Kəzəɗ tə Mələɓ iyi 10
10
Piyer a gizeŋ ma tə Bizlaf əŋ Kwarneliyus
1Hedi məzəwindi aka əŋ Kaysariya, miya ŋga Kwarneliyus, mbiŋ hedi səndawl tə a talaŋ sewje tə Rawma iyi temere, i mə ɗafaŋ ma «kwas talaŋ tə sewje iyi tə əŋ Italiya». 2Mə jemi abə Bizlaf, mbiŋ abə hedi tə ge ŋga iyi fuk, i kəziber ma tə Bizlaf a meɗek a meɗek. A kətər hedi məstakwaŋ iyi mbeh səku tə əŋ faŋw tə Yahuda iyi, a kəɗalaŋ mbuh əŋ Bizlaf a vah ta, a vah ta. 3Əŋ pis məzəwindi aka, tiɗe njamndi maakaɗ tə məcukahw, a gər əŋ səsiŋ mələɓ tə Bizlaf kətəɗaha za əŋ ge ŋga, a ɗafaŋ ma, a zla: «Kwarneliyus!» 4A kəgər mələɓ tə Bizlaf ta, kələndəŋ za, a zlapaŋgu, a zla: «Bay Bayta, mə ɗal seh mey?» Mələɓ tə Bizlaf a ziŋgeŋ zlap, a zla: «Bizlaf kəzlim ɗal mbuh təkwa za, abə mətər təkwa hwa mə dahaŋta əŋ hedi məstakwaŋ iyi, a kəsəŋ kenek a ɗek. 5Mənjawa, ləɓ hedi iyi əŋ Jawpe ley ɗafaŋ ma əŋ Simaŋw, i mə ɗafaŋ ma Piyer. 6A waŋ a ge hedi mə ɗal kəzəɗ tə bukula, miya ŋga Simaŋw, ge ŋga a meɗek talafay.» 7Əŋ mələɓ mə zlapaŋ sey, cu ŋga, Kwarneliyus a ɗafaŋ ma əŋ hedi iyi bək əŋ faŋw tə hedi mə ɗalaŋ kəzəɗ ŋga iyi abə əŋ sewje ntaɗ tə əŋ faŋw tə sewje iyi ley ɗal kəzəɗ ŋga, ar hedi majam tə abə Bizlaf. 8Ɓa, Kwarneliyus a gizeŋta məsəkəŋ mə taŋ iyi fuk, abə dawaŋ ta, ɓa, a ləɓta əŋ Jawpe.
9Garaha kafa ta, əŋ mələɓ iyi sey i mbə əŋ kataf, i kəgwaraha kwata əŋ Jawpe, Piyer a tap a talaŋ biŋ ley ɗal mbuh, ar mbeh kwata pis cakacak. 10Mətis a kəju, a kəmba wuda i zəm. Ama əŋ hala i kədaŋ wuda seh, a lim məsəkəŋ kəɗi səsiŋ. 11A gər lay tə wuzlaf mə rizi, məsəkəŋ mənaŋ gwedere bayta mə mili kəɗi əŋ kəv nfaɗ tata iyi fuk, a kəbəreŋgehe əŋ teyek. 12A ɗəməŋ məsəkəŋ mandaham mbeh səku: məsəkəŋ mandaham tə abə ŋgas sə nfaɗ nfaɗ iyi abə məsəkəŋ mandaham mə nda tə abə dəməs iyi liŋ vigem iyi. 13A zlim wula a kəzlapaŋgu, a zla: «Piyer, gar, fat məsəkəŋ iyi wa, zəmta!» 14Ama Piyer a ziŋgeŋ zlap, a zla: «Mənaŋ mba səku, Bay Bayta, məŋgəvday sa kəter ley zəm məsəkəŋ matak iyi abə məsəkəŋ tə abə ndəra dəlay iyi seh halla.» 15Wula a zlimehe baha, a zlapaŋgu, a zla: «Məsəkəŋ Bizlaf mə zlap səntaŋ ley zəm seh, hwa mba i ɗiyu əŋ məsəkəŋ tə abə ndəra dəlay səku.» 16Məsəkəŋ ta, kəɗal za ŋgas maakaɗ, abə dawaŋ ta, mbehmbeh mba, məsəkəŋ ta, a tap ŋga əŋ wuzlaf.
17Piyer kəjəvəɗ za, a məsəkəŋ mbiŋ mə lim tə əŋ səsiŋ wa, ma ta, a mba i zlap seh viŋgey. Əŋ mbamba, hedi maləɓaha tə ndəra Kwarneliyus iyi sey, i kəɗəp ley səŋ ge tə Simaŋw seh a tikey, i mə geri mənjawa a medigiɗ. 18I ɗaf ma abə fagay, i ɗəp, i zla: «Simaŋw, i mə ɗafaŋ ma Piyer wa seh, a waŋ seh a nawa vaw?» 19Piyer a kəwulək a talaŋ məsəkəŋ mataŋ iyi tə əŋ səsiŋ ta baha, mənaŋ wa, Mimiɗ tə Bizlaf a zlapaŋgu, a zla: «Ehe, a nawa hedi iyi maakaɗ aka, i kəpələkah. 20Gar, bəreŋ, nda abə tata kwa ley ɗal wulək par seh halla, məŋgəvday ar sa mə ləɓahata.» 21Abə dawaŋ ta izey, Piyer a bəreŋ əŋ kelek hedi iyi ta, a zlapaŋta, a zla: «Sa mbə ceh, ar sa hedi heni mə pələku wa. Heni ndaha seh məŋgəvday a mey?» 22I ziŋgeŋ zlap, i zla: «Kwarneliyus, talaŋ habay tə a talaŋ sewje iyi temere mə ləɓanini. Ar hedi sə delele, a kələndəŋ Bizlaf. Yahuda iyi fuk i kəsəŋgu. Mələɓ tə Bizlaf kəzlapaŋgu za, mə ɗafah ma əŋ ge ŋga, amba ley zlim məsəkəŋ hwa mə nda i zlapaŋgu.» 23Piyer a təɗta əŋ ge, a vəlaŋta lay ley waŋ tə njaɗu ntaɗ. Garaha kafa ta, a nda abə hedi sə maakaɗ iyi sey. Hedi makuw ma dakayta iyi tə əŋ Jawpe, i kəlahta. 24Garaha kafa ta baha, a gwar əŋ Kaysariya. Kwarneliyus a kəgəbarta abə hedi tə ge ŋga iyi liŋ abə maday ŋga məndiwiŋ məndiwiŋ iyi, mbiŋ mə ɗafaŋta ma. 25Əŋ Piyer a kəmba i təɗ əŋ ge seh, Kwarneliyus a ndaha ley gbamaŋ talaŋ, a dar malakw a ma ŋga, a ɗalaŋ mbele. 26Ama Piyer a garu, abə ley zlapaŋgu, a zla: «Gar, məŋgəvday sa seh, sa hedi mənaŋ hwa.» 27Piyer a zlap abə Kwarneliyus, ɓa, a təɗ əŋ ge, əŋ lay a lim hedi iyi mbeh səku i mə kwesi a namba. 28A zlapaŋta, a zla: «Heni bahayim, hi kəsəŋ məndiwiŋ, kukus tə Yahuda iyi seh, kətak lə Yahuda za ley ɗal maday abə hedi madaway, aka səku ley təɗ əŋ ge ŋga. Ama Bizlaf kəgizeke za, sa mba i gər kwa viyey mənaŋ hedi tə abə ndəra dəlay, aka səku əŋ hedi tə abə hem səku. 29Məŋgəvday a ɗek, əŋ heni mə ɗafaka ma seh, sa kəndaha za kwa abə ley ɗal wulək par halla. Ama mənjawa, sa mba i səŋ hi ɗafaka ma seh məŋgəvday a mey?» 30Kwarneliyus a ziŋgeŋ zlap, a zla: «Kəɗal waŋ maakaɗ, mənaŋ əŋ hala ta mba, əŋ njamndi maakaɗ tə məcukahw, sa kəɗal mbuh a biŋ na. Mbehmbeh mba, hedi məzəwindi aka abə rukut mawaɗ iyi ndeɗndeɗ, mə geri a ma na, 31a zlapaku, a zla: “Kwarneliyus, Bizlaf kəzlim ɗal mbuh təkwa za, kəsəŋ kenek za a mətər təkwa hwa mə ɗalaŋta əŋ hedi məstakwaŋ iyi. 32Ləɓ hedi iyi əŋ Jawpe ley ɗafaŋ ma əŋ Simaŋw, i mə ɗafaŋ ma Piyer. A waŋ a ge hedi məzəwindi miya ŋga Simaŋw, hedi mə ɗal kəzəɗ tə bukula, ge ŋga a meɗek talafay.” 33Məŋgəvday a ɗek, sa kələɓ hedi iyi za viyu əŋ kelek təkwa, hwa bahayim hwa kəkuw za ley ndaha. Mənjawa, nini fuk nini mbə a nawa a ma tə Bizlaf ley zlim ma Bay Bayta mə ɗiyah ley zlapanini.»
Piyer a giz Labara Səntaŋ Lawayaŋ
34Piyer a ɓət zlap izey, a zla: «Mənjawa, sa kəsəŋ məndiwiŋ Bizlaf a kəwuɗak hedi iyi səku: 35əŋ məŋhayak fuk, əŋgah hedi ta a kəwaŋ talaŋ, a kəɗal məsəkəŋ tə abə kataf ta, mbamba mba seh, hedi ta a ŋgəmaŋ za əŋ Bizlaf. 36Bizlaf kələɓaŋta ma ŋga za əŋ hedi tə əŋ Israyila iyi, kəgizeŋta Labara Səntaŋ Lawayaŋ tə zahay#10:36 Esaya 52:7. za kəɗi əŋ Yesu Almasihu, ar Bay Bayta tə hedi iyi fuk. 37Heni kəsəŋ məsəkəŋ mə mar ley mataŋ ndagwa əŋ Galili, ɓa, əŋ hayak tə Yahudiya fuk, abə dawaŋ tə Yahwana mə gizeŋta Labara Səntaŋ Lawayaŋ əŋ hedi iyi, ɓa, a ɗalaŋta batem mba. 38Heni kəsəŋ Bizlaf kəmay Yesu lə Nasaratu za ley ɗal kəzəɗ ŋga#10:38 Luka 4:18., kəvəlaŋ fagay tə Mimiɗ sə Kweɗek za. Heni kəsəŋ bahayim Yesu kəpik za əŋ hayak abə ley ɗal məsəkəŋ səntaŋ iyi, ley mbəl hedi maməl tə ndəra Iblisa iyi fuk, məŋgəvday Bizlaf mbə abə mbiŋ. 39Nini seh, nini kəɗal sedewe za a məsəkəŋ mbiŋ mə ɗal iyi tə əŋ hayak tə Yahuda iyi abə əŋ Urusalima. I kəjaza za abə ley lawu a mpay mazlaŋgal. 40Ama Bizlaf kəgarahaza za əŋ faŋw tə hedi maməc iyi əŋ waŋ maakaɗ ta, kəvəlaŋ kataf za ley gizehe wucum əŋ hedi iyi, 41kəgizeŋta wucum əŋ hedi iyi fuk halla, ama nini, Bizlaf kəmayanini za məpər mənaŋ sedewe iyi. Nini kəzəm məsəkəŋ za, nini kəsa məsəkəŋ za abə mbiŋ, abə dawaŋ tə Bizlaf kəgarahaza za əŋ faŋw tə hedi maməc iyi#10:41 Luka 24:30, 42.. 42Kəzlapanini za ley giz Labara Səntaŋ Lawayaŋ əŋ hedi iyi, nini kəɗal sedewe za a talaŋ ŋga mbiŋ seh, Bizlaf mə ɗiyu ley mbəzl ma a talaŋ hedi tə abə nje iyi abə a talaŋ hedi maməc iyi. 43Hedi mə giz ma abə miya tə Bizlaf iyi fuk i kəɗal sedewe za a ma ta, abə ley zlap kwa viyey mə kuw ma ŋga fuk, a lim ley baŋ hem ŋga iyi za abə fagay tə miya ŋga#10:43 Esaya 53:5-6; Yeremiya 31:34..»
Hedi Yahuda iyi səku i kəlim Mimiɗ sə Kweɗek
44Əŋ Piyer a kəzlap ndagwa seh, Mimiɗ sə Kweɗek a bəreŋgehe a talaŋ hedi mə zlim zlap ŋga iyi fuk. 45Yahuda makuw ma mandaha tə abə Piyer iyi, i kəhar za, məŋgəvday i kəgər Mimiɗ sə Kweɗek mavəl tə ndəra Bizlaf wa, a kəbəreŋgehe a talaŋ hedi Yahuda iyi səku bahayim. 46Məŋgəvday i zlim i kəzlap ma hedi iyi i mə səŋ səku, i kəsəbaŋ Bizlaf. Abə dawaŋ ta izey, Piyer a zlap, a zla: 47«Mənjawa, hedi iyi wa i kəlim Mimiɗ sə Kweɗek za mənaŋ nini bahayim. Mə gula i takta ley lim batem tə abə yim wa seh viyey?» 48A zlapaŋta ley ɗalaŋta batem abə miya tə Yesu Almasihu. Abə dawaŋ ta izey, i ɗəpu ley nja abə tata tə waŋ iyi mbizek.
ទើបបានជ្រើសរើសហើយ៖
Kəzəɗ tə Mələɓ iyi 10: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
