Márákoso 6
6
Vato ává na Nasaréte vá ta kaŋgá Yésusu
(Mat 13:54-58; Rúk 4:16, 22, 24)
1Kó Yésusu a ma urúkyé na pandó eméje wenda na Násaréte edɔŋgɔ éyé a ma góná ɔ́wɔ́ orɔŋgɔ na vihoóhóná vyáa. 2Isí yá ihuwe, a ma endá wiŋgáana na yanje yá mbásóóríyé kó a ma késyé oyeére vato. Ombunu rá vato, ará vá katé me vátɔ́rɔ́, vá katé kémbyé, vá járá anáá: «Áné kójo a ma me tíhíyé mamba mwané? Peyɔ éjé a timbámó áné kójo a ma me hwá? Kó asimbá ájá a eŋgámó a váwéryámó twinyí? 3Até ómwané kójo kébínde? Ombwene rá Maréyá? Navéne Yáka Yosé, Yude na Símono? Virená vyáá ví ta sɔ́tɔ́ na visó ará?» Náná kówo ó ma eŋgá anáá vato vá rií ka atɔ́wɔ Yésusu. 4Kó Yésusu a ma wundíyé anáá: «Ahúmíye maró a ta katé timbe imítí na edɔŋgɔ yáa, na noyómó náá tɔɔ na yanje yáa.» 5Amó vato vá ta má me atɔ́wɔ na Násaréte, kó Yésusu a ma ondóná vinɔ́ vimó hɔ́rɔ́ a wó táryáana embɔ́ɔ́; a ta ma hítí weŋgá asimbá ándyé ɔ́wɔ́. 6Kó Yésusu a ma ré kémbyé ámó vato amáva vá ta ma ré timbe ŋgɔ́tééná.
Yésusu a tómámó enásá raá yábɔ́t na eba
(Mat 9:35; 10:1, 5-14; Rúk 9:1-6)
Yésusu a ma ré té ndenda na vidɔŋgɔ íví na kɔ́ŋgɔ́ ra Nasaréte a té yeére vato. 7A ma béráana víhoóhóná vyáa íví vyábɔ́t na vívé okésyé o wó tómána váváné na váváné, kó a ma wó hwá ŋguru ra onjwé ówó vambé vá vireréŋgi. 8A ma wó tévéré anáá ka wɔ́rɔ́ wandá na wusó wá oŋgendɔ ámó manyá, ícáka, ítɔɔ waseena mwení naáté yá nkandá, vá mwané owɔ́rɔ́ bɛ́ŋ itímbó. 9Vá mwané ovávaá vesírípasa, ka wɔ́rɔ́ sɔ́tɔ́ íbéní. 10Kó a ma járá hée nawó anáá: «Yanje éyé no mó iŋgáana ɔ́wɔ́, ríyáno ondo húmé ará no né endámó báréyá. 11Ŋgé vato vá rií ka diŋge anáá vá nó aká pandó emó, ka je diŋge honó anáá vá nó vátɔ́rɔ́, vinó worúkye pandó maté, vínó ogite mpumí ójó na eŋgoró ra vinó índi vá jémbe anáá vá mó éŋga wobé.» 12Kó vihoóhóná ví ma enda o té béndé anáá ámó moto a geremenamó océndyé púrú. 13Vá ma gúné ombunu rá vambé vá vireréŋgi, osíyé ombunu rá vinɔ́ mbiti, koo vá katé ondówana.
Eróde na Yésusu
(Mat 14:1-2; Rúk 9:7-9)
14Ahumu Eróde a ma ová vá járá maró má Yésusu, esene éyé ebérááná yáá e ma ré gúmé kó vato vá ma ré járá anáá: «Yohánese adwe vato a mó atá na evérá, wandá mwané kówo a timbe ŋguru ra weŋga ówó asimbá.» 15Avámó vá járá anáá ó ámó Eríyasa, ávámó hée anáá ó ámó ahúmíye moró omo sɛ́ɛm ámó ava na vá ma ríi na mwané. 16Na wéŋga ówó anáá ahumu a ová náná, a eŋgámó anáá: «Yohánese ójó ŋgo má sómbá ucé kóomójo, a mó hónowa!»
Nugwé ná Yohánese
(Mat 14:3-12; Rúk 3:19-20)
17Wó je rií anáá Eróde a ma ambááná Yohánese o me wáá masónó o mo nɔ na mboo. Esené ahumu a ma bɔɔ́ Erodyáde eéné navéne ójó Híripi o me bá. 18Kó Yohánese a ma ré járá náá anáá: «O ta geréména obá okótó wa nɔvéne!» 19Wandá mwané owo Erodyáde a ma ré bena Yohánese kó a katé diŋge anáá a me oná ítɔɔ náná a ta ma ré hítí. 20Amó Yohánese a ma ré eŋga ahumu Eróde mesisí, a je jembe anáá Yohánese a ámó ndíŋgirííŋ a wunde orií mwáŋ mwáŋ wa moto kó a katé kamana naá esene éyé a ma ré keékembyé njáréná ra Yohánese a je diŋge o me vatɔ́rɔ́.
21Wó je rií anáá isí yá mbuŋgáná njuri ra ebyánávéná yá Eróde é ma jiné, wusi mwané wó ma ríi mpaŋá ra itíndíkáná na wusó wá Erodyáde ámó a ma ré támá anáá a oná Yohánese. Kó ámó Eróde a ma téháná vato ává a katé njwé orɔŋgɔ nawó, vagónó vá visimbi na vato vá aŋgísó ává na Gariréya. 22Ŋgwande ra Erodyáde e ma katé bíné kó íbínó yáa mwané é ma wɔ́tɔ́ Eróde na biní vyáa. Kó ahumu a ma járá na ŋgwande eméje anáá: «Cúcámó até éyé o vaŋgámó kó ŋgo né wo hwámó.» 23A ma me ryená anáá: «Até yimé éyé o né cúrámó ŋgo né wo hwámó ítɔɔ isímbí yámé yá edɔŋgɔ.» 24Kó ŋgwande ra okótó e ma húmé ondo súsé netí anáá: «Owaté owo pítyámó osúsé?» Netí a ma me wundíyé anáá: «Ucé rá Yohánese adwe vato.» 25Ŋgwande ra okótó é ma wundé kwakwa na otétá ará ahumu, o me hwá ŋgaráná ejé: «Mbaŋgámó anáá o pwá isímí ojó ucé rá Yohánese adwe vato na máná ra pésínja.» 26Notó e ma híráná osorowa ahumu kó ámó a ma ryáá na wusó wa biní vyáa, a ta ma hítí ováráŋga. 27Itíndíkáná ka tómbá, a ma tómá mwaná wa visimbi umweesií ójó na ava vá katé me gíré anáá a enda wɔ́rɔ́ ucé rá Yohánese adwe vato. Mwaná wa visimbi a ma endá na yanje yá mboo osómbá itɔki yá Yohánese adwe vato. 28Kó a ma uré nojó na pésínja. Ocekiye ŋgwande ra okótó kó ŋgwande ra okótó éjé e ma cekiye netí. 29Ará vihoóhóná vyá Yohánese ví ma ová cómó ra nugwé náa, kó ví ma uré owɔ́rɔ́ mbimbe ondo vaá naáté yá evérá.
Yésusu a toŋyámó vato toósini isáánó
(Mat 14:13-21; Rúk 9:10-17; Yoh 6:1-15)
30Enásá e ma wunde na kɔ́ŋgɔ́ ra Yésusu kó e ma me tɔ́ŋéná até yimé éyé vá ma eŋgá na até yimé éyé vá ma yééré vato. 31Yésusu a ma járá nawó anáá: «Úráno orɔŋgɔ name pandó éjé moto a ta ámó ɔ́wɔ́ ukú ójó anáá no huwe teta.» Esené vato mbunu vá katé rií ɔ́wɔ́ vá endá vá uré ukú ójó anáá Yésusu na enásá raá vá ta ma tímbe itíndíkáná rá onyányá. 32Kó vá ma báréyá na ekáné yá ŋgɔmbe, vaká na wenda ówó na homó ówó moto ka rií ɔ́wɔ́. 33Wó je rií anáá vato vá ma wó ená vá endá kó vá ma jembé ará vá katé enda; kaá vá ma endá urána pere iŋgímé na eŋgoró ondo húmána pandó mwané hɔrɔ́ Yésusu na vihoóhóná vyáa vá ré rií ka enda jine. 34Ará Yésusu a ma sisé ŋgɔmbe, a ma ená vikáné vyá vato kó noóŋgó nó ma me ambááná na wusó wá vato mwané esene éyé vá katé rií ámó vitómbá íví ka na abeerye, kaá a ma késyé o wó yeére mamba mbunu. 35Ó ma ríi wó etá enéŋgá, kó vihoóhóná ví ma keréná Yésusu váye naá anáá: «Enéŋgá eyé kó hónó pandó ejé e ta ámó na wandá. 36Járá na vato ává anáá vá wúndana na vidɔŋgɔ na byanje vyá mékíte índi vá kúse wandá wá onyá.» 37Yésusu a ma wó wúndíyé anáá: «Vinó maté ó wó hwámáno manyá!» Kó vá ma me súsé anáá: «Ye o diŋgámó anáá to enda kuse manyá na vikpama vyá mwení motete móváné índi vá nyányá?» 38Yésusu aye nawó anáá: «No timbámó va beréte vá níi? Ndáno ená.» Kó vá ma etá súsé váye na Yésusu anáá: «To timbámó va beréte vátáánó na cwí ibé.» 39Kaá Yésusu a ma erééná ŋguru anáá vá núumiye moto uŋgimé mudíŋge-mudíŋge na ihuwe. 40Vato vá ma nuúmaná na mudíŋge mwá itete na mudíŋge mwá mɔ́wɔ́ mátáánó. 41Kó Yésusu a ma wɔ́rɔ́ va beréte ává vátáánó na cwí íjí íbé, oneétye aŋgísó na máná, otéŋgyé Irɔŋgɔ. Kaá a ma cécéná va beréte weréena vihoóhóna vyáa ukú ójó anáá vá téŋgíye vato, Yésusu a ma téŋgíyé hónó cwí íjí íbé na moto uŋgimé. 42Amó moto a ma nyá wobéyá. 43Vihoóhóná ví ma wɔ́rɔ́nɔ́ pumbú rá va beréte na pumbú rá cwí íjí í ma cánáná, kó í ma núwé visáŋgá vyábɔ́t na vívé. 44Vato ává vá ma nyá va beréte vá ma ríi toósini ísáánó vanómótó bɛ́ŋ.
Yésusu a ndendámó na máná ra matéyá
(Mat 14:22-33; Yoh 6:16-21)
45Ikɔkɔ ka mana na nimé raá, Yésusu a ma jitímíyé vihoóhóná vyáa anáá vá jówa wenda mbóró ejomo ra ekáné yá osombo na ŋgɔmbe pere éjé na oŋgórá rá Bétayída, itíndíkáná maté ómwané a cáná weŋga na vato anáá vá etána. 46Ará vato vá ma maná wetána, Yésusu a ma endá na máná ra yene emó ondo vásoóriye. 47Ará mbínó e ma obá, ekáné yá ŋgɔmbe éjé vihoóhóná ví ma ríi ɔ́wɔ́ e ma ríi yo etá na témá ra ekáné yá osombo, Yésusu moká na cí. 48Kó a ma ená anáá vihoóhóná vyáa ví ma ré timbe etɔɔ anáá vá bósa esene éyé puŋgi e katé wó dúŋgena; kaá ará ibeesí é ma ríi yó etá kerana, Yésusu a ma endá wó uréna a ndenda na máná ra matéyá kó a ma ríi hónó a etá anáá a wó tómbá. 49Ará vá ma me ená, vá ma buŋgáná anáá nkúú kó vá ma késyé ovaána ndurumye. 50Esené bimé vá katé me néména kó vá katé tiné. Kó isímí mwané, Yésusu a ma járá nawó anáá: «Nomenda! Vinó ka tiné ó ámó noó!» 51Kó a ma náátá na ekáné yá ŋgɔmbe na kɔ́ŋgɔ́ rawó kaá puŋgi e ma tɔmbɔ́. Vihoóhóná ví katé kémbyé mbunu, 52esene éyé vá ta ma ová até éyé é ma tómbávéná ará Yésusu a ma téŋgíyé va beréte, etémá rawó e ta ma ová ntimisaná raá.
Yésusu a ondónámó vinɔ́ na edɔŋgɔ yá Genesaréte
(Mat 14:34-36)
53Vá ma maná ocaka ekáné yá osombo kó vá ma húmé na edɔŋgɔ yá Genesaréte. 54Vá ma sisé ŋgɔmbe kó vato vá ma jembé Yésusu kwakwa. 55Kó vato vá ma kuré otétá na edɔŋgɔ́ yimé, okésyé o me uránena na vinɔ́ na endáŋgá ráwó na pandó iŋgimé éjé vá katé ová anáá Yésusu a ámó áwɔ́. 56Homó wimé ówó Yésusu a katé enda, na vidɔŋgɔ, na eŋgórá tɔɔ na pandó íjí na kɔ́ŋgɔ́ ra oŋgórá, vato vá katé enda vaána vinɔ́ vyáwó na pandó rá mbérúmáná kaá vá katé deekáné Yésusu anáá a míce vinɔ́ imíví ví táhéta tɔɔ bɛ́ŋ ombavé ráa rá cunú; kó bimé ává vá katé me táhá vá katé ondówana.
ទើបបានជ្រើសរើសហើយ៖
Márákoso 6: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL