Rúkasa 6
6
Yésusu na isí yá ihuwe
1Yésusu a katé ndenda na kondo isí yá ihuwe. Vihoóhóná vyáa ví ma késyé opátóna kána ra ohéyá emo éjé vá béráanámó anáá beréyá vá píye na embɔɔ́ vá nyá. 2Va pariséne vámó vá katé járá nawó anáá: «Na wusó wá até owo no eŋgámó wandá ówó iki isí yá ihuwe?» 3Yésusu a ma wundyé anáá: «No ta ma bána até éyé Dáviti a ma eŋgá ará a ma ová njeŋge ómwané na orɔŋgɔ ráá? 4A ma iŋgááná na yanje yá Irɔŋgɔ, owɔ́rɔ́ beréte wa Irɔŋgɔ ójó bɛ́ŋ vacekiye mómí ává vá katé nyá kó a ma nyá na orɔŋgɔ ráá.» 5Yésusu a ma járá sɔ́ɔ́ nawó anáá: «Mwaná moto a ámó njwé ra isí yá ihuwe.»
Yésusu a ondónámó moto ójó na igwé yá ombɔɔ́
6Isí yá ihuwe índyé, Yésusu a ma iŋgááná na yanje yá mbásóóríyé okésyé oyeére vato, moto omo a ma ríi ɔ́wɔ́ a timbe ombɔɔ́ rá enémé igwé. 7Njembe rá béndɔ́ ra Mósese na va pariséne vá katé kweesye Yésusu anáá vá ená ŋgé a vaŋgámó orɔndɔ vinɔ́ isí yá ihuwe ombótá ójó anáá vá me sɔ́mɔ́nɔ. 8Wó je rií anáá Yésusu a katé jembe mbuŋgáná ráwó; kó a ma járá na moto omójo anáá: «Hatééná otérémena na raaté wa visó, kó a ma hatééná otérémena eténé.» 9Yésusu a ma wó súsé anáá: «Isí yá ihuwe, ye o geremenámó weŋga wusi kee wobé; osótyé kee woná?» 10Kó Yésusu a ma wó néméná vá mwané bimé, kó a ma járá na moto ójó a ma timbé igwé yá ombɔɔ́ anáá: «Tóndíyé ombɔ́ɔ́.» Ará a ma tóndíye, ombɔ́ɔ́ ó ma ondówá. 11Va pariséne na jembe rá mbéndɔ́ vá ma ová urúndú kó vá ma késyé osɔsɔ até éyé vá ámó weŋga na Yésusu.
Yésusu a ijatámó enásá raá yábɔ́t na eba
12Na nimé ra mamba mwané, Yésusu a ma endá ondo vásóóriye na yene kó a ma túmbyé wutúú mbímí a vásóóriye Irɔŋgɔ. 13Ará ibeesí é ma húmé, a ma bérááná vihoóhóná vyáá, wijátá vyábɔ́t na vívé, o wó hwá ebérááná anáá enásá. 14A ma ijátá Símono o me rowa anáá: Pyéere, wijata Anderéya ójó navéne Yáka, wijata Yohánese, wijata Híripi na Barateremíya, 15wijata Matyáasa, wijata Tómasa, wijata Yáka ójó ombwene rá Aráfe, na Símono ójó a ma ré kamana na edɔŋgɔ, 16wijata Yúde mwaná Yáka na Yúdasa Isikaríyoto ójó a ma geréméná okava Yésusu.
Yésusu na ncumbí wa vato
17Yésusu a ma sisé yene nawó, otérémena na pandó éjé désɛɛ́ŋ, ará ncumbí wa vato a katé rií, na ombunu rá vihoóhóná vyáa, na vato mbunu ává na Yúdeyá, na ava na Yerúsareme, na ava na rá Tíiri na Sídono eŋgórá éjé na kɔ́ŋgɔ́ ra máŋá. 18Vato mwané vá ma uré ondo vátɔ́rɔ́ Yésusu, índi Yésusu a wó ondónana hónó na makáná máwó, orɔŋgɔ na ava vá katé timbe vambé vá vireréŋgi. 19Moto oŋgimé a katé sɔsɔ anáá a me taátena esene éyé a katé timbe ŋguru emo éjé e katé húmé na ómwané kó a katé wó ondóna bimé.
Visaŋgena na etɔɔ
20Yésusu a nemenamo vihoóhóná vyáá a ma járá anáá: Vitaka na vinó ává vawora noyómó ná Irɔŋgɔ nó ámó na vinó. 21Vitaka na vinó ává ne ova mo njeŋge tetoo ojó esene éyé eye anáá no ne oveyámó. Vitaka na vinó ává ne waŋgamo tetoo ojó ne no riyámó na visaŋgena. 22Vitaka na vinó are vato va ne benámó, are vá ne gunamo, are vá ne seyámó, kó vá ma járá wobé na vinó esene éyé eye anáá no atɔwámó mwaná moto. 23Riiyáno na visaŋgena isí mwané, no jaŋga, esene éyé eye anáá akaná epayí e no giramo na mana; náná owo vakókó vá awó vá kate otúúrye va humiye maaró vá Irɔŋgɔ. 24Noóŋgo na vinó mbútí esene éyé no mána timbe mesi má vinó. 25Noóŋgó na vinó ává na durí, esene éyé no né ovámó njeŋge. Noóŋgó na vinó ává no mutumámó tetee ojó, no né riyámó na nugwé kó no né vaŋgámó. 26Noóŋgó na vinó ará moto uŋgimé a ma járá wusi na vinó: «Esené náná owo vakókó vá vinó vá katé eŋga vahúmíye maró vá Irɔŋgɔ wobé.»
Odiŋge ówó vambéembéná vá visó
27Njárámó na vinó ává no mbátɔ́rɔ́mó anáá: Diŋgáno vambéembéná vá vinó, ŋgáno ava vá nó bénámó wusi. 28Utánáno vato áva vá nó sɛ́ɛmámó ncaráná, kooránáno na wusó wá ava vá nó tuúriyámó. 29Ŋgé moto a wo obétá na itámá ná umwéesií, o me tíhíyámó itámá énomó; ŋgé moto a wɔ́rɔ́ cunú rɔɔ ra isíné, o me micámó a wɔ́rɔ́ hónó sɔ́tɔ rɔɔ. 30Moto a wo súsé wandá o me hwámó, ŋgé moto a wo wɔ́réná wandá, o ta eŋgá me súsé. 31Ŋgáno vasɔ́ɔ́ wandá ówó no diŋgámó anáá vasɔ́ɔ́ vá nó eŋgá. 32Ŋgé na diŋgé bɛ́ŋ ava vá nó díŋgámó, no ta né timbe mayáákana, ítɔɔ vambé vá vato hónó vá díŋgámó ava vá wó díŋgámó. 33Kó ŋge na eŋga bɛ́ŋ ává vá no eŋgámó wusi, ne teŋge no gire maana, esene éyé eye anáá tɔɔ vambé wa vato vá eŋgamo seme. 34Ŋge wa torisye bɛ́ŋ moto ojó we ijimamo anáá avaŋgamo we owundiye mbama, ne teŋge no gire maana, vambé wa vato hónó vá torisyámó vasɔ́ɔ́ ombótá ojó anáá vá wa wó wundiye sɛ́ɛm. 35Wó je rií anáá: «Diŋgáno va mbembena va vinó o weŋgamano wusi, ne torisye ka gire maana na nime. Wɔɔ no waŋgamo otimbe ekáné yá maana kó ne no riyámó vana wa Irɔŋgɔ ojó na máná urehí, esene éyé eye anáá a eŋgamo vambé wusi. 36Ríyáno vesi ámó Tetáŋgá wa vinó a ámó usi. 37No ta eŋgá no jósyé vasɔ́ɔ́, kó Irɔŋgɔ hónó a ta né nó jósyé, no ta eŋgá no sómbéna vasɔ́ɔ́ ntóró, kó Irɔŋgɔ hónó a ta né nó sómbéna vinó hónó ntóró, jwaáno vasɔ́ɔ́, kó Irɔŋgɔ hónó a né nó jwamó. 38Eréénáno vasɔ́ɔ́, Irɔŋgɔ hónó a no ne erenamo, va ne osuunamo na ekáné yá icaka ra cunú rɔ́ɔ́ paŋa ra meta, esene éyé eye anáá meta ojó no timbaanamo náá na oheyána owó vasɔ́ɔ́ keje Irɔŋgɔ hónó a ne otimbaanamo na eje na wuso wa vinó.» 39Yésusu a wó kwenamo nkana anáá: «Ye uŋgewu a hítyámó oture sɔ́ɔ́ uŋgewu? Wó a rii náná vámwané bimé vá vaŋgamo onde obena naáté yá evevera 40Ehoóhona emo eta tómbá oyeére wáá, wó je rií anáá ehoóhona yime eye emo yeére wusi e waŋgamo urií ame oyeére wáá. 41Na wusó wá até wenámó bɛ́ŋ ekene eye na niso na nɔɔvene, mɔmo ka ena pumbú ra uginí eje emo na niso nɔɔ́. 42Twiŋí kówo mamó o hítyámó ojárá na nɔvéne anáá mbíso, gíré ŋgo uryé ekane na niso, mɔmo o ta ena pumbú ra ugini eje na niso nɔɔ́? Moto wa vivana mane urye pumbu ra ugini eje na niso nɔɔ́ kaá o je ena mwaŋgaráŋ ekane eye na niso na nɔvéne.»
Vá ijímámó werété na vibomá vyáa
43Werété ówó mpáŋá wó ta umé vambé vá vibomá, kó ombé wa werété a ta umé vesi vá vibomá, 44vá ijímámó werété wimé na vibomá vyáa: «Vá ta pátá ewówa na ihuwe ra céndé, itɔɔ vibomá vyá werété ówó wó eréenámó mɔwɔ́ na tíné ra menderíne. 45Usi wa moto a turámó usi wa nobótá ójó a ámó naáté yá otémá ráa, ombé wa moto honó a turámó ombé wa nobótá na otémá ráá, esene éyé uŋgúté rá moto uŋgimé ó járámó até éyé yó urámó naáté yá otémá ráa. 46Na wusó wá até kówo no mbéráanámó anáá Okí, Okí kó no ta eŋgá até éyé njárámó na vinó? 47Moto ojó a urámó na noó, a ová enjárá rame, a eŋga até éyé njárámó á puranámó na até? 48Moto mwané a puranamo na moto ojó a ma háá yanje, otime cí fyɛ́ɛ́m okésyé oháá na maná ra nkómó. Ará nowórá nó ma sová na kíndo, osombo osaye na yanje, yanje emeye ka oba esene éyé é ma ríi háyé-háyé wusi. 49Moto ojo a hweramo enjárá rame, ka eŋga ámó njárámó, a puranamo na moto ójó a ma háá yanje na cí ra meŋgénjí ka timé cí fyɛ́ɛ́m anáá a haá na máná ra nkómó, ará matéyá má osombo má ma uré, ogwaanana yanje, kó é ma suuwáná kuŋguuum ocáná cí na cí.»
ទើបបានជ្រើសរើសហើយ៖
Rúkasa 6: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
