Rúkasa 23
23
Vá endámó na Yésusu na pírata
1Kó bimé vá ma hatyááná anáá vá endá na Yésusu na pirata. 2Ɔ́kɔ́, vá ma késyé o me sɔ́mɔ́nɔ anaá: To mó etíye moto ojó a vaá imburyé na edɔŋgɔ yá visó a váráŋgámó anáa vá yáánana cesára tása kó a tɔ́ŋɔ́mó anáá a ámó a sotyé a wunde arií ahumu. 3Pírata a ma me súsé anáa: «Mamo kójo ahumu rá va yúdeene oo?» Yésusu a ma me wundíyé anáa «Mámó kójó o katé jará nána.» 4Pirata a ma járá na vagónó vá vacekiye mómí na vato ává vá ma ríí ɔwɔ́ anáá: Noó ta ená wandá ówó wó géremenámó anáá pwénísye moto ojó. 5Kó vato amáva váma jitiye vá járá anáá: «Yésusu a erenanámó vato vihoóhóná iví ví eŋgámó anáá vá beyá icé, a ma kesye na Gariréya o tombena na Yudeyá, káá wenda ojine e ená.»
Vá endámó na Yésusu na Eróde
6Ará Piráta a ma ová náná, a ma súsé anáá: «Moto ojó a ámó mwaná wa va Gariréya.» 7Kó vato vá ma wundye anáá eeŋ. Kó Piráta a ma tomá Yésusu na Eróde esene éyé Hérodé ojo a katé njwé na Gariréya kó metúú mwané a katé rií na Yerúsareme. 8Ará Hérode a ma ená Yésusu, a ma taká mbunu na otemá ráá. Esené ama ré otaátama anáá a mo ená na wusó wa ikeŋgitye yimé eyé vá ma ré keŋgitye Yésusu, kó hónó a ma ré hítí anáá a ne mo enámó a eŋga nesimbá. 9A ma mo súsé ncuncána mbunu, Yésusu ka mo wundiye wandá. 10Vagónó vá vacekiye mómí na njembe rá mbéndɔ́ vá ma rií ɔ́wɔ́ vá sɔ́mɔ́nɔ Yésusu na ŋguru iŋgimé. 11Hérode na vabyá vikpéré váá vá ma seŋga Yésusu o wunde o mo kpeéré kó vá ma mo váá cunú rá woŋgómbá ojo wunde o mo tomá na Piráta. 12Isí mwané, Piráta nawó na Hérode vá ma bundé va mberá wó je rií anáá na póná, va ma re rií vambémbená.
Vá sómbénámó Yésusu ntóró ra nugwé
13Kó Piráta a ma teháná vagónó vá vacekiye mómí, va nkúkúmé na edɔŋgɔ yimáná. 14Kó a ma járá nawó anáá: «Moto ojó no mó ŋgurána naá anáá a turámó vato na ombé wa pé ojó, énáno ŋgo mó me jósyé na aŋgísó rá vinó noó to ená wobé owó a mo eŋga na mamba mimé ámá no me sɔmɔ́nɔmó ɔ́wɔ́ amáma. 15Tɔɔ Eróde hónó a te ambaana ihusi na moto ojó ombótá ojó anáá vá mó oná, wandá mwané kówo a mó mo wundye na vísó. 16Ŋgo mo nubámó, kaá ŋgo mo mice.» 17Wó je rií anáá, páska oŋgimé, Piráta a katé mbisana vato mwaná wa vimboo omwesí. 18Kó vato bimé vá ma kesye o rume anáá: «O me onámáno, no só micana Barábasa.» 19Barábasa ojó a ámó na mboo esene éyé a ma eŋga induutana na oŋgórá kó a ma óná moto. 20Piráta a ma katé odiŋge anáá a mice Yésusu, kó ará a ma eŋgá anáá a wunde o járá nawó. 21Kó vato vá mwané vá katé orumé anáá: «O mo bomanámó ná kóroso, o mo bomanámó na kóroso.» 22Na eŋgendɔ etató Piráta a ma wó súsé anáá: «Kána ra wobé até moto ojó a mo eŋga? Noó to ená ihusi ijí ye endámó náá na negwé ará ŋgo mo nubámó kaá ŋgo me mcámó.» 23Vato vá mwané vá katé rume hée na ŋguru anáá vá bómona Yésusu na kóroso, kó ndurumi ráwó í ma me mándééná. 24Kó Piráta a ma eŋga ate eyé vá ma me súsé. 25A ma micé moto ojó vato vá ma ré súsé, moto ójó a ma enda na mboo na wuso owó anáá a ma eŋga induutana, kó a ma oná moto. Kó a ma wó hwá Yésusu anáá vá eŋgá até eyé vá diŋgámó náá.
Moto omo a byámó koroso ra Yésusu
26Vá ma ríí na wenda owo na Yésusu, kó vá berumámó na simono, moto ojo na edɔŋgɔ eye anáá sirene, a rií na wuré ówó na Yerúsareme. Kó visimbi ví ma ambaanámó o mo twéna koroso ra Yésusu na obiriki anáá a byá na nime ra Yésusu. 27Ncumbi a vato a kate te mbyɔnɔ Yésusu bayete na vakótó ava vá kate vaŋga va te vá asenyé na wuso wáá 28Kó o hume owo pando emo, Yésusu ama bunde aŋgísó na vakóto ava va ma re te mo byɔnɔ aye na awo anáá: No toŋge no waŋga na wuso ame, aá vakótó ava na Yerúsareme, vaŋganó na wusó vá vinó no waŋga hée na wuso va vana va vinó. 29Esené eye anáá, metúu ma vaŋgámó wa uré ama vá ne járámó anáá: «Vitaka na viwonda vyá vakótó na ava ka byáná itɔɔ ava vá te ma nuye oréké ra mwaná mabane.» 30Vato vá ne vaŋgámó anáá eŋgene ewo sisyána, byéné ví wo asyáana. 31Esené eye anáá vá kesyé otimbana ebe na werete owo owasé, vá ne eŋgámó twinyi na owo ekwete? 32Vá ma re enda hónó na vambé va vato vamo vavane anáá vá enda owo oná orɔŋgɔ na Yésusu.
Vá ondáanámó Yésusu na koroso
33Na weŋga owo anáá vá enda humé pando emo eje vá ma re béraná anáá: «Eteke yá ucé.» Awɔɔ, kó visimbi ví ma wobana Yésusu na koróso, o wunde hónó wondana vambé vato ava vavane na koróso ojo na ombɔɔ ra ombambane ra Yésusu, ojomó na ombɔɔ ra etate. 34Kó Yésusu a ma járá anáá: «Baba, owo jwámó esene éyé eye anáá vá ta jembé ate eye vá eŋgámó.» Kó visimbi vima sava cunu ra Yésusu, otaŋgaana. 35Vato ává na edɔŋgɔ vá ma ré téné ɔ́wɔ́ vá néméná. Vá nkúkúmé vá va Yúdene vá ma ré gwaána na cɔnɔ, vá járá anáá: «A katé sótíye vato, tetee ojó ŋgá a vásótyé ómwané maté wá ríi a ámó mwané Etómá yá Irɔŋgɔ ójó Irɔŋgɔ a ma ijátá.» 36Visímbi hónó vá katé kpeére Yésusu, kó vá ma kerá berebe naá o me tóndíye mɔwɔ́ ámá má gárámó, 37vá járá anáá: «Ŋgé o ámó ahumu rá va Yúdene, o vásótyámó mámó maté.» 38Na máná ra koroso, ntiréná í katé rií ɔ́wɔ́ anáá: «Oojó a ámó ahumu rá va Yúdene.»
39Ombé wa moto umweesií ójo na váváné ává vá ma ríi óbáánérí na kɔ́ŋgɔ́ ra Yésusu, ómwané hónó katé seyá Yésusu a járá anáá: «Ye o ta ámó Kirítu? O vásótyámó mámó maté, kaá o só sotye visó hónó!» 40Wó je rií anáá sɔ́ɔ́ ojomo a ma me riŋgááná naá anáá: «O ta tíné hónó Irɔŋgɔ, mámó hónó ójó o timbámó sɛ́ɛm wa pwénísi ámó ómwané?» 41Visó to geremenámó na pwénísye ejé, esene éyé to ma eŋgá wobé, wó je rií anáá, ómwané a ta eŋgá wandá ówó wó béyámó. 42Kó moto omójo a ma endá na enjárá na wusó aye na Yésusu anáá: «Yésusu, mámó o mbuŋge ará o né urámó ámó ahumu.» 43Yésusu a ma me wundíyé anáá: «Na vatɔ́ɔ́tɔ́, na vatɔ́ɔ́tɔ́ ŋgo wo ojanámó anáá, wusí owó o vaŋgámó orií name na usi wa edɔŋgɔ éyé na máná.»
Nugwé ná Yésusu
44Ó ma ríi wó etá wandá ámó twéfe wa wusí, kó mbínó e ma obá na cí iŋgimé ohúmé na maworo mátátó má wusí. 45Oŋgóná ó ma híndíyé, kó ekáné yá cunú éjé e katé sa pandó éjé mwáŋ mwáŋ na pandó éjé e cakámó orií mwáŋ mwáŋ na yanje yá Irɔŋgɔ e ma saráyá na ráaté. 46Yésusu a ma rumétá na ŋguru a anáá: Tataá ŋgundyámó pepenɔ rame na embɔɔ́ rɔɔ. Bɛ́ŋ ámó a ma járá náná, kó a ma micé embɔɔ́. 47Ogonó wa vabyá vikperé wa va Rómene a ma ená wandá ówó wó ma tómbá, kó a ma rukyé Irɔŋgɔ a járá anáá: Na vatɔ́ɔ́tɔ́, na vatɔ́ɔ́tɔ́ moto ojó a ma ríi ndíŋgírííŋ. 48Kó vato bimé ává vá ma váwónjééná anáá vá endá ená mamba mwané, vá ma wundáná na vidɔŋgɔ vyáwó nótó jɔɔ́ɔ. 49Vá mbérá vá Yésusu bimé ítɔɔ vakótó ává vá katé me byɔɔnɔ kɔ́ɔ́m na Gariréya, vá ma térémáná kenjere vá néména até éyé é katé tómbávena.
Vá váámó mbimbe ra Yésusu naáté yá evérá
50-51Moto omo ebérááná anáá Yóseve a ma ríi na iwónjá rá vagónó vá edɔŋgɔ. Moto mwané a ma endá uré na oŋgórá omó na Yúdeyá ójó vá béráanámó anáá Arimatéya. Kó a katé rií usi, a wunde orií ndíŋgirííŋ a je gíré itíndíkáná íjí Irɔŋgɔ a né jwámó. Kó a ta ma atɔ́wɔ cómbéná éjé iwójá ráwó í ma sómbéná Yésusu. 52Yóseve mwané a ma endá ená pirata, o me súsé mbimbe ra Yésusu. 53Kó a ma sisyé mbimbe ra Yésusu na koroso, ohíté na cunú, o me iŋgíye na evérá éyé é ma ríi tímérí na itááné. Naáté yá evérá mwané, va ma ríi vá arɔ́wɔ́ ka vaá moto ɔ́wɔ́. 54O ma ríi isí yá itúmé éyé vá katé heéhenda isí yá ihuwe. 55Vakóto ává vá katé tíráana Yésusu okésyé ówó na Gariréya vá ma byɔɔnɔ́ Yóseve vá néména evérá; índi vá ená ámó vá váámó mbimbe ra Yésusu. 56Kó vá ma wunde na byanje vyáwó, oheéhenda mbiti na varebínde na wusó wá mbimbe kaá isí yá ihuwe, vá ma huwé ámó mbéndɔ́ e ma ré súsé.
ទើបបានជ្រើសរើសហើយ៖
Rúkasa 23: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
