Rúkasa 13
13
Ye nugwé kee océndyé ówó púrú
1Itíndíkáná mwané, vato vámó vá ma endá ená Yésusu o me ojana ámó Pírata a ma oná vato vámó ává na Gariréya ará vá katé eréenana Irɔŋgɔ mómí. 2Yésusu a ma wó wundíyé anáá: No buŋganámó anáá vato amáva vá katé rií vambé nasesi otómbá vasɔ́ɔ́ va Gariréne ukú ójó anáá vá wó oná nánáo? 3Mbéndɔ́ ŋgo nó ojánámó anáá; no aríi ka céndyé púrú rá vinó, no né gwaánámó bimé ámó vá mwané. 4Kó hónó no buŋganámó anáá vato vábɔ́t na béréma ává mpimi éjé na Sírowé e ma gorá; vá mwané vá ma caká weŋga wobé otómbá vasɔ́ɔ́ bimé ává na Yerúsareme? 5Mbéndɔ́, ŋgo nó ojánámó anáá: «No aríi ka céndyé púrú rá vinó, no né gwaánámó bimé ámó vato mwané.»
Nkaná ra werété womó wó púrana na mpaŋganá éjé ka umé
6Yésusu a ma kwé nkana ejé: «Moto omo a ma nemá mpaŋganá#13:6 Mpaŋganá é ámó werété ówó vá béráanámó na peresí anáá: Figuier. naáté yá apúú ráá rá marété ámá má neénámó mɔwɔ. A ma endá anáá a enda sɔsɔ vibomá vyá werété mwané, ka etíye. 7A ma járá na moto ójó a katé beerye apúú ráa anáá: Éná, maá mátátó amá to ta etíyé ebomá na werété owó. Na wusó wá até kówo wó memenámó ra pandó ra cí ejé na sásáa? O me sómbámó. 8Moto ójó a katé beerye apúú a ma me wundíyé anáá: Oyéere, maná omo mice hée bwaá owó, ŋgo né tímámó na kɔɔ́kɔ́ŋgɔ́, noó osuunana meŋgénjí má yundu. 9Yɔnsi bwaá ówó wó urámó, wó né umámó. Wá ríi ka rií náná, mámó o me sómbá.»
Yésusu a ondónámó okótó wa iyémé isí yá ihuwe
10Yésusu a Katé yeére vato na yanje yá mbásóóríyé isí yá ihuwe. 11Kó okótó omo a ma ríi ɔ́wɔ́ a timbe ombé wa ireréŋgi. Ombé wa ireréŋgi mwané a katé eŋga anáá okótó omójo a rií na iyémé esene éyé a ma ríi a ma maná o me búndyé nɔ́kɔ́kɔ́ kó a ta ma ré ne hítí ovágánona kó a ma ríi a omána otumbyé maá mábɔ́t na méréma na ombé wa ireréŋgi mwané. 12Ará Yésusu a ma me ená, a ma me bérááná aye naá anáá: «Ŋgo wo atámó na makáná mɔɔ́.» 13Yésusu a ma me tárééná embɔɔ́ na nótó, na itíndíkáná mwané hónó, okótó a ma vágánóná, kó a ma késyé omítí Irɔŋgɔ. 14Nnjwé wa yanje yá mbasóóriye a ma ová urundú esene éyé eye anáá: Yésusu a ma rɔndɔ moto isí yá ihuwe, a wɔ́rɔ́mo enjárá: «A járámó na vato anáá masí ma manɔnɔwɔ ma amo ma rato na metúú mwané kówo ne geremenamo we ure onde wa rɔndɔ. Ate isí yá ihuwe.» 15Okí a mo wundyámó anáá: «No ámó vamacekiye mómí! Vino bime amáva kesí no katamo ohurune ndɔne na viyákása vyá vinó we enda nawó na osombo anáá vá nde monu mateyá 16Kó okótó ojó, ójó nda ra Abaraháma ojó, ámó saátana a mó timbámó na mbené mbeya yábɔt na ijemane ojó a te a geremena we uríkye na mbené mwané isí yá ihuwe?» 17Ŋgaráná ra Yésusu mwané e ma ereena va mbembena váá bime wo swení; wó je rií anáá ncumbí wa vato ávámó vá katé urií na visaŋgena na vesi wá motéé bimé ává a katé eŋga.
Tamba ra Irɔŋgɔ e puranamo na até
18Yésusu a ma járá anáá: «Ndamo oheyána tamba na ate ará? E púranámó na até? 19E puranámó na cámá ra goyáka éjé moto a wɔ́rɔ́mó, onema na naŋgáté raá, kó ye atanámó obunde werété kó monooní mo te enda oháá naŋga rá awó na párá ráá.»
20Yésusu a ma járá hée anáá: «Ndamo oheyána tamba ra Irɔŋgɔ na ate ará? 21E emo ame mboŋga ejé okótó a wɔ́rɔ́mó ováá na uhuku ojó vá nambámó makará kó ikwa iŋgime í húsyámó.»
Áné kójo a ámó wiŋgáana na homó ówó Irɔŋgɔ a jwámó
22Yésusu a katé té ndenda na eŋgórá kó hónó na vidɔŋgɔ íví na pé ra wenda ówó na Yerúsareme, kó a katé té yeére vato. 23Moto omo a me susamo anáá: «Okí, Irɔŋgɔ a me swetyámó bɛ́ŋ vana vato katitií?» Yésusu a wundyámó anáá: 24Vaáno ŋguru anáá no iŋgáanena na ohótó ojó cókókó, esene éyé eye na vatɔ́ɔ́tɔ́ ombunu rá vato o mo maámó anáá vá iŋgaana kó vá tono hítí.
25Ará moto wa yanje amo hatenámó opete ohótó na ndiwiki kó no mó káŋgá na naŋgáte, no gite ohótó no járá anáá: Oyéere, o só bunanamo, kó a me no wundyámó anáá: Ta ijímé homa owó ne rámó! 26Ne waŋgámó o járá naá anáá: Noó anáá to má nyenyá kó omonu o rɔŋgɔ nɔɔ, o má yééré vato na enjɔ́ŋɔ́ éjé na eŋgorá ra viso. 27Moto wa yanje a ne wundyámó hée anáá: «Ta ijímé homa owó ne rámó. Urikyáno na kɔŋgɔ rá ame vinó ává no eŋgamo mabé! 28Wɔɔ kówo no ne waŋgamo, no bandona vikárátá, are no ne enámó Abaraháma, Isaaka, Yákɔwɔ kó vahúmíye maaró ma Irɔŋgɔ bimé homó ówó Irɔŋgɔ a jwámó, vinó na naŋgate. 29Vato va me uranamo pere iŋgime maniye, mwesye, na epaana yá oŋgoná, na evetemena yá oŋgoná onde wɔ́rɔ́nɔ endií na tevere na homó ówó Irɔŋgɔ a jwámó. 30Wó je rií anáá vámó ává na nime teteejó vá ne riyámó na wusó, kó vámó ává na wusóteteejo vá ne riyámó na níme.»
Vá díŋgámó anáá vá oná Yésusu na Yérúsareme
31Itindikana mwané va parisene vámó vá ma keréná Yésusu váye naá anáá: «Úrúkyé ará, nda pando enje, esene éyé Erode a waŋgámó anáá a oná.» 32Yésusu a eŋgámó nawó anáá: Ndáno ojana ehaa mwané anáá, ŋgúnámó vambé vá vireréŋgi kó ŋgondónámó vato wusí owó, namberi kó na masí matato mana wandá owó ŋge eŋgámó. 33Wó je rií anáá ŋgeremenamo we enda na wusó na oŋgendo ra ame wusí owó, namberi kó isí eye tii, esene éyé eye anáá: «Ota nyeve anáá ahúmíye maaró ma Irɔŋgɔ a gwe pandó injyé na Yerusareme.»
34Yerusareme, Yeusareme, mámó ojó we onámó vahúmíye maaró ma Irɔŋgɔ kó we oná na atááne ává Irɔŋgɔ a tomámó, eŋgendɔ ini ŋgo ma diŋge anáá mameena vato wɔɔ́ na kɔŋgɔ rá me ame ŋgɔ e mameenamo vana na cí ra embave ráá, wó je rií anáá no tema atɔwɔ. 35Teteejó ŋgo ne ojánámó baŋgamo kútyámó y anje yá vinó ondo húmé na itíndíkáná ijí no me eŋgamo anáá: Irɔŋgɔ a utana nosanjá na ojo a uramo na ebérááná yá Okí.
ទើបបានជ្រើសរើសហើយ៖
Rúkasa 13: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
