Yohánese 9
9
Yésusu a ondónámó uŋgewu omo
1Yésusu a rií na otómbá, a ma ená moto omo ojó a ma byánávéná uŋgewu, 2kó vihoóhóná vyáa ví ma me súsé anaá: «Oyéere, ané sɔ́ kójo a ma sémé ukú ójó anaá moto ojó a byánávena uŋgewu, ye ómwané maté kee vabonda váa?» 3Kó Yésusu a ma wó wundíyé anáá: «Ka na moto, tɔɔ ómwané, tɔɔ vabonda váa moto omo a ta ma sémé. Wó ámó naná ukú ójó anáá manɔnɔwɔ má Irɔŋgɔ má vátíhíye na ómwané! 4Ará wusí wó arɔ́wɔ́ to geremenámó weŋga manɔnɔwɔ ma ojo a ma tómá, mbinó yo urámó kó, moto a ta né hítí onɔnɔwɔ. 5Ndo ámó ineŋgí yá cí ra ndono, itíndíkáná íjí ŋgo a ré riírií na cí ra ndono.»
6Na wéŋga ówó anáá Yésusu a mana ojárá náná, kó a ma uté metí na cí, otɔ́wɔ́ vaná vá vitɔhɔ na metí mwané o me siyé na aŋgísó 7aye naá anáá: «Ndá ondo vá sówa wusó na matéyá má itumburana íjí na Sirowé,» ójó a tirevenámó anáá: «ojo vá ma tómá.» Kó uŋgewu a ma endá, ovásówa kaá na wéŋga ówó anáá a enda wunde, a ma ríi a etá ená. 8Vato ává na kɔɔ́kɔ́ŋgɔ́ na ava vá ma re me enána a ɔŋgɔɔnɔ motéé vá mará járá anáá: «Até moto ójó a katé rií mbɔt na cí a ɔŋgɔɔnɔ motéé ojó?» 9Aavá vá ma ré járá anáá: «Wó ámó sáá ómwané!» Avámó vá járá anáá: «Mbéndɔ́, wó ámó moto omo ójó a puranámó naá.» Kó moto omójo maté a ma ré oja anáá: «Wó ámó sáá noó.» 10Kó vato vá ma ré járá naá anáá: «Twiiŋí kówo aŋgísó rɔɔ́ á má búnúwé?» 11Kó a ma wundyé anáá: «Moto ójó vá béráanámó anáá Yésusu a mó tɔ́wɔ́ vaná vá vitɔhɔ, kó a mó cíyé na aŋgísó aye name anáá: Ndá na Sirowé ondo vásówa wusó. Kaá ŋgo mó énda, osowa ówó ŋgo mó sówa wusó, noó ohírána okésyé wená.» 12Kó vá ma járá naá anáá: «Moto mwané a ámó héni?» A ma wó wundíyé anáá: «Noó ta jembé.»
13Kó vá ma endá na moto ójó a ma ríi uŋgewu omójo na va pariséne. 14Wó je rií anáá wó ma ríi isí yá ihuwe kówo Yésusu a ma tɔ́wɔ́ vitɔhɔ o me bune aŋgísó. 15Kó va pariséne hónó vá ma késyé o me súsé anáá a wó ojána ámó aŋgísó ráa á ma búnuwe. A ma wó wundíyé anáá: «A mó cíyé vitɔhɔ na aŋgísó, kó ará ŋgo mó vásówa wusó, ŋgo enámó.» 16Na raaté wa va pariséne, vato vámó vá ma ré járá anáá: «Moto mwané a ta beeryé isí yá ihuwe, náná wó ámó, anáá a ta ámó wa Irɔŋgɔ.» Vedá avámó vá katé járá anáá: «Twiiŋí kówo moto wa nyéŋgé a hítyámó otimbe ŋguru ra weŋga ówó ukú rá mesimbá omójo?» Kó vá ma saá vámwané na vámwané. 17Kó vá ma wundé ojárá na moto ójó a ma ríi uŋgewu anáá: «Kó mámó, o járámó eéné na wusó wá moto ójó a mó wo bune aŋgísó?» A ma wó wundíyé anáá: «A ámó ahúmíye maró wa Irɔŋgɔ.» 18Wó je rií anáá njwé rá va Yúdene í ma váráŋgá watɔ́wɔ anáá moto omójo a ma ríi uŋgewu, kó a ma ríi a etá ená. Wandá mwané kówo vá ma téháná vabonda váa. 19Kó vá ma wó súsé anáá: «Ye moto ojó a ámó mwaná wa vinó? Kó wó ámó vatɔ́ɔ́tɔ́ anáá a ma byánewená uŋgewu? Kó até eye i mó tómbá anáá ená?» 20Kó vabonda va moto ojó vá ma járá anáá: «Visó to jembámó anáá a ámó mwaná wa visó, kó a ma byánewena uŋgewu. 21Naáté eyé anáá aŋgísó ráá a me bunuwe, to ta jembé. O me súsámano o mwané maté, a nó wundini a támó hée moŋgájo!» 22Vabonda váá vá ma re járá náná esene éyé vá ma re tíné njwé rá va Yúdene ámó vá ma wɔ́rɔ́ cómbéna anáá vá ne gúnámó vato na yanje yá mbásóóríyé, vato ává vá ma járá anáá Yésusu a ámó etómá yá Irɔŋgɔ. 23Na wusó mwané kówo vabonda va moto ojó vá ma járá anáá: «A támó hée moŋgájo, o me súsámáno.»
24Na eŋgendɔ eba, va pariséne vá beranámó moto ojó a ma rii uŋgewu ojó vá ma járá naá anáá: «ojá vatɔ́ɔ́tɔ́ na aŋgísó ra Irɔŋgɔ! Visó to jembámó anáá moto ojó a mó wo ondóona a ámó moto wa nyéŋgé.» 25A wó wundyámó anáá: «Noó ta jembé ŋgé a ámó na nyéŋgé, itɔɔ a ámó usi: Njembámó bɛ́ŋ wandá womwesií anáá ŋgo ma rii uŋgewu, kó ŋgo enámó.» 26Kó vá ma járá naá anáá: «A mó wo eŋga até? A mó éŋga twiiŋí anáá a wo bune aŋgísó?» 27Moto a wó wundyámó anáá: «Ŋgo mana o ne ojána, kó no ta ovátɔ́rɔ́. Até kéye no vaŋgámó anáá ŋgo nó tímisiye hée? Ye no diŋgámó anáá vinó hónó ne bundé vihoóhóná vyáa?» 28Va pariséne vá ma kesyé o mo seyá vá járá anáá: «Mámó kójo o ámó ehoóhóná yáá, visó te ámó vihoóhóná vyá Mósese. 29Visó to jembámó anáá Irɔŋgɔ a ma járááná na Mósese, kó omójo, visó to ta jembé ará a endámó uré.» 30Kó moto a ma wundye anáá: «Kaá wandá ówó wó ámó wá okémbyé ɔ́wɔ́ kóomówo: Vinó no ta jembé homó ówó a endámó uré, wó je rií anáá a mó mbúne noó aŋgísó! 31To jembámó anáá Irɔŋgɔ a ta vatɔ́rééná mbásóóríyé ra vato vá nyéŋgé. Vedá moto a ríi kírítítí na Irɔŋgɔ a je eŋga mbaŋgéná raá, Irɔŋgɔ a me vatɔ́rɔ́mó. 32To ma eŋgá to arɔ́wɔ́ ka ová anáá moto a mó búne uŋgewu wa ebyánávéná aŋgísó. 33Wá ríi moto omójo a ta ámó wa Irɔŋgɔ, a ta hítí weŋga wandá.» 34Vá ma wundyé anáá: «Mámó o ámó na ebyánávéná yɔɔ́ nyéŋgé na nyéŋge kó o diŋgámó anáá o só yeére sukúrú!» Kaá vá ma me nɔɔ́ na naŋgaté.
35Yésusu a ma ová anáá vá ma me gúné kó a ma endá me etíye aye naá anáá: «Ye mámó wo atɔ́wɔmó Mwaná moto?» 36Kó a wundyámó anáá: «Okí, ŋgojánámó áné ójó a ámó ombótá ójó anáá ŋgo me atɔ́wɔ.» 37Yésusu a ma járá naá anáá: «Kaá wo me ená sɔ́, ómwané kójo a járáanámó nɔɔ ojó.» 38Moto omójo a ma járá anáá: «Ŋgo atɔ́wɔmó Okí,» kó a ma kútyé munú na wusó wá Yésusu. 39Yésusu a ma járá sɔ́ anáá: «Ŋgo ma uré na cí ra ndono ukú ójó anáá jósi a eŋgavena, jósi mwané a ámó anáá byewu vyó ená, kaá ava vá káté ená vá búndána byewu.» 40Va pariséne ává vá ma ríi ɔ́wɔ́ vá ma ová até éyé Yésusu a ma járá kó vá ma me súsé anáá: «Ye visó hónó to ámó amánowó byewu?» 41Kó Yésusu a ma wó wundíyé anáá: «No ma ríi no rií byewu, vinó ka rií na nyéŋgé. Kó ámó no járámó anáá to enámó, no dyeenámó na nyéŋgé ra vinó.»
ទើបបានជ្រើសរើសហើយ៖
Yohánese 9: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
