Yohánese 18
18
Kambeena ra Yésusu
(Mat 26:47-56; Már 14:43-50; Rúk 22:47-53)
1Ará Yésusu a ma maná ojárá naná, a ma endá na vihoóhóná vyáa mbóró ra evávárá yá Sédoróno. Apuú rá vaná vá maráté má va paráwa á ma ríi ɔ́wɔ́ kó a ma iŋgááná ɔ́wɔ́ na vihoóhóná vyáa. 2Yúdasa, ójó a ma sérá Yésusu a ma re jembé homó mwané esene éyé Yésusu na vihoóhóná vyá vá ma ré késyé wendana ɔ́wɔ́. 3Yúdasa a ma endá ɔ́wɔ́ na ncumbí wa visimbi na vagíré yanje yá Irɔŋgɔ ává vagónó vá vacekiye mómí na va Pariséne vá ma tómá kó vá ma iŋgááná na apúú ra va paráva vá tímbe wa tɔ́sɔ vá ková, va rámba vá ková na vikpére. 4Yésusu a jembe até éyé é ma geréméná o me húména, a ma kerá aye nawó anáá: «Áné kójo no sɔsɔmó?» 5Vá ma me wundíyé anáá: «Yésusu ójó na Nasaráte.» Yésusu a ma járá nawó anáá: «Ó ámó noó.» Yúdasa ójó a katé me será, a ma ríi na raaté wawó. 6Ará Yésusu a ma járá nawó anáá Ó ámó nóó, vá ma wundáná na nimé, wedúmana na cí. 7Yésusu a ma wundé o wó súsé anáá: «Áné kójo no sɔsɔmó?» Vá ma wundyé anáá: «Yésusu ójó na Nasaráte.» 8Yésusu a ma wó wundíyé anáá: «Ŋgo mó nó ojána anáá ó ámó noó. Wó a ríi sɔ́ anáa noó kójo no sɔsɔmó, micáno avámó ává vá endá.» 9Naná kówo até éyé Yésusu a ma járá é ma geréméná weŋgavena. A ma járá anáá: «Tataá, ta ma deŋgyé umwesií na ava o ma pwá.» 10Símono Pyéere a ma timbé yáápánó rá vitá kó a ma somóná onɔ́ yeŋga manɔnɔwɔ yá ogónó wa acekiye mómí o me sómbá utú ójó pere ra ombɔɔ́ rá enéme. Yeŋga manɔnɔwɔ mwané é ma ríi ebérááná anáá Marákúsu. 11Kó Yésusu a ma járá na Pyéere anáá: «Wundyé yáápánó rɔɔ́ naáté yá ebaará. O buŋganámó anáá ta né vényú ndeya ra makáná éjé Tetáŋgá a ma pwá?»
Va endo ámó na Yésusu na Hána
(Mat 26:57-58; Már 14:53-54; Rúk 22:54)
12Ŋcumbí wa visimbi orɔŋgɔ na ogónó wawó, na vagíré vá yanje yá Irɔŋgɔ ává njwé rá va Yúdene í ma tómá, vá ma ambááná Yésusu o me wótá mbéné. 13Vá ma késyé wenda naá na Hána. Hána a ma ríi babá wa nobá wa Kayípe ójó a ma ríi ogónó wa acekiye mómí mbwaá mwané. 14Kayípe mwané umweesií kójó a ma erééná njwé rá va Yúdene ndébɔ́ mwané anáá: «wó ámó mpí na wusó wá vinó anáá moto umwesií a gwé na wusó wá noyɔŋɔ nimé.»
Pyéere a vásáŋgámó Yésusu
(Mat 26:69-70; Már 14:66-68; Rúk 22:55-57)
15Símono Pyéere na ehoóhóná índyé vá ma byɔɔnɔ́ Yésusu. Amó ogónó wa acekiye mómí a katé jembe ehoóhóná eyomó eméye, kó é ma iŋgááná na yanje yá ogónó wa acekiye mómí orɔŋgɔ na Yésusu. 16Vedá Pyéere a ma cáná na naŋgáté berebe na ohótó. Kó ehoóhóná eyé ogónó wa acekiye mómí a katé jembe a ma húmé, ojáréta na okótó ójó a ma ré gíré ohótó kó a ma iŋgíyé Pyéere. 17Yeŋga manɔnɔwɔ éyé é katé gíré ohótó é ma ríi okótó kó é ma járá na Pyéere anáá: «Mámó honó o ta ámó ehoóhóná emó yá moto ojó?» Pyéere a ma me wundíyé anáá: «Mbéndɔ́!» 18Va eŋga manɔnɔwɔ na vagíré yanje yá Irɔŋgɔ vá ma ratééná ihyáné esene éyé isíné é katé rií kó vá katé vasɔ́wɔ. Pyéere honó a katé rií orɔŋgɔ nawó a vásɔ́wɔ.
Ogóno a cekyé mómí a susámó Yésusu cúcáná
(Mat 26:59-66; Már 14:55-64; Rúk 22:66-71)
19Ogónó wa acekiye mómí a ma késyé osúsé Yésusu cúcáná na até éyé é néménámó vihoóhóná vyáa na até éyé é néménámó ehoóhona éyé a ma ré eréena. 20Yésusu a ma me wundíyé anáá: «Ŋgo ma járá na aŋgísó rá moto uŋgimé, ŋgo káté yeére vato na byanje vyá mbásóóríyé kó honó na yanje yá Irɔŋgɔ, homó ówó va Yúdene bimé vá váwónjéenanámó, noó ta káté járá wandá na asɔɔ́. 21Na wusó wá até kówo o cúcámó cúcáná? Até éyé ŋgo má ojá, súsé vato ává vá má mbátɔ́rɔ́, vá jémbámó wusí na wusí até éyé ŋgo má járá.» 22Ará Yésusu a ma járá naná, agíré yanje yá Irɔŋgɔ omo ójó a ma ríi ɔ́wɔ́ a ma cúpyááná Yésusu ombéré aye naá anáá: «Náná kówo vá wúndiyámó ogónó wa acekiye mómí?» 23Yésusu a ma me wundíyé anáá: «Ŋgé ŋgo mó járá wandá womó ówó wobé, tíhíyámó wandá mwáne, vedá ŋgé ŋgo mó járá wusi, na wusó wá até kówo oŋgobámó?» 24Kó Hána a ma tómá Yésusu na ogónó wa acekiye mómí ójó na Kayípe.
Pyéere a wundámó ovásáŋgá hée Yésusu
(Mat 26:71-75; Már 14:69-72; Rúk 22:58-62)
25Na itíndíkáná mwané, Símono Pyéere, a katé rií a vásówɔ ihyáné. Kó vá ma járá naá anáá: «Mámó hónó o ta ámó ehoóhóná émwéesií yá moto ojó?» Kó Pyéere a ma vásáŋgá ayáá: «Mbéndɔ́ noó ta ámó ehoóhóná yáa.» 26Umweesií ójó na veŋga manɔnɔwɔ vá ogónó wa acekiye mómí, ójó a ma ríi njíwó ra moto ójó Pyéere a ma sómbá útú aye naá anáá: «Kesí ŋgo mó wo ená orɔŋgɔ naá na kondo ra va vaná vá maráté ma paráwa?» 27Kó Pyéere a ma vásáŋgá hée. Na itíndíkáná mwané itétí é ma tómbá otátéta.
Vá byámó Yésusu na Piráta
(Mat 27:1-14; Már 15:1-5; Rúk 23:1-5)
28Na nimé raá, visimbi ví ma urúkyé na Yésusu na edɔŋgɔ yá Kayípe kó vá ma endá naá na yanje yá ŋgɔ́mɔnɔ, wó ma ríi ibeesí kuúkú. Vedá njwé rá va Yúdene í ta ma iŋgáana naáté yá yanje anáá vá vásaára iwéwérí ukú ójó anáá vá nyá manyá má Pásáka. 29Piráta ójó ŋgɔ́mɔnɔ a ma uré ondo wó etíye na naŋgáté kó a ma wó súsé anáá: «Até kéye no sɔ́mɔ́nɔmó moto omójo neyé?» 30Vá ma me wundíyé anáá: «Ŋgé moto ojó a ta éŋga wobé, to mó éŋga to uré naá na mámó?» 31Piráta a ma wó wundíyé anáá: «O me wɔ́rɔ́máno vinó maté no me jósyé ámó mbéndɔ́ ra vinó yo ojámó.» Va Yúdene váye naá anáá: «To ta timbé ŋguru anáá to sómbéna moto ntóró ra nugwé.» 32Náná kówo até éyé Yésusu a ma járá ukú ójó anáá a tíhíye kána ra nugwé éjé a ma geréméná ogwé wó ma eŋgávéná. 33Piráta a ma wunde naate yá yanje, kó a ma eŋgá anáá vá endá na Yésusu, kaá a ma me súsé anáá: «O ámó ahumu rá va Yúdene?» 34Yésusu a ma me wundíyé anáá: «Ye mámó maté kójo o járámó naná kee vato véndyé káva vá má wo tɔ́ŋéná?» 35Piráta a ma me wundíyé anáá: «Yé noó ndo ámó mwaná wa va Yúdene? Vato ává na noyɔŋɔ nɔɔ́ maté na vagónó vá vacekiye mómí vá mó uré nɔɔ na noó, até sɔ́ kéye o mó éŋga?» 36Yésusu a ma me wundíyé anáá: «Edɔŋgɔ yámé é ta ámó na cí ra ndono ejé. Edɔŋgɔ yámé é mó ríi é rií na cí ra ndono, íváámé vá mó éŋga vá núbáana ukú ójó anáá noó ka kavavená na embɔɔ́ ra njwé rá va Yúdene. Vedá edɔŋgɔ yámé é ta ámó na cí owó.» 37Piráta a ma súsé Yésusu anáá: «O ámó sɔ́ ahumu?» Yésusu ámó wundyámó anáá: Mámó kójo o mó jará anáá ndo ámó ahumu. Ŋgo ma byánávéná kó ŋgo ma uré na cí rá ndónó anáá ntisiiyé vatɔ́ɔ́tɔ́. Ójó a ámó pere ra vatɔ́ɔ́tɔ́ a vátɔ́rɔ́mó mií rame. 38Piráta a ma súsé Yésusu anáá: «Até kéye vatɔ́ɔ́tɔ́?»
Vá sómbénámó Yésusu ntóró ra nugwé
(Mat 27:15-31; Már 15:6-20; Rúk 23:13-25)
Na nimé ra vipeŋge mwané, Piráta a ma endá hée ondo etíye va Yúdene na naŋgáté aye nawó anáá: «Na noó, ta éna ihusi na moto ójó ukú ójó anáá vá me sómbéna ntóró. 39Veda ámó ntumu ra vinó yo ojamo anáá ŋgo nó hwá mwaná wa vimboo na wusó wá ibínó yá Pásáka, no diŋgámó anáá ŋgo nó micena ahumu rá va Yúdene?» 40Vá ma me wundíyé vá rúme anáá: «Mbéndɔ́, até ómwané, micé Barábasa!» Wó je ríi anáá Barábasa mwané a katé ríí ohambe.
ទើបបានជ្រើសរើសហើយ៖
Yohánese 18: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
