Yohánese 12
12
Maréyá a suunámó arábínde na eŋgoró ra Yésusu
1Ará ibínó yá pásáka é ma ríi yá cáná metúú máráátó, Yésusu a ma endá húmé na Betaníya. Ó ámó edɔŋgɔ éyé Rasára ójó Yésusu mwané a ma hetíyé na raaté wa vigwé a katé sɔ́tɔ́ ɔ́wɔ́. 2Ɔ́wɔ́ vá ma me námbéná manyá kó Maáta kójo a katé seŋe manyá mwané, Rasára ó mwané indindíi na vato ávámó na dévere orɔŋgɔ na Yésusu. 3Kó Maráyá a ma wɔ́rɔ́ morikɔ́nɔ wa arábínde ójó a cakámó odíyé osuune na eŋgoró ra Yésusu. Arábínde mwané vá ma héndá na uhuwe omó ójó vá béráanámó anáá Náará. Kó Maráyá a ma késyé opúmbyé eŋgoró ra Yésusu na kító ráa kaá inumbú o je núwé táásé na yanje yimé. 4Kó Yúdasa Isikariyóto ójó a ma geréméná o sérá Yésusu a je rií umweesií ójó na vihoóhóná vyáa paa ayáá: 5«Ye vá ta ohítí osérá arábínde omójó ukú ójó anáá to timbe vikpama vyá mwení motete mótátó índi to téŋgíye vawora?» 6A ta ma ré járá náná esene éyé a katé ová vawora noóŋgó, a katé járá náná esene éyé a katé rií uŋgúbí. Ómwané kójo a katé timbe icáka rá mwení kó a katé ibána até éyé vá ma ré vaána naáté. 7Kó Yésusu a ma járá anáá: «Micé okótó omójo cók! A mó késyé weŋgá até éyé vá mó eŋgámó isí éyé vá mó ŋgáámó naáté yá evérá. 8Vawora vá mwané no né riyámó nawó itíndíkáná íŋgímé, wó je rií anáá noó no ta né rií name itíndíkáná íŋgímé.»
Vá díŋgámó anáá vá oná Rasára
9Ekáné yá ncumbí wa va Yúdene a ma ová anáá Yésusu a katé rií ɔ́wɔ́ na Betaníya kó vá ma uráná até bɛ́ŋ na wusó wá Yésusu, vá ma uráná hónó anáá vá ená Rasára mwané ójó Yésusu a ma honóná na nugwé. 10Ɔ́wɔ́ kówo vagónó vá vacekiye mómí vá ma kásá anáá vá onámó hónó Rasára, 11esene éyé na wusó wá Rasára mwané ków ombunu rá va Yúdene ó katé wó urúkye vá atɔ́wɔ Yésusu.
Yésusu a iŋgáanámó na Yerúsareme
(Mat 21:1-11; Már 11:1-11; Rúk 19:28-40)
12Isí éyé tii, ekáné yá ncumbí wa vato ójó a ma uré na wusó wá ibínó yá pásáka a ma ová anáá Yésusu a urámó na Yerúsareme, 13kó vá ma wɔ́rɔ́nɔ́ maŋgó má embíré wurúkiye na oŋgórá anáá vá endá bérúme naá. Vá katé rume anáá: «Niimí na Irɔŋgɔ! Irɔŋgɔ a utana nosanjá na ojo a urámó na ebérááná yá Okí, ahumu wa Isayéere!» 14Kó Yésusu a ma wɔ́rɔ́ mwaná wa eyákása, onuumana na máná raá esene éyé ó ámó tiré-tíré na va kárate ává mwáŋ mwáŋ anáá: 15«Mámó ka tíné oŋgórá rá Siyɔ́ŋɔ! Éná, ahumu rɔɔ́ yó urámó indindíi na máná ra mwaná wa eyákása.» 16Na makésyé, vihoóhóná vyáa ví ta ma ová até éyé é katé tómbávena. Kaá ará Irɔŋgɔ a ma néétyé Yésusu na niimí, ɔ́wɔ́ kówo vá ma endá buŋge anáá wandá mwané wó ma ríi tiré-tiré na wusó wáa kó wandá mwané hónó kówo vato amáva vá katé me eŋga. 17Vato bimé ává vá ma ríi ɔ́wɔ́ isí éyé Yésusu a ma hetíyé Rasára na raaté wa vigwé owunde o me béráana anáá a húmé na evérá vá katé oja até yimé éyé vá ma ená. 18Amó vato amáva vá ma ová anáá Yésusu a ma eŋgá esimbá mwané, ɔ́wɔ́ kówo vá ma uré anáá vá endá bérúme naá.
Niimí na koroso
19Kó va pariséne vá ma késyé ojárá vá mwané na vá mwané anáá: «Vinó maté no enámó anáá no ta hítí weŋga wandá. Moto uŋgimé a ámó bɛ́ŋ na o me byɔɔnɔ!»
Niimí na koroso
20Va Geréke vámó vá ma uré na Yerúsareme anáá vá endá gúmíye Irɔŋgɔ na itíndíkáná rá ibínó. 21Vá ma keréná moto omo ójó na edɔŋgo yá Gariréya na oŋgórá rá Betayída ebérááná anáá Híripi váye naá anáá: «Ímíné, to diŋgámó anáá to ená Yésusu.» 22Híripi a ma endá ojana Anderéya kó bimé vává vá ma endá ojana Yésusu. 23Yésusu a ma wó wundíyé anáá: «Tetee ojó itíndíkáná yó jíné íjí Mwaná moto a geremenamó otimbe niimí.» 24Na vatɔ́ɔ́tɔ́, Na vatɔ́ɔ́tɔ́, ŋgo nó ojanámó anáá, ncɔ́ ra ohéyá éjé yobámó na cí yo a ríi ka gwé, e káŋgámó moká, wó je rií anáá yá gwé, yo eréenámó ncɔ́ mbunu. 25Ojo a diŋgámó esɔ́tɔ́ yáa a mó déŋgyámó esɔ́tɔ́ mwané kaá ojo a diŋgámó Irɔŋgɔ otómbá esɔ́tɔ́ yáa na cí ejé, moto mwané a mó vétéenámó esɔ́tɔ́ yáa kó a mó sɔ́tɔ́mó na Irɔŋgɔ ka na mamana. 26Moto a eŋgá anáá a nɔnɔwena, ó mwané o mbyɔɔnɔ, náná homó ówó ndo ámó, yeŋga manɔnɔwɔ yámé hónó orií ɔ́wɔ́. Esené Tetáŋgá a mó yáákanámó moto uŋgimé ójó a nɔnɔwenámó.
27Kó Yésusu a ma endá na wusó na enjárá ayáá: «Tetee ojó otémá ramé wó mána ndeérana. Kó ŋgo né járámó eéné? Ye ŋgo né járámó anáá: Tataá ŋgatámó na itíndíkáná rá etɔɔ ijí? Mbéndɔ́, esene éyé na wusó wá itíndíkáná ijí kówo ŋgo ma caká wuré. 28Tataá érééná ebérááná yɔɔ́ niimí!» Kó mií emo e ma endá uré na máná e járá anáá: «Ŋgo mó me whá niimí kó ŋgo né wundámó o me hwá hée.» 29Vato ává vá ma ríi ɔ́wɔ́ owunde wová mií mwané vá katé járá anáá ó ámó mbemberitye, ávámó va járá anáá éŋgerese kójo a mó járéta na Yésusu. 30Kó Yésusu a ma járá anáá: «Ó ta ámó na wusó wámé kówo mií eméje e mó járéta, ó ámó na wusó wá vinó. 31Tetee ojó Irɔŋgɔ a vaŋgámó ojósyé cí ra ndono kó tetee ojó hónó a vaŋgámó wumbe njwé éjé na cí ejé na naŋgáté. 32Kaá noó ará Irɔŋgɔ a mó neétyámó na maná, ŋgo mó túrámó vato bimé na noó.» 33A ma járá vipéŋgé imíví índi a tíhíye ukúkú ra nugwé ójó a ma geréméná ogwé. 34Vato vá ma me wundíyé anáá: «To ma ová naáté yá va kárate vá mbéndɔ́ anáá etómá yá Irɔŋgɔ é mó sɔ́tɔ́mó na kɔ́rɔ́tɔ́tɔ́. Kó twiiŋí kówo mámó o hítyámó ojárá anáá Mwaná moto a geremenamó orií néétyérí? Áné sɔ́ɔ́ maté kójo Mwaná moto?» 35Yésusu a ma wó wundíyé anáá: «Ineŋgí yó arɔ́wɔ́ na raaté wa vinó na mwaná wa itíndíkáná. Ndendáno itíndíkáná íjí no timbámó ineŋgí, ukú ójó anáá mbínó ka nó bútyáana, esene éyé ojo a ndendámó naáté yá mbínó a ta jembé ará a endámó. 36Itíndíkáná íjí no timbámó ineŋgí, atɔ́wɔ́no ineŋgí ukú ójó anáá no rií vaná vá ineŋgí.» Na wéŋga ówó anáá Yésusu a mana ojárá nawó náná, kó a ma soŋgóná ondo vásɔ́mena urehí na vató.
Va Yúdene vá ta kaŋgá Yésusu
37Itɔɔ ámó Yésusu a ma eŋgá mesimbá mbunu na aŋgísó ráwó, vato ka me atɔ́wɔ. 38Náná kówo até éyé ahúmíye maró wa Irɔŋgɔ ójó Isáyá a ma járá é katé eŋgavena. A ma járá anáá: «Okí, áné kójo a ma atɔ́wɔ́ vipéŋgé vyá visó? Áné kójo Okí a ma me tíhíyé ŋguru raá?» 39Isáyá mwané umweesií a ma ojá até éyé é katé eŋga anáá vato mwané ka atɔ́wɔ. A ma ojá anáá: 40«Irɔŋgɔ a ma wó váá bwewu na aŋgíso owunde orerimiye etémá rawó ukú ójó anáá vá mwané ka ená na aŋgísó ráwó, etémá rawó hónó ka ová wandá. Ɔ́wɔ́ kówo Irɔŋgɔ a ma járá anáá: Vá ta búndé na noó ukú ójó anáá ŋgo wó ondóna.» 41Isáyá a ma ojá náná esene éyé a ma ená niimí ná Yésusu kó a ma ojá maró máa. 42Wó je rií anáá ombunu rá njwé rá va Yúdene vá mwané maté vá ma késyé watɔ́wɔ Yésusu kó vá ta ma ré járá mií na máná esene éyé vá ma ré tíné anáá va Pariséne ka wó gúné na yanje yá mbásóóríyé. 43Na vatɔ́ɔ́tɔ́, na vatɔ́ɔ́tɔ́ vá ma ré diŋge matamáná ámá má endámó uré na vato otómbá ama má endámó uré na Irɔŋgɔ.
44Kó Yésusu a ma járá mií na máná ayáá: «Ojo a ŋgátɔ́wɔmó, até noó kójo a atɔ́wɔmó, a atɔ́wɔmó ojo a ma tómá,» 45kó ojo a ŋgénámó, a enámó hónó ojo a ma tómá. 46Noó ŋgo ma uré na cí ra ndono ámó ineŋgí ukú ójó anáá ojo a ŋgátɔ́wɔmó, ómwané ka rií naáté yá mbínó. 47Ŋgé moto a ová vipéŋgé vyámé ka je eŋga ámó vipéŋgé mwané ví súsámó, até noó kójo ŋgo me sómbénámó ntóró raá esene éyé noó ta ma uré ondo jósyé cí ra ndono, ŋgo ma uré ondo sótyé cí ra ndono. 48Ŋgé moto a mbáráŋgá owunde ováráŋga enjárá rame, a jósyévenámó kó enjárá rame mwané kéje e mó me jósyámó na isí yá mamana. 49Enjárá éjé njárámó e ta endá uré na noó maté, e endámó uré na Tetáŋgá ójó a ma tómá. Ó mwané maté kójo a ma tévéré até yimé éyé ŋgo ma geréméná woja na até yimé éyé ŋgo ma geréméná oyeére vato. 50Kó njembámó anáá mbéndɔ́ ra Tetáŋgá yo eréenámó esɔ́tɔ́ éyé kɔ́rɔ́tɔ́tɔ́. Wandá mwané kówo até yimé éyé ŋgojámó, ŋgojámó ámó Tetáŋgá a ma ŋgojáná.
ទើបបានជ្រើសរើសហើយ៖
Yohánese 12: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
