Ŋgengéná 17
17
Póoro na Sirása vá endámó na oŋgórá Tesaroníka
1Póoro na Sírasa vá ma tómbéná na oŋgórá ra Ampiporísi kó na oŋgórá rá Aporoníya kaá vá ma endá húmé na oŋgórá rá Tesaroníka. Va Yúdene vá ma ré timbe yanje yá mbásóóríyé homó mwané. 2Kó ámó na ntumu raá, Póoro a ma túmbyé va sábata vátátó ɔ́wɔ́ orɔŋgɔ na va Yúdene, a járáana nawó maró ámá na va kárate ává mwáŋ mwáŋ, 3a katé wó tímisíyena a wunde o wó tíhíye anáá, Etómá yá Irɔŋgɔ é ma geréméná wená etɔɔ, ohonowa na raaté wa vigwé. Kó a ma járá hée nawó anáá: «Etómá yá Irɔŋgɔ mwané éyé ŋgo nó ójánámó ó ámó Yésusu.» 4Maró mwané má ma tááténá va Yúdene vámó na etémá kó vá ma vábáyétá na Póoro na Sírasa. Va geréke mbunu ává vá gumíyámó Irɔŋgɔ vá mwané hónó vá ma vábáyétá orɔŋgɔ nawó ítɔɔ ombunu rá vakótó ává na byanje vyá vato ívíŋgombá.
5Kó va Yúdene avámó vá ma késyé weŋga onjíŋí. Va mása vá ma endá na enjɔ́ŋɔ́ o té wɔ́rɔ́nɔ vaájó vá encomo anáá vá sítiye vato vá wunde ovaá imburyé naáté yá oŋgóra. Kó vá ma enda na yanje yá Yásono vá sɔ́sɔ Póoro na Sírasa ukú ójó anáá vá endá nawó na aŋgísó rá vato. 6Amó vá ta ma etíye Póoro na Sírasa, vá ma ambááná Yásono orɔŋgɔ na vatɔ́wɔ avámó, o té wó júkúriye, wenda ówó nawó na va rɔ́yá ává na oŋgóra. Kó vá ma késyé orume vá járá anáá: «Vato ává vá hɔ́mbɔ́kɔmó cí ra ndono iŋgimí kaá tetee ojó vá etá ará, 7kó Yásono ojó kójo a má wó áká na yanje yáá. Vato mwané vá eŋgámó mamba ámá má pékáanámó na mbéndɔ́ ra ogónó wa ahumu, vá tɔ́ŋɔ́mó anáá ahumu éndyé á ámó ɔ́wɔ́ ájá vá béráanámó anáá Yésusu.» 8Maró mwané má ma eŋgá anáá etémá ra vato na va rɔ́yá ává na oŋgórá e béyá. 9Kó vá ma súsé Yásono na vatɔ́wɔ avámó anáá vá yáákana ekáné yá táŋgó ra mwení kó vá ma wó mícé.
Póoro na Sírasa vá endámó na oŋgórá Beréyá
10Ará mbínó e ma obá, vatɔ́wɔ vá ma tómá Póoro na Sírasa pere éjé na oŋgórá rá Beréyá. Ohúmé ówó vá ma húmé ɔ́kɔ́, vá ma endá na yanje yá mbásóóríyé yá va Yúdene. 11Va Yúdene ává ɔ́kɔ́ na beréyá vá ma wó aká otómbá ámó ava na Tesaroníka. Vá ma buné otémá ráwó oŋgímé na maró má Irɔŋgɔ, kó mesí mimé, vá ma ré heesye va Kárate ává mwáŋ mwáŋ índi vá ijíme ŋgé wandá ówó Póoro a katé wó ojana wó ámó mwané náná. 12Ombunu na vámwané ó ma atɔ́wɔ́ Irɔŋgɔ, ítɔɔ vakótó vá jiní na raaté wa va geréke, na vanómótó nyetete hónó vá ma atɔ́wɔ́ Irɔŋgɔ.
13Kó ará va Yúdene ává na Tesaroníka vá ma ová anáá Póoro a katé oja hée maró má Irɔŋgɔ na Beréyá, vá ma endá urána anáá vá vaá imburyé vá wunde ositiye vato. 14Kó isímí-isímí, vatɔ́wɔ vá ma tómá Póoro pere ra máŋá, veda Sírasa na Timotéya vá mwané vá ma cáná ɔ́wɔ́ na Beréyá. 15Vato ává vá ma endá tíráana Póoro vá ma endá húmé ombárá na oŋgórá ra Aténe kó vá ma wundé na Beréyá, wojana Sírasa nawó na Timotéya anáá: «Póoro a mó éŋga anáá no me byɔɔnɔ kwa-kwa.»
Póoro a ámó na oŋgórá rá Aténe
16Na itíndíkáná íjí Póoro a katé gíré Sírasa nawó na Timotéya na Aténe ɔ́kɔ́, otémá ó katé me béyá ámó va sambé vá viheere vá katé rií mbunu na oŋgórá mwané. 17Naáté yá yanje yá mbásóóríyé, Póoro a ma ré járáana na va Yúdene, a járáana hónó na ava ka rií va Yúdene vá je gúmíye Irɔŋgɔ. Na pandó rá mbérúmáná hónó, a ma ré járáana mesí mimé na vato bimé ává vá ma ré tómbána. 18Vabuŋgana ává vihoóhóná vyá Epikúru na vabuŋgana ává vihoóhóná vyá Senónó vá mwané hónó vá katé járáana na Póoro. Avámó vá ma ré wundiye anáá: «Ompɔ́ɔ́pɔ́pɔ́ ojó a diŋgámó anáá a járá maté até?» Avámó vá járá anáá: «A katé diŋge anáá a só ojána mamba má va sambé ává to ta jembé.» Esené Póoro a katé oja Usi wa cómó wa Yésusu a wunde hónó otɔ́ŋɔ́ anáá vigwé ví mó hátyáanámó. 19Kó vá ma endá na Póoro na va rɔ́yá ává na oŋgórá kaá vá ma járá naá anáá: «O só tímísíyámó mkpámáká ra ehoóhona éyé o katé eréena eméye! 20Esené wo atónámó vato etú na vipéŋgé íví ndímbe na ndímbe kó to diŋgámó anáá to jembe até éyé ví tirivenámó.» 21Vato vá edɔŋgɔ bimé na menɔ́ ámá má katé sɔ́tɔ́ na Aténe vá katé rií bɛ́ŋ vá ríi ka rií na wója, orií na ovátɔ́rɔ́ ówó mkpámáka rá mamba.
22Kó Póoro eténe na raaté wa vato amáva a ma wɔ́rɔ́ enjárá ayáá: Aá vato ává na Aténe, ŋgo enámó anáá no ámó vato ává vá díŋgámó obyɔɔnɔ va sambé váwó. 23Esené ará ŋgo má ndéndá naáté yá oŋgórá rá vinó, ŋgo má éná viheere vyá vinó vyá iki, noó owunde wená pandó ra mómí éjé no ma tiré ɔ́wɔ́ anáá: Na wusó wá sambé ójó to ta jembé. Kaá até éyé no gúmíyámó ka jembe kéye ŋgo endámó nó ojána. 24Irɔŋgɔ ójó a ma héndá cí ra ndono na wandá wimé ówó naáté, ómwané ojo Okí wa cí na máná kó a ta sɔ́tɔ́ na byanje íví háyé-háyé na embɔɔ́ ra vato. 25Kó hónó a ta gíré anáá vato vá me nɔnɔwena mámó wéŋga anáá a jámámó wandá wómó, esene éyé ómwané kójo a eréenámó moto uŋgimé esɔ́tɔ́, pepenɔ na motéé umumú.
26Na nimé ra moto umwesií a ma héndá mayɔŋɔ mimé índi má sɔ́tɔ́ na cí iŋgimé. A ma tándá embárá ra vidɔŋgɔ vyáwó owunde otírímiyána motíndíkaná mwá esɔ́tɔ́. 27Irɔŋgɔ a ma eŋgá náná ukú ójó anáá vato vá me sɔsɔ. Itɔɔ vá timbé vindíndiŋ ará vá me sɔsɔmó, yɔŋsi vá hityámó o me ɔŋgɔ́. Wó je rií anáá Irɔŋgɔ a ta ámó urehí na visó. 28Ómwané kójo a eŋgámó anáá to sɔ́tɔ́, to ndenda, to wunde orií. Náná kówo vahúmíye vesi vá vipéŋgé vá vinó vá ma késyé ojárá anáá:
To ámó hónó vaná váá.
29Náná wó ámó anáá ámó to ámó vaná váá, to ta geréméná obuŋgana anáá Irɔŋgɔ a puranámó na viheere vyá góoro, ítɔɔ vyá itwíŋí yá mwení, ítɔɔ vyá atááné ájá vato vá ma kéká na njembéná ráwó kó hónó na peyɔ ráwó. Vá ma eŋgá motéé mwané esene éyé vá ta ma ré jembe Irɔŋgɔ. 30Tetee ojó, Irɔŋgɔ a ta néméná mutíndíkáná úmú moto a arɔ́wɔ́ ka jembe até éyé a vaŋgámó na vatɔ́ɔ́tɔ́, wandá mwané kówo a wó béráanámó bimé ítɔɔ vá ámó pandó ejaté anáá vá céndyé púrú ráwó. 31Esené a ma tírímíyé isí ímwéesií éyé a mó jósyámó cí ra ndono iŋgimé na vatɔ́ɔ́tɔ́, kó a ma ijátá moto ójó a mó éŋgámó jósi mwané. To jembámó anáá ó ámó va bébéré esene éyé a ma hetíyé moto mwané na raaté wa vigwé.
32Ará vato amáva vá ma ová Póoro a járá anáá Irɔŋgɔ a hítyámó ohonona moto ójó a mó gwé, kó váámó vá ma késyé o me kpeére, avámó vá járá anáá: «To né wo átɔ́rɔ́mó o járá mamba amáma isí índyé.» 33Kó Póoro a ma wó urúkyé. 34Wó je rií anáá vato vámó ává na raaté wawó vá ma vábáyéta na Póoro, obúndé vatɔ́wɔ. Na raaté wawó, Dénisí a ma ríi ɔ́wɔ́, a je rií umweesií ójó na va rɔ́yá ává na Aténe, okótó omo ebérááná anáá Damarísi na avámó hée.
ទើបបានជ្រើសរើសហើយ៖
Ŋgengéná 17: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
