Ŋgengéná 10
10
Koronéye a enámó éŋgerese wa Irɔŋgɔ
1Moto omo na oŋgórá Cesaráyá ebérááná anáá Koronéye, a ma ríi ogónó na ncámbá wa visimbi ojó na Róma, vá béráana anáá: «iwónjá rá itariyéne.» 2A katé beerye tévéré rá Irɔŋgɔ na yanje yáá yá vato yimé, a aka ombunu rá vawora ává na noyɔŋɔ ná va Yúdene, a vásoóriye Irɔŋgɔ itíndíkáná iŋgímé. 3Isí emó, wandá ámó maworo mátátó má enéŋgá, a ma ená éŋgerese wa Irɔŋgɔ a iŋgáana naáté yá yanje yáa, kó a ma me berááná anáá: «Koronéye!» 4Koronéye a ma néméná éŋgerese na wokótó wimé kó a ma járá naá anáá: «Okí, até kéye é ta tómbá?» Éŋgerese a ma wundyé anáá: «Irɔŋgɔ a mó atɔ́wɔ mbásóóríyé rɔɔ́, kó vyaka íví o káté aka vawora a ta wo béríhyé. 5Tetee ojó, tómá vato na Yópe ombótá ójó anáá vá uré na moto omo ójó vá béráanámó anáá Símono a rií hée anáá Pyéere. 6A vétémámó na yanje yá sɔ́ɔ́ Símono ojó a nɔnɔwɔmó vikoo vyá náma yanje yáa é ámó na kɔ́ŋgɔ́ ra máŋá.» 7Béŋ ámó éŋgerese omójo a ma endá, Koronéye a ma beraaná veŋga manɔnɔwɔ váa vává, na mwaná wa visimbi waá omo ójó a ma etá kɔ́ɔ́m a me nɔnɔɔwena a je atɔ́wɔ Irɔŋgɔ. 8A ma wó ojáná até yimé éyé é ma tómbá, kó a ma wó tómá na Yópe.
Pyéere a enámó motéé
9Míveri máa, mwaná wa visimbi wa Koronéye na veŋga manɔnɔwɔ vá etá berebe na oŋgórá ra Yópe. Wandá ámó twéfe, Pyéere a ma endá wasóóriye na ceyá ra yanje. 10Kó ama ová njeŋge a diŋge anáá a nyányá. Itindíkana ijí vá katé o mo nambéna manyá, Pyéere a enámó wandá o sise na máná. 11A ma ená máná hwɔɔŋ, wandá owó o katé sise wó púrana na ekáné yá eposa yá cunú eyé vá ambaanámó na kɔ́ŋgɔ́ iní, kó e ma wá taráyá na cí. 12Kó naáté yá cunú mwané, nama i ma rii ɔ́wɔ́ ikú iŋgímé, ijí na eŋgoró ené, iji iwa túrámó naá cí, kó na monóoní. 13Kó mií emó e járámó náá anáá: «Pyéere hatééná, oná, indi onyá!» 14Pyéere a wundyámó anáá: «Mbéndɔ́ Okí, ŋgo ma eŋga arɔ́ɔ́ kanyá wandá wá iki ítɔɔ ówó na manyɔ́tɔ́.» 15A wundo ámó wová mií ijárá náá anáá: «Owo Irɔŋgɔ a mó pómóna, mámó o teŋge járá anáá o ámó iki!» 16Mií é ma járá naná eŋgendɔ etátó, na nímé ráá kó eposa yá cunú eméye é ma wundé na máná.
17Pyéere a ma ré sɔsɔ ntimisaná ra wandá owó a mó ená, itíndíkáná mwané, vato ává Koronéye a má tómá vá omána o ta súsé yanje yá Símono kó vá ma rii vá te téné na ohótó. 18Vá beraanámó kó vá susámó anáá: «Ye ará kówo Símono ojó vá beraanámó anáá Pyéere a wetémámó?» 19Pyéere a ma rii a rá buŋgana até éyé a mo ená, kó Ireréŋgi éyé mwaŋ mwáŋ é járámó náá anáá: «Ená vato vatátó vá wo sɔsɔmó. 20Sɔ́ŋgíyé osise indi wo enda nawó ka petaana, wó ámó noó kójo ŋgo mó wó tómá.» 21Pyéere a ma sisé onde atiini vato ává aye nawó anáá: «Noó ojó ne sɔ́sɔmó ojo, no me uré onde eŋga até?» 22Vá wundyámó anáá: «Wó ámó ogónó wa mwaná wa visimbi ojó Koronéye kójo a me só tómá. A ámó ndíŋgirííŋ wa moto ojó a tinámó Irɔŋgɔ, kó va Yúdene bimé vá mo kaŋgámó. Éŋgerese wa Irɔŋgɔ a me mó tewére anáá wo enda na yanje yáá indi a ová até eyé o waŋgámó o me ojana.» 23Kó Pyéere a ma iŋgaaná nawó owó hendena ombeté.
Miwerí máa, vá wɔ́rɔ́mó pé orɔŋgɔ na vatɔ́wɔ vámó ává na Yópé ává vá ma enda tíráana Pyéere. 24Kó isí éyé é ma byɔɔnɔ́, vá ma endá humé na Cesaráyá, Koronéye a ma bérááná vijíjíyé vyáa na va mbérá váa kó a katé giré Pyéere. 25Ará Pyéere a ma enda jine kó Koronéye a ma endá omo wɔ́rɔ́ na pé kó a ma kútyé munú na wusó wáa. 26Pyéere a ma járá náá anáá: «Haténá! Noó hónó ndo ámó moto amo mámó, kó a ma me aká ohateena.» 27Pyéere a iŋgaanámó naáté yá yanje ate a járána na Koronéye, a ma etíyé ombunu rá vato wónjéénérí. 28A járámó nawó anáá: «No jembámó anáá mwaná wa Yúdene a ta gerémená urií wombere na hayídene itɔɔ wiŋgaana naáté yá yanje yáá. Wó je rií anáá noó Irɔŋgɔ a me tihini anáá ta geremena onéméná moto anáá a ámó na manyɔ́tɔ́. 29Wandá mwané kówo ŋgo me soŋgíni wure ará o me tehána. Tetee ojó baŋgámó anáá njembe na wusó owaté kówo o me mberána.» 30Koronéye a wundyámó anáá: «Metúú matátó wusí owó, na ma wora matátó ámó tetee ojó, ndií na mbasóóriye naáté yá yanje yá mé, mbubuwámó moto a byá cunú i nanja a tenéná na mondá. 31Kó a ma járá name anáá: Koronéye, Irɔŋgɔ a me ová mbásóóríyé rɔɔ, a ta wo baríhyé na va deési wɔ́ɔ́ ává wó eréénanámó vawówóra. 32Tómá vato na Yopé, ombótá ójó anáá vá nde beráana Símono ojó vá beráanámó anáá Pyéere. A wétémámó na yanje yá Símono ojómó ojó a nɔnɔɔmó vikoo a sɔ́tɔ́mó na kɔ́ŋgɔ́ ra máŋa. 33Kó ŋgo mó hírána tómá vato anáá vá nde oberáana kó o mó éŋga wusi ámó o mó uré. Tetee ojó, visó bimé to ámó ará na monda rɔɔ ukú ójó anáá to ová até eyé Okí a me otéwére anáá o só ojána.»
Enjárá ra Pyéere naáté yá yanje yá Koronéye
34Pyéere a ma wɔ́rɔ́ enjárá a ye anáá: Ŋgo ová tetee ojó anáá na vatɔ́ɔ́tɔ́, Irɔŋgɔ a támó na wusó wa moto umwesií 35vedá, moto uŋgimána ojó a mityámó Irɔŋgɔ a rií ndíŋgirííŋ, tɔɔ a ndo ámó uré na noyɔŋɔ enaté, Irɔŋgɔ a me ovámó wusi. 36A ma tómena neyɔŋɔ na Isayére Usi wa Cómó wa dɔ́ŋgɔrɔ́ɔ́ŋ na Yésusu Kirítu ojó ámó Okí wa moto uŋgimé. 37No jembámó até eyé éma kasí ohumé na Gariréya, kó na Yúdeyá oŋgimé na nímé rá mbérááná kó na nduwáná ra Yohánese. 38No jembámó ámó Irɔŋgɔ a ma eréena Yésusu ojó na Nasaráte ŋguru ra Mwáŋ mwáŋ wa Ireréŋgi, kó Yésusu mwané a ma ndendá pandó iŋgímé a te eŋga wusi, a ondónana vato bimé ává vá ma rii na mboo na Saátana, esene éyé Irɔŋgɔ a katé rií naá. 39Kó visó to ámó va wúsinete na wandá wimé owó a ma eŋgá na edɔŋgɔ yá va Yúdene, kó na Yerúsareme. Omwáné ojó vá ma oná ome bomona na kóroso, 40na metúú matátó, Irɔŋgɔ o mo wundye na esɔ́tɔ́, kó a ma eŋga anáá avatihiye, 41até na neyɔŋɔ nimé, vedá na visó ává Irɔŋgɔ a ma kesye wo ijata anáá to rií vatisíni, visó ává to ma nyányá kó omónu orɔŋgɔ na Yésusu na nímé ejé anáá a hatena na pandó ra vigwé. 42Kó a ma só téwéré anáá to ojana noyɔŋɔ Usi wa Cómó kó to tisínye anáá a ámó ojó Irɔŋgɔ a ma tirimiyé anáá a njwésyé va hwené na vigwé. 43Ómwané kójo vahúmíye maró vá Irɔŋgɔ bimé vá tisínyámó anáá: «Moto uŋgimé ójó a mó me atɔ́wɔmó, na ebérááná yáá, nyéŋgé ráa í mo juwanámó.»
Mwáŋ mwwáŋ wa Ireréŋgi a sisanámó va hayídene
44Pyéere a ma rií ará járá, kó Mwáŋ mwáŋ wa Ireréŋgi a má sisáná moto uŋgimé ojó a katé ovátɔ́rɔ́ enjárá mwané. 45Va Yúdene áwá vá ma atɔ́wɔ́, ává vá ma rii orɔŋgɔ na Pyéere vá ma kambí anáá Irɔŋgɔ a eréenámó va hayidene Mwáŋ mwáŋ wa Ireréŋgi, 46esene éyé vatɔ́wɔ mwané vá katé ová va hayidene ává vá járá enjárá indyé kó vá gumiye Irɔŋgɔ. Kó Pyéere a ma járá anáá: 47«Ye moto a pítyámó okamana vato ava vá mána otimbe Mwáŋ mwáŋ wa Ireréŋgi ámó visó anáá vá duwána na matéyá?» 48Kó Pyéere a eréenámó ŋguru anáá vá wó dwé na ebérááná yá Yésusu Kirítu. Kó vato ává vá ma duwáná vá ma járá náá anáá a mana rií hée vaná vá metúú nawó.
ទើបបានជ្រើសរើសហើយ៖
Ŋgengéná 10: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
