Ŋgengéná 1
1
Rúkasa a tíhíyámó kárate waá
1Aá Teyofíri ogoó, Naáté yá kárate wame wa wusó, ŋgo ma ójá wimé ówó Yésusu a ma eŋgá na wimé ówó a ma yééré vato, owɔ́rɔ́ ówó na makésyé 2ondo húmé isí éyé a ma náátá na máná. Hɔrɔ́ a arɔ́wɔ́ ka naáta na máná, a ma ijé enásá raá, kó a ma wó hwá tévéré na ŋguru ra Mwáŋ mwáŋ wa Ireréŋgi. 3Na nimé ra nugwé na náa, a ma vátíhíyé na enásá raá kó a ma wó tíhíyé eŋgendɔ mbunu anáá a ámó pwené. Na táŋgó ra metúú mɔwɔ́ mááné, a katé wó húména a wó ojána mamba má Tamba ra Irɔŋgɔ. 4Isí emó a ríí na onyá nawó, kó a eŋgámó nawó anáá: «Vinó ka urúkye Yerúsareme, vedá gíráno tánó ra Tetáŋgá éjé ŋgo ma nó ojáná. 5Esené Yohánese a ma dwé vato naáté yá matéyá vedá vinó, metúú ámá má urámó, no né duwanámó naáté yá Mwáŋ mwáŋ wa Ireréŋgi.»
Yésusu a naátámó na máná
6Enásá e ma ríi wonjéénérí orɔŋgɔ na Yésusu, kó vá ma me súsé anáá: «Okí, ye tetee ojó kówo o vaŋgámó owunde onuumiye edɔŋgɔ yá Ísayéere?» 7Yésusu aye nawó anáá: «No ta timbé anáá no ijíme táma na itíndíkáná íjí mamba mwané má géremenámó ojine, esene éyé Tetáŋgá kójo a ma tírímíyé mamba mwané na ŋguru raá maté, 8vedá no né timbámó ŋguru, ŋguru ra Mwáŋ mwáŋ wa Ireréŋgi ará a né sisámó na vino. Kaá no né riyámó va wúsinete vamé na Yerúsareme, na Yúdeyá uŋgimé, na Samaríyá ondo húmé na ombárá rá cí.»
9Omana ówó Yésusu a ma maná ojárá naná, a ma náátá na máná na aŋgíso rá enásá raá kó erandó é ma uré o me bútyáana vá etá ka ne me ená. 10Amó vá katé neénemena na máná ará Yésusu a katé enda, vá ma buuwé vato vává vá téné na kɔ́ŋgɔ́ rawó, vá byá cunú pugúum 11kó vá ma járá na enásá anáá: «Aá vato ává na Gariréya, no riyámó hɔ́rɔ́ na oneénemena ówó máná na wusó wá até? Yésusu omójo, ójó vá ré nó uryéná anáá a enda na máná, a mó wundámó sɛ́ɛm ámó no mó me ená a enda na máná.»
Ncámbá ra enásá
12Enásá e ma urúkyé yene yá maráté ámá vá béráanámó anáá orívyá, kó vá ma wundáná na Yerúsareme, yene mwané ka je rií urehí, wandá ámó kírométa imwesií. 13Ará vá ma húmé na Yerúsareme, vá ma endá na cómbá éjé na máná ra yanje, Pyéere a ma ríi ɔ́wɔ́, Yohánese, Yáka na Anderéya, Híripi na Tómasa, Barateremíya na Matyáasa, Yáka ójó ombwene rá Aráfe, Símono ójó a katé kamana na ntumu rá edɔŋgɔ na Yúde ombwene rá Yáka. 14Bimé mií emwesií vá katé rií na mbásóóríyé orɔŋgɔ na vakótó vámó, na Maráyá netí Yésusu, na va navéne va Yésusu.
Matyáasa a héŋgíiyámó Yúdasa
15Na metúú mwané, vatɔ́wɔ vá ma váwónjééná, vá ma ríi vato berebe itete na mɔ́wɔ́ máváné. Pyéere a ma hatééná na raaté wawó ayáá: 16Va mbísó, até éyé Mwáŋ mwáŋ wa Ireréŋgi a ma ojá na aŋgóŋgí é ma geréméná weŋgavena. A ma ojá na uŋguté rá Dáviti até éyé é néménámó Yúdasa ójó a ma búndé ature wa vato ává vá ma ambááná Yésusu 17wó je ríí anáá a katé rií orɔŋgɔ na visó ává enásá. Kó a ma timbé ŋgává ra manɔnɔwɔ ámó viso. 18Na mwení íjí vá ma me hwá na wusó wá ncémé raá, a ma kusé cí, kó a ma obá na ucé, osaráyá na raaté, tona osaasasa. 19Vato bimé ává na Yerúsareme vá ma ová ndɔ́ŋɔ́ mwané, kó vá ma bérááná pandó mwané anáá Hakeredáma náná wó tírevenámó anáá: «apúú ra miné.» 20Na kárate wa Esawo vá ma tiré anáá:
Ŋgá Yanje yáa é wúnde ipunde,
moto ka ne rií ɔ́wɔ́.
Vá ma tiré hée anáá:
Ŋgá moto undyé a me héŋgíye na manɔnɔwɔ máa.
21Vato vá ámó ɔ́wɔ́ ává vá katé só tíráana itíndíkáná iŋgímé íjí Okí Yésusu a ma só turé, 22okésyé ówó ará Yohánese a má me dweé ondo húmé ámó a ma náátá na máná. Wó géremenámó sɔ́ anáá moto omo ójó na vá mwané a búnde atiseenye wa ehonowa yáa.
23Kó vá ma tírímíyé vato váváné, Yóseve ójó ebérááná anáá Barasábasa, vá wúnde o me béráana anáá Yusutúsu kaá na Matyáasa. 24Vatɔ́wɔ vá má vásóóríyé anáá: «Okí, o jembámó otémá rá moto uŋgimé, o só tíhíyámó ojo o mó ijata na vato ává vává né ává, 25ukú ójó anáá a búndé onásá kaá a wɔ́rɔ́ pandó ra manɔnɔwɔ éjé Yúdasa a ma amá kútyé anáá a enda na pandó raá.» 26Vá ma sává vibérááná anáá vá ijíme ojo Okí a né ijátámó. Matyáasa kójo vá ma ijátá kó vá ma me uswíyé na ncámbá ra enásá éjé yábɔ́t na umweesií.
ទើបបានជ្រើសរើសហើយ៖
Ŋgengéná 1: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
