Márko̱s 6
6
Tsíninbu̱únꞌ xa̱bo̱ juyáá Jesús ná Nasarét
(Mt 13.53-58; Lc 4.16-30)
1A̱ꞌkhue̱n nigájna̱a Jesús ikhín, ni̱kaa̱ ná xuajñuu̱, jamí nigóó tsí naꞌsngúu̱n ga̱jma̱á nindxu̱u̱. 2Ído̱ ni̱ga̱nú mbiꞌi rí nduya̱a xu̱únꞌ xa̱bo̱, a̱ꞌkhue̱n Jesús nigíꞌdu̱u̱n niꞌsngáá ná awúun guꞌwá rí na̱gi̱mbíin xa̱bo̱ judío̱. Maphú mbaꞌiin xa̱bo̱ tsí nu̱dxawíín rí naꞌsngáa̱ namakúún, jamí nu̱ra̱xe̱-mijnée̱: «Náá neꞌne-gajma̱a̱ ríge̱ꞌ xa̱bo̱ tsíge̱ꞌ róꞌ. Náá ni̱ma̱ñuu̱ ju̱ma̱ máján ríge̱ꞌ róꞌ. Jamí náá nijanáa̱ tsiakhe̱ rí ma̱ꞌnii̱ rí phú wáá ríge̱ꞌ róꞌ. 3Á ra̱ꞌkhá xa̱bo̱ tsíge̱ꞌ ñajuun tsí naꞌthóo ixe̱, a̱dée María̱ dxe̱ꞌ. Á ra̱ꞌkhá dxíyo̱o̱ ñajuun Santiágo̱, ga̱jma̱á José, ga̱jma̱á Júda̱s jamí Simón dxe̱ꞌ. Á ra̱ꞌkhá ge̱jyoꞌ júwa̱ꞌ mangiin jñáguíi̱ ga̱jma̱á nindxa̱ꞌlóꞌ dxe̱ꞌ». Ikhaa jngó ra̱khúu̱n gúya-makuíi̱.
4Xómáꞌ Jesús niꞌthúu̱n: «Jámbi̱in xa̱bo̱ nduya-makuíí tsí na̱gu̱wíjnga̱a ajngóo Ana̱ꞌlóꞌ. I̱ndo̱ó máꞌ xa̱bo̱ xuajñuu̱, ga̱jma̱á a̱nguii̱n, jamí xa̱bo̱ guꞌwóo̱, tsíya̱-makuíi̱». 5Ikhaa jngó ra̱khóo gáꞌnii̱ nimbá rí phú wáá ikhín, i̱ndo̱ó máꞌ niꞌni̱i a̱kui̱ín mbá tikhuun xa̱bo̱ tsí najáñúú niꞌnii̱ ído̱ rí nixkrámii̱ ga̱jma̱á ñawúu̱n. 6Jamí phú nimakuu Jesús rí tsínimbu̱únꞌ xa̱bo̱ tsúꞌkhue̱n juyáa̱. A̱ꞌkhue̱n ni̱ke̱e̱ gáꞌsngáa̱ mbá nawa̱a̱ ná triga̱ xuajen laka.
Jesús naxúngui̱inꞌ mbá gu̱wa̱ꞌ i̱jmi̱i tsí naꞌsngúún
(Mt 10.5-15; Lc 9.1-6)
7Nda̱wa̱á a̱ꞌkhue̱n nindxaꞌwúu̱n tsí mbá gu̱wa̱ꞌ i̱jmi̱i (12), nigíꞌdu̱u̱n nixuꞌmii̱ a̱jmi̱i jamí a̱jmi̱i. Jamí nixnúu̱ tsiakhe̱ rí mu̱xkawíin gíñá ꞌguéen ná xuñúú xa̱bo̱. 8Nixná-ngawúu̱n rí mu̱xúye̱e̱ nitháan rí ma̱jmúu̱ ná jamba̱a̱. Ni ama, ni guma, ni máꞌ mbúkha̱a̱. Niꞌthúu̱n rí mbuye̱e̱ i̱ndo̱ó máꞌ ixe̱ rí gída̱ꞌ ñawúu̱n. 9Mangaa máꞌ niꞌthúu̱n rí mu̱xu̱ꞌdáa̱ cháda nakhúu̱n, i̱ndo̱ó máꞌ numuu rí mu̱xúdee̱ a̱jma̱ idi̱i̱ xtíñúu̱. 10Jamí niꞌthúu̱n xóó: «Asndo náá gáta̱ꞌa̱ꞌlaꞌ mbá guꞌwá, ga̱wajúnlaꞌ ikhín asndo gága̱nú mbiꞌi rí ma̱ga̱jnáaꞌlaꞌ ná xuajen rúꞌkhue̱n. 11Jamí xí ríga̱ mbá xuajen ná tsíñúú xa̱bo̱ gúdri̱guáanꞌlaꞌ ni máꞌ tsíñúu̱ gúdxawíi̱n rí nu̱tha̱nlaꞌ, a̱ga̱jnáaꞌlaꞌ ikhín, jamí gu̱xprígúulaꞌ yujnda̱ꞌ rí ni̱gi̱ꞌma ná nakhuálaꞌ, kajngó mbuyáa̱ rí ra̱máján ini̱i̱. Na̱tha̱nꞌ-jmbalaꞌ rí mbiꞌi rí ma̱to̱ꞌo̱o̱ awan ga̱jma̱á numúú xa̱bo̱, i̱wa̱á gakhe̱ mbuyamíni̱í xa̱bo̱ tsúꞌkhue̱n, xó rí mu̱gíꞌníí xa̱bo̱ Sodóma̱ ga̱jma̱á Gomóra̱».#6.11 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «Na̱tha̱nꞌ-jmbalaꞌ rí mbiꞌi rí ma̱to̱ꞌo̱o̱ awan ga̱jma̱á numúú xa̱bo̱, i̱wa̱á gakhe̱ mbuyamíni̱í xa̱bo̱ tsúꞌkhue̱n, xó rí mu̱gíꞌníí xa̱bo̱ Sodóma̱ ga̱jma̱á Gomóra̱».
12A̱ꞌkhue̱n nigájnúú tsí mbá gu̱wa̱ꞌ i̱jmi̱i, nigóo̱ gúthan-raꞌee̱ rí ma̱thanga̱a a̱kui̱ín xa̱bo̱ inuu Ana̱ꞌlóꞌ. 13Phú mbaꞌiin gíñá ꞌguéen nu̱xkawíi̱n ná xuñúú xa̱bo̱, xúꞌkhue̱n máꞌ phú mbaꞌiin tsí najáñúú nu̱tsuaꞌii̱n yatsi̱i xndú olíbo̱, jamí naꞌni̱i a̱kui̱ín ini̱i̱.
Xáne nijáñuu Juáán tsí naxúꞌdu-maꞌíin xa̱bo̱ ná awúun iya
(Mt 14.1-12; Lc 9.7-9)
14Nidxawuun thúngaa Eróde̱s rí nuthan xa̱bo̱ numuu Jesús, numuu rí ni̱dróꞌoo a̱pha̱ ajngáa ga̱jma̱á numuu̱. Jamí niꞌthée̱n:#6.14 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «Tikhuun xa̱bo̱ nuthan:». «Juáán tsí naxúꞌdu-maꞌíin xa̱bo̱ ná awúun iya ndiyáa mbiꞌyuu, ikhaa jngó gíꞌdoo̱ tsiakhe̱ rí ma̱ꞌnii̱ rí phú wáá ríge̱ꞌ». 15I̱ꞌwíin nuthan: «Elía̱s#6.15 Elía̱s mbiꞌyuu mbáa tsí ni̱gu̱wíjnga̱a ajngóo Ana̱ꞌlóꞌ wajyúú. ñajuu̱n». Xómáꞌ i̱ꞌwíin nuthan: «Mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuu̱n, xómá tsí ni̱rawíjnga̱a ajngóo Ana̱ꞌlóꞌ nákhí wajyúú».
16Ído̱ nidxawuun Eróde̱s ajngáa rúꞌkhue̱n, a̱ꞌkhue̱n niꞌthée̱n: «Ikhaa Juáán ñajuun xa̱bo̱ tsúꞌkhue̱n. Ikhúúnꞌ jmínu̱úꞌ ni̱xna̱-ñájun rí mu̱thon-rígú idxu̱u̱, jamí ndiyáa̱ mbiꞌyuu̱ xúge̱ꞌ rá».
17Numuu rí nákhí wapha, jmína̱a̱ꞌ máꞌ Eróde̱s nixúꞌmii xa̱bo̱ rí mu̱rtuwiin Juáán, xúꞌkhue̱n máꞌ nixná-ñájwii̱n rí ma̱xtoꞌóo̱ ga̱jma̱á ñuu ajwa̱nꞌ ná géjwa̱nꞌ. Rúꞌkhue̱n neꞌne Eróde̱s numuu rí ndiyáa̱ a̱ꞌgo̱ tsí mbiꞌyuu Erodía̱s, a̱ꞌgui̱i Felípe̱, dxíyo̱o̱ máꞌ Eróde̱s. 18Numuu rí Juáán naꞌthúun Eróde̱s: «Ra̱máján rí ma̱raꞌdaa a̱ꞌgui̱i dxíya̱a̱ꞌ asndo xómá a̱ꞌgia̱aꞌ». 19Xómáꞌ Erodía̱s, phú najiꞌnáa̱ jaꞌyoo̱ Juáán, jamí nandoo̱ maxíya̱a̱. I̱ndo̱ó máꞌ numuu rí tsíxkamaa̱ xáne gáꞌnii̱ rí maxíya̱a̱. 20Xómáꞌ Eróde̱s namíñuu̱ jaꞌyoo̱ Juáán, numuu ndaꞌyoo̱ rí xa̱bo̱ jmbii ñajuu̱n jamí ndaꞌyoo̱ rí xa̱bi̱i Ana̱ꞌlóꞌ ñajuu̱n. Ikhaa numuu rúꞌkhue̱n nixná-ñájwii̱n rí mi̱tia̱wáa̱n kajngó nda̱a̱ rí gágíꞌnuu̱. Jamí ído̱ nadxawu̱n rí naꞌthán Juáán, tsiánguá eꞌne a̱kuii̱n, maske máꞌ xúꞌkhue̱n na̱ni̱gu̱u̱ꞌ máꞌ madxawuu̱n rí naꞌthán.
21A̱ꞌkhue̱n ni̱ga̱nú mbiꞌi rí gíꞌthu̱u̱n Erodía̱s. Ikhaa mbiꞌi rúꞌkhue̱n ni̱gu̱ma ndxa̱a̱ rí naráma̱a tsiguu Eróde̱s. A̱ꞌkhue̱n Eróde̱s nindxaꞌwúún ma̱peꞌtso xa̱bo̱ ñajun jamí tsí nuthan-ñajúún tsí juda ajwa̱nꞌ, xúꞌkhue̱n máꞌ xa̱bo̱ buanuu tsí phú gíꞌdoo numúú ná numbaa Galiléa̱. 22Awúun máꞌ rúꞌkhue̱n ni̱to̱ꞌo̱o̱ dxáꞌgú, a̱dée Erodía̱s, niꞌsian nakhúu. Phú ni̱ni̱gu̱u̱ꞌ Eróde̱s rí niꞌsian dxáꞌgú, xúꞌkhue̱n máꞌ tsí trigi̱in napeꞌtso gajmíi̱. Xómáꞌ Eróde̱s niꞌthúun dxáꞌgú: «A̱ta̱ndo̱ꞌo̱ꞌ asndo náá rí nandaaꞌ, jamí ikhúúnꞌ ma̱xna̱a̱ꞌ ne̱». 23A̱ꞌkhue̱n nixuda-mine̱e̱ꞌ ga̱jma̱á nindxu̱u̱ xáꞌnii: «Mbá xúgíí rí ma̱ta̱ndo̱ꞌo̱ꞌ, ma̱xna̱a̱ꞌ ne̱, maske máꞌ asndo mbá ti̱kua̱pha̱a̱ ná rí na̱tha̱n-ñájuunlo̱ꞌ».
24A̱ꞌkhue̱n ni̱kaa̱ dxáꞌgú gáraxu̱u̱ nánée:
―Dí gánda̱ꞌa̱ rá.
Xómáꞌ nánée̱ niꞌthán:
―A̱ta̱nda̱ꞌa̱ idxu̱u̱ Juáán tsí naxúꞌdu-maꞌíin xa̱bo̱ ná awúun iya.
25A̱ꞌkhue̱n rí mbá nacha̱ máꞌ ni̱ta̱ꞌa̱a dxáꞌgú ná gída̱ꞌ Eróde̱s, jamí xáꞌnii niꞌthúu̱n: «Nandoꞌ rí xúge̱ꞌ máꞌ ma̱ra̱xnu̱ꞌ ná awúun mbá xúrto̱ idxu̱u̱ Juáán tsí naxúꞌdu-maꞌíin xa̱bo̱ ná awúun iya».
26A̱ꞌkhue̱n phú nidaa a̱kui̱in Eróde̱s. I̱ndo̱ó máꞌ numuu rí nixuda-mine̱e̱ꞌ rí ma̱ꞌnii̱, jamí ga̱jma̱á numúú xa̱bo̱ tsí trigi̱in napeꞌtso ga̱jma̱á nindxu̱u̱, ra̱khóo gáꞌthée̱n rí ma̱xáꞌne-mbánuu̱. 27A̱ꞌkhue̱n rí mbá nacha̱ máꞌ nixúngua̱a̱ꞌ mbáa xa̱bo̱ tsí kuatuun ajwa̱nꞌ rí ma̱ꞌkha̱ jayóo idxu̱u̱ Juáán. 28A̱ꞌkhue̱n xa̱bo̱ tsúꞌkhue̱n ni̱ka̱ gáro̱thon-rígú idxu̱u̱ ná géjwa̱nꞌ,#6.28 Ajngáa rí na̱gi̱ꞌdu̱u̱n ge̱jyoꞌ na̱ꞌkha̱ ná ndámba̱ kíxnuu 27 ná mbá tikhu i̱yi̱i̱ꞌ rí wayuu. jamí ni̱ꞌkhe̱e̱ jayóo̱ ne̱ ná awúun mbá xúrto̱, xúꞌkhue̱n máꞌ nixnáxu̱u̱ ne̱ dxáꞌgú. Xómáꞌ dxáꞌgú nixnáxu̱u̱ ne̱ nánée.
29Ído̱ nidxawíín ríge̱ꞌ tsí niꞌsngúún Juáán, a̱ꞌkhue̱n niguwée̱ꞌ ágúyaa̱ xuyuu, jamí nigóo̱ gúdii̱.
Jesús naxníꞌtsúún mbá witsu míl xa̱bo̱
(Mt 14.13-21; Lc 9.10-17; Jn 6.1-14)
30Ído̱ niguwáanꞌ tsí nixúngui̱inꞌ Jesús, a̱ꞌkhue̱n nimbáxii̱n ga̱jma̱á nindxu̱u̱, jamí nitháa̱n mbá xúgíí rí nini̱i̱, xúꞌkhue̱n máꞌ rí nisngáa̱. 31A̱ꞌkhue̱n Jesús niꞌthúu̱n: «A̱guwalaꞌ i̱ndo̱ó máꞌ ikháanꞌlaꞌ ga̱jma̱á nindxu̱ꞌ i̱mba̱ janíí, ná ndawi̱in xa̱bo̱, jamí a̱gu̱ya̱a xa̱ꞌlaꞌ mbá lájwíin». Numuu rí phú mbaꞌiin xa̱bo̱ tsí nagóó jamí naguwáanꞌ. Ikhaa jngó tsí naꞌsngúún Jesús, asndo ni tsíyaphii̱n rí mu̱piꞌtsii̱.
32A̱ꞌkhue̱n nigóo̱ i̱ndo̱ó máꞌ ikhii̱n ná awúun mbá ixe̱-rguwa rí na̱ka̱ inuu iya, kajngó magóo̱ ná ndawi̱in xa̱bo̱. 33I̱ndo̱ó máꞌ numuu rí phú mbaꞌiin xa̱bo̱ ndiyáá rí nigájnúu̱ nigóo̱ jamí ni̱gu̱ma-nuwuu̱n nene̱ xa̱bo̱. A̱ꞌkhue̱n rí phú mbaꞌiin xa̱bo̱ nigájnúú ná mbámbá xuajen, nigóó nakhúún ná na̱ka̱ Jesús. Asndo ginuu xa̱bo̱ tsúꞌkhue̱n niguáꞌnú xó rí ikhii̱n, ikhaa jngó ikhín máꞌ nimbáxii̱n gajmíi̱ xa̱bo̱.#6.33 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «ikhaa jngó ikhín máꞌ nimbáxii̱n gajmíi̱ xa̱bo̱». 34Ído̱ nigájna̱a Jesús ná awúun ixe̱-rguwa, ndiꞌyoo̱ rí mbaꞌiin mi̱ndaꞌkho xa̱bo̱ gachúún ikhín. A̱ꞌkhue̱n phú niñáwíin a̱kuii̱n jaꞌñúu̱, numuu rí xómá xu̱kú mogo̱ tsí ndawa̱a̱ tsí na̱ña̱wu̱ún jaꞌñúu̱. A̱ꞌkhue̱n phú mbaꞌa rí nigíꞌdu̱u̱n niꞌsngúu̱n.
35Ído̱ neꞌne wakhíí guéño máꞌ rá, a̱ꞌkhue̱n ni̱xu̱ꞌma-mijná tsí naꞌsngúu̱n, jamí nitháa̱n:
―Phú wakhíí máꞌ rá, jamí ndawi̱in xa̱bo̱ ná mbaa ríge̱ꞌ. 36Arathán-ngáwúún xa̱bo̱ kajngó magóó mbá nawa̱a̱ ná júwa̱ꞌ xa̱bo̱ xanáá jamí ná triga̱ xuajen, kajngó mutsi̱i̱ rí mu̱phi̱i̱, numuu rí na̱nguá judee̱ nitháan.
37A̱ꞌkhue̱n niriꞌña Jesús:
―Gu̱xnúu̱ ikháanꞌlaꞌ rí mu̱phi̱i̱.
Xómáꞌ ikhii̱n nitháa̱n:
―Nandaaꞌ rí mu̱ꞌguá gútse̱xo̱ꞌ guma ga̱jma̱á a̱jma̱ siénto̱ (200) mbúkha̱a̱ ajwa̱nꞌ,#6.37 Mbúkha̱a̱ ajwa̱nꞌ rúꞌkhue̱n mbiꞌyuu «denário̱» ná ajngáa griégo̱. Mbá mbúkha̱a̱ rúꞌkhue̱n nadaa numuu xa̱bo̱ rí nañajun mbá mbiꞌi. kajngó mu̱xnúu̱xo̱ꞌ rí mu̱phi̱i̱ ráanꞌ.
38A̱ꞌkhue̱n niꞌthúu̱n:
―Wátha̱ guma ju̱dalaꞌ rá. Aꞌgua ágúya̱álaꞌ mbu̱ꞌyáá.
Jamí ído̱ ndiyáa̱ wátha̱ ne̱ ríga̱, a̱ꞌkhue̱n nitháa̱n:
―Ríga̱ witsu guma, jamí a̱jmi̱i i̱gi̱ꞌ.
39A̱ꞌkhue̱n niꞌthúu̱n rí muni̱i̱ rí ma̱trigi̱in mbámbá kuthuun mbá xúgíin xa̱bo̱ ná tsu̱du̱u̱ ra̱xa̱ maxa. 40A̱ꞌkhue̱n nitrigii̱n ná witsu skíñú (100) xa̱bo̱ mbámbá kothon, jamí ná a̱jma̱ skíñú gu̱wi̱inꞌ (50) xa̱bo̱ nitrigii̱n. 41A̱ꞌkhue̱n niguatuun Jesús rí mbá witsu guma jamí nájmi̱i i̱gi̱ꞌ, niyaxi̱i̱ mikhuíí, jamí niríguu̱ la gamaku inuu Ana̱ꞌlóꞌ. A̱ꞌkhue̱n nixpíꞌthángaa̱ guma, jamí nixnúu̱ tsí naꞌsngúu̱n rí mu̱xpi̱ꞌtha̱-raꞌee̱ ne̱ ná inúú xa̱bo̱. Mangaa máꞌ niwiꞌthá-raꞌiin nájmi̱i i̱gi̱ꞌ mu̱phu̱ún mbá xúgíin xa̱bo̱. 42Mbá xúgíin xa̱bo̱ nipeꞌtso asndo ni̱gi̱ꞌmúú. 43A̱ꞌkhue̱n tsí naꞌsngúún Jesús ni̱gímbúu mbá gu̱wa̱ꞌ i̱jma̱ (12) ixtu gatíí xkuꞌxí rí nipíduun guma jamí i̱gi̱ꞌ. 44Jamí tsí nipeꞌtso ñajúún xó mbá witsu míl (5 000) wáa xa̱bekha.
Jesús na̱ka̱ nakhúu inuu iya a̱pha̱
(Mt 14.22-27; Jn 6.16-21)
45A̱ꞌkhue̱n mbá nacha̱ máꞌ Jesús niꞌthúún tsí naꞌsngúún rí ma̱tsimúu̱ ná ixe̱-rguwa, kajngó magóo̱ ginuu̱ ná Betsáida̱, rí ꞌgí ná i̱mba̱ kri̱doo iya. Xómáꞌ ikhaa̱ ninguanúu̱ xóó kajngó maꞌthán-ngawúu̱n xa̱bo̱ tsí mbaꞌiin. 46Ído̱ wámbo̱o̱ niꞌthán-ngawúu̱n xa̱bo̱, a̱ꞌkhue̱n nitsimuu̱ júba̱ kajngó maꞌthán-jáñuu̱ Ana̱ꞌlóꞌ. 47Ído̱ neꞌne jína máꞌ rá, ixe̱-rguwa na̱ka̱ máꞌ ne̱ ná ti̱kua̱pho̱o̱ ñañuu a̱pha̱, jamí mbáwíi Jesús ninguanúu ná ju̱ba̱ꞌ. 48A̱ꞌkhue̱n ndiꞌyoo Jesús rí maphú gakhe̱ igíꞌníí tsí naꞌsngúu̱n rí nuxmangua̱ꞌa̱n iya rí nagóó juñu̱ú ixe̱-rguwa, numuu rí ná nagóo̱, ikhín máꞌ i̱ꞌkha̱ gíñá ná inúu̱. Jamí ído̱ rí nangiyuu máꞌ ma̱tse rá, a̱ꞌkhue̱n ni̱ꞌkha̱ nakhúu Jesús ná inuu ñañuu a̱pha̱ ná nagóo̱, jamí ikhii̱n ni̱ju̱múu̱ rí ma̱nújngoo̱ ná inúu̱. 49Ído̱ ndiyáá tsí naꞌsngúu̱n rí na̱ꞌkhe̱e̱ nakhúu̱ ná inuu iya, a̱ꞌkhue̱n ni̱ju̱múu̱ rí mbáa tsiꞌyoo ñajuu̱n, jamí ni̱ndxa̱ꞌwa̱skee̱. 50Mbá xúgíi̱n máꞌ ndiyáa̱, ikhaa jngó phú nixúwúu̱nꞌ.
Xómáꞌ ikhaa̱ mbá nacha̱ máꞌ niꞌthúu̱n: «¡Ma̱xámíñalaꞌ, ikhúúnꞌ máꞌ ñajunꞌ! Gu̱ne̱ gakhe̱ a̱kia̱nꞌlaꞌ». 51A̱ꞌkhue̱n nitsimuu Jesús ná ixe̱-rguwa rí gatii̱n, jamí ni̱we̱je̱ rí naxnúu gíñá. Xómáꞌ ikhii̱n, namíñúu̱ jamí phú namakúu̱n, 52ga̱jma̱á numuu rí xóó máꞌ gúkú a̱kuíi̱n, jamí xóó máꞌ táfruꞌúu̱n rí phú wáá niríga̱ ga̱jma̱á guma.
Jesús naꞌne-thanúú xa̱bo̱ tsí najáñúú ná Jenesarét
(Mt 14.34-36)
53Ído̱ wámbúu̱n ni̱ki̱dii̱n ná inuu ñañuu a̱pha̱, a̱ꞌkhue̱n niguáꞌníi̱ ná rawuun mbayuu Jenesarét, ikhín máꞌ ni̱ru̱ꞌwáa̱ ixe̱-rguwa. 54Ído̱ rí inu máꞌ naguátaa̱n ná ixe̱-rguwa, a̱ꞌkhue̱n núkho̱ máꞌ ni̱gu̱ma-nuwi̱in Jesús nene̱ xa̱bo̱. 55A̱ꞌkhue̱n nigóó-ragáñúú xa̱bo̱ mbá nawa̱a̱ numbaa rúꞌkhue̱n, jamí ni̱gíꞌdíi̱n niguwá judii̱n ga̱jma̱á agú tsí najáñúú. Nagóo̱ asndo náá máꞌ nu̱dxawíi̱n rí ngrigo̱o̱ꞌ Jesús. 56Jamí asndo náá máꞌ na̱ka̱ Jesús, ná triga̱ xuajen laka, ná triga̱ xuajen mba̱ꞌwo̱, o ná triga̱ guꞌwá ná xanáá mbo̱ꞌ, nu̱skuíjii̱n ná jamba̱a̱ tsí najáñúú. Ído̱ rí nanújngoo Jesús ikhín, nuthán-jáñíi̱ rí maniñúu̱ rí mu̱xkajmee̱ maske asndo lájwíin rawuun xtíñuu̱. Jamí mbá xúgíin tsí nu̱xkajmaa̱, naꞌni̱i a̱kui̱ín.
ទើបបានជ្រើសរើសហើយ៖
Márko̱s 6: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.