Márko̱s 4
4
Ajngáa xkri̱da ga̱jma̱á numuu xa̱bo̱ tsí naꞌdu tsíga
(Mt 13.1-9; Lc 8.4-8)
1Mbu̱júꞌ máꞌ nigíꞌdu̱u̱n Jesús niꞌsngáá ná rawuun ñañuu a̱pha̱. A̱ꞌkhue̱n phú mbaꞌiin xa̱bo̱ ni̱gi̱mbúun mbá nawa̱a̱ inuu̱, ikhaa jngó nitsimuu̱ mbá ixe̱-rguwa rí na̱ka̱ inuu iya, jamí ni̱gi̱ꞌi̱i̱ ná awúun ne̱. Mbá xúgíin xa̱bo̱ wájun ná rawuun iya. 2Jamí phú mbaꞌa inii rí naꞌsngúu̱n xa̱bo̱ ga̱jma̱á majñu̱u̱ ajngáa xkri̱da. Xáꞌnii iꞌthúu̱n ná awúun rí naꞌsngáa̱:
3«Gu̱dxawíín májánlaꞌ ajngáa ríge̱ꞌ: Mbáa xa̱bo̱ nigájnuu ni̱ka̱ gáꞌdu tsíga. 4Ído̱ ni̱ka̱-rastrígo̱o̱ ne̱, mbá tikhu tsíga nifrigu ná rawuun jamba̱a̱. A̱ꞌkhue̱n niguwá ño̱ꞌo̱n nida̱a ne̱ niꞌpho̱. 5Mbá tikhu tsíga nifrigu ná majñu̱u̱ itsí, ná ra̱gíꞌdoo mba̱a̱ ju̱ba̱ꞌ. A̱ꞌkhue̱n rí wapha máꞌ nijráꞌán ne̱, numuu rí na̱nguá gíꞌdoo me̱jno̱ꞌ ju̱ba̱ꞌ. 6I̱ndo̱ó máꞌ numuu rí táxkuaꞌán me̱jno̱ꞌ ajmu̱u̱ ne̱, ikhaa jngó ído̱ ni̱ꞌkha̱ a̱kha̱ꞌ, nikha ne̱, jamí nijndoo ne̱. 7Mbá tikhu tsíga nifrigu ná majñu̱u̱ iná tsuwan. Xómáꞌ iná tsuwan ndiꞌya, a̱ꞌkhue̱n nikhá-roꞌoo inúu tsíga ído̱ nijráꞌán, jamí xkuaꞌnii tájma̱a̱ xndúu ne̱. 8Xómáꞌ i̱ꞌwá tsíga nifrigu ná inuu ju̱ba̱ꞌ rí máján, jamí phú nijma̱a̱ xndúu ne̱, numuu rí nijráꞌán ne̱ jamí ndiꞌya ne̱. Ríga̱ tsíga rí nijma̱a̱ mbá skíñú gu̱wa̱ꞌ (30) tsígoo rí mbóó máꞌ waꞌdu, ríga̱ rí nijma̱a̱ atsú skíñú (60) tsígoo, jamí ríga̱ rí nijma̱a̱ witsu skíñú (100) tsígoo rí mbóó máꞌ tsíga waꞌdu». 9A̱ꞌkhue̱n Jesús niꞌthúu̱n: «Tsí gíꞌdoo ñaꞌwuun rí madxawuun, gadxawuu̱n».
Náá numuu kajngó Jesús naꞌsngáá ga̱jma̱á majñu̱u̱ ajngáa xkri̱da
(Mt 13.10-17; Lc 8.9-10)
10Ído̱ ninguanúu i̱mba̱wíi Jesús, a̱ꞌkhue̱n rí xa̱bo̱ tsí wájun mijngi inuu̱ gajmíí tsí mbá gu̱wa̱ꞌ i̱jmi̱i naꞌsngúu̱n, ni̱ra̱xíi̱ ga̱jma̱á numuu ajngáa xkri̱da rí niꞌthée̱n. 11A̱ꞌkhue̱n niꞌthúu̱n: «Ikháanꞌlaꞌ nijanálaꞌ rí ma̱fraꞌa̱ꞌlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ndaꞌyoo̱ ga̱jma̱á numuu rí xáne naꞌthán-ñájúu̱n xa̱bo̱. Xómáꞌ tsí i̱ꞌwíin xa̱bo̱ rá, mbá xúgíí na̱thúu̱nlo̱ꞌ ga̱jma̱á majñu̱u̱ ajngáa xkri̱da. 12Kajngó maske máꞌ nu̱ya̱xi̱i̱, mu̱xúyáa̱ rí ríga̱. Maske máꞌ nu̱dxawíi̱n, ma̱xáfruꞌúu̱n rí nu̱dxawíi̱n, kajngó ma̱xáthangii̱n ná inuu Ana̱ꞌlóꞌ, ni máꞌ Ana̱ꞌlóꞌ ma̱xáꞌne mba̱a̱ a̱kui̱in jaꞌyoo aꞌkhúu̱n».
Jesús naꞌthán dí iyoo gáꞌthán ajngáa xkri̱da ga̱jma̱á numuu tsíga
(Mt 13.18-23; Lc 8.11-15)
13Jamí niꞌthúu̱n mangaa: «Á tsífraꞌa̱ꞌlaꞌ ajngáa xkri̱da ríge̱ꞌ dxe̱ꞌ. Xáne lá gáfraꞌa̱ꞌlaꞌ i̱ꞌwá ajngáa xkri̱da xúꞌkhue̱n rá. 14Tsí naꞌdu tsíga, ikhaa ñajuun xó mbáa xa̱bo̱ tsí naꞌthán-ráꞌa ajngóo Ana̱ꞌlóꞌ. 15Mbá tikhuun xa̱bo̱ jaꞌñúú xómá tsíga rí waꞌdu ná rawuun jamba̱a̱. Nithúu̱n ajngóo Ana̱ꞌlóꞌ, jamí ído̱ rí wámbúu̱n ni̱dxawíi̱n ne̱, mbá nacha̱ máꞌ na̱ꞌkha̱ Satanás, naríya̱aꞌ ne̱ ná awúun a̱kuíi̱n. 16I̱ꞌwíin xa̱bo̱ jaꞌñúú xómá tsíga rí waꞌdu ná majñu̱u̱ itsí. Ikhiin tsúꞌkhue̱n nu̱dxawíín ajngóo Ana̱ꞌlóꞌ, jamí phú gagi a̱kuíi̱n, mbá nacha̱ máꞌ nu̱dri̱guíi̱ ne̱. 17I̱ndo̱ó máꞌ numuu rí na̱nguá gíwúu̱n ne̱ me̱jno̱ꞌ, ikhaa jngó tsígajñúu̱. Ído̱ na̱ꞌkha̱ gaꞌkho̱ inúu̱ o nixkúu̱n ga̱jma̱á numuu ajngóo Ana̱ꞌlóꞌ mbo̱ꞌ, a̱ꞌkhue̱n mbáko máꞌ nu̱ni̱ꞌñáa̱ rí ni̱dxawíi̱n. 18I̱ꞌwíin xa̱bo̱ jaꞌñúú xómá tsíga rí waꞌdu ná majñu̱u̱ iná tsuwan. Ikhiin tsúꞌkhue̱n nu̱dxawíín ajngóo Ana̱ꞌlóꞌ, 19i̱ndo̱ó máꞌ numuu rí naxná-gamiéjúu̱n eꞌne rí ndaꞌñúu̱ ná numbaa ríge̱ꞌ, jamí na̱gu̱ma-nduwii̱n eꞌne mbúkha̱a̱, xúꞌkhue̱n máꞌ eꞌne i̱ꞌwá rí na̱ni̱gúu̱nꞌ ma̱guáꞌdáa̱ guéño. Ikhaa rúꞌkhue̱n naꞌne rí ma̱khá-múꞌúun ajngóo Ana̱ꞌlóꞌ rí ni̱dxawíi̱n, jamí nda̱a̱ nimbá rí máján ini̱i̱. 20Xómáꞌ i̱ꞌwíin xa̱bo̱ jaꞌñúú xómá tsíga rí waꞌdu ná ju̱ba̱ꞌ rí máján. Ikhiin tsúꞌkhue̱n nu̱dxawíín ajngóo Ana̱ꞌlóꞌ jamí nu̱dri̱guíi̱ ne̱ ga̱jma̱á mbá jañii a̱kuíi̱n, a̱ꞌkhue̱n nuni̱i̱ rí máján xómá tsíga rí nijma̱a̱ mbá skíñú gu̱wa̱ꞌ tsígoo, rí nijma̱a̱ atsú skíñú tsígoo, jamí rí nijma̱a̱ witsu skíñú tsígoo rí mbóó máꞌ tsíga waꞌdu».
Ajngáa xkri̱da ga̱jma̱á numuu agu
(Lc 8.16-18)
21Jamí niꞌthúu̱n mangaa: «Á na̱ꞌkha̱ jiꞌyá agu kajngó ma̱ju̱góo ne̱ ga̱jma̱á mbá e̱jna̱, o ma̱gi̱da̱ꞌ ne̱ ná agoo xi̱yoo dxe̱ꞌ. Á ra̱ꞌkhá asndo tsída̱ꞌ i̱rigu ne̱ kajngó ma̱mbiꞌi-taꞌa ne̱ rá. 22Numuu rí mbá xúgíí rí ríga̱ ngu̱ꞌwo̱o̱, ma̱ga̱nú tsiakhe̱ mbiꞌi rí ma̱kujma ne̱. Xúꞌkhue̱n máꞌ mbá xúgíí rí ríga̱ ngu̱ꞌwo̱o̱ ná mijína, ma̱ga̱nú tsiakhe̱ mbiꞌi rí ma̱kujma ne̱ gáꞌne agu. 23Xí mbáa gíꞌdoo ñaꞌwuun rí madxawuun, gadxawuu̱n».
24Mangaa máꞌ niꞌthúu̱n: «Gu̱ꞌgí máján idxa̱ꞌlaꞌ rí nu̱dxawíínlaꞌ. Numuu rí awan rí nu̱dxawíínlaꞌ ga̱jma̱á, ikhaa máꞌ awan rúꞌkhue̱n gájanálaꞌ rí ma̱fraꞌa̱ꞌlaꞌ, jamí asndo ma̱janálaꞌ i̱tha̱án xóó. 25Numuu rí xa̱bo̱ tsí gíꞌdoo máꞌ, ikhaa tsúꞌkhue̱n ma̱janáá xóó. Jamí tsí nda̱a̱ rí gíꞌdoo rá, ma̱ga̱ta-jáꞌyúu̱ asndo rí gíꞌdoo̱ máꞌ».
Ajngáa xkri̱da ga̱jma̱á numuu xó na̱ka̱-raꞌya tsíga
26Niꞌthán xóó Jesús: «Xáꞌnii jaꞌnii naꞌthán-ñájúún xa̱bo̱ Ana̱ꞌlóꞌ, jaꞌnii ne̱ xómá ído̱ rí mbáa xa̱bo̱ nastrígo̱o̱ tsíga ná inuu ju̱ba̱ꞌ. 27Ído̱ wámbo̱o̱ niꞌdu tsíga xa̱bo̱, a̱ꞌkhue̱n nabóo̱ mi̱guii̱ jamí na̱tu̱xii̱ i̱mba̱ mbiꞌi. Xkuaꞌnii nanújngoo mbiꞌi jamí mbroꞌon, a̱ꞌkhue̱n ni tsíꞌyoo xa̱bo̱ xáne najráꞌán tsíga ni máꞌ xáne na̱ka̱-ragaja̱a̱ ne̱. 28Numuu rí ikhaa máꞌ ju̱ba̱ꞌ eꞌne rí ndaꞌya ne̱. Ginii inúu ne̱ iꞌya, a̱ꞌkhue̱n na̱ꞌkha̱ iñuu ne̱, nda̱wa̱á natíí tsígoo ne̱ ná iña. 29Ído̱ nikhi̱i̱ máꞌ tsíga rá, a̱ꞌkhue̱n mbá nacha̱ máꞌ nothon xta̱wo̱o̱ ne̱ ga̱jma̱á chíde̱ xngaa, numuu rí ni̱ga̱nú máꞌ mbiꞌi rí ma̱gi̱xi̱i ne̱».
Ajngáa xkri̱da ga̱jma̱á numuu ya̱ꞌwo̱ mostása̱
(Mt 13.31-32; Lc 13.18-19)
30Mangaa máꞌ niꞌthée̱n: «Dí ñajuun ma̱goo ma̱jmalóꞌ kajngó mu̱ꞌthánlóꞌ xáne Ana̱ꞌlóꞌ naꞌthán-ñájúún xa̱bo̱ róꞌ. Náá rí ajngáa xkri̱da ma̱goo ma̱jmalóꞌ kajngó mu̱ꞌthánlóꞌ ga̱jma̱á numuu ne̱ róꞌ. 31Xómá tsígoo ya̱ꞌwo̱ rí mbiꞌyuu mostása̱ jaꞌnii ne̱, numuu rí ído̱ nidu ne̱ ná inuu ju̱ba̱ꞌ, tsíga rúꞌkhue̱n i̱tha̱án lájwíin ne̱ inuu mbá xúgíí tsíga rí ríga̱ ná tsu̱du̱u̱ numbaa. 32I̱ndo̱ó máꞌ numuu rí nda̱wa̱á ído̱ wámba̱ waꞌdu ne̱ rá, ndaꞌya ne̱ jamí i̱tha̱án mba̱a̱ ne̱ eꞌne xó rí mbá xúgíí ixu̱u̱ ya̱ꞌwo̱, xúꞌkhue̱n máꞌ phú mbijwa̱ꞌ ñawúun ne̱ eꞌne, ikhaa jngó asndo ño̱ꞌo̱n nandoo nune̱ xáñúú ná agoo xka̱mixoo ne̱».
Jesús naꞌsngáá mbáko máꞌ ga̱jma̱á ajngáa xkri̱da
(Mt 13.34-35)
33Maphú mbaꞌa ajngáa xkri̱da rí xkuaꞌnii najmuu Jesús ído̱ rí naꞌsngúu̱n xa̱bo̱ ajngóo Ana̱ꞌlóꞌ, xómá rí nandoo ma̱fruꞌúu̱n. 34Mbáko máꞌ ajngáa xkri̱da ijmuu̱ ído̱ rí naꞌthúu̱n xa̱bo̱. Xómáꞌ tsí naꞌsngúu̱n, naꞌthán-makúu̱n mbá xúgíí ído̱ rí júwe̱e̱ꞌ ndakhúu̱n.
Jesús naꞌne rí ma̱wi̱ji̱i gíñá ná inuu ñañuu a̱pha̱
(Mt 8.23-27; Lc 8.22-25)
35Ído̱ ni̱ka̱-raꞌne wakhíí rí mbiꞌi máꞌ rúꞌkhue̱n, a̱ꞌkhue̱n Jesús niꞌthúún tsí naꞌsngúún: «Ga̱ki̱dáánlóꞌ i̱mba̱ mbíꞌthóo ñañuu a̱pha̱». 36A̱ꞌkhue̱n niniñúu̱ xa̱bo̱ tsí phú mbaꞌiin, jamí xómá gíwa̱nꞌ Jesús ná awúun ixe̱-rguwa, nigóo̱ juya̱a̱. Mangaa máꞌ ni̱ka̱ i̱ꞌwá ixe̱-rguwa ga̱jma̱á nindxúu̱n. 37A̱ꞌkhue̱n mbá nacha̱ máꞌ ni̱tu̱xu̱u̱ꞌ mi̱ndaꞌkho gíñá ná inuu iya. Jamí iya rí narmbúxe̱-mina̱ꞌ najni̱í ne̱ ná awúun ixe̱-rguwa eꞌne gíñá, rí asndo nanguaꞌán ne̱. 38Xómáꞌ Jesús kri̱ga̱a̱ naꞌgu ná xtuun ixe̱-rguwa, kathóꞌoo mbá xtíin idxu̱u̱. A̱ꞌkhue̱n ni̱xkaxii̱, jamí nitháa̱n: «¡Táta̱ naꞌsngáá! Á tsíxná-gamiéjwaanꞌ rí na̱rmáꞌáánlóꞌ ná awúun iya rá».
39A̱ꞌkhue̱n ni̱tu̱xu̱u̱ꞌ Jesús, nixná-ñájuu̱n gíñá, jamí niꞌthúu̱n ñañuu a̱pha̱: «¡Atatsíñáá! ¡Wíí gáꞌne!». A̱ꞌkhue̱n núkho̱ máꞌ ni̱we̱je̱ gíñá, jamí mbá xúgíí nibáa-wíyuu ná inuu iya. 40A̱ꞌkhue̱n niꞌthúu̱n tsí naꞌsngúu̱n: «Náá numuu kajngó namíñalaꞌ guéño róꞌ. Xóó máꞌ na̱nguá wéje̱ a̱kia̱nꞌlaꞌ ju̱yo̱ꞌ ráanꞌ».
41A̱ꞌkhue̱n i̱tha̱án nimíñúu̱, jamí ni̱ra̱xe̱-mijnée̱: «Tsáa xa̱bi̱i̱ ñajuun tsíge̱ꞌ, rí asndo gíñá jamí iya nanimbo̱o̱ꞌ rí naꞌthán róꞌ».
ទើបបានជ្រើសរើសហើយ៖
Márko̱s 4: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.