Márko̱s 16
16
Ndiꞌyáa mbiꞌyuu Jesús
(Mt 28.1-10; Lc 24.1-12; Jn 20.1-10)
1Ído̱ ninújngoo máꞌ mbiꞌi rí nduya̱a xu̱únꞌ xa̱bo̱ judío̱, a̱ꞌkhue̱n María̱ tsí na̱ꞌkha̱ ná Magdála̱ xúꞌkhue̱n máꞌ Salomé, jamí María̱ nánée Santiágo̱, nitsi̱i̱ iyoo iná rí maphú ndaa thawuun, kajngó magóo̱ gútsuaꞌaa̱n ne̱ Jesús. 2Jamí maphú miꞌcha̱ rí mbiꞌi ginii rí ndayáa semána̱, nigóo̱ ná iñá-wajíín ído̱ rí inu máꞌ na̱ꞌkha̱ a̱kha̱ꞌ. 3Jamí nagóo̱-ruthan-mijnée̱: «Tsáa gáyáxe̱ngaa itsí rí júgoo rawuun iñá-wajen rá». 4Ído̱ niguáꞌníi̱ ikhín, a̱ꞌkhue̱n ni̱ya̱xi̱i̱ jamí ndiyáa̱ rí itsí rí maphú mba̱a̱, ni̱gi̱xe̱ngaa máꞌ ne̱, ka̱ma ne̱ janíí.
5Ído̱ ni̱tu̱ꞌwúu̱n ná awúun iñá-wajen, a̱ꞌkhue̱n ndiyáa̱ mbáa dxáma júwuun mbá xtíin miꞌxá mbijwa̱ꞌ, ꞌgíi̱ ná ñawún mújúu̱n ikhii̱n. A̱ꞌkhue̱n maphú nimíñúú go̱ꞌo̱. 6Xómáꞌ ikhaa̱ niꞌthúu̱n: «Ma̱xámíñalaꞌ. Ikháanꞌlaꞌ ndu̱ꞌyáalaꞌ Jesús tsí na̱ꞌkha̱ ná Nasarét, tsí waꞌdujmaa ná ixe̱ krúsi̱. Ndiyáa̱ mbiꞌyuu̱, ndawa̱a̱ ge̱jyoꞌ. Gu̱ya̱xe̱laꞌ ná nibóo xuyuu̱. 7I̱ndo̱ó máꞌ numuu rí xúge̱ꞌ rá, gaꞌgualaꞌ gúthu̱únlaꞌ tsí niꞌsngúu̱n, ga̱jma̱á máꞌ Pédro̱ mangaa. Gu̱thúu̱nlaꞌ rí ginii̱ Jesús i̱ka̱ inalaꞌ ná Galiléa̱. Ikhín gúyáa̱laꞌ, xómá rí niꞌthánlaꞌ wapha».
8A̱ꞌkhue̱n go̱ꞌo̱ tsúꞌkhue̱n nigájna̱á-ragáñúú ná iñá-wajen, numuu rí nixúwúu̱nꞌ mi̱ndaꞌkho asndo naguaꞌii̱n. Jamí asndo nimbáa xa̱bo̱ tútháa̱n, numuu rí phú namíñúu̱.
Jesús nasngájma-mina̱ꞌ inuu María̱ tsí na̱ꞌkha̱ ná Magdála̱#16.9-20 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa rí júgua-raꞌa ga̱jma̱á [...].
(Jn 20.11-18)
[ 9Ído̱ ndiyáa mbiꞌyuu Jesús rí miꞌcha̱ mbiꞌi ginii rí ndayáa semána̱, ginii nisngájma-mine̱e̱ꞌ inuu María̱ tsí na̱ꞌkha̱ ná Magdála̱, tsí ni̱gu̱wíi̱n mbá juwiin gíñá ꞌguéen ná xuyuu nákhí wapha. 10A̱ꞌkhue̱n ni̱kaa̱ gáꞌthúu̱n tsí ningrigo̱o̱ꞌ gajmíí Jesús, tsí júwa̱ꞌ najínúú jamí nu̱mbi̱ya̱ꞌ. 11Xómáꞌ ikhii̱n, ído̱ ni̱dxawíi̱n rí Jesús xtáa ndaꞌya jamí María̱ ndiꞌyoo̱ máꞌ, tánimbúu̱n juyáa̱.
Jesús nasngájma-mina̱ꞌ inúú a̱jmi̱i tsí niꞌsngúún
(Lc 24.13-35)
12Nda̱wa̱á i̱mba̱ xó jaꞌnii nisngájma-mine̱e̱ꞌ ná inúú a̱jmi̱i tsí niꞌsngúu̱n, tsí inu nagóó ná xanáá. 13A̱ꞌkhue̱n ikhii̱n nithangii̱n gúthúu̱n i̱ꞌwíin a̱nguíi̱n, ni máꞌ tsúꞌkhue̱n tánimbúu̱n juñúu̱.
Jesús naxná-ngáwúún tsí niꞌsngúún rí jaꞌyoo muni̱i̱
(Mt 28.16-20; Lc 24.36-49; Jn 20.19-23)
14Nda̱wa̱á jayu nisngájma-mina̱ꞌ Jesús ná inúú tsí mbá gu̱wa̱ꞌ i̱mbi̱in (11) niꞌsngúu̱n, awúun máꞌ rí gatii̱n napiꞌtsii̱. A̱ꞌkhue̱n ikhaa̱ nixprígúu̱n numuu rí tsínimbúu̱n jamí rí phú gúkú a̱kuíi̱n, numuu rí tánimbúu̱n juñúu̱ tsí ndiyáá máꞌ rí ndiyáa̱ mbiꞌyuu̱. 15A̱ꞌkhue̱n niꞌthúu̱n: «Gaꞌgualaꞌ mbá xúgíí numbaa, jamí gu̱tha̱n-rúꞌúúnlaꞌ mbá xúgíin xa̱bo̱ ajngáa máján. 16Jamí tsí ma̱nimbo̱o̱ꞌ jaꞌyoo ajngáa máján, xúꞌkhue̱n máꞌ mi̱xúꞌdu-maꞌáa̱n ná awúun iya, tsúꞌkhue̱n ma̱jríya̱a̱ꞌ. Xómáꞌ tsí ma̱xánimbo̱o̱ꞌ rá, tsúꞌkhue̱n mamínu̱u̱ꞌ jámuu ga̱jma̱á numuu aꞌkhúun. 17Jamí ikhaa rí phú wáá ríge̱ꞌ mune̱ tsí nanimbu̱únꞌ juyeꞌ: ga̱jma̱á mbiꞌyuꞌ mu̱xkawíi̱n gíñá ꞌguéen, muthee̱n i̱ꞌwá ajngáa rí nuthan xa̱bo̱, 18mu̱ra̱tuu̱n a̱bo̱ꞌ ga̱jma̱á ñawúu̱n, xí mu̱wa̱a̱n mbá thana xkawe̱ꞌ, nda̱a̱ rí gágíꞌníi̱ gáꞌne ne̱. Xúꞌkhue̱n máꞌ mu̱xkra̱mii̱ xa̱bo̱ tsí najáñúú, jamí ikhii̱n ma̱ꞌnii̱ a̱kuíi̱n».
Jesús na̱ka̱a mikhuíí
(Lc 24.50-53)
19Nda̱wa̱á ído̱ rí wámbo̱o̱ Táta̱ Jesús niꞌthúún tsí naꞌsngúún, a̱ꞌkhue̱n wa̱tri̱guíi̱ ri̱jma̱á ná mikhuíí, jamí ni̱gi̱ꞌi̱i̱ ná ñawún mújúun Ana̱ꞌlóꞌ. 20A̱ꞌkhue̱n ikhii̱n nigájnúu̱ nigóo̱ gúthan-raꞌee̱ a̱pha̱ mbá xúgíí inuu numbaa. Jamí Táta̱ Jesús nambáñúu̱ rí muni̱i̱ rí phú wáá, rí nasngájma rí gakon ajngáa máján rí nuthee̱n. Xkuaꞌnii gáꞌne.]
ទើបបានជ្រើសរើសហើយ៖
Márko̱s 16: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.