Lúka̱s 22
22
Júda̱s na̱gi̱ꞌdoo mbá awan gajmíí xa̱bo̱ ede̱ rí maxnáxi̱i̱ Jesús
(Mt 26.1-5,14-16; Mc 14.1-2,10-11; Jn 11.45-53)
1Nangiyuu máꞌ ndxa̱a̱ rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ, ikhaa máꞌ ndxa̱a̱ rí mbiꞌyuu Páskua̱. 2Xómáꞌ dxakuun tsí gíꞌdoo numúú jamí xa̱bo̱ tsí nusngáá xtángoo nu̱ndxa̱ꞌwa̱-mijnée̱ xáne gúni̱i̱ rí mu̱xíya̱a̱ Jesús, numuu rí namíñúu̱ eꞌne rí mune̱ xa̱bo̱ xuajen. 3A̱ꞌkhue̱n ni̱to̱ꞌo̱o̱ Satanás xuyuu Júda̱s, ikhaa máꞌ tsí nuxna-mbiꞌíi̱ Iskarióte̱ mangaa, jamí mbáa máꞌ tsí mbá gu̱wa̱ꞌ i̱jmi̱i (12) naꞌsngúún Jesús ñajuu̱n. 4A̱ꞌkhue̱n Júda̱s ni̱ka̱ gáꞌñúú dxakuun tsí gíꞌdoo numúú gajmíí tsí nuthan-ñajúún tsí nu̱ña̱wa̱án guꞌwá dxákuun, jamí niꞌthán-mine̱e̱ꞌ gajmíi̱ xáne gáꞌnii̱ rí maxnáxi̱i̱ Jesús ná inúu̱. 5Xómáꞌ ikhii̱n phú nidxu a̱kuíi̱n rí xkuaꞌnii ni̱dxawíi̱n, ikhaa jngó niguáꞌdáa̱ awan rí muxnáa̱ mbúkha̱a̱ Júda̱s. 6Máján neꞌne a̱kui̱in Júda̱s rí xkuaꞌnii, ikhaa jngó ninguanúu rí maxnáxi̱i̱ Jesús ído̱ gáꞌne gaꞌchú, kajngó mu̱xúyáá xa̱bo̱.
Nakueꞌtso-añuu Jesús gajmíí tsí naꞌsngúún
(Mt 26.17-29; Mc 14.12-25; Jn 13.21-30; 1 Co 11.23-26)
7Ni̱ga̱nú mbiꞌi rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ, ído̱ rí jaꞌyoo ma̱ja̱ñúu a̱ꞌdá-mógó tsí mu̱phi̱í xa̱bo̱ ná awúun ndxa̱a̱ Páskua̱. 8A̱ꞌkhue̱n Jesús nixuꞌmaa Pédro̱ ga̱jma̱á Juáán jamí niꞌthúu̱n:
―Aꞌgua gúne̱-mbáníílaꞌ ná mu̱peꞌtso-añalóꞌ ndxa̱a̱ Páskua̱.
9A̱ꞌkhue̱n ikhii̱n ni̱ra̱xíi̱ Jesús:
―Náá iyaaꞌ rí mu̱ne̱-mbánííxo̱ꞌ ne̱ rá.
10A̱ꞌkhue̱n Jesús niriꞌñúu̱:
―Ído̱ gáta̱ꞌa̱ꞌlaꞌ ná xuajen, a̱ꞌkhue̱n mu̱xkamaalaꞌ mbáa xa̱bo̱ tsí jayá mbá raya gajno̱ꞌ iya. Gaꞌgualaꞌ tsu̱du̱u̱ asndo náá gáto̱ꞌo̱o̱ guꞌwá. 11Xáꞌnii gútha̱ánlaꞌ táta̱ tsí guꞌwóo: “Xáꞌnii iraxe̱ Táta̱ tsí naꞌsngáá: ‘Náá ꞌgí gaꞌchú awúun guꞌwáaꞌ ná ma̱goo ma̱kuéꞌtsó-añuꞌ Páskua̱ gajmíꞌ tsí na̱sngúún rá’”. 12A̱ꞌkhue̱n ikhaa̱ masngájmalaꞌ mbá guꞌwá mba̱a̱ ri̱jma̱á, ná ríga̱ máꞌ na̱ma̱ñuu mbá xúgíí. Gu̱ne̱-májánlaꞌ ikhín rí mu̱ꞌpho-añalóꞌ.
13A̱ꞌkhue̱n nigóo̱, jamí ni̱xkamaa̱ xómá jayu waꞌthúu̱n neꞌne Jesús. Ikhín máꞌ nene̱-mbáníi̱ rí mu̱peꞌtso-añúu̱ ndxo̱o̱ Páskua̱.
14Ído̱ ni̱ga̱nú wakhíí rí mu̱peꞌtso-añúu̱ rá, ni̱ge̱ꞌe̱ Jesús gajmíí tsí maxúngui̱inꞌ. 15A̱ꞌkhue̱n niꞌthúu̱n: «Maphú neꞌne a̱kui̱nꞌ rí ma̱kuéꞌtsó-añuꞌ Páskua̱ ríge̱ꞌ ga̱jma̱á nindxa̱ꞌlaꞌ, awúun rí xóó tsíga̱nú rí ma̱mínu̱u̱ꞌlo̱ꞌ. 16Numuu na̱tha̱nꞌlaꞌ rí náxáthangu̱ún ma̱kuéꞌtsó-añuꞌ xáꞌnii, asndo gámbánuu rí nandoo gáꞌthán ne̱ ná naꞌthán-ñájun Ana̱ꞌlóꞌ».
17A̱ꞌkhue̱n Jesús niwatuun mbá rgúxi̱ iyoo úba̱ rí ni̱ga̱yu̱u̱ꞌ, niríguu̱ la gamaku inuu Ana̱ꞌlóꞌ, jamí niꞌthée̱n: «Awanlaꞌ ríge̱ꞌ, jamí gu̱xpíꞌthá-mijnálaꞌ ne̱, 18numuu na̱tha̱nꞌlaꞌ rí náxágánꞌlo̱ꞌ iyoo úba̱ rí ni̱ga̱yu̱u̱ꞌ, asndo gága̱nú mbiꞌi rí Ana̱ꞌlóꞌ maꞌthán-ñájúún xa̱bo̱».
19Nda̱wa̱á niwatuu̱n mbá guma bopho jamí niríguu̱ la gamaku inuu Ana̱ꞌlóꞌ. A̱ꞌkhue̱n nixpíꞌthángaa̱ ne̱, nixnúu̱ ne̱ mu̱phi̱i̱, jamí niꞌthée̱n: «Guma ríge̱ꞌ ñajuun xuyuꞌ rí kixnáxe̱ ga̱jma̱á numalaꞌ. Gu̱ne̱-ri̱ya̱aꞌlaꞌ ríge̱ꞌ kajngó ma̱rmáꞌáan a̱kia̱nꞌlaꞌ ju̱yo̱ꞌ».
20Ikhaa máꞌ niꞌnii̱ ga̱jma̱á rgúxi̱ rí gajno̱ꞌ iyoo úba̱ rí ni̱ga̱yu̱u̱ꞌ ído̱ wámbo̱o̱ nikueꞌtso-añuu̱, niwatuu̱n ne̱ jamí niꞌthée̱n: «Ikhaa iyoo úba̱ rí ni̱ga̱yu̱u̱ꞌ ríge̱ꞌ ñajuun awan nuxe̱ꞌ rí na̱gu̱ma ga̱jma̱á iꞌdiuꞌ, rí na̱ga̱dí-rámuu ga̱jma̱á numalaꞌ.
21»I̱ndo̱ó máꞌ numuu rí a̱gu̱ya̱álaꞌ rí mbóó ꞌgí ga̱jma̱á nindxu̱ꞌ nakueꞌtso tsí maxnáxu̱únꞌlo̱ꞌ ná inúú xa̱bo̱ sia̱nꞌ. 22Gakon máꞌ rí A̱dée Xa̱bo̱ Numbaa, ma̱gíꞌnuu mbá xúgíí rí wéje̱ máꞌ rí ma̱gíꞌnuu̱, i̱ndo̱ó máꞌ numuu rí ¡maphú mingínáa tsí maxnáxi̱i̱!».
23A̱ꞌkhue̱n tsí naꞌsngúún Jesús ni̱gíꞌdíi̱n ni̱ra̱xe̱-mijnée̱, tsáa ñajuun tsí ma̱ꞌne rúꞌkhue̱n.
Tsí i̱wa̱á gíꞌdoo numuu ñajuun tsí naꞌne-mba̱ꞌwi̱in xa̱bo̱
24Xúꞌkhue̱n máꞌ mangaa ni̱gíꞌdíi̱n ni̱tsa̱ñúu̱ ga̱jma̱á numuu tsáa tsí ikhii̱n i̱wa̱á gíꞌdoo numuu. 25Xómáꞌ Jesús niꞌthúu̱n: «Tsí ñajúún thúngaa ná numbaa ríge̱ꞌ, nuxna-ñajúún xa̱bo̱ xuajen xómá rí naꞌne a̱kuíi̱n ikhii̱n. Jamí xa̱bo̱ ñajun tsúꞌkhue̱n, nandúún rí ma̱ꞌne mbiꞌñúú “xa̱bo̱ tsí máján ene̱”. 26Xómáꞌ ikháanꞌlaꞌ rá, ma̱xáꞌne jaꞌñáaꞌlaꞌ xkuaꞌnii. A̱ꞌkhue̱n gakon, tsí i̱wa̱á gíꞌdoo numuu e̱ne̱laꞌ, ga̱ꞌne-mine̱e̱ꞌ asndo xó rí na̱nguá gíꞌdoo numuu̱. Jamí tsí naxná-ñájun, ga̱ꞌne-mine̱e̱ꞌ asndo xó rí mbáa tsí naꞌne-mba̱ꞌwu̱un xa̱bo̱. 27Tsáa tsí i̱wa̱á gíꞌdoo numuu róꞌ: tsí na̱ge̱ꞌe̱ ma̱kueꞌtso, o tsí nastráma xúba̱ mu̱peꞌtso xa̱bo̱ dxe̱ꞌ. Á ra̱ꞌkhá i̱wa̱á gíꞌdoo numuu tsí na̱ge̱ꞌe̱ ma̱kueꞌtso rá. Xómáꞌ ikhúúnꞌ, xtáá ga̱jma̱á nindxa̱ꞌlaꞌ asndo xómá tsí nastráma xúba̱ rí mu̱peꞌtso xa̱bo̱.
28»Ikháanꞌlaꞌ nijuwalaꞌ ga̱jma̱á nindxu̱ꞌ awúun mbá xúgíí jamínu̱ꞌ rí nika-ranújngoꞌlo̱ꞌ. 29Ikhaa numuu rúꞌkhue̱n, na̱xna̱ꞌlaꞌ tsiakhe̱ rí mu̱tha̱n-ñájunlaꞌ ga̱jma̱á nindxu̱ꞌ, xómá rí Tátéꞌ nixníꞌ tsiakhe̱ rí ma̱tha̱n-ñájun mangúúnꞌ. 30Kajngó phú gagi a̱kia̱nꞌlaꞌ mu̱peꞌtsolaꞌ ga̱jma̱á nindxu̱ꞌ ído̱ rí ma̱tha̱n-ñájun. Xúꞌkhue̱n máꞌ ma̱trigáanꞌlaꞌ mu̱tha̱n-ñájun jamí mu̱ra̱jwa̱ꞌlaꞌ ga̱jma̱á numúú mbá gu̱wa̱ꞌ i̱jma̱ (12) kuthuun i̱ji̱in Israél.
Jesús naꞌthán rí Pédro̱ maꞌthán rí tsíꞌne-nuwii̱n
(Mt 26.31-35; Mc 14.27-31; Jn 13.36-38)
31Ríge̱ꞌ mangaa niꞌthán Táta̱:#22.31 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ríge̱ꞌ mangaa niꞌthán Táta̱:».
―Simón, Simón, na̱tha̱a̱nꞌlo̱ꞌ rí Satanás ni̱nda̱ꞌa̱ rí mada-taꞌáa̱nꞌlaꞌ xómá nida-taꞌán ixí iña. 32Xómáꞌ ikhúúnꞌ ni̱tha̱n-jáñuu máꞌ Ana̱ꞌlóꞌ ga̱jma̱á numaaꞌ, kajngó ma̱xáta̱tsi̱ꞌñáá rí wéje̱ a̱kia̱anꞌ ná inuꞌ. Jamí ído̱ nithanga̱án máꞌ ná inuꞌ rá, atambáñúú a̱ngia̱anꞌ rí ma̱wajún gúkúún mangiin».
33Xómáꞌ Simón niꞌthán:
―Táta̱, xtáá na̱ma̱ñuꞌ rí ma̱ꞌgá géjwa̱nꞌ, jamí asndo ma̱ja̱ñúꞌ mangaa ga̱jma̱á nindxa̱a̱ꞌ.
34A̱ꞌkhue̱n niꞌthán Jesús:
―Pédro̱, na̱tha̱a̱nꞌlo̱ꞌ rí mbroꞌon máꞌ ríge̱ꞌ awúun rí xóó tsíndxaꞌwá mba̱xtá, ma̱ra̱tha̱n atsú nothon rí tsíthane̱-nuwúún.
Nangiyuu máꞌ rí mamínu̱u̱ꞌ Jesús
35A̱ꞌkhue̱n Jesús niraxúu̱n tsí naꞌsngúu̱n:
―Nákhí ni̱xu̱ꞌmáaꞌlaꞌ rí mu̱ꞌgua gútha̱n-ráꞌalaꞌ, jamí ni̱tha̱nꞌlaꞌ rí mu̱xúya̱laꞌ ná ma̱ti mbúkha̱a̱, ni máꞌ ama, ni máꞌ cháda, á ríga̱ rí ndiꞌyálaꞌ rá.
A̱ꞌkhue̱n ikhii̱n ni̱riꞌñee̱:
―Na̱nguá, nitháan.
36A̱ꞌkhue̱n Jesús niꞌthúu̱n:
―Xómáꞌ xúge̱ꞌ rá, tsí gíꞌdoo ná ma̱ti mbúkha̱a̱, gayée̱ ne̱ ma̱ꞌgee̱, tsí gíꞌdoo ama, gayée̱ ne̱. Jamí tsí nda̱a̱ chíde̱ eꞌne, ga̱ngu̱jwe̱e̱ xtátsii̱n kajngó ma̱goo maꞌtsi̱i̱ mbá chíde̱. 37Numuu rí ndaꞌyóo ma̱mba̱núu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ ga̱jma̱á numuꞌ: “Niñíi̱ asndo xómá na̱gu̱mii xa̱bo̱ tsí ra̱májíin”.#22.37 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 53.12. Numuu rí mbá xúgíí rí ka̱ma naꞌthán ga̱jma̱á numuꞌ, ma̱mba̱núu ne̱.
38A̱ꞌkhue̱n nithan tsí naꞌsngúu̱n:
―Táta̱, ge̱jyoꞌ ríga̱ a̱jma̱ chíde̱.
A̱ꞌkhue̱n ikhaa̱ niꞌthée̱n:
―¡Mbá xkuaꞌnii máꞌ rá!
Jesús naꞌthán-jáñuu Ana̱ꞌlóꞌ ná Jetsemaní
(Mt 26.36-46; Mc 14.32-42)
39A̱ꞌkhue̱n nigájnuu Jesús ni̱ka̱ ná júba̱ rí mbiꞌyuu Olíbo̱, xómá naꞌne jayuu̱. Nigóó ga̱jma̱á nindxu̱u̱ tsí naꞌsngúu̱n. 40Ído̱ niguáꞌníi̱ ikhín, a̱ꞌkhue̱n ikhaa̱ niꞌthúu̱n: «Gu̱tha̱n-jáñíílaꞌ Ana̱ꞌlóꞌ, ra̱ꞌkhá ma̱gu̱ma-rájáanꞌlaꞌ mu̱ne̱ aꞌkhán».
41A̱ꞌkhue̱n ikhaa̱ niríya̱ꞌ-mine̱e̱ꞌ, ni̱ke̱e̱ mbá xó mba̱ꞌ na̱ka̱ itsí rí nada ga̱jma̱á ñawúun xa̱bo̱, ikhín nismáti̱go̱o̱, jamí nigíꞌdu̱u̱n niꞌthán-jáñuu̱ Ana̱ꞌlóꞌ. 42Xáꞌnii niꞌthée̱n: «Táa, xí ikháánꞌ nandaaꞌ, athane̱-jríñu̱úꞌ inuu jamínu̱ꞌ ríge̱ꞌ. I̱ndo̱ó máꞌ numuu rí ma̱xáꞌne xómá rí nandoꞌ ikhúúnꞌ, rí ga̱mba̱núu xómá rí naꞌne a̱kia̱anꞌ ikháánꞌ». 43A̱ꞌkhue̱n nisngájma-mina̱ꞌ mbáa ánje̱l tsí na̱ꞌkha̱ mikhuíí inuu̱, kajngó maxnúu̱ tsiakhe̱. 44Awúun máꞌ rí xtáa̱ namínu̱u̱ꞌ mi̱ndaꞌkho, i̱wa̱á gakhe̱ iꞌthán-jáñuu̱ Ana̱ꞌlóꞌ, jamí phú gakhe̱ najwiyaa̱, asndo mbá máján iꞌdi jaꞌnii iya rí nangutígú inuu̱ mbayíí.#22.43-44 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ kíxnuu 43 ga̱jma̱á 44.
45Ído̱ wámbo̱o̱ niꞌthán-jáñuu̱ Ana̱ꞌlóꞌ, ni̱wi̱jii̱, a̱ꞌkhue̱n ni̱ꞌkhaa̱ gáꞌñúu̱ tsí naꞌsngúu̱n. Nunii̱ nixkamii̱ ga̱jma̱á numuu rí phú níꞌngúu̱n eꞌne rí najínúu̱. 46A̱ꞌkhue̱n niꞌthúu̱n: «Náá numuu kajngó nu̱nu̱ꞌlaꞌ róꞌ. Awaxu̱unꞌlaꞌ jamí gu̱tha̱n-jáñíílaꞌ Ana̱ꞌlóꞌ, ra̱ꞌkhá ma̱gu̱ma-rájáanꞌlaꞌ mu̱ne̱ aꞌkhán».
Júda̱s naxnáxi̱i̱ Jesús
(Mt 26.47-56; Mc 14.43-50; Jn 18.2-11)
47Awúun máꞌ rí xóó naꞌthán Jesús ríge̱ꞌ, a̱ꞌkhue̱n niguáꞌnú mbaꞌiin xa̱bo̱. Tsí mbiꞌyuu Júda̱s, mbáa máꞌ tsí mbá gu̱wa̱ꞌ i̱jmi̱i (12) naꞌsngúún Jesús, na̱ꞌkha̱ ginii jayá ikhúu̱n. Ikhaa tsúꞌkhue̱n nixuꞌma-mina̱ꞌ ná wéje̱ Jesús kajngó maraꞌnuu inuu̱ ído̱ rí maraxii̱. 48Xómáꞌ Jesús niꞌthúu̱n: «Júda̱s, nataxnáxi̱i̱ A̱dée Xa̱bo̱ Numbaa ga̱jma̱á mbóó rí natraꞌníí inuu̱ ráanꞌ».
49Ído̱ tsí naꞌsngúún Jesús ndiyáá rí na̱ꞌkha̱ ma̱ri̱gá, a̱ꞌkhue̱n nithee̱n: «Táta̱, á mu̱xnúu̱xo̱ꞌ ga̱jma̱á chíde̱ dxe̱ꞌ». 50A̱ꞌkhue̱n rí mbáa tsí ikhii̱n neꞌne-jámbi̱yu̱u̱ꞌ mbáa yumbée tsí jayá idxu̱ún dxakuun, ni̱ro̱thon-ríguíi̱ ñaꞌwun mújúun. 51Xómáꞌ Jesús niꞌthán: «Máján rá. Gu̱ni̱ꞌñúu̱laꞌ». A̱ꞌkhue̱n nixkajmee̱ ñaꞌwuun tsí nijámbi̱yu̱u̱ꞌ, jamí núkho̱ niꞌni̱i ne̱.
52A̱ꞌkhue̱n Jesús niꞌthúún dxakuun tsí gíꞌdoo numúú gajmíí tsí nuthan-ñajúún tsí nu̱ña̱wa̱án guꞌwá dxákuun, xúꞌkhue̱n máꞌ xa̱bo̱ buanuu tsí niguwá gúrtuwii̱n: «Á ku̱ꞌwá ñajunꞌ i̱ya̱álaꞌ dxe̱ꞌ, kajngó asndo chíde̱ ga̱jma̱á ixe̱ traꞌa̱ ñawánlaꞌ iguwalaꞌ. 53Tsitsíí nixtáá ga̱jma̱á nindxa̱ꞌlaꞌ ná guꞌwá dxákuun, jamí na̱nguá ne̱ne̱laꞌ rí mu̱rtuwúúnlaꞌ. I̱ndo̱ó máꞌ numuu rí ni̱ga̱nú máꞌ mbiꞌi rí mu̱rtuwúúnlaꞌ rí xúge̱ꞌ rá, ído̱ rí gíꞌdoo ski̱yu̱u̱ꞌ rí mijína».
Pédro̱ naꞌthán rí tsíꞌne-nuwiin Jesús
(Mt 26.57-58,69-75; Mc 14.53-54,66-72; Jn 18.12-18,25-27)
54A̱ꞌkhue̱n ni̱rtuwii̱n Jesús jamí nigóo̱ juya̱a̱ ná guꞌwóo tsí jayá idxu̱ún dxakuun. Xómáꞌ Pédro̱ na̱ka̱ tsu̱du̱u̱ Jesús, tsíngua̱ꞌ, tsíngua̱ꞌ i̱ke̱e̱. 55Ikhín ná ti̱kua̱pho̱o̱ rixo̱o̱ guꞌwóo dxakuun, ni̱ꞌgí xa̱bo̱ agu kajngó ma̱thagúu̱n, jamí nitrigii̱n mbá nawa̱a̱ rawuun ne̱. Pédro̱ mangaa ni̱ge̱ꞌe̱ ga̱jma̱á nindxúu̱n. 56Mbáa a̱ꞌgo̱ yumbáá ndiꞌyoo rí ꞌgí nathaguu Pédro̱, a̱ꞌkhue̱n niyaxu̱u̱ mújúu̱n jamí niꞌthée̱n: «Tsíge̱ꞌ mangaa ngrigo̱o̱ꞌ ga̱jma̱á nindxu̱u̱ tsí nikhuáa».
57Xómáꞌ Pédro̱ niꞌthán rí ra̱gákon rúꞌkhue̱n: «Nána̱, ikhúúnꞌ tsíne̱-núwíinlo̱ꞌ xa̱bo̱ tsúꞌkhue̱n».
58Wáa i̱mbégo eꞌne, ni̱gu̱ma-nuwii̱n neꞌne i̱mba̱a̱ꞌ xa̱bo̱. Ikhaa tsúꞌkhue̱n niꞌthúun Pédro̱:
―Ikháánꞌ mangáánꞌ jimáá tsu̱dúu̱n.
Xómáꞌ Pédro̱ niꞌthán:
―Na̱nguá, táta̱, ra̱ꞌkhúúnꞌlo̱ꞌ.
59Ninújngoo máꞌ xí mbá ajwa̱nꞌ wáa, a̱ꞌkhue̱n i̱mba̱a̱ꞌ xa̱bo̱ niꞌthán: «Maphú ikhaa xa̱bo̱ tsíge̱ꞌ ngrigo̱o̱ꞌ ga̱jma̱á nindxu̱u̱ mangaa, numuu rí ikhaa̱ mangaa̱ na̱ꞌkhe̱e̱ ná numbaa Galiléa̱».
60Xómáꞌ Pédro̱ niꞌthán: «Táta̱, na̱nguá i̱yo̱o̱ dí ñajuun irathán».
Awúun máꞌ rí xóó naꞌthée̱n, núkho̱ nindxaꞌwá mbáa mba̱xtá. 61A̱ꞌkhue̱n nitangayii Táta̱, niyaxu̱u̱ Pédro̱. Xómáꞌ Pédro̱ núkho̱ ni̱rmáꞌáan a̱kuii̱n rí waꞌtháa̱n neꞌne Táta̱: «Mbroꞌon máꞌ ríge̱ꞌ awúun rí xóó tsíndxaꞌwá mba̱xtá, ma̱ra̱tha̱n atsú nothon rí tsíthane̱-nuwúún». 62A̱ꞌkhue̱n niríya̱ꞌ-mina̱ꞌ Pédro̱ janíí, jamí ni̱mbi̱ye̱e̱ꞌ jínúu̱.
Xa̱bo̱ tsí ku̱ra̱tuun ajwa̱nꞌ naxkruꞌúún juyáá Jesús
(Mt 26.67-68; Mc 14.65)
63Xa̱bo̱ tsí nu̱ña̱wa̱án Jesús, nu̱tsi̱jmaa̱ jamí nuxnáa̱. 64Nu̱ruguáa̱ iduu ga̱jma̱á xtíin, nuxnáa̱ inuu,#22.64 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «nuxnáa̱ inuu». jamí nutháa̱n: «Arathán tsáa nixnáaꞌ, mbu̱ya̱áxo̱ꞌ». 65Nuthan-xkawíi̱ꞌ, jamí ríge̱ꞌ rí ñúꞌún itháa̱n.
Na̱ka̱ jiꞌyáa Jesús ná inúú xa̱bo̱ buanuu ede̱
(Mt 26.59-66; Mc 14.55-64; Jn 18.19-24)
66Ído̱ ni̱mbiꞌi, niwi̱in xa̱bo̱ buanuu drígu̱ún xa̱bo̱ judío̱, ikhiin máꞌ tsí ñajúún dxakuun tsí gíꞌdoo numúú jamí xa̱bo̱ tsí nusngáá xtángoo. A̱ꞌkhue̱n nigóo̱ juya̱a̱ Jesús ná inúú xa̱bo̱ buanuu ede̱. Ikhín ni̱ra̱xíi̱:
67―Arathánxo̱ꞌ, á ikháánꞌ ñajwaanꞌ Krísto̱ dxe̱ꞌ.
A̱ꞌkhue̱n Jesús niriꞌñúu̱:
―Xí ma̱tha̱nꞌlaꞌ rí ikhúúnꞌ ñajunꞌ, ma̱xánimba̱ꞌlaꞌ ju̱yo̱ꞌ. 68Jamí xí ma̱ra̱xa̱ꞌlaꞌ, ni mu̱xúriꞌñuꞌlaꞌ ni máꞌ mu̱xúni̱ꞌñúꞌlaꞌ.#22.68 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ni máꞌ mu̱xúni̱ꞌñúꞌlaꞌ». 69I̱ndo̱ó máꞌ numuu rí asndo nákhí máꞌ xúge̱ꞌ rá, ma̱ge̱ꞌe̱ A̱dée Xa̱bo̱ Numbaa ná ñawún mújúun Ana̱ꞌlóꞌ, tsí gíꞌdoo mbá xúgíí tsiakhe̱.
70A̱ꞌkhue̱n rí mbá xúgíi̱n nitháa̱n Jesús:
―Xí xkuaꞌnii, ikháánꞌ máꞌ ñajwaanꞌ A̱dée Ana̱ꞌlóꞌ xúꞌkhue̱n róꞌ.
A̱ꞌkhue̱n Jesús niꞌthúu̱n:
―Ikháanꞌ máꞌ i̱tha̱nlaꞌ rí ikhúúnꞌ ñajunꞌlo̱ꞌ.
71A̱ꞌkhue̱n ikhii̱n nithee̱n: «Náá lá rí i̱mba̱ iyalóꞌ rí muthanlóꞌ xa̱bo̱ rá. Numuu rí jmína̱áꞌlóꞌ máꞌ ni̱dxawíínlóꞌ rí niríye̱e̱ꞌ rawuu̱n».
ទើបបានជ្រើសរើសហើយ៖
Lúka̱s 22: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
Lúka̱s 22
22
Júda̱s na̱gi̱ꞌdoo mbá awan gajmíí xa̱bo̱ ede̱ rí maxnáxi̱i̱ Jesús
(Mt 26.1-5,14-16; Mc 14.1-2,10-11; Jn 11.45-53)
1Nangiyuu máꞌ ndxa̱a̱ rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ, ikhaa máꞌ ndxa̱a̱ rí mbiꞌyuu Páskua̱. 2Xómáꞌ dxakuun tsí gíꞌdoo numúú jamí xa̱bo̱ tsí nusngáá xtángoo nu̱ndxa̱ꞌwa̱-mijnée̱ xáne gúni̱i̱ rí mu̱xíya̱a̱ Jesús, numuu rí namíñúu̱ eꞌne rí mune̱ xa̱bo̱ xuajen. 3A̱ꞌkhue̱n ni̱to̱ꞌo̱o̱ Satanás xuyuu Júda̱s, ikhaa máꞌ tsí nuxna-mbiꞌíi̱ Iskarióte̱ mangaa, jamí mbáa máꞌ tsí mbá gu̱wa̱ꞌ i̱jmi̱i (12) naꞌsngúún Jesús ñajuu̱n. 4A̱ꞌkhue̱n Júda̱s ni̱ka̱ gáꞌñúú dxakuun tsí gíꞌdoo numúú gajmíí tsí nuthan-ñajúún tsí nu̱ña̱wa̱án guꞌwá dxákuun, jamí niꞌthán-mine̱e̱ꞌ gajmíi̱ xáne gáꞌnii̱ rí maxnáxi̱i̱ Jesús ná inúu̱. 5Xómáꞌ ikhii̱n phú nidxu a̱kuíi̱n rí xkuaꞌnii ni̱dxawíi̱n, ikhaa jngó niguáꞌdáa̱ awan rí muxnáa̱ mbúkha̱a̱ Júda̱s. 6Máján neꞌne a̱kui̱in Júda̱s rí xkuaꞌnii, ikhaa jngó ninguanúu rí maxnáxi̱i̱ Jesús ído̱ gáꞌne gaꞌchú, kajngó mu̱xúyáá xa̱bo̱.
Nakueꞌtso-añuu Jesús gajmíí tsí naꞌsngúún
(Mt 26.17-29; Mc 14.12-25; Jn 13.21-30; 1 Co 11.23-26)
7Ni̱ga̱nú mbiꞌi rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ, ído̱ rí jaꞌyoo ma̱ja̱ñúu a̱ꞌdá-mógó tsí mu̱phi̱í xa̱bo̱ ná awúun ndxa̱a̱ Páskua̱. 8A̱ꞌkhue̱n Jesús nixuꞌmaa Pédro̱ ga̱jma̱á Juáán jamí niꞌthúu̱n:
―Aꞌgua gúne̱-mbáníílaꞌ ná mu̱peꞌtso-añalóꞌ ndxa̱a̱ Páskua̱.
9A̱ꞌkhue̱n ikhii̱n ni̱ra̱xíi̱ Jesús:
―Náá iyaaꞌ rí mu̱ne̱-mbánííxo̱ꞌ ne̱ rá.
10A̱ꞌkhue̱n Jesús niriꞌñúu̱:
―Ído̱ gáta̱ꞌa̱ꞌlaꞌ ná xuajen, a̱ꞌkhue̱n mu̱xkamaalaꞌ mbáa xa̱bo̱ tsí jayá mbá raya gajno̱ꞌ iya. Gaꞌgualaꞌ tsu̱du̱u̱ asndo náá gáto̱ꞌo̱o̱ guꞌwá. 11Xáꞌnii gútha̱ánlaꞌ táta̱ tsí guꞌwóo: “Xáꞌnii iraxe̱ Táta̱ tsí naꞌsngáá: ‘Náá ꞌgí gaꞌchú awúun guꞌwáaꞌ ná ma̱goo ma̱kuéꞌtsó-añuꞌ Páskua̱ gajmíꞌ tsí na̱sngúún rá’”. 12A̱ꞌkhue̱n ikhaa̱ masngájmalaꞌ mbá guꞌwá mba̱a̱ ri̱jma̱á, ná ríga̱ máꞌ na̱ma̱ñuu mbá xúgíí. Gu̱ne̱-májánlaꞌ ikhín rí mu̱ꞌpho-añalóꞌ.
13A̱ꞌkhue̱n nigóo̱, jamí ni̱xkamaa̱ xómá jayu waꞌthúu̱n neꞌne Jesús. Ikhín máꞌ nene̱-mbáníi̱ rí mu̱peꞌtso-añúu̱ ndxo̱o̱ Páskua̱.
14Ído̱ ni̱ga̱nú wakhíí rí mu̱peꞌtso-añúu̱ rá, ni̱ge̱ꞌe̱ Jesús gajmíí tsí maxúngui̱inꞌ. 15A̱ꞌkhue̱n niꞌthúu̱n: «Maphú neꞌne a̱kui̱nꞌ rí ma̱kuéꞌtsó-añuꞌ Páskua̱ ríge̱ꞌ ga̱jma̱á nindxa̱ꞌlaꞌ, awúun rí xóó tsíga̱nú rí ma̱mínu̱u̱ꞌlo̱ꞌ. 16Numuu na̱tha̱nꞌlaꞌ rí náxáthangu̱ún ma̱kuéꞌtsó-añuꞌ xáꞌnii, asndo gámbánuu rí nandoo gáꞌthán ne̱ ná naꞌthán-ñájun Ana̱ꞌlóꞌ».
17A̱ꞌkhue̱n Jesús niwatuun mbá rgúxi̱ iyoo úba̱ rí ni̱ga̱yu̱u̱ꞌ, niríguu̱ la gamaku inuu Ana̱ꞌlóꞌ, jamí niꞌthée̱n: «Awanlaꞌ ríge̱ꞌ, jamí gu̱xpíꞌthá-mijnálaꞌ ne̱, 18numuu na̱tha̱nꞌlaꞌ rí náxágánꞌlo̱ꞌ iyoo úba̱ rí ni̱ga̱yu̱u̱ꞌ, asndo gága̱nú mbiꞌi rí Ana̱ꞌlóꞌ maꞌthán-ñájúún xa̱bo̱».
19Nda̱wa̱á niwatuu̱n mbá guma bopho jamí niríguu̱ la gamaku inuu Ana̱ꞌlóꞌ. A̱ꞌkhue̱n nixpíꞌthángaa̱ ne̱, nixnúu̱ ne̱ mu̱phi̱i̱, jamí niꞌthée̱n: «Guma ríge̱ꞌ ñajuun xuyuꞌ rí kixnáxe̱ ga̱jma̱á numalaꞌ. Gu̱ne̱-ri̱ya̱aꞌlaꞌ ríge̱ꞌ kajngó ma̱rmáꞌáan a̱kia̱nꞌlaꞌ ju̱yo̱ꞌ».
20Ikhaa máꞌ niꞌnii̱ ga̱jma̱á rgúxi̱ rí gajno̱ꞌ iyoo úba̱ rí ni̱ga̱yu̱u̱ꞌ ído̱ wámbo̱o̱ nikueꞌtso-añuu̱, niwatuu̱n ne̱ jamí niꞌthée̱n: «Ikhaa iyoo úba̱ rí ni̱ga̱yu̱u̱ꞌ ríge̱ꞌ ñajuun awan nuxe̱ꞌ rí na̱gu̱ma ga̱jma̱á iꞌdiuꞌ, rí na̱ga̱dí-rámuu ga̱jma̱á numalaꞌ.
21»I̱ndo̱ó máꞌ numuu rí a̱gu̱ya̱álaꞌ rí mbóó ꞌgí ga̱jma̱á nindxu̱ꞌ nakueꞌtso tsí maxnáxu̱únꞌlo̱ꞌ ná inúú xa̱bo̱ sia̱nꞌ. 22Gakon máꞌ rí A̱dée Xa̱bo̱ Numbaa, ma̱gíꞌnuu mbá xúgíí rí wéje̱ máꞌ rí ma̱gíꞌnuu̱, i̱ndo̱ó máꞌ numuu rí ¡maphú mingínáa tsí maxnáxi̱i̱!».
23A̱ꞌkhue̱n tsí naꞌsngúún Jesús ni̱gíꞌdíi̱n ni̱ra̱xe̱-mijnée̱, tsáa ñajuun tsí ma̱ꞌne rúꞌkhue̱n.
Tsí i̱wa̱á gíꞌdoo numuu ñajuun tsí naꞌne-mba̱ꞌwi̱in xa̱bo̱
24Xúꞌkhue̱n máꞌ mangaa ni̱gíꞌdíi̱n ni̱tsa̱ñúu̱ ga̱jma̱á numuu tsáa tsí ikhii̱n i̱wa̱á gíꞌdoo numuu. 25Xómáꞌ Jesús niꞌthúu̱n: «Tsí ñajúún thúngaa ná numbaa ríge̱ꞌ, nuxna-ñajúún xa̱bo̱ xuajen xómá rí naꞌne a̱kuíi̱n ikhii̱n. Jamí xa̱bo̱ ñajun tsúꞌkhue̱n, nandúún rí ma̱ꞌne mbiꞌñúú “xa̱bo̱ tsí máján ene̱”. 26Xómáꞌ ikháanꞌlaꞌ rá, ma̱xáꞌne jaꞌñáaꞌlaꞌ xkuaꞌnii. A̱ꞌkhue̱n gakon, tsí i̱wa̱á gíꞌdoo numuu e̱ne̱laꞌ, ga̱ꞌne-mine̱e̱ꞌ asndo xó rí na̱nguá gíꞌdoo numuu̱. Jamí tsí naxná-ñájun, ga̱ꞌne-mine̱e̱ꞌ asndo xó rí mbáa tsí naꞌne-mba̱ꞌwu̱un xa̱bo̱. 27Tsáa tsí i̱wa̱á gíꞌdoo numuu róꞌ: tsí na̱ge̱ꞌe̱ ma̱kueꞌtso, o tsí nastráma xúba̱ mu̱peꞌtso xa̱bo̱ dxe̱ꞌ. Á ra̱ꞌkhá i̱wa̱á gíꞌdoo numuu tsí na̱ge̱ꞌe̱ ma̱kueꞌtso rá. Xómáꞌ ikhúúnꞌ, xtáá ga̱jma̱á nindxa̱ꞌlaꞌ asndo xómá tsí nastráma xúba̱ rí mu̱peꞌtso xa̱bo̱.
28»Ikháanꞌlaꞌ nijuwalaꞌ ga̱jma̱á nindxu̱ꞌ awúun mbá xúgíí jamínu̱ꞌ rí nika-ranújngoꞌlo̱ꞌ. 29Ikhaa numuu rúꞌkhue̱n, na̱xna̱ꞌlaꞌ tsiakhe̱ rí mu̱tha̱n-ñájunlaꞌ ga̱jma̱á nindxu̱ꞌ, xómá rí Tátéꞌ nixníꞌ tsiakhe̱ rí ma̱tha̱n-ñájun mangúúnꞌ. 30Kajngó phú gagi a̱kia̱nꞌlaꞌ mu̱peꞌtsolaꞌ ga̱jma̱á nindxu̱ꞌ ído̱ rí ma̱tha̱n-ñájun. Xúꞌkhue̱n máꞌ ma̱trigáanꞌlaꞌ mu̱tha̱n-ñájun jamí mu̱ra̱jwa̱ꞌlaꞌ ga̱jma̱á numúú mbá gu̱wa̱ꞌ i̱jma̱ (12) kuthuun i̱ji̱in Israél.
Jesús naꞌthán rí Pédro̱ maꞌthán rí tsíꞌne-nuwii̱n
(Mt 26.31-35; Mc 14.27-31; Jn 13.36-38)
31Ríge̱ꞌ mangaa niꞌthán Táta̱:#22.31 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ríge̱ꞌ mangaa niꞌthán Táta̱:».
―Simón, Simón, na̱tha̱a̱nꞌlo̱ꞌ rí Satanás ni̱nda̱ꞌa̱ rí mada-taꞌáa̱nꞌlaꞌ xómá nida-taꞌán ixí iña. 32Xómáꞌ ikhúúnꞌ ni̱tha̱n-jáñuu máꞌ Ana̱ꞌlóꞌ ga̱jma̱á numaaꞌ, kajngó ma̱xáta̱tsi̱ꞌñáá rí wéje̱ a̱kia̱anꞌ ná inuꞌ. Jamí ído̱ nithanga̱án máꞌ ná inuꞌ rá, atambáñúú a̱ngia̱anꞌ rí ma̱wajún gúkúún mangiin».
33Xómáꞌ Simón niꞌthán:
―Táta̱, xtáá na̱ma̱ñuꞌ rí ma̱ꞌgá géjwa̱nꞌ, jamí asndo ma̱ja̱ñúꞌ mangaa ga̱jma̱á nindxa̱a̱ꞌ.
34A̱ꞌkhue̱n niꞌthán Jesús:
―Pédro̱, na̱tha̱a̱nꞌlo̱ꞌ rí mbroꞌon máꞌ ríge̱ꞌ awúun rí xóó tsíndxaꞌwá mba̱xtá, ma̱ra̱tha̱n atsú nothon rí tsíthane̱-nuwúún.
Nangiyuu máꞌ rí mamínu̱u̱ꞌ Jesús
35A̱ꞌkhue̱n Jesús niraxúu̱n tsí naꞌsngúu̱n:
―Nákhí ni̱xu̱ꞌmáaꞌlaꞌ rí mu̱ꞌgua gútha̱n-ráꞌalaꞌ, jamí ni̱tha̱nꞌlaꞌ rí mu̱xúya̱laꞌ ná ma̱ti mbúkha̱a̱, ni máꞌ ama, ni máꞌ cháda, á ríga̱ rí ndiꞌyálaꞌ rá.
A̱ꞌkhue̱n ikhii̱n ni̱riꞌñee̱:
―Na̱nguá, nitháan.
36A̱ꞌkhue̱n Jesús niꞌthúu̱n:
―Xómáꞌ xúge̱ꞌ rá, tsí gíꞌdoo ná ma̱ti mbúkha̱a̱, gayée̱ ne̱ ma̱ꞌgee̱, tsí gíꞌdoo ama, gayée̱ ne̱. Jamí tsí nda̱a̱ chíde̱ eꞌne, ga̱ngu̱jwe̱e̱ xtátsii̱n kajngó ma̱goo maꞌtsi̱i̱ mbá chíde̱. 37Numuu rí ndaꞌyóo ma̱mba̱núu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ ga̱jma̱á numuꞌ: “Niñíi̱ asndo xómá na̱gu̱mii xa̱bo̱ tsí ra̱májíin”.#22.37 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 53.12. Numuu rí mbá xúgíí rí ka̱ma naꞌthán ga̱jma̱á numuꞌ, ma̱mba̱núu ne̱.
38A̱ꞌkhue̱n nithan tsí naꞌsngúu̱n:
―Táta̱, ge̱jyoꞌ ríga̱ a̱jma̱ chíde̱.
A̱ꞌkhue̱n ikhaa̱ niꞌthée̱n:
―¡Mbá xkuaꞌnii máꞌ rá!
Jesús naꞌthán-jáñuu Ana̱ꞌlóꞌ ná Jetsemaní
(Mt 26.36-46; Mc 14.32-42)
39A̱ꞌkhue̱n nigájnuu Jesús ni̱ka̱ ná júba̱ rí mbiꞌyuu Olíbo̱, xómá naꞌne jayuu̱. Nigóó ga̱jma̱á nindxu̱u̱ tsí naꞌsngúu̱n. 40Ído̱ niguáꞌníi̱ ikhín, a̱ꞌkhue̱n ikhaa̱ niꞌthúu̱n: «Gu̱tha̱n-jáñíílaꞌ Ana̱ꞌlóꞌ, ra̱ꞌkhá ma̱gu̱ma-rájáanꞌlaꞌ mu̱ne̱ aꞌkhán».
41A̱ꞌkhue̱n ikhaa̱ niríya̱ꞌ-mine̱e̱ꞌ, ni̱ke̱e̱ mbá xó mba̱ꞌ na̱ka̱ itsí rí nada ga̱jma̱á ñawúun xa̱bo̱, ikhín nismáti̱go̱o̱, jamí nigíꞌdu̱u̱n niꞌthán-jáñuu̱ Ana̱ꞌlóꞌ. 42Xáꞌnii niꞌthée̱n: «Táa, xí ikháánꞌ nandaaꞌ, athane̱-jríñu̱úꞌ inuu jamínu̱ꞌ ríge̱ꞌ. I̱ndo̱ó máꞌ numuu rí ma̱xáꞌne xómá rí nandoꞌ ikhúúnꞌ, rí ga̱mba̱núu xómá rí naꞌne a̱kia̱anꞌ ikháánꞌ». 43A̱ꞌkhue̱n nisngájma-mina̱ꞌ mbáa ánje̱l tsí na̱ꞌkha̱ mikhuíí inuu̱, kajngó maxnúu̱ tsiakhe̱. 44Awúun máꞌ rí xtáa̱ namínu̱u̱ꞌ mi̱ndaꞌkho, i̱wa̱á gakhe̱ iꞌthán-jáñuu̱ Ana̱ꞌlóꞌ, jamí phú gakhe̱ najwiyaa̱, asndo mbá máján iꞌdi jaꞌnii iya rí nangutígú inuu̱ mbayíí.#22.43-44 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ kíxnuu 43 ga̱jma̱á 44.
45Ído̱ wámbo̱o̱ niꞌthán-jáñuu̱ Ana̱ꞌlóꞌ, ni̱wi̱jii̱, a̱ꞌkhue̱n ni̱ꞌkhaa̱ gáꞌñúu̱ tsí naꞌsngúu̱n. Nunii̱ nixkamii̱ ga̱jma̱á numuu rí phú níꞌngúu̱n eꞌne rí najínúu̱. 46A̱ꞌkhue̱n niꞌthúu̱n: «Náá numuu kajngó nu̱nu̱ꞌlaꞌ róꞌ. Awaxu̱unꞌlaꞌ jamí gu̱tha̱n-jáñíílaꞌ Ana̱ꞌlóꞌ, ra̱ꞌkhá ma̱gu̱ma-rájáanꞌlaꞌ mu̱ne̱ aꞌkhán».
Júda̱s naxnáxi̱i̱ Jesús
(Mt 26.47-56; Mc 14.43-50; Jn 18.2-11)
47Awúun máꞌ rí xóó naꞌthán Jesús ríge̱ꞌ, a̱ꞌkhue̱n niguáꞌnú mbaꞌiin xa̱bo̱. Tsí mbiꞌyuu Júda̱s, mbáa máꞌ tsí mbá gu̱wa̱ꞌ i̱jmi̱i (12) naꞌsngúún Jesús, na̱ꞌkha̱ ginii jayá ikhúu̱n. Ikhaa tsúꞌkhue̱n nixuꞌma-mina̱ꞌ ná wéje̱ Jesús kajngó maraꞌnuu inuu̱ ído̱ rí maraxii̱. 48Xómáꞌ Jesús niꞌthúu̱n: «Júda̱s, nataxnáxi̱i̱ A̱dée Xa̱bo̱ Numbaa ga̱jma̱á mbóó rí natraꞌníí inuu̱ ráanꞌ».
49Ído̱ tsí naꞌsngúún Jesús ndiyáá rí na̱ꞌkha̱ ma̱ri̱gá, a̱ꞌkhue̱n nithee̱n: «Táta̱, á mu̱xnúu̱xo̱ꞌ ga̱jma̱á chíde̱ dxe̱ꞌ». 50A̱ꞌkhue̱n rí mbáa tsí ikhii̱n neꞌne-jámbi̱yu̱u̱ꞌ mbáa yumbée tsí jayá idxu̱ún dxakuun, ni̱ro̱thon-ríguíi̱ ñaꞌwun mújúun. 51Xómáꞌ Jesús niꞌthán: «Máján rá. Gu̱ni̱ꞌñúu̱laꞌ». A̱ꞌkhue̱n nixkajmee̱ ñaꞌwuun tsí nijámbi̱yu̱u̱ꞌ, jamí núkho̱ niꞌni̱i ne̱.
52A̱ꞌkhue̱n Jesús niꞌthúún dxakuun tsí gíꞌdoo numúú gajmíí tsí nuthan-ñajúún tsí nu̱ña̱wa̱án guꞌwá dxákuun, xúꞌkhue̱n máꞌ xa̱bo̱ buanuu tsí niguwá gúrtuwii̱n: «Á ku̱ꞌwá ñajunꞌ i̱ya̱álaꞌ dxe̱ꞌ, kajngó asndo chíde̱ ga̱jma̱á ixe̱ traꞌa̱ ñawánlaꞌ iguwalaꞌ. 53Tsitsíí nixtáá ga̱jma̱á nindxa̱ꞌlaꞌ ná guꞌwá dxákuun, jamí na̱nguá ne̱ne̱laꞌ rí mu̱rtuwúúnlaꞌ. I̱ndo̱ó máꞌ numuu rí ni̱ga̱nú máꞌ mbiꞌi rí mu̱rtuwúúnlaꞌ rí xúge̱ꞌ rá, ído̱ rí gíꞌdoo ski̱yu̱u̱ꞌ rí mijína».
Pédro̱ naꞌthán rí tsíꞌne-nuwiin Jesús
(Mt 26.57-58,69-75; Mc 14.53-54,66-72; Jn 18.12-18,25-27)
54A̱ꞌkhue̱n ni̱rtuwii̱n Jesús jamí nigóo̱ juya̱a̱ ná guꞌwóo tsí jayá idxu̱ún dxakuun. Xómáꞌ Pédro̱ na̱ka̱ tsu̱du̱u̱ Jesús, tsíngua̱ꞌ, tsíngua̱ꞌ i̱ke̱e̱. 55Ikhín ná ti̱kua̱pho̱o̱ rixo̱o̱ guꞌwóo dxakuun, ni̱ꞌgí xa̱bo̱ agu kajngó ma̱thagúu̱n, jamí nitrigii̱n mbá nawa̱a̱ rawuun ne̱. Pédro̱ mangaa ni̱ge̱ꞌe̱ ga̱jma̱á nindxúu̱n. 56Mbáa a̱ꞌgo̱ yumbáá ndiꞌyoo rí ꞌgí nathaguu Pédro̱, a̱ꞌkhue̱n niyaxu̱u̱ mújúu̱n jamí niꞌthée̱n: «Tsíge̱ꞌ mangaa ngrigo̱o̱ꞌ ga̱jma̱á nindxu̱u̱ tsí nikhuáa».
57Xómáꞌ Pédro̱ niꞌthán rí ra̱gákon rúꞌkhue̱n: «Nána̱, ikhúúnꞌ tsíne̱-núwíinlo̱ꞌ xa̱bo̱ tsúꞌkhue̱n».
58Wáa i̱mbégo eꞌne, ni̱gu̱ma-nuwii̱n neꞌne i̱mba̱a̱ꞌ xa̱bo̱. Ikhaa tsúꞌkhue̱n niꞌthúun Pédro̱:
―Ikháánꞌ mangáánꞌ jimáá tsu̱dúu̱n.
Xómáꞌ Pédro̱ niꞌthán:
―Na̱nguá, táta̱, ra̱ꞌkhúúnꞌlo̱ꞌ.
59Ninújngoo máꞌ xí mbá ajwa̱nꞌ wáa, a̱ꞌkhue̱n i̱mba̱a̱ꞌ xa̱bo̱ niꞌthán: «Maphú ikhaa xa̱bo̱ tsíge̱ꞌ ngrigo̱o̱ꞌ ga̱jma̱á nindxu̱u̱ mangaa, numuu rí ikhaa̱ mangaa̱ na̱ꞌkhe̱e̱ ná numbaa Galiléa̱».
60Xómáꞌ Pédro̱ niꞌthán: «Táta̱, na̱nguá i̱yo̱o̱ dí ñajuun irathán».
Awúun máꞌ rí xóó naꞌthée̱n, núkho̱ nindxaꞌwá mbáa mba̱xtá. 61A̱ꞌkhue̱n nitangayii Táta̱, niyaxu̱u̱ Pédro̱. Xómáꞌ Pédro̱ núkho̱ ni̱rmáꞌáan a̱kuii̱n rí waꞌtháa̱n neꞌne Táta̱: «Mbroꞌon máꞌ ríge̱ꞌ awúun rí xóó tsíndxaꞌwá mba̱xtá, ma̱ra̱tha̱n atsú nothon rí tsíthane̱-nuwúún». 62A̱ꞌkhue̱n niríya̱ꞌ-mina̱ꞌ Pédro̱ janíí, jamí ni̱mbi̱ye̱e̱ꞌ jínúu̱.
Xa̱bo̱ tsí ku̱ra̱tuun ajwa̱nꞌ naxkruꞌúún juyáá Jesús
(Mt 26.67-68; Mc 14.65)
63Xa̱bo̱ tsí nu̱ña̱wa̱án Jesús, nu̱tsi̱jmaa̱ jamí nuxnáa̱. 64Nu̱ruguáa̱ iduu ga̱jma̱á xtíin, nuxnáa̱ inuu,#22.64 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «nuxnáa̱ inuu». jamí nutháa̱n: «Arathán tsáa nixnáaꞌ, mbu̱ya̱áxo̱ꞌ». 65Nuthan-xkawíi̱ꞌ, jamí ríge̱ꞌ rí ñúꞌún itháa̱n.
Na̱ka̱ jiꞌyáa Jesús ná inúú xa̱bo̱ buanuu ede̱
(Mt 26.59-66; Mc 14.55-64; Jn 18.19-24)
66Ído̱ ni̱mbiꞌi, niwi̱in xa̱bo̱ buanuu drígu̱ún xa̱bo̱ judío̱, ikhiin máꞌ tsí ñajúún dxakuun tsí gíꞌdoo numúú jamí xa̱bo̱ tsí nusngáá xtángoo. A̱ꞌkhue̱n nigóo̱ juya̱a̱ Jesús ná inúú xa̱bo̱ buanuu ede̱. Ikhín ni̱ra̱xíi̱:
67―Arathánxo̱ꞌ, á ikháánꞌ ñajwaanꞌ Krísto̱ dxe̱ꞌ.
A̱ꞌkhue̱n Jesús niriꞌñúu̱:
―Xí ma̱tha̱nꞌlaꞌ rí ikhúúnꞌ ñajunꞌ, ma̱xánimba̱ꞌlaꞌ ju̱yo̱ꞌ. 68Jamí xí ma̱ra̱xa̱ꞌlaꞌ, ni mu̱xúriꞌñuꞌlaꞌ ni máꞌ mu̱xúni̱ꞌñúꞌlaꞌ.#22.68 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ni máꞌ mu̱xúni̱ꞌñúꞌlaꞌ». 69I̱ndo̱ó máꞌ numuu rí asndo nákhí máꞌ xúge̱ꞌ rá, ma̱ge̱ꞌe̱ A̱dée Xa̱bo̱ Numbaa ná ñawún mújúun Ana̱ꞌlóꞌ, tsí gíꞌdoo mbá xúgíí tsiakhe̱.
70A̱ꞌkhue̱n rí mbá xúgíi̱n nitháa̱n Jesús:
―Xí xkuaꞌnii, ikháánꞌ máꞌ ñajwaanꞌ A̱dée Ana̱ꞌlóꞌ xúꞌkhue̱n róꞌ.
A̱ꞌkhue̱n Jesús niꞌthúu̱n:
―Ikháanꞌ máꞌ i̱tha̱nlaꞌ rí ikhúúnꞌ ñajunꞌlo̱ꞌ.
71A̱ꞌkhue̱n ikhii̱n nithee̱n: «Náá lá rí i̱mba̱ iyalóꞌ rí muthanlóꞌ xa̱bo̱ rá. Numuu rí jmína̱áꞌlóꞌ máꞌ ni̱dxawíínlóꞌ rí niríye̱e̱ꞌ rawuu̱n».
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.