Lúka̱s 20
20
Nitraxi̱í Jesús ga̱jma̱á numuu rí naꞌne
(Mt 21.23-27; Mc 11.27-33)
1Mbá mbiꞌi, Jesús gída̱ꞌ naꞌsngúún xa̱bo̱ ajngáa máján ná awúun guꞌwá dxákuun, a̱ꞌkhue̱n niguáꞌnú dxakuun tsí gíꞌdoo numúú, jamí xa̱bo̱ tsí nusngáá xtángoo gajmíí xa̱bo̱ buanuu. 2Ikhiin tsúꞌkhue̱n ni̱ra̱xi̱í Jesús:
―Náá ndiyá idxa̱a̱ꞌ rí nathane̱ mbá xúgíí ríge̱ꞌ róꞌ. Tsáa niꞌtháanꞌ rí xáꞌnii gátha̱ne̱ róꞌ.
3A̱ꞌkhue̱n Jesús niriꞌñúu̱:
―Ma̱ña̱ꞌlaꞌ mbá graxe̱ mangúúnꞌ, jamí gu̱riꞌñuꞌlaꞌ. 4Tsáa nixúngua̱a̱ꞌ Juáán rí maxúꞌdu-maꞌíin xa̱bo̱ ná awúun iya róꞌ. Ana̱ꞌlóꞌ, o xa̱bo̱ numbaa dxe̱ꞌ.
5A̱ꞌkhue̱n ikhii̱n ni̱gíꞌdíi̱n nithan-mijnée̱: «Xí mu̱ꞌthánlóꞌ: “Ana̱ꞌlóꞌ nixúngua̱a̱ꞌ”, a̱ꞌkhue̱n ikhaa̱ mariꞌñalóꞌ: “Náá numuu kajngó tánimba̱ꞌlaꞌ ju̱ya̱á rí naꞌthée̱n xúꞌkhue̱n róꞌ”. 6Xí mu̱ꞌthánlóꞌ rí xa̱bo̱ numbaa ni̱xu̱ngua̱a̱ꞌ Juáán, a̱ꞌkhue̱n rí mbá xúgíin xa̱bo̱ xuajen muxnalóꞌ ga̱jma̱á itsí, numuu rí mbá xúgíi̱n naꞌne jañii a̱kuíi̱n rí Juáán ninindxu̱u̱ mbáa xa̱bo̱ tsí ni̱gu̱wíjnga̱a ajngóo Ana̱ꞌlóꞌ». 7A̱ꞌkhue̱n ni̱riꞌñee̱:
―Tsíya̱áxo̱ꞌ tsáa nixúngua̱a̱ꞌ Juáán.
8Xómáꞌ Jesús niriꞌñúu̱:
―Ni máꞌ ikhúúnꞌ ma̱xátha̱nꞌlaꞌ náá ndi̱ya̱ idxu̱ꞌ rí na̱ne̱ ríge̱ꞌ.
Ajngáa xkri̱da ga̱jma̱á numúú xa̱bo̱ ra̱májíin tsí nu̱ñajwíín ju̱ba̱ꞌ
(Mt 21.33-44; Mc 12.1-11)
9A̱ꞌkhue̱n Jesús niꞌthúún xa̱bo̱ ajngáa xkri̱da ríge̱ꞌ: «Mbáa xa̱bo̱ niꞌdu ajmu̱u̱ úba̱ ná mbayuu, niniñuu̱ ne̱ ná ñawúún mbá tikhuun xa̱bo̱ tsí nu̱ñajwíín ju̱ba̱ꞌ, tsí muxnáa̱ tháan rí najma̱a̱ ná mbayuu̱. A̱ꞌkhue̱n nigájnuu̱ ni̱ke̱e̱, jamí phú mba̱yo̱ꞌ neꞌne ndawa̱a̱. 10Jamí ído̱ ni̱ga̱nú mbiꞌi rí nijma̱a̱ xndúu úba̱ rá, a̱ꞌkhue̱n nixúngua̱a̱ꞌ mbáa yumbée̱ ná inúú xa̱bo̱ tsúꞌkhue̱n kajngó ma̱grui̱gú rí jaꞌyoo ma̱janáa̱ ikhaa̱ ga̱jma̱á numuu úba̱ rí niꞌdii̱. Xómáꞌ xa̱bo̱ tsí nu̱ñajwíín ju̱ba̱ꞌ nixnáá mi̱ndaꞌkho yumbée̱, jamí nda̱a̱ rí jayá tsúꞌkhue̱n ni̱ꞌkha̱a nini̱i̱. 11A̱ꞌkhue̱n rí xa̱bo̱ tsí mbayuu nixúngua̱a̱ꞌ i̱mba̱a̱ꞌ yumbáá. Xómáꞌ xa̱bo̱ tsí nu̱ñajwíín ju̱ba̱ꞌ, nixnáa̱ mi̱ndaꞌkho yumbáá jamí nene̱-ngínáa̱. Xkuaꞌnii nda̱a̱ máꞌ rí jayá tsúꞌkhue̱n mangaa ni̱ꞌkha̱a nini̱i̱. 12A̱ꞌkhue̱n rí xa̱bo̱ tsí mbayuu nixúngua̱a̱ꞌ yumbáá tsí riatsíi. Xómáꞌ xa̱bo̱ tsí nu̱ñajwíín ju̱ba̱ꞌ, nene̱-jámbi̱yíi̱ꞌ yumbáá jamí ni̱xkriya̱a̱ꞌ.
13»A̱ꞌkhue̱n niꞌthán-mina̱ꞌ xa̱bo̱ tsí mbayuu: “Díne máꞌ gáne̱ rá. Ma̱xu̱ꞌmáa a̱ꞌdéꞌ tsí maphú nandoꞌ ja̱yo̱o̱ rámá. Á gáꞌne xí tsíge̱ꞌ tsí mbuya-makuíi̱ ído̱ gúyáa̱”. 14Xómáꞌ xa̱bo̱ tsí nu̱ñajwíín ju̱ba̱ꞌ, ído̱ ndiyáa̱ rí na̱ꞌkha̱ a̱dée xa̱bo̱ tsí mbayuu, a̱ꞌkhue̱n nithan-mijnée̱: “Ikhaa tsíge̱ꞌ ñajuun tsí ma̱nújnga̱a ñawúun mbaa ríge̱ꞌ. Gu̱xíya̱a̱lóꞌ kajngó ma̱nguanúu ne̱ ñawánlóꞌ”. 15A̱ꞌkhue̱n ni̱ríya̱a̱ꞌ ná rawuun mbayuu úba̱, jamí ni̱xíya̱a̱.
A̱ꞌkhue̱n niraxe̱ Jesús:
―Dí lá gágíꞌníí xa̱bo̱ tsúꞌkhue̱n gáꞌne táta̱ tsí mbayuu ñajuun ná ríga̱ ajmu̱u̱ úba̱, i̱ju̱ma̱ꞌlaꞌ rá. 16Ma̱ꞌgee̱ gágu̱díi̱n xa̱bo̱ tsúꞌkhue̱n, tsí nu̱ñajwíín ju̱ba̱ꞌ, jamí maniñúu̱ i̱ꞌwíin xa̱bo̱ mu̱ñajun mbayuu̱ ná ríga̱ ajmu̱u̱ úba̱».
Ído̱ ni̱dxawíín xa̱bo̱ rúꞌkhue̱n, a̱ꞌkhue̱n nithee̱n:
―¡Ana̱ꞌlóꞌ gáꞌne rí ni miꞌtsú ma̱xáríga̱ rúꞌkhue̱n!
17Xómáꞌ Jesús niyaxúu̱n, jamí niꞌthúu̱n:
―Dí iyoo gáꞌthán rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ xúꞌkhue̱n róꞌ:
“Ikhaa itsí rí ni̱ni̱ꞌñá-ti̱ga̱ xa̱bo̱ tsí nune̱ guꞌwá,
ikhaa ne̱ ninindxu̱u̱ itsí mba̱a̱ rí jayá ski̱yu̱u̱ꞌ rakhóo guꞌwá”.#20.17 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 118.22.
18Jámba̱a̱ xa̱bo̱ tsí ma̱xpátrámaa inuu itsí rúꞌkhue̱n, ma̱migaa. Jamí tsí ma̱ráka itsí rúꞌkhue̱n tsu̱du̱u̱, ma̱ꞌne i̱ꞌníi mbá jayii.
19Ído̱ nifruꞌu̱ún dxakuun tsí gíꞌdoo numúú jamí xa̱bo̱ tsí nusngáá xtángoo rí Jesús neꞌne ajngáa xkri̱da ríge̱ꞌ ga̱jma̱á numúu̱ ikhii̱n, a̱ꞌkhue̱n neꞌne a̱kuíi̱n rí mu̱rtuwii̱n. I̱ndo̱ó máꞌ numuu rí túrtuwii̱n, numuu rí namíñúu̱ ene̱ xa̱bo̱ xuajen.
Graxe̱ ga̱jma̱á numuu mbúkho̱o̱ guꞌwá-ñajun
(Mt 22.15-22; Mc 12.13-17)
20Nu̱ya̱xíi̱ máꞌ xúꞌkhue̱n Jesús, jamí ni̱xu̱ꞌmii̱ mbá tikhuun xa̱bo̱ tsí nu̱ne̱ rí xa̱bo̱ májíin ñajúún kajngó mu̱ña̱maa̱. Ndiñúu̱ gúni̱i̱ rí ma̱ngra̱ꞌaa Jesús ná ajngáa rí naꞌthán, kajngó ma̱goo mu̱rtuwii̱n jamí magóo̱ juya̱a̱ ná inuu xa̱bo̱ ñajun. 21Xa̱bo̱ tsí nu̱ña̱ma ni̱ra̱xíi̱:
―Táta̱ naꞌsngáá, ndu̱ya̱áxo̱ꞌ rí ikháánꞌ narathán-jmbaaꞌ jamí narasngáá i̱ndo̱ó máꞌ rí máján. Tsítraꞌwíin xa̱bo̱ tsí ma̱tha̱ne̱-nga̱ju̱ún, jamí narasngáá xómá rí nandoo Ana̱ꞌlóꞌ rí ma̱juwalóꞌ. 22Arathánxo̱ꞌ, á máján rí mu̱ne̱-númaxo̱ꞌ ná inuu thúngaa Sésa̱r rá, o na̱nguá dxe̱ꞌ.
23Xómáꞌ Jesús ndiꞌyoo máꞌ rí maphú wiphii̱n rí muni̱i̱ rí ma̱ngra̱ꞌaa̱, ikhaa jngó niꞌthúu̱n:
―Náá numuu kajngó nandalaꞌ gúne̱-ngru̱ꞌúún róꞌ.#20.23 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Náá numuu kajngó nandalaꞌ gúne̱-ngru̱ꞌúún róꞌ». 24Gu̱snga̱jmúꞌlaꞌ mbá mbúkha̱a̱ ajwa̱nꞌ mba̱yo̱o̱. Tsáa inuu jamí tsáa mbiꞌyuu rí ka̱ma ge̱jyoꞌ róꞌ.
A̱ꞌkhue̱n ikhii̱n ni̱riꞌñee̱:
―Drígo̱o̱ thúngaa Sésa̱r.
25A̱ꞌkhue̱n Jesús niꞌthúu̱n:
―Xí xkuaꞌnii, gu̱xna̱alaꞌ thúngaa Sésa̱r rí jaꞌyoo mbayáa, jamí gu̱xna̱alaꞌ Ana̱ꞌlóꞌ rí jaꞌyoo mbayáa.
26Xkuaꞌnii táꞌngúu̱n gúxkamaa̱ nimbá ajngáa rí ni̱ngra̱ꞌaa Jesús ná inúú xa̱bo̱ xuajen, rí i̱ndo̱ó máꞌ nimakúu̱n neꞌne rí niriꞌñee̱, jamí neꞌne-wíyuu rawúu̱n.
Graxe̱ ga̱jma̱á numuu rí mbuya̱a mbiꞌñúú xa̱bo̱
(Mt 22.23-33; Mc 12.18-27)
27Nda̱wa̱á a̱ꞌkhue̱n niguáꞌnú mbá tikhuun xa̱bo̱ saduséo̱. Ikhiin tsúꞌkhue̱n nuthan rí mu̱xúya̱a mbiꞌñúú xa̱bo̱ tsí nijáñúú, ikhaa jngó nitháa̱n Jesús ajngáa ríge̱ꞌ:
28―Táta̱ naꞌsngáá, ná xtángoo rí niꞌtháán Moisés ka̱ma naꞌthán: “Xí mbáa xa̱biya̱ tsí ninigúún gájáñuu jamí tágu̱maa nimbáa a̱dée̱ ga̱jmáa̱ a̱ꞌguii̱, dxíyo̱o̱ jaꞌyoo rí manigúún ga̱jma̱á a̱ꞌgóxuáꞌa, kajngó ma̱gu̱mii i̱ji̱in xa̱bo̱ tsí nijáñuu”. 29Mbá miꞌtsú nijúwa̱ꞌ mbá juwiin xa̱bekha tsí mbá guꞌwíin. Tsí ginii jayu ninigúún, jamí tági̱ꞌdaa̱ asndo nimbáa a̱dée̱ ga̱jmáa̱ a̱ꞌguii̱ ído̱ rí nijáñuu̱. 30A̱ꞌkhue̱n xa̱bo̱ tsí riajma̱a̱ ndiyáa a̱ꞌgo̱. Mangaa máꞌ tsúꞌkhue̱n nijáñuu, jamí tágu̱mii i̱jii̱n.#20.30 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ndiyáa a̱ꞌgo̱. Mangaa máꞌ tsúꞌkhue̱n nijáñuu, jamí tágu̱mii i̱jii̱n». 31Jamí xa̱bo̱ tsí riatsíi ndiyáa a̱ꞌgo̱. Xkuaꞌnii asndo mbá xúgíin tsí mbá juwiin, jamí ndawi̱in i̱jíi̱n ído̱ nijáñúu̱. 32Nda̱wa̱á jayu a̱ꞌkhue̱n nijáñuu a̱ꞌgo̱ mangaa. 33Ikhaa jngó, ído̱ rí mbuya̱a mbiꞌñúú xa̱bo̱, tsáa tsí ikhii̱n ma̱ꞌne a̱ꞌgui̱i ñajuun a̱ꞌgo̱ tsúꞌkhue̱n rá. Numuu rí mbá juwii̱n neꞌne a̱ꞌguíi̱n ñajuun a̱ꞌgo̱.
34A̱ꞌkhue̱n Jesús niriꞌñúu̱:
―Ná numbaa ríge̱ꞌ, nu̱ni̱ꞌgúún xa̱bekha, jamí nu̱nújún go̱ꞌo̱. 35Xómáꞌ tsí mbuya̱a mbiꞌñúú jamí ma̱janúú rí ma̱ju̱wá ná i̱mba̱ numbaa, nimbáa xa̱biya̱ ma̱xánigúún, ni máꞌ nimbáa a̱ꞌgo̱ ma̱xánújún. 36Ná numbaa rúꞌkhue̱n náxájáñúú xa̱bo̱, numuu rí ma̱nindxúu̱n xómá jaꞌñúú ánje̱l. Jamí i̱ji̱in Ana̱ꞌlóꞌ ñajúu̱n, numuu rí ndiyaa̱ mbiꞌñúu̱.
37»Xómáꞌ ga̱jma̱á numuu rí mbuya̱a mbiꞌñúú tsí nijáñúú rá, asndo Moisés máꞌ niꞌsngáá rúꞌkhue̱n nákhí ndiꞌyoo rí nakha iná tsuwan. Ikhín niꞌthée̱n rí Táta̱ Mikhuíí ñajuun “Anu̱u̱ Abraám, Anu̱u̱ Isaák jamí Anu̱u̱ Jakób”. 38Numuu rí Ana̱ꞌlóꞌ, ra̱ꞌkhá Anu̱ú xa̱bo̱ tsí nijáñúú ñajuu̱n, rí Anu̱ú xa̱bo̱ tsí nduya ñajuu̱n. Ná inuu Ana̱ꞌlóꞌ, mbá xúgíin xa̱bo̱ júwa̱ꞌ nduya.
39A̱ꞌkhue̱n ni̱riꞌñáa̱ mbá tikhuun xa̱bo̱ tsí nusngáá xtángoo: «Táta̱ naꞌsngáá, maphú máján nitriꞌña». 40Nda̱wa̱á a̱ꞌkhue̱n, ni i̱mba̱a̱ꞌ máꞌ nátáꞌngo̱o̱ a̱kui̱in rí maraxu̱u̱ xóó Jesús.
Krísto̱ ñajuun a̱dée Dabíd jamí Tátée̱ mangaa
(Mt 22.41-46; Mc 12.35-37)
41A̱ꞌkhue̱n Jesús niraxu̱ún xa̱bo̱: «Náá numuu kajngó nuthan xa̱bo̱ rí Krísto̱ ñajuun a̱dée Dabíd róꞌ. 42Numuu rí jmína̱a̱ꞌ máꞌ Dabíd niꞌthán ná awúun I̱yu̱u̱ꞌ ajmúú:
“Táta̱ Mikhuíí niꞌthúun Tátéꞌ:
‘Araꞌún ná ñawún mújúnꞌ ge̱jyoꞌ,
43asndo gáskuíji̱in xa̱bo̱ sia̱nꞌ dríga̱a̱ꞌ ná agoo nakhuáaꞌ’”.#20.42-43 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 110.1.
44Xí jmína̱a̱ꞌ máꞌ Dabíd naꞌthúu̱n “Tátéꞌ”, xáne gágoo ma̱ꞌne rí Krísto̱ ñajuun a̱dée Dabíd xúꞌkhue̱n rá».
Jesús naꞌthán xáne jaꞌñúú xa̱bo̱ tsí nusngáá xtángoo
(Mt 23.1-36; Mc 12.38-40; Lc 11.37-54)
45Awúun máꞌ rí mbá xúgíin xa̱bo̱ nu̱dxawíín rí naꞌthán Jesús, a̱ꞌkhue̱n ikhaa̱ niꞌthúu̱n tsí naꞌsngúu̱n: 46«Gu̱ña̱wa̱n-mijnálaꞌ inúú xa̱bo̱ tsí nusngáá xtángoo, numuu rí ikhii̱n na̱ni̱gúu̱nꞌ majúwúu̱n xtíin rí mbijwa̱ꞌ asndo mbayíí. Na̱ni̱gúu̱nꞌ rí phú gamaku mi̱traxii̱n gúne̱ xa̱bo̱ ná xuáá. Xúꞌkhue̱n máꞌ na̱ni̱gúu̱nꞌ rí ma̱trigii̱n ná wájun xíle̱ gamaku ná awúun mbámbá guꞌwá rí na̱gi̱mbáanꞌlóꞌ, jamí ná napeꞌtso xa̱bo̱ ná ríga̱ ndxa̱a̱. 47Nu̱drígú-jáꞌñúu̱ go̱ꞌóxuáꞌa rí guáꞌdáá, a̱ꞌkhue̱n maphú nagajñúu̱ rí nuthán-jáñíi̱ Ana̱ꞌlóꞌ kajngó ma̱ju̱mu̱ú xa̱bo̱ rí májíi̱n mi̱ndaꞌkho. I̱ndo̱ó máꞌ numuu rí ikhii̱n i̱tha̱án mba̱a̱ jamínu̱ꞌ mu̱dri̱guíi̱».
ទើបបានជ្រើសរើសហើយ៖
Lúka̱s 20: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
