Lúka̱s 1
1
Náá numuu ni̱gu̱ma i̱yi̱i̱ꞌ ríge̱ꞌ
1Phú mbaꞌiin xa̱bo̱ tsí nitháán nini̱i̱ máꞌ rí mu̱ꞌgí-jmbuu̱ ajngóo mbá xúgíí rí phú gakon niríga̱ ná majña̱ꞌlóꞌ. 2Ndiñúu̱ gútháa̱n xómá waꞌsngáxo̱ꞌ jayu nene̱ tsí ndiyáá ga̱jma̱á idúún asndo nákhí ginii jayu. Ikhiin máꞌ tsíge̱ꞌ ni̱mbáyíí rí mi̱ꞌthán-raꞌa ajngóo Ana̱ꞌlóꞌ. 3Xúꞌkhue̱n máꞌ mangúúnꞌ, ni̱ra̱xu̱ún mújúnꞌ mbaꞌiin xa̱bo̱ mbá xúgíí xáne phú niríga̱ asndo nákhí rí ginii jayu. Jamí xúge̱ꞌ rá, wámbo̱ꞌ máꞌ ne̱ne̱-jmbu̱u ne̱, jamí naꞌne a̱kui̱nꞌ rí ma̱tháán ne̱ inaaꞌ ikháánꞌ, táta̱ nikhi̱i̱ Teófi̱lo̱, 4kajngó ma̱goo ma̱tha̱ya̱á májáanꞌ mangáánꞌ rí gakon ga̱jma̱á numuu rí waꞌsngáaꞌ máꞌ.
Mbáa ánje̱l naꞌthán rí ma̱gu̱maa Juáán
5Nixtáa mbáa dxakuun mbiꞌyuu Sakaría̱s nákhí mbiꞌi rí Eróde̱s ninindxu̱u̱ thúngaa ná numbaa Judéa̱. Dxakuun tsúꞌkhue̱n jimaa̱ gajmíi̱ kuthuun dxakuun tsí nigo̱ mbiꞌñúú Abía̱s. Xómáꞌ a̱ꞌgui̱i Sakaría̱s mbiꞌyuu Elisabét,#1.5 «Elisabét» mbiꞌyuu̱ rí ajngáa griégo̱, jamí «Isabél» mbiꞌyuu̱ rí ajngáa xtílo̱o̱. jamí a̱ꞌgo̱ máꞌ ri̱jyu̱u̱ꞌ dxakuun Aarón tsí nixtáa̱ wajyúú ñajuu̱n mangaa̱. 6Nájmii̱ májáan a̱kuíi̱n jamí mbá jmbu jayu júwe̱e̱ꞌ ná inuu Ana̱ꞌlóꞌ, nanimbúu̱n juyáa̱ jamí nune̱-mbáníi̱ mbá xúgíí jayu xtángawoo Táta̱. 7I̱ndo̱ó máꞌ numuu rí ndawi̱in i̱jíi̱n, numuu rí tsíyoo ma̱ꞌne-xuajen Elisabét, jamí nájmii̱ ni̱ka̱ guéño máꞌ tsigúu̱n rá.
8Ni̱ga̱nú mbiꞌi rí jaꞌñúú kuthuun dxakuun tsí ñajúún a̱ngui̱in Sakaría̱s, rí mu̱ñajwii̱n ná inuu Ana̱ꞌlóꞌ. 9Xómá nuni̱i̱ jayu mbámbá rí jaꞌñúu̱ mu̱ñajwii̱n ná guꞌwá dxákuun, nuni̱i̱ rí mbuyáa̱ tsáa jayá mbiꞌi rí matsikhá wájya ikhín. Ikhaa mbiꞌi rúꞌkhue̱n nigájnuu mbiꞌyuu Sakaría̱s rí matsikhá ne̱ ná awúun guꞌwóo Táta̱. 10Awúun máꞌ rí nakha wájya, mbá xúgíin jayu xa̱bo̱ tsí gachúún rixa̱á nuthán-jáñíi̱ Ana̱ꞌlóꞌ. 11A̱ꞌkhue̱n nisngájma-mina̱ꞌ ná inuu Sakaría̱s mbáa ánje̱l tsí nixúngua̱a̱ꞌ Táta̱, wíji̱i̱ ná níjñú mújúun ixe̱ ná nakha-ráma wájya. 12Ído̱ Sakaría̱s ndiꞌyoo ánje̱l tsúꞌkhue̱n, mbá ni̱ka̱ a̱kuii̱n, jamí phú nimíñuu̱. 13A̱ꞌkhue̱n waꞌtháa̱n neꞌne ánje̱l:
―Sakaría̱s, ma̱xámíñaaꞌ. Numuu rí nidxawuun máꞌ Ana̱ꞌlóꞌ rí nirathán-jáñíí. Ikhaa jngó a̱ꞌgia̱aꞌ ma̱ꞌnii̱ mbáa a̱ꞌdiáaꞌ. Ikhaa ada̱ tsúꞌkhue̱n ma̱ra̱xna̱-mbiꞌíí Juáán. 14Ma̱ra̱xtaa gagi jamí ma̱ꞌdxu a̱kia̱anꞌ. Mbaꞌiin xa̱bo̱ ma̱ꞌdxu a̱kui̱ín rí ma̱gu̱maa a̱ꞌdiáaꞌ, 15numuu rí ma̱nindxu̱u̱ xa̱bo̱ mba̱a̱ ná inuu Ana̱ꞌlóꞌ. Ni miꞌtsú ma̱xágáa̱n iyoo úba̱ rí ni̱ga̱yu̱u̱ꞌ ni máꞌ nimbá inii iya najnga̱a̱. Asndo nákhí xóó gakhuá-éwáa̱n, Xu̱u̱ꞌ Ana̱ꞌlóꞌ ma̱xtáa mbá jayu ga̱jma̱á nindxu̱u̱. 16Ikhaa̱ ma̱ꞌnii̱ rí mbaꞌiin xa̱bo̱ Israél ma̱thangi̱in ná inuu Táta̱ tsí ñajuun Anúu̱ ikhii̱n. 17Ikhaa Juáán ma̱ꞌga ginii inuu Táta̱ jamí ma̱gi̱ꞌdoo̱ ski̱yu̱u̱ꞌ Elía̱s tsí ni̱gu̱wíjnga̱a ajngóo Ana̱ꞌlóꞌ wajyúú, kajngó ma̱ꞌnii̱ rí xa̱bo̱ tsí ñajúún anu̱ ma̱gúún mbu̱júꞌ juñúú i̱ji̱ín, jamí tsí najñaguun ma̱ꞌnii̱ rí mbuya̱ri̱dúu̱n rí na̱ma̱ñúú xa̱bo̱ tsí májíin. Xkuaꞌnii gáꞌnii̱ kajngó ma̱ju̱wá na̱ma̱ñúú xa̱bo̱ rí mu̱dri̱guíi Táta̱ ído̱ gáꞌkha̱.
18A̱ꞌkhue̱n Sakaría̱s niraxu̱u̱ ánje̱l:
―Xáne gágoo mba̱yo̱o̱ rí gakon rí narathúnꞌ rá. Numuu rí wayuꞌ guéño máꞌ, jamí ni̱ka̱ guéño máꞌ tsiguu a̱ꞌgui̱ꞌ mangaa.
19A̱ꞌkhue̱n watriꞌñáa̱ neꞌne ánje̱l:
―Ikhúúnꞌ ñajunꞌ Gabriél, tsí xtáa̱ ná inuu Ana̱ꞌlóꞌ, jamí ikhaa̱ máꞌ nixúngúu̱nꞌ rí ma̱ꞌkha gátha̱a̱nꞌlo̱ꞌ ajngáa máján ríge̱ꞌ. 20I̱ndo̱ó máꞌ numuu rí xúge̱ꞌ rá, ga̱jma̱á numuu rí tsínimba̱a̱ꞌ rí na̱tha̱a̱nꞌ, ma̱ꞌne ajmá ñajwaanꞌ jamí ma̱xáxóo gátsi̱ndxákuun asndo gámbánuu rí na̱tha̱a̱nꞌlo̱ꞌ. Na̱tha̱n-jmbaaꞌ rí ma̱ga̱nú mbiꞌi rí ma̱mba̱núu rí ni̱tha̱a̱nꞌ xúge̱ꞌ.
21Awúun máꞌ rí guáꞌthi̱ín xa̱bo̱ rixa̱á rí ma̱ga̱jnáa Sakaría̱s, nu̱ra̱xe̱-mijnée̱ náá numuu kajngó nagajyúu̱ mi̱ndaꞌkho ná awúun guꞌwá dxákuun. 22Jamí ído̱ nigájnaa̱ rá, ni̱ka̱ ajngóo̱. I̱ndo̱ó ñawúu̱n iꞌnii̱ rí naꞌthúu̱n xa̱bo̱. A̱ꞌkhue̱n nifruꞌu̱ún xa̱bo̱ rí ríga̱ rí ndiꞌyoo̱ inu-mbiꞌíí ná awúun guꞌwá dxákuun.
23Ído̱ wámbo̱o̱ Sakaría̱s neꞌne-gáxu̱u̱ mbiꞌi rí jaꞌyoo mañajwii̱n ná guꞌwá dxákuun, a̱ꞌkhue̱n ni̱kaa̱ guꞌwóo̱. 24Nda̱wa̱á a̱ꞌkhue̱n rí nigo̱-édoo Elisabét, a̱ꞌgui̱i Sakaría̱s. Mbá witsuun go̱nꞌ nixtáa̱ ná guꞌwóo̱, tágájnuu̱ mbá jayu, jamí naꞌthée̱n: 25«Ríge̱ꞌ neꞌne Táta̱ ga̱jma̱á numuꞌ rí xúge̱ꞌ rá, kajngó ma̱gata̱a mate̱ꞌ rí gúꞌdo̱ꞌ ná inúú xa̱bo̱».
Ánje̱l Gabriél naꞌthán rí ma̱gu̱maa Jesús
26Ído̱ neꞌne máꞌ majuun go̱nꞌ rí jago̱-édoo Elisabét, a̱ꞌkhue̱n Ana̱ꞌlóꞌ nixuꞌmaa ánje̱l Gabriél ma̱ꞌga ná xuajen Nasarét, rí ꞌgí ná numbaa Galiléa̱. 27Ni̱ke̱e̱ gáꞌyoo̱ mbáa dxáꞌgú tsí niꞌkhu̱u̱ máꞌ rí manújún ga̱jma̱á mbáa xa̱bo̱ tsí mbiꞌyuu José, a̱ꞌdá-ri̱jyu̱u̱ thúngaa Dabíd. Dxáꞌgú tsúꞌkhue̱n mbiꞌyuu María̱. 28Ído̱ ni̱to̱ꞌo̱o̱ ánje̱l ná gída̱ꞌ María̱, a̱ꞌkhue̱n niꞌthúu̱n: «Na̱ra̱xi̱ínlo̱ꞌ, tsáánꞌ phú na̱gu̱ma-nga̱jwa̱án eꞌne Ana̱ꞌlóꞌ. Táta̱ xtáa ga̱jma̱á nindxa̱a̱ꞌ, jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».#1.28 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».
29Xómáꞌ María̱ phú nimakuu̱ rí xkuaꞌnii waꞌtháa̱n neꞌne ánje̱l, jamí naraxe̱-mine̱e̱ꞌ: «Náá numuu kajngó xáꞌnii iraxúu̱nꞌ róꞌ». 30A̱ꞌkhue̱n waꞌtháa̱n neꞌne ánje̱l:
―Ma̱xámíñaaꞌ, María̱, numuu rí Ana̱ꞌlóꞌ niꞌgí-mina̱ꞌ rí ma̱ꞌne-nga̱jwa̱ánꞌ. 31Atadxawíín lá rí ma̱tha̱a̱nꞌ: Rí xúge̱ꞌ rá, mi̱da-éda, ma̱tha̱ni̱i̱ mbáa dxáma, tsí ma̱ra̱xna̱-mbiꞌíí Jesús. 32Ikhaa̱ ma̱nindxu̱u̱ mbáa xa̱bo̱ mba̱a̱, jamí ma̱ꞌne mbiꞌyuu̱ «A̱dée Ana̱ꞌlóꞌ Mikhuíí». Táta̱ Mikhuíí ma̱ꞌne rí ma̱nindxu̱u̱ thúngaa xómá ninindxu̱u̱ xi̱ꞌñú-egoo̱ Dabíd wajyúú. 33Kajngó maꞌthán-ñájúu̱n jámuu xa̱bi̱i Jakób, jamí ni miꞌtsú ma̱xáyámba̱ rí naꞌthán-ñájwii̱n ikhaa̱.
34A̱ꞌkhue̱n rí María̱ niraxu̱u̱ ánje̱l:
―Xáne lá gágoo ma̱mba̱núu rí narathúnꞌ, xí xóó táya̱a̱ xa̱biya̱ rá.
35A̱ꞌkhue̱n ánje̱l niriꞌñuu María̱:
―Xu̱u̱ꞌ Ana̱ꞌlóꞌ ma̱ga̱taa ga̱jma̱á nindxa̱a̱ꞌ, jamí ski̱yu̱u̱ꞌ Ana̱ꞌlóꞌ Mikhuíí mambráꞌáánꞌ asndo xó mbá nákua. Ikhaa jngó ada̱ tsí ma̱tha̱ni̱i̱ ma̱nindxu̱u̱ Xa̱bo̱ Jaꞌwii, jamí ma̱ꞌne mbiꞌyuu̱ «A̱dée Ana̱ꞌlóꞌ». 36Asndo nána̱ Elisabét máꞌ mangaa, tsí mijngi xtayáá, ma̱ꞌnii mbáa ada̱ maske ni̱ka̱ guéño máꞌ tsiguu̱. Ikhaa tsí nuthan xa̱bo̱ rí tsíyoo ma̱ꞌne-xuajen, wámba̱ máꞌ timajuun go̱nꞌ eꞌne rí jago̱-édee̱. 37Numuu rí Ana̱ꞌlóꞌ na̱ꞌngo̱o̱ naꞌne mbá xúgíí jayu.
38A̱ꞌkhue̱n María̱ niꞌthán:
―Ge̱jyoꞌ xtáá ma̱ne̱ rí naꞌthán Táta̱. Ga̱mba̱núu ga̱jma̱á nindxu̱ꞌ xómá rí nirathán.
Wámba̱ rúꞌkhue̱n, ni̱ka̱a ánje̱l.
María̱ na̱ka̱ gáꞌyoo Elisabét
39Ikhaa máꞌ mbiꞌi rí ñúꞌún, María̱ neꞌne-mbánu-mina̱ꞌ, jamí ni̱ke̱e̱-ragáyuu̱ ná júba̱, mbá xuajen rí ꞌgí ná júba̱ numbaa Judéa̱. 40Ído̱ ni̱ga̱níi̱, ni̱to̱ꞌo̱o̱ ná guꞌwóo Sakaría̱s, a̱ꞌkhue̱n niraxii̱ Elisabét. 41Ído̱ nidxawuun Elisabét rí watraxii̱ neꞌne María̱, a̱ꞌkhue̱n rí asndo ni̱ba̱ñi̱i̱ꞌ ada̱ ná awúun Elisabét, jamí ni̱ꞌkha̱ Xu̱u̱ꞌ Ana̱ꞌlóꞌ ga̱jma̱á nindxu̱u̱. 42A̱ꞌkhue̱n rí asndo gakhe̱ niꞌthán Elisabét, niꞌthúu̱n María̱:
―Ikháánꞌ phú i̱tha̱án mba̱a̱ na̱gu̱ma-tsakun-rámááꞌ xó rí mbá xúgíin go̱ꞌo̱. Xkuaꞌnii máꞌ na̱gu̱ma-tsakun-rámaa ada̱ tsí kua̱ꞌa̱a̱n ná awáanꞌ mangaa. 43Náá máꞌ numuu rí nga̱ju̱únꞌ mi̱ndaꞌkho rí asndo na̱ꞌkha̱ nánée Tátéꞌ Mikhuíí gáꞌyeꞌ rá. 44Numuu rí ído̱ ni̱dxawuun rí nitraxu̱ún, núkho̱ ni̱ba̱ñi̱i̱ꞌ a̱ꞌdéꞌ ná awúnꞌ rí nadxu a̱kuii̱n. 45Phú gagi xtaa ikháánꞌ tsáánꞌ ninimba̱a̱ꞌ, numuu rí ma̱mba̱núu mbá xúgíí rí niꞌtháanꞌ Táta̱.
46A̱ꞌkhue̱n niꞌthán María̱:
―Ikhúúnꞌ na̱ne̱-mba̱a̱ Táta̱.
47Nadxu a̱kui̱nꞌ ja̱yo̱o̱ Ana̱ꞌlóꞌ, tsí naꞌne-jríñu̱úꞌ.
48Numuu ni̱rmáꞌáan a̱kuii̱n e̱ne̱, tsúún a̱ꞌgo̱ yumbée̱ tsí na̱nguá gíꞌdoo numuu ñajunꞌ.
Ikhaa jngó asndo nákhí máꞌ xúge̱ꞌ rá, jámba̱ miꞌtsú muthan xa̱bo̱ rí phú gagi xtáá.
49Numuu rí Ana̱ꞌlóꞌ tsí gíꞌdoo mbá xúgíí tsiakhe̱ phú mba̱a̱ rí máján niꞌnii̱ ga̱jma̱á numuꞌ.
Xa̱bo̱ Jaꞌwii ñajuun mbiꞌyuu̱.
50Jámba̱ miꞌtsú nañáwíin
a̱kuii̱n jaꞌñúu̱ xa̱bo̱ tsí nduya-makuíi̱.
51Phú wáá rí neꞌne Ana̱ꞌlóꞌ ga̱jma̱á ski̱yu̱u̱ꞌ.
Ikhaa̱ niꞌnii̱ rí nigáñú-ruꞌúún xa̱bo̱ tsí nu̱ndxa̱ꞌwa̱-mijná rí gíꞌdoo guéño numúú.
52Nixrígúu̱n mbayíí xa̱bo̱ tsí trigi̱in nuthan-ñajun,
Jamí nixúxii̱n xa̱bo̱ tsí ngíníi kajngó ma̱gi̱ꞌdoo numúú.
53Xa̱bo̱ tsí na̱xki̱dxu̱ún, neꞌne-matíi̱ rí máján ñawúún,
xómáꞌ xa̱bo̱ tsí phú guáꞌdáá rá, michú ñawúún nirthangii̱n.
54Nimbáñúu̱ xa̱bi̱i yumbée̱ Israél.
Jamí ni̱rmáꞌáan a̱kuii̱n rí ma̱ñáwíin a̱kuii̱n jaꞌñúu̱.
55Xkuaꞌnii nixuda-mine̱e̱ꞌ ga̱jma̱á nindxu̱ún táta̱-xi̱ꞌñálóꞌ wajyúú,
rí jámba̱ miꞌtsú mambáyúu̱ táta̱-xi̱ꞌñálóꞌ Abraám jamí xa̱bo̱ ri̱jyu̱u̱ꞌ.
56A̱ꞌkhue̱n nixtáa María̱ ga̱jma̱á nindxu̱u̱ Elisabét xó mbá atsúun go̱nꞌ wáa, nda̱wa̱á a̱ꞌkhue̱n nithangaa̱ ni̱kaa̱ guꞌwóo̱.
Rí niríga̱ nákhí ni̱gu̱maa Juáán
57Ído̱ ni̱ga̱nú mbiꞌi rí ma̱ꞌne-xuajen Elisabét, a̱ꞌkhue̱n niꞌnii̱ mbáa dxáma. 58Jamí ído̱ rí xa̱bo̱ tsí júwa̱ꞌ mijngi jamí a̱ngui̱in Elisabét ni̱dxawíín rí phú mba̱a̱ rí máján ni̱gu̱maa̱ neꞌne Ana̱ꞌlóꞌ, nijúwe̱e̱ꞌ gagi ga̱jma̱á nindxu̱u̱. 59Ído̱ nirámuu migiñu mbiꞌi rí ni̱gu̱maa ada̱, a̱ꞌkhue̱n niguwée̱ꞌ kajngó mbayée̱ tsina jndi. Jamí xa̱bo̱ tsí niwi̱in ndiñúu̱ rí Sakaría̱s máꞌ gáꞌne mbiꞌyuu ada̱, numuu rí xkuaꞌnii máꞌ mbiꞌyuu tátée̱. 60Xómáꞌ nánée ada̱ niꞌthúún xa̱bo̱:
―¡Na̱nguá! Ma̱xáꞌne mbiꞌyuu̱ xkuaꞌnii. Juáán gáꞌne mbiꞌyuu̱.
61A̱ꞌkhue̱n waꞌtháán Elisabét nene̱ xa̱bo̱:
―Náá numuu kajngó róꞌ. Nimbáa xa̱bo̱ guꞌwáaꞌ na̱nguá mbiꞌyuu xkuaꞌnii.
62A̱ꞌkhue̱n nini̱i̱ ñawúu̱n inuu Sakaría̱s, kajngó mbuyáa̱ xáne iyoo̱ ikhaa̱ rí ma̱ꞌne mbiꞌyuu a̱dée̱. 63A̱ꞌkhue̱n ikhaa̱ ni̱nda̱ꞌe̱e̱ mbá ixe̱ wapa ná maꞌtháa̱n. Ikhín niꞌtháa̱n ríge̱ꞌ: «Juáán ñajuun mbiꞌyuu̱». Mbá xúgíin xa̱bo̱ nimakúún rí xkuaꞌnii niꞌtháa̱n. 64Núkho̱ ni̱ꞌkha̱a ajngóo Sakaría̱s, a̱ꞌkhue̱n nigíꞌdu̱u̱n niꞌthée̱n jamí neꞌne-mba̱a̱ Ana̱ꞌlóꞌ. 65A̱ꞌkhue̱n phú nimíñúú mbá xúgíin xa̱bo̱ tsí júwa̱ꞌ mijngi ga̱jma̱á nindxúu̱n, jamí mbá xúgíí júba̱ ná numbaa Judéa̱ nuthan xa̱bo̱ ga̱jma̱á numuu mbá xúgíí ríge̱ꞌ. 66Mbá xúgíin xa̱bo̱ tsí nu̱dxawíín rí niríga̱, nu̱ndxa̱ꞌwa̱-mijnée̱ ga̱jma̱á numuu rúꞌkhue̱n, jamí nu̱ra̱xe̱-mijnée̱: «Tsáa máꞌ gánindxu̱u̱ ada̱ tsíge̱ꞌ ído̱ gáꞌkhi̱i̱ rá». Numuu rí Táta̱ xtáa ga̱jma̱á nindxu̱u̱.
Sakaría̱s naꞌne-mba̱a̱ Ana̱ꞌlóꞌ
67A̱ꞌkhue̱n ni̱ꞌkha̱ Xu̱u̱ꞌ Ana̱ꞌlóꞌ ga̱jma̱á nindxu̱u̱ Sakaría̱s, tátée Juáán, jamí niꞌthée̱n ajngáa ríge̱ꞌ:
68«A̱gu̱ma-mba̱a̱ Táta̱, Anu̱ú xa̱bo̱ Israél.
Numuu rí ni̱ꞌkhe̱e̱ gámbáñúu̱ jamí ni̱ꞌkhe̱e̱ gáꞌne-jáwíi̱n xa̱bo̱ xuajñuu̱.
69Ana̱ꞌlóꞌ nixuꞌmaa mbáa tsí phú mba̱a̱ ski̱yu̱u̱ꞌ ma̱ꞌne-jríñáaꞌlóꞌ,
tsí na̱ꞌkha̱ ná ri̱jyu̱u̱ꞌ Dabíd, yumbée̱ máꞌ ikhaa̱.
70Xómá rí nixuda-mina̱ꞌ Ana̱ꞌlóꞌ nákhí wajyúú ga̱jma̱á majñu̱ú xa̱bo̱ jaꞌwuun tsí ni̱rawíjnga̱a ajngóo̱.
71Niꞌthée̱n rí ma̱ꞌne-jríñáaꞌlóꞌ inúú xa̱bo̱ sia̱nꞌ dríga̱ꞌlóꞌ,
jamí ná ñawúún mbá xúgíin xa̱bo̱ tsí tsíñúú gúyalóꞌ.
72Nixuda-mine̱e̱ꞌ rí ma̱ñáwíin a̱kuii̱n jaꞌñúu̱ xi̱ꞌñálóꞌ,
jamí rí ma̱xámbumuu̱ rí ma̱ꞌne-mbánuu̱ awan tsúꞌkhaa rí ni̱gi̱ꞌdoo̱.
73Xáꞌnii nixuda-mine̱e̱ꞌ ga̱jma̱á nindxu̱u̱ táta̱-xi̱ꞌñálóꞌ Abraám,
74rí ma̱ꞌne-jríñáaꞌlóꞌ inúú xa̱bo̱ sia̱nꞌ dríga̱ꞌlóꞌ,
kajngó ma̱xámíñalóꞌ ído̱ rí mu̱ꞌne̱-mba̱wi̱i̱lóꞌ.
75Ana̱ꞌlóꞌ nandoo rí mbá jaꞌwu jamí mbá jmbu gájuwalóꞌ inuu̱,
awúun mbá xúgíí mbiꞌi rí juwalóꞌ ná numbaa.
76»Xómáꞌ ikháánꞌ rá a̱ꞌdéꞌ, ma̱nindxa̱a̱ꞌ xa̱bo̱ tsí na̱gu̱wíjnga̱a ajngóo Ana̱ꞌlóꞌ Mikhuíí ná inúú xa̱bo̱.
Numuu rí ikháánꞌ giníí mi̱dxo̱ꞌ-rathane̱ májáan jambo̱o̱ Táta̱.
77Ma̱ra̱thu̱ún xa̱bo̱ xuajñuu Ana̱ꞌlóꞌ, rí ikhaa̱ ma̱ꞌne-jáwíi̱n,
numuu rí ikhaa̱ ma̱ꞌne mba̱a̱ a̱kuii̱n jaꞌyoo̱ aꞌkhúu̱n,
78numuu rí ra̱ꞌkhá tháán nañáwíin a̱kui̱in Ana̱ꞌlóꞌ jaꞌyalóꞌ.
Ikhaa jngó na̱ꞌkha̱ gáꞌyalóꞌ tsí xómá a̱kha̱ꞌ na̱ꞌkha̱ miꞌcha̱ ná mikhuíí jaꞌnii,
79kajngó ma̱mbiꞌñúú xa̱bo̱ tsí júwa̱ꞌ ná mijína, jamí namíñúú rí ma̱ja̱ñúú.
Ikhaa tsúꞌkhue̱n mbayá ikhalóꞌ rí ma̱juwalóꞌ tsímáá».
80Xómáꞌ ada̱ tsúꞌkhue̱n ni̱ka̱-ragaja̱a̱ xúꞌkhue̱n máꞌ ni̱ka̱-raꞌne gúkuíi̱ ná inuu Ana̱ꞌlóꞌ. Jamí nixtáa̱ ná mbaa niníí asndo ni̱ga̱nú mbiꞌi rí nisngájma-mine̱e̱ꞌ ná inúú xa̱bo̱ Israél.
ទើបបានជ្រើសរើសហើយ៖
Lúka̱s 1: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
Lúka̱s 1
1
Náá numuu ni̱gu̱ma i̱yi̱i̱ꞌ ríge̱ꞌ
1Phú mbaꞌiin xa̱bo̱ tsí nitháán nini̱i̱ máꞌ rí mu̱ꞌgí-jmbuu̱ ajngóo mbá xúgíí rí phú gakon niríga̱ ná majña̱ꞌlóꞌ. 2Ndiñúu̱ gútháa̱n xómá waꞌsngáxo̱ꞌ jayu nene̱ tsí ndiyáá ga̱jma̱á idúún asndo nákhí ginii jayu. Ikhiin máꞌ tsíge̱ꞌ ni̱mbáyíí rí mi̱ꞌthán-raꞌa ajngóo Ana̱ꞌlóꞌ. 3Xúꞌkhue̱n máꞌ mangúúnꞌ, ni̱ra̱xu̱ún mújúnꞌ mbaꞌiin xa̱bo̱ mbá xúgíí xáne phú niríga̱ asndo nákhí rí ginii jayu. Jamí xúge̱ꞌ rá, wámbo̱ꞌ máꞌ ne̱ne̱-jmbu̱u ne̱, jamí naꞌne a̱kui̱nꞌ rí ma̱tháán ne̱ inaaꞌ ikháánꞌ, táta̱ nikhi̱i̱ Teófi̱lo̱, 4kajngó ma̱goo ma̱tha̱ya̱á májáanꞌ mangáánꞌ rí gakon ga̱jma̱á numuu rí waꞌsngáaꞌ máꞌ.
Mbáa ánje̱l naꞌthán rí ma̱gu̱maa Juáán
5Nixtáa mbáa dxakuun mbiꞌyuu Sakaría̱s nákhí mbiꞌi rí Eróde̱s ninindxu̱u̱ thúngaa ná numbaa Judéa̱. Dxakuun tsúꞌkhue̱n jimaa̱ gajmíi̱ kuthuun dxakuun tsí nigo̱ mbiꞌñúú Abía̱s. Xómáꞌ a̱ꞌgui̱i Sakaría̱s mbiꞌyuu Elisabét,#1.5 «Elisabét» mbiꞌyuu̱ rí ajngáa griégo̱, jamí «Isabél» mbiꞌyuu̱ rí ajngáa xtílo̱o̱. jamí a̱ꞌgo̱ máꞌ ri̱jyu̱u̱ꞌ dxakuun Aarón tsí nixtáa̱ wajyúú ñajuu̱n mangaa̱. 6Nájmii̱ májáan a̱kuíi̱n jamí mbá jmbu jayu júwe̱e̱ꞌ ná inuu Ana̱ꞌlóꞌ, nanimbúu̱n juyáa̱ jamí nune̱-mbáníi̱ mbá xúgíí jayu xtángawoo Táta̱. 7I̱ndo̱ó máꞌ numuu rí ndawi̱in i̱jíi̱n, numuu rí tsíyoo ma̱ꞌne-xuajen Elisabét, jamí nájmii̱ ni̱ka̱ guéño máꞌ tsigúu̱n rá.
8Ni̱ga̱nú mbiꞌi rí jaꞌñúú kuthuun dxakuun tsí ñajúún a̱ngui̱in Sakaría̱s, rí mu̱ñajwii̱n ná inuu Ana̱ꞌlóꞌ. 9Xómá nuni̱i̱ jayu mbámbá rí jaꞌñúu̱ mu̱ñajwii̱n ná guꞌwá dxákuun, nuni̱i̱ rí mbuyáa̱ tsáa jayá mbiꞌi rí matsikhá wájya ikhín. Ikhaa mbiꞌi rúꞌkhue̱n nigájnuu mbiꞌyuu Sakaría̱s rí matsikhá ne̱ ná awúun guꞌwóo Táta̱. 10Awúun máꞌ rí nakha wájya, mbá xúgíin jayu xa̱bo̱ tsí gachúún rixa̱á nuthán-jáñíi̱ Ana̱ꞌlóꞌ. 11A̱ꞌkhue̱n nisngájma-mina̱ꞌ ná inuu Sakaría̱s mbáa ánje̱l tsí nixúngua̱a̱ꞌ Táta̱, wíji̱i̱ ná níjñú mújúun ixe̱ ná nakha-ráma wájya. 12Ído̱ Sakaría̱s ndiꞌyoo ánje̱l tsúꞌkhue̱n, mbá ni̱ka̱ a̱kuii̱n, jamí phú nimíñuu̱. 13A̱ꞌkhue̱n waꞌtháa̱n neꞌne ánje̱l:
―Sakaría̱s, ma̱xámíñaaꞌ. Numuu rí nidxawuun máꞌ Ana̱ꞌlóꞌ rí nirathán-jáñíí. Ikhaa jngó a̱ꞌgia̱aꞌ ma̱ꞌnii̱ mbáa a̱ꞌdiáaꞌ. Ikhaa ada̱ tsúꞌkhue̱n ma̱ra̱xna̱-mbiꞌíí Juáán. 14Ma̱ra̱xtaa gagi jamí ma̱ꞌdxu a̱kia̱anꞌ. Mbaꞌiin xa̱bo̱ ma̱ꞌdxu a̱kui̱ín rí ma̱gu̱maa a̱ꞌdiáaꞌ, 15numuu rí ma̱nindxu̱u̱ xa̱bo̱ mba̱a̱ ná inuu Ana̱ꞌlóꞌ. Ni miꞌtsú ma̱xágáa̱n iyoo úba̱ rí ni̱ga̱yu̱u̱ꞌ ni máꞌ nimbá inii iya najnga̱a̱. Asndo nákhí xóó gakhuá-éwáa̱n, Xu̱u̱ꞌ Ana̱ꞌlóꞌ ma̱xtáa mbá jayu ga̱jma̱á nindxu̱u̱. 16Ikhaa̱ ma̱ꞌnii̱ rí mbaꞌiin xa̱bo̱ Israél ma̱thangi̱in ná inuu Táta̱ tsí ñajuun Anúu̱ ikhii̱n. 17Ikhaa Juáán ma̱ꞌga ginii inuu Táta̱ jamí ma̱gi̱ꞌdoo̱ ski̱yu̱u̱ꞌ Elía̱s tsí ni̱gu̱wíjnga̱a ajngóo Ana̱ꞌlóꞌ wajyúú, kajngó ma̱ꞌnii̱ rí xa̱bo̱ tsí ñajúún anu̱ ma̱gúún mbu̱júꞌ juñúú i̱ji̱ín, jamí tsí najñaguun ma̱ꞌnii̱ rí mbuya̱ri̱dúu̱n rí na̱ma̱ñúú xa̱bo̱ tsí májíin. Xkuaꞌnii gáꞌnii̱ kajngó ma̱ju̱wá na̱ma̱ñúú xa̱bo̱ rí mu̱dri̱guíi Táta̱ ído̱ gáꞌkha̱.
18A̱ꞌkhue̱n Sakaría̱s niraxu̱u̱ ánje̱l:
―Xáne gágoo mba̱yo̱o̱ rí gakon rí narathúnꞌ rá. Numuu rí wayuꞌ guéño máꞌ, jamí ni̱ka̱ guéño máꞌ tsiguu a̱ꞌgui̱ꞌ mangaa.
19A̱ꞌkhue̱n watriꞌñáa̱ neꞌne ánje̱l:
―Ikhúúnꞌ ñajunꞌ Gabriél, tsí xtáa̱ ná inuu Ana̱ꞌlóꞌ, jamí ikhaa̱ máꞌ nixúngúu̱nꞌ rí ma̱ꞌkha gátha̱a̱nꞌlo̱ꞌ ajngáa máján ríge̱ꞌ. 20I̱ndo̱ó máꞌ numuu rí xúge̱ꞌ rá, ga̱jma̱á numuu rí tsínimba̱a̱ꞌ rí na̱tha̱a̱nꞌ, ma̱ꞌne ajmá ñajwaanꞌ jamí ma̱xáxóo gátsi̱ndxákuun asndo gámbánuu rí na̱tha̱a̱nꞌlo̱ꞌ. Na̱tha̱n-jmbaaꞌ rí ma̱ga̱nú mbiꞌi rí ma̱mba̱núu rí ni̱tha̱a̱nꞌ xúge̱ꞌ.
21Awúun máꞌ rí guáꞌthi̱ín xa̱bo̱ rixa̱á rí ma̱ga̱jnáa Sakaría̱s, nu̱ra̱xe̱-mijnée̱ náá numuu kajngó nagajyúu̱ mi̱ndaꞌkho ná awúun guꞌwá dxákuun. 22Jamí ído̱ nigájnaa̱ rá, ni̱ka̱ ajngóo̱. I̱ndo̱ó ñawúu̱n iꞌnii̱ rí naꞌthúu̱n xa̱bo̱. A̱ꞌkhue̱n nifruꞌu̱ún xa̱bo̱ rí ríga̱ rí ndiꞌyoo̱ inu-mbiꞌíí ná awúun guꞌwá dxákuun.
23Ído̱ wámbo̱o̱ Sakaría̱s neꞌne-gáxu̱u̱ mbiꞌi rí jaꞌyoo mañajwii̱n ná guꞌwá dxákuun, a̱ꞌkhue̱n ni̱kaa̱ guꞌwóo̱. 24Nda̱wa̱á a̱ꞌkhue̱n rí nigo̱-édoo Elisabét, a̱ꞌgui̱i Sakaría̱s. Mbá witsuun go̱nꞌ nixtáa̱ ná guꞌwóo̱, tágájnuu̱ mbá jayu, jamí naꞌthée̱n: 25«Ríge̱ꞌ neꞌne Táta̱ ga̱jma̱á numuꞌ rí xúge̱ꞌ rá, kajngó ma̱gata̱a mate̱ꞌ rí gúꞌdo̱ꞌ ná inúú xa̱bo̱».
Ánje̱l Gabriél naꞌthán rí ma̱gu̱maa Jesús
26Ído̱ neꞌne máꞌ majuun go̱nꞌ rí jago̱-édoo Elisabét, a̱ꞌkhue̱n Ana̱ꞌlóꞌ nixuꞌmaa ánje̱l Gabriél ma̱ꞌga ná xuajen Nasarét, rí ꞌgí ná numbaa Galiléa̱. 27Ni̱ke̱e̱ gáꞌyoo̱ mbáa dxáꞌgú tsí niꞌkhu̱u̱ máꞌ rí manújún ga̱jma̱á mbáa xa̱bo̱ tsí mbiꞌyuu José, a̱ꞌdá-ri̱jyu̱u̱ thúngaa Dabíd. Dxáꞌgú tsúꞌkhue̱n mbiꞌyuu María̱. 28Ído̱ ni̱to̱ꞌo̱o̱ ánje̱l ná gída̱ꞌ María̱, a̱ꞌkhue̱n niꞌthúu̱n: «Na̱ra̱xi̱ínlo̱ꞌ, tsáánꞌ phú na̱gu̱ma-nga̱jwa̱án eꞌne Ana̱ꞌlóꞌ. Táta̱ xtáa ga̱jma̱á nindxa̱a̱ꞌ, jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».#1.28 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».
29Xómáꞌ María̱ phú nimakuu̱ rí xkuaꞌnii waꞌtháa̱n neꞌne ánje̱l, jamí naraxe̱-mine̱e̱ꞌ: «Náá numuu kajngó xáꞌnii iraxúu̱nꞌ róꞌ». 30A̱ꞌkhue̱n waꞌtháa̱n neꞌne ánje̱l:
―Ma̱xámíñaaꞌ, María̱, numuu rí Ana̱ꞌlóꞌ niꞌgí-mina̱ꞌ rí ma̱ꞌne-nga̱jwa̱ánꞌ. 31Atadxawíín lá rí ma̱tha̱a̱nꞌ: Rí xúge̱ꞌ rá, mi̱da-éda, ma̱tha̱ni̱i̱ mbáa dxáma, tsí ma̱ra̱xna̱-mbiꞌíí Jesús. 32Ikhaa̱ ma̱nindxu̱u̱ mbáa xa̱bo̱ mba̱a̱, jamí ma̱ꞌne mbiꞌyuu̱ «A̱dée Ana̱ꞌlóꞌ Mikhuíí». Táta̱ Mikhuíí ma̱ꞌne rí ma̱nindxu̱u̱ thúngaa xómá ninindxu̱u̱ xi̱ꞌñú-egoo̱ Dabíd wajyúú. 33Kajngó maꞌthán-ñájúu̱n jámuu xa̱bi̱i Jakób, jamí ni miꞌtsú ma̱xáyámba̱ rí naꞌthán-ñájwii̱n ikhaa̱.
34A̱ꞌkhue̱n rí María̱ niraxu̱u̱ ánje̱l:
―Xáne lá gágoo ma̱mba̱núu rí narathúnꞌ, xí xóó táya̱a̱ xa̱biya̱ rá.
35A̱ꞌkhue̱n ánje̱l niriꞌñuu María̱:
―Xu̱u̱ꞌ Ana̱ꞌlóꞌ ma̱ga̱taa ga̱jma̱á nindxa̱a̱ꞌ, jamí ski̱yu̱u̱ꞌ Ana̱ꞌlóꞌ Mikhuíí mambráꞌáánꞌ asndo xó mbá nákua. Ikhaa jngó ada̱ tsí ma̱tha̱ni̱i̱ ma̱nindxu̱u̱ Xa̱bo̱ Jaꞌwii, jamí ma̱ꞌne mbiꞌyuu̱ «A̱dée Ana̱ꞌlóꞌ». 36Asndo nána̱ Elisabét máꞌ mangaa, tsí mijngi xtayáá, ma̱ꞌnii mbáa ada̱ maske ni̱ka̱ guéño máꞌ tsiguu̱. Ikhaa tsí nuthan xa̱bo̱ rí tsíyoo ma̱ꞌne-xuajen, wámba̱ máꞌ timajuun go̱nꞌ eꞌne rí jago̱-édee̱. 37Numuu rí Ana̱ꞌlóꞌ na̱ꞌngo̱o̱ naꞌne mbá xúgíí jayu.
38A̱ꞌkhue̱n María̱ niꞌthán:
―Ge̱jyoꞌ xtáá ma̱ne̱ rí naꞌthán Táta̱. Ga̱mba̱núu ga̱jma̱á nindxu̱ꞌ xómá rí nirathán.
Wámba̱ rúꞌkhue̱n, ni̱ka̱a ánje̱l.
María̱ na̱ka̱ gáꞌyoo Elisabét
39Ikhaa máꞌ mbiꞌi rí ñúꞌún, María̱ neꞌne-mbánu-mina̱ꞌ, jamí ni̱ke̱e̱-ragáyuu̱ ná júba̱, mbá xuajen rí ꞌgí ná júba̱ numbaa Judéa̱. 40Ído̱ ni̱ga̱níi̱, ni̱to̱ꞌo̱o̱ ná guꞌwóo Sakaría̱s, a̱ꞌkhue̱n niraxii̱ Elisabét. 41Ído̱ nidxawuun Elisabét rí watraxii̱ neꞌne María̱, a̱ꞌkhue̱n rí asndo ni̱ba̱ñi̱i̱ꞌ ada̱ ná awúun Elisabét, jamí ni̱ꞌkha̱ Xu̱u̱ꞌ Ana̱ꞌlóꞌ ga̱jma̱á nindxu̱u̱. 42A̱ꞌkhue̱n rí asndo gakhe̱ niꞌthán Elisabét, niꞌthúu̱n María̱:
―Ikháánꞌ phú i̱tha̱án mba̱a̱ na̱gu̱ma-tsakun-rámááꞌ xó rí mbá xúgíin go̱ꞌo̱. Xkuaꞌnii máꞌ na̱gu̱ma-tsakun-rámaa ada̱ tsí kua̱ꞌa̱a̱n ná awáanꞌ mangaa. 43Náá máꞌ numuu rí nga̱ju̱únꞌ mi̱ndaꞌkho rí asndo na̱ꞌkha̱ nánée Tátéꞌ Mikhuíí gáꞌyeꞌ rá. 44Numuu rí ído̱ ni̱dxawuun rí nitraxu̱ún, núkho̱ ni̱ba̱ñi̱i̱ꞌ a̱ꞌdéꞌ ná awúnꞌ rí nadxu a̱kuii̱n. 45Phú gagi xtaa ikháánꞌ tsáánꞌ ninimba̱a̱ꞌ, numuu rí ma̱mba̱núu mbá xúgíí rí niꞌtháanꞌ Táta̱.
46A̱ꞌkhue̱n niꞌthán María̱:
―Ikhúúnꞌ na̱ne̱-mba̱a̱ Táta̱.
47Nadxu a̱kui̱nꞌ ja̱yo̱o̱ Ana̱ꞌlóꞌ, tsí naꞌne-jríñu̱úꞌ.
48Numuu ni̱rmáꞌáan a̱kuii̱n e̱ne̱, tsúún a̱ꞌgo̱ yumbée̱ tsí na̱nguá gíꞌdoo numuu ñajunꞌ.
Ikhaa jngó asndo nákhí máꞌ xúge̱ꞌ rá, jámba̱ miꞌtsú muthan xa̱bo̱ rí phú gagi xtáá.
49Numuu rí Ana̱ꞌlóꞌ tsí gíꞌdoo mbá xúgíí tsiakhe̱ phú mba̱a̱ rí máján niꞌnii̱ ga̱jma̱á numuꞌ.
Xa̱bo̱ Jaꞌwii ñajuun mbiꞌyuu̱.
50Jámba̱ miꞌtsú nañáwíin
a̱kuii̱n jaꞌñúu̱ xa̱bo̱ tsí nduya-makuíi̱.
51Phú wáá rí neꞌne Ana̱ꞌlóꞌ ga̱jma̱á ski̱yu̱u̱ꞌ.
Ikhaa̱ niꞌnii̱ rí nigáñú-ruꞌúún xa̱bo̱ tsí nu̱ndxa̱ꞌwa̱-mijná rí gíꞌdoo guéño numúú.
52Nixrígúu̱n mbayíí xa̱bo̱ tsí trigi̱in nuthan-ñajun,
Jamí nixúxii̱n xa̱bo̱ tsí ngíníi kajngó ma̱gi̱ꞌdoo numúú.
53Xa̱bo̱ tsí na̱xki̱dxu̱ún, neꞌne-matíi̱ rí máján ñawúún,
xómáꞌ xa̱bo̱ tsí phú guáꞌdáá rá, michú ñawúún nirthangii̱n.
54Nimbáñúu̱ xa̱bi̱i yumbée̱ Israél.
Jamí ni̱rmáꞌáan a̱kuii̱n rí ma̱ñáwíin a̱kuii̱n jaꞌñúu̱.
55Xkuaꞌnii nixuda-mine̱e̱ꞌ ga̱jma̱á nindxu̱ún táta̱-xi̱ꞌñálóꞌ wajyúú,
rí jámba̱ miꞌtsú mambáyúu̱ táta̱-xi̱ꞌñálóꞌ Abraám jamí xa̱bo̱ ri̱jyu̱u̱ꞌ.
56A̱ꞌkhue̱n nixtáa María̱ ga̱jma̱á nindxu̱u̱ Elisabét xó mbá atsúun go̱nꞌ wáa, nda̱wa̱á a̱ꞌkhue̱n nithangaa̱ ni̱kaa̱ guꞌwóo̱.
Rí niríga̱ nákhí ni̱gu̱maa Juáán
57Ído̱ ni̱ga̱nú mbiꞌi rí ma̱ꞌne-xuajen Elisabét, a̱ꞌkhue̱n niꞌnii̱ mbáa dxáma. 58Jamí ído̱ rí xa̱bo̱ tsí júwa̱ꞌ mijngi jamí a̱ngui̱in Elisabét ni̱dxawíín rí phú mba̱a̱ rí máján ni̱gu̱maa̱ neꞌne Ana̱ꞌlóꞌ, nijúwe̱e̱ꞌ gagi ga̱jma̱á nindxu̱u̱. 59Ído̱ nirámuu migiñu mbiꞌi rí ni̱gu̱maa ada̱, a̱ꞌkhue̱n niguwée̱ꞌ kajngó mbayée̱ tsina jndi. Jamí xa̱bo̱ tsí niwi̱in ndiñúu̱ rí Sakaría̱s máꞌ gáꞌne mbiꞌyuu ada̱, numuu rí xkuaꞌnii máꞌ mbiꞌyuu tátée̱. 60Xómáꞌ nánée ada̱ niꞌthúún xa̱bo̱:
―¡Na̱nguá! Ma̱xáꞌne mbiꞌyuu̱ xkuaꞌnii. Juáán gáꞌne mbiꞌyuu̱.
61A̱ꞌkhue̱n waꞌtháán Elisabét nene̱ xa̱bo̱:
―Náá numuu kajngó róꞌ. Nimbáa xa̱bo̱ guꞌwáaꞌ na̱nguá mbiꞌyuu xkuaꞌnii.
62A̱ꞌkhue̱n nini̱i̱ ñawúu̱n inuu Sakaría̱s, kajngó mbuyáa̱ xáne iyoo̱ ikhaa̱ rí ma̱ꞌne mbiꞌyuu a̱dée̱. 63A̱ꞌkhue̱n ikhaa̱ ni̱nda̱ꞌe̱e̱ mbá ixe̱ wapa ná maꞌtháa̱n. Ikhín niꞌtháa̱n ríge̱ꞌ: «Juáán ñajuun mbiꞌyuu̱». Mbá xúgíin xa̱bo̱ nimakúún rí xkuaꞌnii niꞌtháa̱n. 64Núkho̱ ni̱ꞌkha̱a ajngóo Sakaría̱s, a̱ꞌkhue̱n nigíꞌdu̱u̱n niꞌthée̱n jamí neꞌne-mba̱a̱ Ana̱ꞌlóꞌ. 65A̱ꞌkhue̱n phú nimíñúú mbá xúgíin xa̱bo̱ tsí júwa̱ꞌ mijngi ga̱jma̱á nindxúu̱n, jamí mbá xúgíí júba̱ ná numbaa Judéa̱ nuthan xa̱bo̱ ga̱jma̱á numuu mbá xúgíí ríge̱ꞌ. 66Mbá xúgíin xa̱bo̱ tsí nu̱dxawíín rí niríga̱, nu̱ndxa̱ꞌwa̱-mijnée̱ ga̱jma̱á numuu rúꞌkhue̱n, jamí nu̱ra̱xe̱-mijnée̱: «Tsáa máꞌ gánindxu̱u̱ ada̱ tsíge̱ꞌ ído̱ gáꞌkhi̱i̱ rá». Numuu rí Táta̱ xtáa ga̱jma̱á nindxu̱u̱.
Sakaría̱s naꞌne-mba̱a̱ Ana̱ꞌlóꞌ
67A̱ꞌkhue̱n ni̱ꞌkha̱ Xu̱u̱ꞌ Ana̱ꞌlóꞌ ga̱jma̱á nindxu̱u̱ Sakaría̱s, tátée Juáán, jamí niꞌthée̱n ajngáa ríge̱ꞌ:
68«A̱gu̱ma-mba̱a̱ Táta̱, Anu̱ú xa̱bo̱ Israél.
Numuu rí ni̱ꞌkhe̱e̱ gámbáñúu̱ jamí ni̱ꞌkhe̱e̱ gáꞌne-jáwíi̱n xa̱bo̱ xuajñuu̱.
69Ana̱ꞌlóꞌ nixuꞌmaa mbáa tsí phú mba̱a̱ ski̱yu̱u̱ꞌ ma̱ꞌne-jríñáaꞌlóꞌ,
tsí na̱ꞌkha̱ ná ri̱jyu̱u̱ꞌ Dabíd, yumbée̱ máꞌ ikhaa̱.
70Xómá rí nixuda-mina̱ꞌ Ana̱ꞌlóꞌ nákhí wajyúú ga̱jma̱á majñu̱ú xa̱bo̱ jaꞌwuun tsí ni̱rawíjnga̱a ajngóo̱.
71Niꞌthée̱n rí ma̱ꞌne-jríñáaꞌlóꞌ inúú xa̱bo̱ sia̱nꞌ dríga̱ꞌlóꞌ,
jamí ná ñawúún mbá xúgíin xa̱bo̱ tsí tsíñúú gúyalóꞌ.
72Nixuda-mine̱e̱ꞌ rí ma̱ñáwíin a̱kuii̱n jaꞌñúu̱ xi̱ꞌñálóꞌ,
jamí rí ma̱xámbumuu̱ rí ma̱ꞌne-mbánuu̱ awan tsúꞌkhaa rí ni̱gi̱ꞌdoo̱.
73Xáꞌnii nixuda-mine̱e̱ꞌ ga̱jma̱á nindxu̱u̱ táta̱-xi̱ꞌñálóꞌ Abraám,
74rí ma̱ꞌne-jríñáaꞌlóꞌ inúú xa̱bo̱ sia̱nꞌ dríga̱ꞌlóꞌ,
kajngó ma̱xámíñalóꞌ ído̱ rí mu̱ꞌne̱-mba̱wi̱i̱lóꞌ.
75Ana̱ꞌlóꞌ nandoo rí mbá jaꞌwu jamí mbá jmbu gájuwalóꞌ inuu̱,
awúun mbá xúgíí mbiꞌi rí juwalóꞌ ná numbaa.
76»Xómáꞌ ikháánꞌ rá a̱ꞌdéꞌ, ma̱nindxa̱a̱ꞌ xa̱bo̱ tsí na̱gu̱wíjnga̱a ajngóo Ana̱ꞌlóꞌ Mikhuíí ná inúú xa̱bo̱.
Numuu rí ikháánꞌ giníí mi̱dxo̱ꞌ-rathane̱ májáan jambo̱o̱ Táta̱.
77Ma̱ra̱thu̱ún xa̱bo̱ xuajñuu Ana̱ꞌlóꞌ, rí ikhaa̱ ma̱ꞌne-jáwíi̱n,
numuu rí ikhaa̱ ma̱ꞌne mba̱a̱ a̱kuii̱n jaꞌyoo̱ aꞌkhúu̱n,
78numuu rí ra̱ꞌkhá tháán nañáwíin a̱kui̱in Ana̱ꞌlóꞌ jaꞌyalóꞌ.
Ikhaa jngó na̱ꞌkha̱ gáꞌyalóꞌ tsí xómá a̱kha̱ꞌ na̱ꞌkha̱ miꞌcha̱ ná mikhuíí jaꞌnii,
79kajngó ma̱mbiꞌñúú xa̱bo̱ tsí júwa̱ꞌ ná mijína, jamí namíñúú rí ma̱ja̱ñúú.
Ikhaa tsúꞌkhue̱n mbayá ikhalóꞌ rí ma̱juwalóꞌ tsímáá».
80Xómáꞌ ada̱ tsúꞌkhue̱n ni̱ka̱-ragaja̱a̱ xúꞌkhue̱n máꞌ ni̱ka̱-raꞌne gúkuíi̱ ná inuu Ana̱ꞌlóꞌ. Jamí nixtáa̱ ná mbaa niníí asndo ni̱ga̱nú mbiꞌi rí nisngájma-mine̱e̱ꞌ ná inúú xa̱bo̱ Israél.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.