Jonás 2

Jonás naꞌthán-jáñuu Ana̱ꞌlóꞌ

1A̱ꞌkhue̱n rí asndo ná awúun i̱gi̱ꞌ Jonás niꞌthán-jáñuu Anu̱u̱ tsí xtáa Mikhuíí. 2Xáꞌnii niꞌthée̱n:

«Awúun rí xtáá gaꞌkho̱ ni̱tha̱n-jáñaaꞌ, Táta̱,

jamí ikháánꞌ nitadxawunꞌ.

Awúun rí ku̱ꞌwu̱únꞌ ná iñá-wajíín, ni̱tha̱n-jáñaaꞌ,

jamí ikháánꞌ nitadxawíín a̱ꞌwóꞌ.

3Nithada-muꞌúún ná phú me̱jno̱ꞌ awúun iya a̱pha̱.

I̱ndo̱ó máꞌ iya natuaꞌán ná ku̱ꞌwu̱únꞌ.

Mbá xúgíí ski̱yu̱u̱ꞌ iya rí narmbúxe̱-mina̱ꞌ nanújngoo ná tsu̱du̱ꞌ.

4Asndo ni̱ndxa̱ꞌwa̱-mína̱ꞌ rí níyaaꞌ máꞌ xtayoꞌ.

Maske máꞌ xúꞌkhue̱n, ma̱thangu̱ún máꞌ tsiakhe̱ mba̱yo̱o̱ guꞌwá dxákiaanꞌ.

5Ni̱rmúꞌúún mbá jayu ná awúun iya,

jamí waꞌdu-muꞌúún mbá jayu ná iñá me̱jno̱ꞌ.

I̱ndo̱ó máꞌ mbáꞌwá nimbróꞌoo ná idxu̱ꞌ.

6Nigátáa asndo ná xtuun nakhúu júba̱.

Mbá jámuu nirugoo ju̱ba̱ꞌ ná tsu̱du̱ꞌ i̱yo̱o̱lo̱ꞌ.

Xómáꞌ ikháánꞌ rá, Tátéꞌ, Anu̱ꞌ Mikhuíí, nithane̱-jríñu̱úꞌ rí tájáñuꞌ.

7Ído̱ nda̱yo̱o̱ rí na̱ka̱ máꞌ xu̱ꞌ rá,

ni̱rmáꞌáan a̱kui̱nꞌ ja̱ya̱a̱ꞌ, Táta̱.

Ni̱ga̱nú a̱ꞌwóꞌ asndo ná ñaꞌwaanꞌ ná guꞌwá dxákiaanꞌ.

8Xómáꞌ xa̱bo̱ tsí nune̱-mbi̱in tsí ra̱ꞌkháa Ana̱ꞌlóꞌ ñajúún,

nu̱ni̱ꞌñáá-ranimbu̱únꞌ juyaaꞌ ikháánꞌ.

9Xómáꞌ ikhúúnꞌ ma̱sian ajmúú rí ma̱ne̱-mba̱ánꞌ,

xúꞌkhue̱n máꞌ ma̱xna̱xáaꞌ tsi̱gi̱jña̱ꞌ,

jamí ma̱ne̱-mbánuu rí ni̱xu̱ꞌdá-mina̱ꞌ ná inaaꞌ.

¡I̱ndo̱ó máꞌ ikháánꞌ, Anu̱ꞌ Mikhuíí, na̱ꞌnga̱a̱ꞌ nathane̱-jáwíin xa̱bo̱!».

10A̱ꞌkhue̱n rí Ana̱ꞌlóꞌ Mikhuíí niꞌthán-ñájuun i̱gi̱ꞌ, jamí i̱gi̱ꞌ ni̱ka̱ gáxi-ri̱ya̱aꞌ Jonás ná rawuun iya.

ទើបបានជ្រើសរើសហើយ៖

Jonás 2: tcf

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ខគម្ពីរពេញនិយមពី
Jonás 2