Juáán 13
13
Jesús naꞌjñáa nakhúún tsí mbá gu̱wa̱ꞌ i̱jmi̱i naꞌsngúún
1Nangiyuu máꞌ ma̱ri̱gá ndxa̱a̱ Páskua̱. Jamí ndaꞌyoo Jesús rí ni̱ga̱nú máꞌ mbiꞌi rí maniñuu̱ numbaa kajngó ma̱ꞌgaa̱ ná xtáa Tátée̱. Xómá rí Jesús ndiyoo jayu jaꞌñúú xa̱bi̱i tsí júwa̱ꞌ ná numbaa ríge̱ꞌ, xkuaꞌnii máꞌ ndiyoo̱ jayu jaꞌñúu̱ asndo ndámba̱wóo.
2Ído̱ neꞌne wakhíí nitrigii̱n mu̱peꞌtso-añúu̱. Xómáꞌ gixa̱a̱ wapha máꞌ nixúꞌdaa̱ ju̱ma̱ ná a̱kui̱in Júda̱s Iskarióte̱, a̱dée Simón, rí maxnáxi̱i̱ Jesús. 3Jamí Jesús ndaꞌyoo̱ máꞌ rí mbá xúgíí tsiakhe̱ nijanáa̱ neꞌne Tátée̱. Xúꞌkhue̱n máꞌ ndaꞌyoo̱ rí Ana̱ꞌlóꞌ nixúngua̱a̱ꞌ jamí ná rí inuu máꞌ Ana̱ꞌlóꞌ i̱kaa̱. 4Ikhaa jngó awúun máꞌ rí napeꞌtso-añúu̱ ni̱tu̱xu̱u̱ꞌ Jesús, niríye̱e̱ꞌ xtíñuu̱ rí júwúu̱n inúú jamí niwatuu̱n mbá xtíin, nidrákee̱ ne̱ ná smídúu̱. 5Wámba̱ rúꞌkhue̱n nixíñe̱e̱ꞌ iya awúun mbá daan rí mbóó ñaꞌwuun. A̱ꞌkhue̱n nigíꞌdu̱u̱n nijñáa̱ nakhúún tsí naꞌsngúu̱n jamí nixúdíi̱ ne̱ ga̱jma̱á xtíin rí bráka ná smídúu̱.
6Ído̱ ni̱ga̱nú Jesús ná ꞌgí Simón Pédro̱, a̱ꞌkhue̱n Pédro̱ niꞌthán:
―Táta̱, ikháánꞌ ma̱ra̱jña̱a nakhúꞌ ráanꞌ.
7A̱ꞌkhue̱n Jesús niꞌthúun Pédro̱:
―Rí xúge̱ꞌ, ikháánꞌ tsífraꞌa̱a̱ꞌ rí na̱ne̱lo̱ꞌ, ma̱fraꞌa̱a̱ꞌ ne̱ nda̱wa̱á.
8Xómáꞌ Pédro̱ niꞌthán:
―¡Na̱nguá Táta̱! ¡Ni miꞌtsú ma̱xáni̱ꞌñúu rí ma̱ra̱jña̱a nakhúꞌ!
A̱ꞌkhue̱n Jesús niꞌthúun Pédro̱:
―Xí tsíjña̱a nakhuáaꞌ, ma̱xáxóo rí ma̱nindxa̱a̱ꞌ xa̱bi̱ꞌ.
9A̱ꞌkhue̱n Simón Pédro̱ niꞌthúun Jesús:
―Táta̱, ma̱xára̱jña̱a i̱ndo̱ó máꞌ nakhúꞌ xúꞌkhue̱n róꞌ, rí arajñáa ñawúnꞌ ga̱jma̱á idxu̱ꞌ mangaa.
10Xómáꞌ Jesús niꞌthúun Pédro̱:
―Tsí ni̱kú máꞌ niwan, tsíꞌyóo máꞌ rí ma̱gaꞌwii̱ mbá xúgíi̱, rí i̱ndo̱ó máꞌ nakhúu̱ iꞌyóo rí ma̱gaꞌwu̱u, numuu rí mbá xúgíí máꞌ xuyuu̱ jaꞌwu. Jaꞌwáanꞌlaꞌ máꞌ rí ikháanꞌlaꞌ, maske máꞌ ra̱ꞌkhá mbá xúgiáanꞌlaꞌ.
11Jesús ndaꞌyoo mújúun máꞌ tsáa ñajuun tsí maxnáxi̱i̱, ikhaa jngó niꞌthée̱n rí ra̱ꞌkhá mbá xúgíi̱n jaꞌwuu̱n.
12Ído̱ wámbo̱o̱ Jesús nijñáa nakhúún tsí naꞌsngúún, a̱ꞌkhue̱n nijúwaa̱n xtíñuu̱ jamí ni̱gi̱ꞌii̱ mbu̱júu̱ ma̱kuiꞌtsii̱. A̱ꞌkhue̱n niraxúu̱n tsí naꞌsngúu̱n:
―Nafraꞌa̱ꞌlaꞌ rí ne̱ne̱lo̱ꞌ ga̱jma̱á nindxa̱ꞌlaꞌ ráanꞌ. 13Ikháanꞌlaꞌ nu̱thu̱nꞌlaꞌ: “Táta̱ naꞌsngáá” jamí “Táta̱”. Máján máꞌ e̱ne̱laꞌ, numuu rí ikhaa máꞌ ñajunꞌlo̱ꞌ. 14Ikhaa jngó, xí ikhúúnꞌ tsúún ñajunꞌ Táta̱ naꞌsngáá jamí Táta̱ ni̱jña̱a nakhuálaꞌ, xúꞌkhue̱n máꞌ gíꞌmaa rí mu̱jña̱-mi̱jna̱a nakhuálaꞌ mangáanꞌlaꞌ. 15Ikhúúnꞌ ni̱ꞌgí mbá xkri̱da mbu̱ya̱álaꞌ, kajngó mu̱ne̱laꞌ xómá ne̱ne̱ ikhúúnꞌ ga̱jma̱á nindxa̱ꞌlaꞌ. 16Na̱tha̱nꞌ-jmbalaꞌ rí nimbáa yumbáá na̱nguá gíꞌdoo numuu̱ i̱tha̱án xó rí tsí nithán-ñájwíi̱n eꞌne. Xúꞌkhue̱n máꞌ mangaa, nimbáa tsí waxúngua̱a̱ꞌ na̱nguá gíꞌdoo numuu̱ i̱tha̱án xó rí tsí waxúngua̱a̱ꞌ neꞌne. 17Xí nafraꞌa̱ꞌlaꞌ ríge̱ꞌ jamí nu̱ne̱-mbáníílaꞌ ne̱, maphú gagi gájuwalaꞌ.
18»Tsítha̱nlo̱ꞌ ga̱jma̱á numalaꞌ mbá xúgiáanꞌ ikháanꞌlaꞌ. Ikhúúnꞌ nda̱yo̱o̱ tsíin ñajúún tsí ni̱ra̱ꞌwíinlo̱ꞌ. I̱ndo̱ó máꞌ numuu rí ndaꞌyóo ma̱mba̱núu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: “Ikhaa tsí naꞌkho̱ guma ga̱jma̱á nindxu̱ꞌ nitangayii jaꞌñúú mangaa”.#13.18 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 41.9. 19Asndo nákhí máꞌ xúge̱ꞌ na̱tha̱nꞌlaꞌ ríge̱ꞌ, nákhí rí xóó tsíríga̱ ne̱, kajngó ído̱ rí ma̱ri̱gá ne̱, ma̱nimba̱ꞌlaꞌ rí Ikhúúnꞌ ñajunꞌ tsí ni̱tha̱n rí ñajunꞌlo̱ꞌ. 20Na̱tha̱nꞌ-jmbalaꞌ ríge̱ꞌ: xí mbáa na̱grui̱guíi tsí na̱xu̱ꞌmáa ikhúúnꞌ, ikhúúnꞌ máꞌ i̱grui̱gúu̱n. Jamí tsí na̱grui̱gúúnꞌ ikhúúnꞌ, na̱grui̱guíi̱ tsí nixúngu̱únꞌlo̱ꞌ.
Jesús naꞌthán rí Júda̱s ñajuun tsí maxnáxi̱i̱
(Mt 26.20-25; Mc 14.17-21; Lc 22.21-23)
21Ído̱ wámbo̱o̱ Jesús niꞌthán ríge̱ꞌ, maphú nidaa a̱kuii̱n, a̱ꞌkhue̱n niꞌthán-jmbuu̱: «Na̱tha̱nꞌ-jmbalaꞌ rí mbáa tsí ikháanꞌlaꞌ maxnáxu̱únꞌlo̱ꞌ ná inúú xa̱bo̱ sia̱nꞌ».
22A̱ꞌkhue̱n tsí naꞌsngúu̱n ni̱ya̱xe̱-mijná, numuu rí tsíyáa̱ mbá jayu tsáa tsí ikhii̱n naꞌthán Jesús numuu. 23Mbáa tsí naꞌsngúu̱n ꞌgí ná níjñúu̱, ikhaa tsí phú i̱tha̱án nandoo Jesús jaꞌyoo. 24Xómáꞌ Pédro̱ niyaxu̱u̱ tsúꞌkhue̱n, jamí niꞌnii̱ iduu̱ rí ikhaa tsúꞌkhue̱n gáraxu̱u̱ Jesús tsáa ñajuun tsí maxnáxi̱i̱.
25Ikhaa jngó, tsí ꞌgí máꞌ mijngi nixuꞌma-mina̱ꞌ i̱tha̱án ná níjñúu Jesús jamí niraxu̱u̱:
―Táta̱, tsáa ñajuun tsí maxnáxi̱ín ná inúú xa̱bo̱ sia̱nꞌ róꞌ.
26Jamí Jesús niriꞌñuu̱:
―Ikhaa tsí ma̱xnu̱u̱ guma bopho rí ma̱rma̱jan ge̱jyoꞌ, ikhaa tsúꞌkhue̱n ñajuu̱n.
A̱ꞌkhue̱n Jesús ni̱rma̱jan guma jamí nixnúu̱ ne̱ me̱kho̱ Júda̱s Iskarióte̱, a̱dée Simón. 27Ído̱ wámbo̱o̱ Júda̱s niꞌkho̱ guma bopho rí gída̱ꞌ rawuu̱n, ni̱to̱ꞌo̱o̱ Satanás ná awúun a̱kuii̱n. A̱ꞌkhue̱n Jesús niꞌthúun Júda̱s: «Mbá nacha̱ máꞌ gátha̱ne̱ rí nithaꞌgí-mina̱ꞌ rí ma̱tha̱ne̱».
28I̱ndo̱ó máꞌ numuu rí nimbáa tsí ꞌgí nakueꞌtso táfroꞌo̱o̱ náá numuu kajngó xkuaꞌnii niꞌthúu̱n Júda̱s. 29Numuu rí Júda̱s wéje̱ inuu rí ma̱ña̱wu̱u̱n xtábúxo̱o̱ mbúkhúu̱n, ikhaa jngó mbá tikhuu̱n ni̱ju̱múu̱ rí Jesús niꞌthúun Júda̱s rí maꞌtse̱ rí ndaꞌyóo ma̱jmúu̱ ná ndxa̱a̱, o rí maxnúu̱ tháan tsí ngíníi mbo̱ꞌ. 30Ído̱ wámbo̱o̱ Júda̱s niꞌkho̱ guma bopho rí gída̱ꞌ rawuu̱n, mbá nacha̱ máꞌ nigájnuu̱ ni̱ke̱e̱. Jamí neꞌne jína máꞌ rúꞌkhue̱n rá.
Jesús naꞌthán mbá xtángoo nuxe̱ꞌ
31Nda̱wa̱á, ído̱ rí nigájnuu máꞌ Júda̱s, a̱ꞌkhue̱n niꞌthán Jesús: «Xúge̱ꞌ nakujma rí phú mba̱a̱ ski̱yu̱u̱ꞌ A̱dée Xa̱bo̱ Numbaa rá, jamí ga̱jma̱á majñu̱u̱ ikhaa̱ nakujma rí phú mba̱a̱ ski̱yu̱u̱ꞌ Ana̱ꞌlóꞌ. 32Xí ga̱jma̱á majñu̱u̱ ikhaa̱ nakujma rí phú mba̱a̱ ski̱yu̱u̱ꞌ Ana̱ꞌlóꞌ, Ana̱ꞌlóꞌ ma̱ꞌne rí ma̱kujma rí phú mba̱a̱ ski̱yu̱u̱ꞌ mangaa̱, jamí phú inu máꞌ ma̱ꞌne Ana̱ꞌlóꞌ rúꞌkhue̱n.
33»I̱ji̱nꞌ, phú nandoꞌ ja̱ya̱ꞌlaꞌ, i̱mbégo jayu xóó xtáá ga̱jma̱á nindxa̱ꞌlaꞌ. Nda̱yo̱o̱ máꞌ rí mbu̱ꞌñúuꞌlaꞌ, ikhaa jngó ikhúúnꞌ na̱tha̱nꞌlaꞌ xúge̱ꞌ xómá rí ni̱thu̱únlo̱ꞌ xa̱bo̱ ñajun judío̱: Ma̱xáxóo mu̱ꞌgualaꞌ ná nakalo̱ꞌ.
34»Na̱tha̱nꞌlaꞌ mbá xtángoo nuxe̱ꞌ rí nandoꞌ rí mu̱ne̱-mbáníílaꞌ: Ga̱galaꞌ ju̱ya̱-mijnálaꞌ. Xómá rí ikhúúnꞌ ndiyoꞌ ja̱ya̱ꞌlaꞌ, xkuaꞌnii máꞌ gágalaꞌ ju̱ya̱-mijná mangáanꞌlaꞌ. 35Xí ikháanꞌlaꞌ nandalaꞌ ju̱ya̱-mijnálaꞌ, mbá xúgíin xa̱bo̱ mbuyáa̱ rí ikháanꞌlaꞌ ñajwanlaꞌ xa̱bi̱ꞌ tsí na̱sngúún».
Jesús naꞌthán rí Pédro̱ maꞌthán rí tsíꞌne-nuwii̱n
(Mt 26.31-35; Mc 14.27-31; Lc 22.31-34)
36A̱ꞌkhue̱n Simón Pédro̱ niraxu̱u̱ Jesús:
―Náá idxo̱ꞌ róꞌ, Táta̱.
Xómáꞌ Jesús niriꞌñuu̱:
―Ná nakalo̱ꞌ, ma̱xáxóo mi̱dxo̱ꞌ ga̱jma̱á nindxu̱ꞌ rí xúge̱ꞌ. I̱ndo̱ó máꞌ numuu rí nda̱wa̱á ma̱goo mi̱dxo̱ꞌ ná nakalo̱ꞌ.
37A̱ꞌkhue̱n niꞌthán mbu̱júu Pédro̱:
―Táta̱, náá numuu kajngó tsíyoo ma̱ꞌgá ga̱jma̱á nindxa̱a̱ꞌ rí xúge̱ꞌ róꞌ. Xtáá na̱ma̱ñuꞌ asndo rí ma̱ja̱ñúꞌ ga̱jma̱á numaaꞌ.
38Xómáꞌ Jesús niꞌthúun Pédro̱:
―Xtaa na̱ma̱ñaaꞌ asndo rí ma̱ja̱ñáaꞌ ga̱jma̱á numuꞌ ráanꞌ. Na̱tha̱n-jmbaaꞌ rí asndo xóó máꞌ tsíndxaꞌwá miꞌcho̱o̱ mba̱xtá, wámba̱a̱ꞌ máꞌ nirathán atsú nothon rí tsíthane̱-nuwúún.
ទើបបានជ្រើសរើសហើយ៖
Juáán 13: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
