XÓ NI̱GI̱ꞋDU̱U̱N-MUU 8:21-22

Ído̱ ni̱grui̱gú xe̱ꞌ Ana̱ꞌlóꞌ Mikhuíí rí phú ndaa thawuun, a̱ꞌkhue̱n niꞌthán-mine̱e̱ꞌ: «Maske máꞌ asndo nákhí rí natse a̱kui̱ín xa̱bo̱, wéje̱ máꞌ rí muni̱i̱ rí ra̱máján, ná-xátangu̱ún ma̱xna̱-máꞌáan ju̱ba̱ꞌ ga̱jma̱á numúú xa̱bo̱ rá. Jamí ni̱mi̱ꞌtsu̱n ná-xáne̱ gámbi̱i̱n xúgíin tsí nduya, xó rí ne̱ne̱ xúge̱ꞌ. »Awúun máꞌ rí xóó kri̱ga̱ ju̱ba̱ꞌ, ma̱xámba̱ rí mi̱ꞌdu jamí rí ma̱gi̱xi̱i̱ ganitsu, ma̱ꞌne mika jamí ngúwán, ma̱ꞌkha̱ go̱nꞌ rí ma̱ꞌne ruꞌwa jamí go̱nꞌ rí ma̱ꞌne ruꞌphu, jamí ma̱ꞌne máꞌ mbiꞌi jamí mbroꞌon».