XÓ NI̱GI̱ꞋDU̱U̱N-MUU 48
48
Jakób naꞌne tsakun-rámii i̱ji̱i̱n José
1Nda̱wa̱á rí ninújngoo máꞌ mbiꞌi rúꞌkhue̱n waꞌtháán José: «Najáñuu ana̱a̱ꞌ». A̱ꞌkhue̱n rí ni̱ke̱e̱ gáꞌyoo̱ anu̱u̱ gajmíi̱ ná-a̱jmi̱i̱ i̱ji̱i̱n, Manasés ga̱jma̱á Efraín. 2A̱ꞌkhue̱n waꞌtháán Jakób: «Na̱ꞌkha̱ a̱ꞌdeáaꞌ José gáꞌyaaꞌ». A̱ꞌkhue̱n rí Israél neꞌne tsiakhe̱-mina̱ꞌ rí ma̱ge̱ꞌe̱ ná xi̱yawoo̱. 3A̱ꞌkhue̱n waꞌtháán José neꞌne anu̱u̱:
―Ana̱ꞌlóꞌ tsí Gíꞌdoo Xúgíí Tsiakhe̱ nikujmaa inu̱ꞌ ná xuajen Lús ná mbaa Kanaán, jamí neꞌne tsakun-rámúu̱. 4Xúꞌkhue̱n máꞌ nixuda-mine̱e̱ꞌ rí niꞌthínꞌ xáꞌnii: “Rí xúge̱ꞌ rá, ma̱ne̱ rí ma̱ꞌne mbaꞌiin i̱jia̱a̱nꞌ jamí ma̱ne̱ rí ma̱mi̱diúún mi̱ndaꞌkho xa̱bia̱a̱ꞌ, jamí ma̱nindxa̱a̱ꞌ idxu̱ún mbaꞌa xuajen mba̱ꞌo̱. Xúꞌkhue̱n máꞌ ma̱xnúú mbaa ríge̱ꞌ i̱jia̱a̱nꞌ tsí ma̱guwá nda̱wa̱á, ma̱ꞌne drígúu̱n ne̱ mbá jámuu mbiꞌi”. 5Ikhaa jngó xúge̱ꞌ rá, i̱jia̱a̱nꞌ tsí a̱jmi̱i̱ tsí ni̱gu̱mii ge̱e̱, nákhí xóó táꞌkha gáya̱a̱ꞌ ná Ejípto̱, Efraín ga̱jma̱á Manasés, ma̱nindxúu̱n máꞌ i̱ji̱nꞌ ikhúúnꞌ rá, xómá rí i̱ji̱nꞌ Rubén ga̱jma̱á Simeón. 6Xómáꞌ i̱jia̱a̱nꞌ tsí ma̱ra̱ꞌdiin nda̱wa̱á, tsúꞌkhue̱n ma̱ꞌnii̱ i̱jia̱a̱nꞌ jmína̱á ikháán. I̱ndo̱ó ga̱jma̱á numúú máꞌ dxájúu̱n ma̱ri̱dúu̱n mbaa mangii̱n. 7Numuu rí nákhí nigájna̱a̱ꞌ ná Padán-arám, nijáñu-jáꞌyéꞌ ru̱dáaꞌ Rakél ná jamba̱á ná mbayuu máꞌ Kanaán, ná mijngi ꞌgí Efráta̱. Ikhín máꞌ ni̱dii̱ ná rawuun jambo̱o̱ Efráta̱, rí mbiꞌyuu Belén.
8Ído̱ rí Israél ndiꞌñúú i̱ji̱i̱n José, a̱ꞌkhue̱n niraxi̱i̱:
―Tsíin e̱je̱n ñajúún tsíge̱ꞌ róꞌ.
9A̱ꞌkhue̱n José niriꞌña̱a̱ ajngóo anu̱u̱:
―I̱ji̱nꞌ ikhúúnꞌ ñajúu̱n, tsí nixníꞌ Ana̱ꞌlóꞌ ná ge̱e̱.
A̱ꞌkhue̱n rí Israél niꞌthán:
―Ataxúꞌmii̱ tháan ná inu̱ꞌ ge̱e̱, jngó ma̱ne̱ tsakun-rámii̱lo̱ꞌ.
10Numuu rí xi̱ꞌñú guéño máꞌ ñajuun Israél, aguu iduu̱ níꞌngo̱o̱ rí mayaxi̱i̱. Ikhaa jngó José nixuꞌmii i̱ji̱i̱n mijngi ná inuu anu̱u̱, xómáꞌ ikhaa̱ niraꞌnuu̱ inúú jamí nigo̱-raꞌii̱n. 11Xómáꞌ Israél niꞌthúun José:
―Táju̱mu̱ꞌ xí xóó mba̱yo̱o̱ inaaꞌ, jamí xúge̱ꞌ rá, Ana̱ꞌlóꞌ naꞌne rí mba̱ñúú asndo mangiin i̱jia̱a̱nꞌ.
12A̱ꞌkhue̱n rí José ni̱gu̱wíi̱n i̱ji̱i̱n ná iduu nakhúu anu̱u̱, jamí nismáti̱go̱o̱ rí niꞌgíi̱ inuu̱ asndo mbayíí. 13A̱ꞌkhue̱n rí José nigu̱u̱n ná-a̱jmi̱i̱ máꞌ i̱ji̱i̱n, Efraín ná ñawún mújúu̱n, rí ma̱we̱je̱ ná ñawún xti̱yu̱u̱ꞌ Israél, jamí Manasés ñawún xti̱yu̱u̱ꞌ, rí ma̱we̱je̱ ná ñawún mújúun Israél. A̱ꞌkhue̱n rí nixuꞌmii̱ inuu anu̱u̱. 14Xómáꞌ Israél ja rá, nitsriya̱ꞌ ñawún mújúun, jamí nirígui̱ ná idxu̱u̱ Efraín, tsí lájuíin. Jamí ñawún xti̱yu̱u̱ꞌ nirígui̱ ná idxu̱u̱ Manasés. Xkuaꞌnii nikriꞌkhuíi̱n ñawúu̱n, maske máꞌ Manasés ñajuun xa̱bo̱ ginii. 15A̱ꞌkhue̱n rí neꞌne tsakun-rámaa̱ José rí niꞌthée̱n ajngáa ríge̱ꞌ:
«Ikhaa Ana̱ꞌlóꞌ tsí ningrigo̱o̱ ga̱jma̱á xi̱ꞌñúꞌ Abraám,
xúꞌkhue̱n máꞌ ga̱jma̱á anu̱ꞌ Isaák,
ikhaa máꞌ tsí ni̱ña̱wi̱nꞌ,
asndo nákhí rí ni̱gu̱múú asndo máꞌ mbiꞌi xúge̱ꞌ,
16ikhaa máꞌ Ánje̱l tsí naꞌne-jríñu̱ú mbá xúgíí rí ra̱máján,
Ana̱ꞌlóꞌ tsúꞌkhue̱n gáꞌne tsakun-rámii jiáma tsíge̱ꞌ.
Ga̱jma̱á nindxúu̱n ikhii̱n ma̱xándáti̱ga̱ jámuu mbiꞌyu̱ꞌ,
ni máꞌ mbiꞌyuu anu̱ꞌ Abraám jamí Isaák.
A̱gu̱mii mi̱ndaꞌkho i̱jíi̱n, jamí ga̱ju̱wée̱ꞌ ná inuu numbaa».
17Ído̱ ndiꞌyoo José rí anu̱u̱ nirígu ñawún mújúun ná idxu̱u̱ Efraín, táni̱gu̱u̱ꞌ rúꞌkhue̱n. Jngó niguatuu̱n ñawúun anu̱u̱ ná idxu̱u̱ Efraín rí marígu̱u̱ ná idxu̱u̱ Manasés. 18A̱ꞌkhue̱n iꞌthúu̱n anu̱u̱:
―Ra̱ꞌkhá xkuaꞌnii, táa̱. Atrígu ñawún májáanꞌ ná idxu̱u̱ tsíge̱ꞌ. Ikhaa̱ ñajuun phú xa̱bo̱ ginii.
19Xómáꞌ anu̱u̱ ra̱khóo, jamí niꞌthée̱n:
―Nda̱yo̱o̱-málo̱ꞌ, táa̱. Nda̱yo̱o̱ máꞌ rí mangaa̱ ma̱nindxu̱u̱ mbá xuajen rí phú ma̱gi̱ꞌdoo numuu. I̱ndo̱ó numuu rí ge̱ꞌthe̱e̱ i̱tha̱n ma̱gi̱ꞌdoo numuu xóo rí ikhaa̱, jamí xa̱bi̱i̱ mone̱-mi̱jna̱ mbaꞌa xuajen mba̱ꞌo̱.
20A̱ꞌkhue̱n rí ikhaa máꞌ mbiꞌi rúꞌkhue̱n Israél neꞌne tsakun-rámii̱, rí niꞌthée̱n ajngáa ríge̱ꞌ: «Ga̱jma̱á mbiꞌyalaꞌ mone̱ tsakun-ráma-mi̱jna̱ i̱ji̱i̱n Israél. Xáꞌnii góthée̱n: “Ana̱ꞌlóꞌ gáꞌne tsakun-rámáá xóo rí niꞌñúu̱ Efraín ga̱jma̱á Manasés”». Xkuaꞌnii nitsijii̱ Efraín ginii inuu Manasés.
21A̱ꞌkhue̱n Israél niꞌthúun José:
―Ikhúúnꞌ xtáá rí ma̱ja̱ñúꞌ xúge̱ꞌ rá. I̱ndo̱ó máꞌ Ana̱ꞌlóꞌ ma̱xtáa ga̱jma̱á nindxa̱ꞌlaꞌ, jamí ma̱ꞌnii̱ rí ma̱tangáa̱nꞌlaꞌ ná mbañúú xi̱ꞌñálaꞌ. 22Jamí ikhúúnꞌ na̱xna̱a̱ꞌ i̱tháan mba̱a̱ xó rí ni̱dri̱gú dxíya̱a̱ꞌ, ikhaa bríjniúu júba̱#48.22 Ná ajngáa ebréo̱, ajngáa rí «sikém» naxná ju̱ma̱ rí «i̱tháan mba̱a̱», jamí xúꞌkhue̱n máꞌ naxná ju̱ma̱ rí «bríjniúu júba̱» mangaa. rí ni̱rígúlo̱ꞌ ná ñawúún mbo̱ amorréo̱ ga̱jma̱á chídiu̱ꞌ jamí ga̱jma̱á xkamídúꞌ.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 48: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.