XÓ NI̱GI̱ꞋDU̱U̱N-MUU 4
4
Rí neꞌne Kaín ga̱jma̱á Abél
1A̱ꞌkhue̱n Adán niꞌgu ga̱jma̱á a̱ꞌgui̱i̱, jamí nigo̱-éda Éba̱. A̱ꞌkhue̱n ni̱gu̱maa a̱dée̱ tsí nixnúu̱ mbiꞌyuu Kaín,#4.1 Ná ajngáa ebréo̱, mbiꞌyuu «Kaín» naꞌthán-wíi̱ «ni̱gúꞌdaa». numuu rí niꞌthée̱n: «Ana̱ꞌlóꞌ nimbáyíꞌ rí gúꞌdaa mbáa a̱ꞌdéꞌ dxáma». 2Nda̱wa̱á ni̱gu̱maa Abél, ge̱ꞌthe̱e̱ máꞌ Kaín. Abél ninindxu̱u̱ waxtú xu̱kú mogo̱. Xómáꞌ Kaín niñajun inuu ju̱ba̱ꞌ ja.
3Ni̱ga̱nú mbá mbiꞌi rí Kaín ni̱ꞌkha̱ gáxnáxi̱i̱ gamaku inuu Ana̱ꞌlóꞌ Mikhuíí. Jagui̱i̱ rí nijma̱a̱ ná inuu ju̱ba̱ꞌ ni̱ꞌkhe̱e̱. 4Xúꞌkhue̱n máꞌ Abél mangaa, ni̱ꞌkha̱ gáxnáxi̱i̱n mogo̱ tsí ginuu ni̱gu̱mii, tsí phú i̱tháan rangíin. A̱ꞌkhue̱n rí Ana̱ꞌlóꞌ Mikhuíí ni̱ni̱gu̱u̱ꞌ jaꞌyoo Abél, xúꞌkhue̱n máꞌ tsí nixnáxi̱i̱n mangaa. 5I̱ndo̱ó numuu rí Kaín táni̱gu̱u̱ꞌ Ana̱ꞌlóꞌ jaꞌyoo, ni máꞌ rí nixnáxi̱i̱. Ikhaa jngó Kaín maphú nijiꞌnáa mi̱ndaꞌkho, asndo ná-khaa inuu̱.
6A̱ꞌkhue̱n rí Ana̱ꞌlóꞌ Mikhuíí niꞌthúun Kaín: «Náá numuu kajngó ijiꞌnáá guéño, jamí asndo ná-khaa inaaꞌ róꞌ. 7Xí nathane̱ rí máján, á ra̱ꞌkhá ma̱goo máꞌ mi̱tri̱guíín rá dxe̱ꞌ. Xí nathane̱ rí ra̱máján, gíꞌthu̱u̱n aꞌkhán rí magatuwíín. Xómáꞌ ikháán rá, jaꞌyaaꞌ rí ma̱ra̱tha̱n-ñájuíín ne̱».
8A̱ꞌkhue̱n rí Kaín niꞌthúun dxíyo̱o̱: «Gu̱ꞌgua̱lóꞌ xanáá». Awúun máꞌ rí júwe̱e̱ꞌ ná xanáá, Kaín nigíꞌdu̱u̱n nixnúu Abél asndo nixíya̱a̱.
9Nda̱wa̱á Ana̱ꞌlóꞌ Mikhuíí niraxu̱u̱ Kaín:
―Náá xtáa dxíya̱a̱ꞌ Abél rá.
Xómáꞌ Kaín niriꞌña̱a̱:
―Tsíyo̱lo̱ꞌ jún. Á ikhúúnꞌ jaꞌyo̱ꞌ rí ma̱ña̱wu̱u̱n dxíyo̱ꞌ kajngó rá dxe̱ꞌ.
10Ana̱ꞌlóꞌ Mikhuíí niꞌthúu̱n:
―Díne ñajuun rí nithane̱ rá. Iꞌdiuu dxíya̱a̱ꞌ rí ni̱ga̱díí ná inuu ju̱ba̱ꞌ, nandxaꞌwá-raꞌa inu̱ꞌ. 11Ikhaa jngó xúge̱ꞌ rá, kixná-maꞌáán ná inuu ju̱ba̱ꞌ, numuu rí ju̱ba̱ꞌ niꞌña̱a̱ iꞌdiuu dxíya̱a̱ꞌ rí nitaxídíí. 12Ído̱ gáthiajun inuu ju̱ba̱ꞌ, ná-xájma̱a̱ mújúun rí me̱ꞌtso. Ma̱nindxa̱a̱ꞌ xa̱bo̱ tsí ma̱ngroꞌoo máꞌ xúꞌkhue̱n ná inuu numbaa.
13A̱ꞌkhue̱n rí Kaín niꞌthúun Ana̱ꞌlóꞌ Mikhuíí:
―Ma̱xáꞌngo̱ꞌ rí gakhe̱ guéño ma̱ne̱-numa̱a̱ꞌ aꞌkhúnꞌ. 14Xúge̱ꞌ rá, naraxko̱ꞌ ná inuu ju̱ba̱ꞌ, jamí ná-xáxóo ma̱xtáá inaaꞌ. Ma̱nindxu̱ꞌ xa̱bo̱ tsí ma̱ngroꞌoo máꞌ xúꞌkhue̱n ná inuu numbaa, jamí ma̱ꞌne rí asndo tsáa tsí maxkamúú maxíñu̱ú.
15Ana̱ꞌlóꞌ Mikhuíí niriꞌña̱a̱:
―Xí mbáa tsí maxíya̱a̱ Kaín, gakon rí mbá juan nothon ma̱ꞌne numa̱a̱ꞌ rí niꞌnii̱.
A̱ꞌkhue̱n rí Ana̱ꞌlóꞌ Mikhuíí nixnúu mbá tsina Kaín, ikhaa jngó ma̱xájáñuu̱ gáꞌne asndo tsáa tsí gíxkama̱a̱. 16A̱ꞌkhue̱n rí Kaín nigájnuu ná inuu Ana̱ꞌlóꞌ Mikhuíí, jamí ni̱ka̱ gáxtáa̱ ná mbaa Nód rí ꞌgí ná na̱ꞌkha̱ a̱kha̱ꞌ inuu Edén.
Tsí xa̱bi̱i̱ Kaín
17A̱ꞌkhue̱n rí Kaín niꞌgu ga̱jma̱á a̱ꞌgui̱i̱, jamí nigo̱-éda, xúꞌkhue̱n máꞌ ni̱gu̱maa mbáa a̱dée̱ tsí nixnúu̱ mbiꞌyuu Enók. Nda̱wa̱á Kaín niꞌgí mbá xuajen rí neꞌne mbiꞌyuu Enók xó rí mbiꞌyuu máꞌ a̱dée̱. 18Xómáꞌ Enók ni̱gu̱maa mbáa a̱dée tsí mbiꞌyuu Irád, jamí Irád ni̱gu̱maa mbáa a̱dée tsí mbiꞌyuu Meujaél, jamí Meujaél ni̱gu̱maa mbáa a̱dée tsí mbiꞌyuu Metusaél, jamí Metusaél ni̱gu̱maa mbáa a̱dée tsí mbiꞌyuu Lamék. 19Xómáꞌ Lamék nigu̱u̱n a̱jmi̱i̱ go̱ꞌo̱. Mbáa mbiꞌyuu Áda̱, xómáꞌ i̱mba̱a̱ mbiꞌyuu Síla̱. 20Áda̱ neꞌne xuajii̱n ni̱gu̱maa Jabál, tsí niꞌgí idxu̱u̱ rí ma̱ju̱wá xa̱bo̱ ná guꞌwá xtíin, xúꞌkhue̱n máꞌ rí mu̱xpi̱ꞌthi̱i̱n xu̱kú kiraꞌdiin. 21Tsí dxíyo̱o̱ Jabál, tsí mbiꞌyuu Jubál, tsúꞌkhue̱n niꞌgí idxu̱u̱ rí nidi̱í xa̱bo̱ ixe̱ rí gíꞌdoo nítúu jamí nindíi̱ talalí. 22Mangaa Síla̱ neꞌne xuajii̱n ni̱gu̱maa Tubal-kaín, tsí ni̱ma̱ñuu ni̱gu̱wíi mbá xúgíí inii ajua̱nꞌ rí na̱gu̱ma ga̱jma̱á brónse̱ ga̱jma̱á yéro̱. Jamí dxáguíi Tubal-kaín mbiꞌyuu Naáma̱.
23Xómáꞌ Lamék, niꞌthúún gu̱ꞌwi̱i̱:
«Áda̱ ga̱jma̱á Síla̱ gu̱dxawíínlaꞌ ajngóꞌ.
Gu̱ꞌwi̱i̱ Lamék, gu̱ꞌgí ñaꞌwanlaꞌ rí ma̱tha̱n.
Ma̱xíya̱a̱ mbáa xa̱biya̱ xí ma̱ꞌne ñawínꞌ,
jamí mbáa dxáma xí maxníꞌ.
24Xí tsí maxíya̱a̱ Kaín mbá juan nothon ma̱ꞌne numa̱a̱ꞌ ja,
i̱wa̱á-lá tsí maxíya̱a̱ Lamék, atsú skíñú gu̱wa̱ꞌ-nítsu i̱jma̱ (77) nothon ma̱ꞌne numa̱a̱ꞌ».
Xa̱bo̱ tsí riatsíi a̱dée Adán ga̱jma̱á Éba̱
25A̱ꞌkhue̱n rí Adán niꞌgu mbu̱jú ga̱jma̱á a̱ꞌgui̱i̱, jamí a̱ꞌgui̱i̱ neꞌne xuajii̱n ni̱gu̱maa mbáa dxáma tsí nixnúu̱ mbiꞌyuu Sét,#4.25 Ná ajngáa ebréo̱, mbiꞌyuu «Sét» naꞌthán-wíi «naxná». numuu rí ikhaa̱ niꞌthée̱n: «Ana̱ꞌlóꞌ nixnáa̱ i̱mba̱a̱ a̱ꞌdéꞌ xtiꞌkhuu Abél, tsí nixíya̱a̱ Kaín». 26Xómáꞌ Sét mangaa ni̱gu̱maa mbáa a̱dée, jamí nixná mbiꞌyuu̱ Enós. Awúun máꞌ mbiꞌi rúꞌkhue̱n nigíꞌdi̱í xa̱bo̱ ni̱xri̱ga̱á mbiꞌyuu Ana̱ꞌlóꞌ Mikhuíí ído̱ rí nene̱-mba̱a̱.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 4: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.