XÓ NI̱GI̱ꞋDU̱U̱N-MUU 31
31
Jakób naꞌgí-mina̱ꞌ rí ma̱tanga̱a̱ ná Kanaán
1Jakób nadxawuun ajngúún i̱ji̱i̱n Labán, rí nuthan: «Jakób nigu̱u̱ mbá xúgíí drígo̱o̱ ana̱ꞌlóꞌ, jamí ga̱jma̱á máꞌ rí drígo̱o̱ máꞌ ana̱ꞌlóꞌ, xtáa̱ mújúu̱n mi̱ndaꞌkho». 2Mangaa máꞌ ndaꞌyoo Jakób rí nánguá máꞌ nitiaxíi̱ máján eꞌne Labán xóo nákhí rí wapha. 3Xúꞌkhue̱n máꞌ Ana̱ꞌlóꞌ Mikhuíí niꞌthúun Jakób mangaa: «A̱tanga̱án ná xuajiuun ana̱a̱ꞌ, ná júwa̱ꞌ máꞌ a̱ngia̱a̱nꞌ, jamí ikhúúnꞌ ma̱xtáá ga̱jma̱á nindxa̱a̱ꞌ».
4A̱ꞌkhue̱n rí Jakób nixuꞌma ajngáa rí ma̱ꞌkha̱ Rakél ga̱jma̱á Léa̱ ná xtáa̱ xanáá gajmíi̱ mogo̱. 5A̱ꞌkhue̱n niꞌthúu̱n:
―Nda̱yo̱o̱lo̱ꞌ rí ana̱ꞌlaꞌ, nánguá iyaxe̱ꞌ mújúnꞌ xóo nákhí rí wapha. Maske máꞌ xúꞌkhue̱n, i̱ndo̱ó Anu̱u̱ máꞌ anu̱ꞌ xtáa ga̱jma̱á nindxu̱ꞌ. 6Jamí ikháa̱nꞌlaꞌ ndu̱yáá-málaꞌ rí ni̱ñajun inuu ana̱ꞌlaꞌ mbá xúgíí ski̱yu̱ꞌ. 7Xómáꞌ ana̱ꞌlaꞌ naꞌne-nduwúún máꞌ xúꞌkhue̱n, jamí mbá gu̱wa̱ꞌ nothon nariꞌkhu̱u̱ rí na̱da̱a̱ꞌ. I̱ndo̱ó numuu rí Ana̱ꞌlóꞌ tsíniñuu̱ rí ma̱ꞌñi̱ꞌ rí ra̱máján. 8Jamí xí ikhaa̱ iꞌthán xáꞌnii: “Tsí mixtíin ma̱ꞌne rí ma̱tha̱da̱a̱ꞌ”, a̱ꞌkhue̱n rí mbá xúgíin mogo̱ none̱ xuajiin mixtíin i̱ji̱ín. Jamí xí ikhaa̱ iꞌthán xáꞌnii: “Tsí mbijua̱ mixtiúún gáꞌne tsí ma̱tha̱da̱a̱ꞌ” rá, a̱ꞌkhue̱n rí mbá xúgíin none̱ xuajiin mbijua̱ mixtiúún i̱ji̱ín. 9Xkuaꞌnii ni̱grui̱gúu̱ Ana̱ꞌlóꞌ xu̱kuíi ana̱ꞌlaꞌ, jamí nixníꞌlo̱ꞌ ikhúúnꞌ.
10»Mbá miꞌtsún, awúun máꞌ mbiꞌi rí nuxka-mi̱jna̱a̱ mogo̱, ni̱gúndaa ndi̱yo̱o̱ rí mbijua̱ jamí iꞌwá inii mixtiúún jmba̱ꞌo̱ tsí none̱ tsíga-mi̱jna̱ gajmíí mogo̱ iꞌgú. 11A̱ꞌkhue̱n niꞌthínꞌ Ánje̱l drígo̱o̱ Ana̱ꞌlóꞌ awúun máꞌ rí na̱gúndaa: “Jakób”. Jamí ikhúúnꞌ ni̱ri̱ꞌñaa̱: “Ge̱e̱ máꞌ xtáá”. 12A̱ꞌkhue̱n ikhaa̱ niꞌthée̱n: “Atiaxe̱ xúge̱ꞌ ma̱thi̱yáá, rí mbijua̱ jamí iꞌwá inii mixtiúún mbá xúgíin jmba̱ꞌo̱ tsí none̱ tsíga-mi̱jna̱ gajmíí mogo̱ iꞌgú. Numuu rí ikhúúnꞌ nda̱yo̱o̱ mbá xúgíí rí naꞌñaaꞌ Labán. 13Ikhúúnꞌ ñaju̱nꞌ Ana̱a̱ꞌ Mikhuíí tsí nithayáá ná Bet-él, ná rí ikháán nitastrámáá iya miꞌtsín inuu itsí, ná rí nitaxúda-mina̱ꞌ inu̱ꞌ mbá awan. Araxo̱n xúge̱ꞌ rá, adxájna̱a̱ꞌ mbaa ríge̱ꞌ, jamí ga̱tanga̱án ná mbaa rí ni̱gu̱máá”.
14A̱ꞌkhue̱n rí ni̱ri̱ꞌñaa̱ Rakél ga̱jma̱á Léa̱:
―Á kuaꞌdáá-láxo̱ꞌ xóó rí ma̱re̱daxo̱ꞌ ná goꞌóo ana̱ꞌxo̱ꞌ, ju̱ma̱a̱ꞌ ján rá. 15Á ra̱ꞌkhá naꞌñaxo̱ꞌ asndo xóo iꞌwíin go̱ꞌo̱ rá dxe̱ꞌ. Asndo nixná-ngu̱juáa̱nꞌxo̱ꞌ, jamí wámbo̱o̱ niꞌkhui̱i̱ mbá xúgíí rí nigu̱u̱ ga̱jma̱á numaxo̱ꞌ. 16Gakon máꞌ mbá xúgíí rí ni̱grui̱gúu̱ Ana̱ꞌlóꞌ Mikhuíí ná ñawúun ana̱ꞌxo̱ꞌ, dríga̱ꞌlóꞌ ñajuun ne̱ jamí drígu̱ún máꞌ i̱jia̱nꞌlóꞌ. Ikhaa jngó xúge̱ꞌ rá, athane̱ xúgíí xóo rí niꞌtháanꞌ Ana̱ꞌlóꞌ.
Jakób nagájna̱a̱ ná Padán-arám
17A̱ꞌkhue̱n rí ni̱tu̱xu̱u̱ Jakób, jamí nistrámii̱ i̱ji̱i̱n jamí gu̱ꞌwi̱i̱ ná tsu̱dúún kaméyo̱. 18Jamí ndiyée̱ ikhoo̱ gajmíi̱ xúgíin xu̱kuíi̱ tsí ni̱ka̱-radaa̱ numuu̱, xúꞌkhue̱n máꞌ ga̱jma̱á mbá xúgíí nguátha̱ rí ni̱ka̱ ra̱ge̱ꞌdoo̱ ná Padán-arám. Rúꞌkhue̱n niꞌnii̱ jngó ma̱tanga̱a̱ ná mbaa Kanaán, ná xtáa máꞌ anu̱u̱. 19Xómáꞌ Labán nigájnuu ni̱ka̱ gáꞌdi̱i̱n mogui̱i̱, ikhaa jngó Rakél neꞌne-kúwi̱i̱nꞌ xándá tsí mitsúꞌkhiin tsí gíꞌdiin máꞌ anu̱u̱. 20Xkuaꞌnii neꞌne-nduwaa Jakób Labán mbo̱ araméo̱, táꞌthúu̱n xí na̱ka̱a. 21Nigáyuu̱ ga̱jma̱á mbá xúgíí rí gíꞌdoo̱, núkho̱ máꞌ ninújngoo̱ ná mañuu Éufra̱te̱s, jamí ndiyée̱ ikhoo̱ na̱ke̱e̱ ná júba̱ Galaád.
Labán na̱ka̱-raxkoo Jakób
22Mbiꞌi riatsúu waꞌtháán Labán rí nigáyuu Jakób. 23A̱ꞌkhue̱n rí nigímbúu̱n a̱ngui̱i̱n, jamí ni̱ke̱e̱ tsu̱du̱u̱ Jakób mbá juan mbiꞌi eꞌne. Ni̱ka̱ gáxkama̱a̱ ná júba̱ Galaád. 24Mbroꞌon máꞌ rúꞌkhue̱n ni̱ꞌkha̱ Ana̱ꞌlóꞌ ná awúun xnuꞌnduu Labán mbo̱ araméo̱, a̱ꞌkhue̱n waꞌtháa̱n: «A̱thia̱wa̱án-lá rí ma̱xánújngoo-rámuu rí ma̱ra̱tháán Jakób».
25A̱ꞌkhue̱n rí Labán nixkama̱a̱ Jakób ná júba̱ Galaád, ná niskuíje̱ máꞌ guꞌwá xtíñuu Jakób. Ikhín máꞌ niskuíje̱ guꞌwá xtíñuu Labán gajmíí a̱ngui̱i̱n. 26A̱ꞌkhue̱n Labán niꞌthúun Jakób:
―Dí ñajuun nithane̱ rá. Déjngó nithane̱ nduwúún, jamí nidxa̱ꞌ xtiin i̱ji̱nꞌ asndo xóo tsí natiin ná awúun xkujndu mba̱a̱ róꞌ. 27Déjngó nitagáyaaꞌ ngu̱ꞌwa̱aꞌ, jamí nithane̱ nduwúún. Xúꞌkhue̱n máꞌ tára̱thu̱nꞌ jngó ma̱goo ma̱tha̱n-ngáwaaꞌ ga̱jma̱á gagi, ga̱jma̱á ajmúú, jamí ga̱jma̱á tambóra̱ jamí ixe̱-táñú róꞌ. 28Ni máꞌ tátsi̱ꞌñúꞌ rí ma̱raꞌnuu wáa inúú i̱ji̱nꞌ ga̱jma̱á máꞌ i̱jín-xíñi̱ꞌ. Rí phú najmeyoo rí nithane̱ xúge̱ꞌ ján rá. 29Ríga̱ mba̱a̱ ski̱yu̱ꞌ rí ma̱ña̱ꞌlaꞌ rí ra̱máján, i̱ndo̱ó numuu rí nduꞌwíín Anu̱u̱ ana̱a̱ꞌ niꞌthínꞌ: “A̱thia̱wa̱án-lá rí ma̱xánújngoo-rámuu rí ma̱ra̱tháán Jakób”. 30Jamí xúge̱ꞌ rí nadxu̱u̱ꞌ máꞌ rá, rí natanga̱án máꞌ ná goꞌóo ana̱a̱ꞌ, náá-lá numuu jngó nithane̱ ku̱ꞌwíin xándéꞌ tsí mitsúꞌkhiin xúꞌkhue̱n rá.
31A̱ꞌkhue̱n Jakób niriꞌña̱a̱ ajngóo Labán:
―Ni̱ga̱yúꞌ numuu rí nimíñu̱ꞌ, jamí ni̱ndxa̱ꞌwa̱-mina̱ꞌ gáꞌne xí ma̱drígúu̱n-jáꞌyéꞌ ga̱jma̱á tsiakhe̱ i̱jia̱a̱nꞌ. 32―Jakób tséꞌyoo xí Rakél neꞌne-kúwi̱i̱nꞌ xándá, ikhaa jngó niꞌthée̱n xóó―: Asndo tsáa ñajuun tsí ma̱ta̱xkami̱i̱ xándiáaꞌ ñawúun, ga̱ja̱ñúu. Ná inúú mbá xúgíin a̱ngia̱nꞌlóꞌ athaꞌyáa̱ꞌ jamí athane̱-nuwi̱i̱nꞌ re̱, rí ñajuun dríga̱a̱ꞌ ná awúun drígo̱ꞌ, jamí ada̱a̱ ne̱.
33A̱ꞌkhue̱n rí Labán ni̱to̱ꞌo̱o̱ ná guꞌwá xtíñuu Jakób, ná goꞌóo Léa̱, jamí ná guꞌúún ná-a̱jmi̱i̱ yumbáá mbo̱ go̱ꞌo̱, jamí na̱nguá nixkami̱i̱ ikhín. Ído̱ rí nigájna̱a̱ ná goꞌóo Léa̱, ni̱to̱ꞌo̱o̱ ná goꞌóo Rakél. 34Xómáꞌ Rakél nirkaꞌuu̱n xándá ná agoo xíli̱i̱ kaméyo̱, jamí ni̱gi̱ꞌi̱i̱ ikhín. Xómáꞌ Labán ndiꞌñíi̱ꞌ mbá xúgíí awúun guꞌwá xtíin, jamí na̱nguá nixkami̱i̱. 35A̱ꞌkhue̱n Rakél niꞌthúun anu̱u̱: «Ma̱xájiꞌnáá-lá, táa̱, numuu rí tsíyoo gátu̱xu̱ꞌ rí ma̱ra̱xi̱ínlo̱ꞌ. Numuu rí xtáá naꞌkhu̱u̱ awúnꞌ xóo rí nagíꞌníí máꞌ go̱ꞌo̱».
Xómáꞌ ikhaa̱ ndiꞌñíi̱ꞌ xándá, jamí na̱nguá nixkami̱i̱. 36A̱ꞌkhue̱n rí Jakób nijiꞌnáa, jamí ni̱tsa̱ñu̱u̱ꞌ ga̱jmáa̱ Labán, jngó niꞌthúu̱n xáꞌnii:
―Náá rí ra̱máján ne̱ne̱, ithayáá róꞌ. Náá-lá aꞌkhúnꞌ jún rá, jngó mikoo guéño idxa̱ꞌ-raraxko̱ꞌ rá. 37Nithaꞌyáa̱ꞌ máꞌ mbá xúgíí ná awúun drígo̱ꞌ. Náá rí nitaxkama̱a̱ rí ñajuun dríga̱a̱ꞌ rá. Ataskuíje̱ ne̱ ge̱e̱, ná rí inúú a̱ngui̱nꞌ jamí a̱ngia̱a̱nꞌ, ikhaa jngó ikhii̱n gára̱jue̱e̱ꞌ ga̱jma̱á numalóꞌ. 38Awúun rí mbá skíñú tsigu nixtáá ni̱ñajun ga̱jma̱á nindxa̱a̱ꞌ, nimbá miꞌtsún táfrigu̱u̱n i̱ji̱ín mogia̱a̱ꞌ ni máꞌ tso̱tiaanꞌ, ni máꞌ ikhúúnꞌ tíꞌkhuu nimbáa mogia̱a̱ꞌ. 39Nimbá miꞌtsún táꞌkha ja̱ya̱a̱ inaaꞌ xu̱kiáaꞌ tsí nixíya̱a̱ xu̱kú-xáná. Ikhúúnꞌ máꞌ e̱ne̱ núma̱a̱ꞌ rí naꞌne xu̱kú tsúꞌkhue̱n. Xúꞌkhue̱n máꞌ tsí na̱gu̱ma-kúwi̱i̱nꞌ mbiꞌi o mbroꞌon mbo̱ꞌ, ikháán na̱tru̱múú rí na̱ne̱-númi̱i̱nlo̱ꞌ. 40Rí mbiꞌi naꞌne gámbu̱ún rí mika, xúꞌkhue̱n máꞌ mbroꞌon naꞌne gámbu̱ún rí ngúwán, jamí asndo tsíyoo gígú. 41Xkuaꞌnii jamínu̱ꞌ nixtáá mbá skíñú tsigu ná guꞌwáaꞌ. Mbá gu̱wa̱ꞌ i̱kho̱ tsigu rí nixtáá ni̱yumbáá-rámu̱ꞌ ga̱jma̱á numúú ná-a̱jmi̱i̱ i̱jia̱a̱nꞌ, jamí mbá majuun tsigu rí ni̱ñajun ga̱jma̱á numúú xu̱kiáaꞌ. Xómáꞌ ikháán rá, nidxa̱ꞌ-ratriꞌkhu̱u̱ mbá gu̱wa̱ꞌ nothon xóo rí na̱da̱a̱ꞌ. 42Xí numuu rí táxtáa ga̱jma̱á nindxu̱ꞌ Ana̱ꞌlóꞌ tsí Anu̱u̱ máꞌ Abraám, tsí naꞌne máꞌ mba̱a̱ anu̱ꞌ Isaák, gakon máꞌ rí michú ñawúnꞌ gáta̱xu̱ꞌmúu̱. I̱ndo̱ó numuu rí Ana̱ꞌlóꞌ ndiꞌyoo rí na̱mínu̱u̱ꞌ ga̱jma̱á numuu ñajun rí na̱ne̱lo̱ꞌ, ikhaa jngó nixpríguáa̱ꞌ nduꞌwíín.
Jakób ga̱jma̱á Labán none̱ mbá awan
43A̱ꞌkhue̱n niriꞌñuu Labán Jakób:
―Go̱ꞌo̱ tsíge̱ꞌ, i̱ji̱nꞌ ikhúúnꞌ ñajúún, xúꞌkhue̱n máꞌ e̱je̱n tsíge̱ꞌ, i̱jín-xíñi̱ꞌ ikhúúnꞌ ñajúún. Jamí mogo̱, mogui̱ꞌ máꞌ ñajúún. Mbá xúgíí rí natiaxi̱í ge̱e̱, drígo̱ꞌ ñajuun ne̱. Nda̱a̱ rí gágóo ma̱ñu̱ú xúge̱ꞌ i̱ji̱nꞌ tsíge̱ꞌ, jamí e̱je̱n tsí nene̱ ku̱mii̱. 44Ikhaa jngó xúge̱ꞌ rá, u̱guáꞌnúlóꞌ mbá awan ikháán jamí ikhúúnꞌ, rí ikhaa ne̱ masngájma rí nuꞌthán-míjnálóꞌ ná-a̱jma̱álóꞌ.
45A̱ꞌkhue̱n rí Jakób ndiyá mbá itsí, jamí nitsijii̱ ne̱ xó mbá tsina rí masngájma. 46Jakób niꞌthúún a̱ngui̱i̱n: «U̱rangoolaꞌ itsí».
A̱ꞌkhue̱n rí ikhii̱n nirangoo̱ itsí, jamí niꞌgíi̱ ne̱ mbá ꞌnduꞌ. Ikhín máꞌ nipiꞌtsii̱ ná kuíje̱ mbá ꞌnduꞌ itsí rúꞌkhue̱n. 47Xómáꞌ Labán nixnúu mbiꞌyuu ne̱ Jegár Saadúta̱,#31.47 Ná ajngáa araméo̱, ajngáa Jegár Saadúta̱ naꞌthán-wíi̱ «rí ꞌgí ꞌnduꞌ nasngájma». xómáꞌ Jakób nixnúu mbiꞌyuu ne̱ Galaád.#31.47 Ná ajngáa ebréo̱, ajngáa Galaád naꞌthán-wíi̱ «rí ꞌgí ꞌnduꞌ nasngájma». 48A̱ꞌkhue̱n Labán niꞌthán:
―Rí mbá ꞌnduꞌ itsí ríge̱ꞌ nasngájma rí nuꞌthán-míjnálóꞌ xúge̱ꞌ ná-a̱jma̱álóꞌ.
Ikhaa jngó neꞌne mbiꞌyuu ne̱ Galaád. 49Xúꞌkhue̱n máꞌ neꞌne mbiꞌyuu ne̱ Míspa̱ mangaa,#31.49 Ná ajngáa ebréo̱, ajngáa Míspa̱ naꞌthán-wíi̱ «rí wéje̱ ná nitiaxe̱-ráma». numuu rí niꞌthán Labán:
―Ana̱ꞌlóꞌ Mikhuíí gáyaxu̱u̱ ná majia̱nꞌlóꞌ, ído̱ góꞌne̱ wajíí-mi̱jna̱lóꞌ. 50Xí ma̱tha̱ñu̱ú nikhuáa i̱ji̱nꞌ, o xí mi̱dii̱n iꞌwíin go̱ꞌo̱ rí inúú máꞌ i̱ji̱nꞌ, ndawa̱a̱ i̱mba̱a̱ tsí ndaꞌyoo ná majia̱nꞌlóꞌ. Atiaxe̱ rí Ana̱ꞌlóꞌ ñajuun tsí ndaꞌyoo ná majia̱nꞌlóꞌ ná-a̱jma̱álóꞌ. 51―Labán niꞌthúun xóó Jakób―: Atiaxi̱í rí mbá ꞌnduꞌ itsí ríge̱ꞌ, xúꞌkhue̱n máꞌ tsina ríge̱ꞌ, ni̱tsijilo̱ꞌ ná majia̱nꞌlóꞌ. 52Rí mbá ꞌnduꞌ itsí ríge̱ꞌ nasngájma, xúꞌkhue̱n máꞌ nasngájma tsina rí wéje̱ ge̱e̱, rí ni máꞌ ikhúúnꞌ ma̱xánújngo̱ꞌ inuu itsí ríge̱ꞌ, ni máꞌ ikháán ma̱xánújngaaꞌ rí mo̱ꞌne̱-míjnálóꞌ rí ra̱máján. 53Ga̱ra̱jua̱ꞌ ga̱jma̱á nindxa̱ꞌlóꞌ Ana̱ꞌlóꞌ tsí Anu̱u̱ Abraám jamí Anu̱u̱ Nakór, mbo̱ máꞌ ñajúún xi̱ꞌñálóꞌ.
A̱ꞌkhue̱n rí Jakób nixuda-mina̱ꞌ inuu máꞌ Ana̱ꞌlóꞌ tsí naꞌne-mba̱a̱ Isaák. 54Xúꞌkhue̱n máꞌ ni̱gu̱díi̱n xu̱kú tsi̱gi̱jia̱nꞌ ná inuu júba̱, jamí nindxaꞌúu̱n a̱ngui̱i̱n rí mo̱peꞌtso. Nda̱wa̱á rí wámbúu̱n máꞌ nipiꞌtsii̱, ikhín máꞌ ninii̱ ná júba̱ mbroꞌon rúꞌkhue̱n. 55Xómáꞌ Labán miꞌcha̱ ni̱tu̱xi̱i̱ rí i̱mba̱ mbiꞌi, jamí niraꞌnuu̱ inúú i̱ji̱i̱n ga̱jma̱á máꞌ i̱jín-xíñii̱, jamí neꞌne tsakun-rámii̱. A̱ꞌkhue̱n rí nitanga̱a̱ ni̱ka̱a̱ ná xtáa̱ máꞌ.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 31: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.