XÓ NI̱GI̱ꞋDU̱U̱N-MUU 16
16
Agár ga̱jma̱á Ismaél
1Saraí a̱ꞌgui̱i̱ Abrám na̱nguá i̱gu̱mii i̱ji̱i̱n ga̱jmáa̱ a̱jmbaa̱. Ikhaa̱ gíꞌdaa̱ mbáa yumbáá a̱ꞌgo̱ tsí na̱ꞌkha̱ ná Ejípto̱ mbiꞌyuu Agár. 2A̱ꞌkhue̱n rí Saraí niꞌthúun Abrám: «Nathayáá máꞌ rí Ana̱ꞌlóꞌ Mikhuíí niniñi̱ꞌ rí ma̱xágúꞌdiin i̱ji̱nꞌ. Ikhaa jngó na̱tha̱n-jáñaaꞌ rí me̱no̱ꞌ ga̱jma̱a̱ꞌ yumbéꞌ. Gáꞌne xí ma̱goo ma̱gúꞌdiin i̱ji̱i̱n ikhaa̱».
A̱ꞌkhue̱n rí Abrám neꞌne-mbánuu rí niꞌthán Saraí. 3Ído̱ naꞌne máꞌ gu̱wa̱ꞌ tsigu rí xtáa Abrám ná mbaa Kanaán, Saraí ni̱ꞌkha̱ jayáa̱ yumbée̱ tsí na̱ꞌkha̱ ná Ejípto̱, jamí nixnáxi̱i̱ inuu Abrám rí ma̱ꞌne asndo xóo a̱ꞌgui̱i̱. 4A̱ꞌkhue̱n rí Abrám niꞌgu ga̱jmáa̱, jamí nigo̱-édee̱. Ído̱ ndiꞌyoo Agár rí jago̱-éda, a̱ꞌkhue̱n rí nánguá iya-makuu̱ ña̱ꞌñii̱. 5A̱ꞌkhue̱n Saraí niꞌthúun Abrám:
―Aꞌkháanꞌ ikháán rí tsíya-makui̱ꞌ yumbéꞌ rá. Ikhúúnꞌ máꞌ ni̱xna̱xáa̱ꞌ rí ma̱ꞌne a̱ꞌgia̱a̱ꞌ, jamí ído̱ ndiꞌyoo̱ rí jago̱-édee̱ nánguá iya-makui̱ꞌ. Ana̱ꞌlóꞌ Mikhuíí gára̱jua̱ꞌ ga̱jma̱á numalóꞌ.
6Xómáꞌ Abrám niriꞌña̱a̱:
―Ná ñawáanꞌ xtáa yumbiáaꞌ. Athane̱ ga̱jma̱á nindxu̱u̱ xómá eꞌne a̱kia̱a̱nꞌ.
A̱ꞌkhue̱n rí Saraí naꞌne rí mamínu̱u̱ꞌ Agár, ikhaa jngó nigáyuu̱ ni̱ke̱e̱. 7A̱ꞌkhue̱n rí Ánje̱l drígo̱o̱ Ana̱ꞌlóꞌ Mikhuíí nixkama̱a̱ ná mbaa niníí, ná mijngi ꞌgí iduu iya, ná jamba̱a̱ rí na̱ka̱ ná Súr. 8A̱ꞌkhue̱n niꞌthúu̱n:
―Agár, tsáán ñajuaanꞌ yumbée Saraí, náá idxa̱ꞌ ikháán rá, jamí náá idxo̱ꞌ róꞌ.
A̱ꞌkhue̱n niriꞌña̱a̱ ikhaa̱:
―Na̱ga̱yúꞌ inuu Saraí, nána̱ tsí naꞌthán-ñájui̱nꞌ.
9Xómáꞌ Ánje̱l drígo̱o̱ Ana̱ꞌlóꞌ Mikhuíí niꞌthúu̱n:
―A̱tanga̱án ná inuu̱, jamí atatsíñá-mina̱ꞌ rí maꞌthán-ñájuaa̱nꞌ.
10Jamí waꞌtháa̱n xóó neꞌne Ánje̱l:
«Ma̱ne̱ rí ma̱mi̱diúún mi̱ndaꞌkho xa̱bia̱a̱ꞌ,
rí asndo ma̱xáꞌngo̱o̱ ma̱gi̱xnuu̱ rí mbaꞌii̱n.
11Xta-éda, ma̱tha̱ne̱ ku̱maa mbáa a̱ꞌdeáaꞌ,
jamí ma̱ra̱xna̱ mbiꞌyuu̱ Ismaél,
numuu rí Ana̱ꞌlóꞌ Mikhuíí niꞌdxuun rí xtaa nathamíni̱í.
12Ikhaa̱ ma̱nindxu̱u̱ mbáa xa̱bo̱ namangu̱u̱ꞌ,
jamí ikhaa̱ ma̱ꞌne gajmíi̱ xúgíin,
xúꞌkhue̱n máꞌ xúgíin mone̱ gajmíi̱ ikhaa̱,
jamí ma̱xtáa̱ janíí inúú xúgíin a̱ngui̱i̱n».
13A̱ꞌkhue̱n rí Agár nixnúu̱ mbiꞌyuu Ana̱ꞌlóꞌ Mikhuíí tsí nindxákuu̱n ga̱jmáa̱ «Ikháán ñajuaanꞌ Anu̱ꞌ Mikhuíí tsí ndaꞌyoo», numuu rí niꞌthán-mine̱e̱ꞌ: «Á ra̱ꞌkhá ge̱jioꞌ ndi̱yo̱o̱ tsí ndaꞌye̱ꞌ rá». 14Ikhaa jngó iduu iya neꞌne mbiꞌyuu «Iduu iya Mbo̱ Ndaꞌya jamí Ndaꞌye̱ꞌ». Iduu iya rúꞌkhue̱n ꞌgí ná majiu̱u̱nꞌ Káde̱s ga̱jma̱á Beréd.
15A̱ꞌkhue̱n rí Agár neꞌne ku̱maa̱ a̱dée Abrám. Xómáꞌ Abrám nixná mbiꞌyuu̱ Ismaél. 16Jamí Abrám gíꞌdoo akho̱ skíñú majuun (86) tsiguu̱, ído̱ rí Agár neꞌne ku̱maa Ismaél.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 16: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.