XÓ NI̱GI̱ꞋDU̱U̱N-MUU 13
13
Abraám naꞌne wájí-mina̱ꞌ ga̱jma̱á Lót
1Ído̱ Abrám nigájna̱a̱ ná Ejípto̱, nitsima̱a̱ ná giaxu̱u̱ mbayuu Negéb ga̱jmáa̱ a̱ꞌgui̱i̱, ga̱jma̱á mbá xúgíí rí gíꞌdoo̱, xúꞌkhue̱n máꞌ ga̱jmáa̱ Lót mangaa. 2Abrám phú ni̱gi̱ꞌdiin mi̱ndaꞌkho xu̱kú kiraꞌdiin, jamí phú ni̱gi̱ꞌdoo̱ ajua̱nꞌ rí miꞌxá ga̱jma̱á rí mo̱jmo̱ꞌ. 3Ná rí Negéb nigájna̱a̱ Abrám, mañuu máꞌ xúꞌkhue̱n ni̱ꞌkha̱a̱-ratanga̱a asndo ni̱ga̱núu̱ ná Bet-él, ná nixtáa̱ nákhí rí ginii, ná majiu̱u̱nꞌ xuajen Bet-él ga̱jma̱á Aí. 4Ikhín máꞌ ná rí ni̱rngu̱xi̱i̱ itsí nákhí rí wapha, Abrám nixrégo̱o̱ mbiꞌyuu Ana̱ꞌlóꞌ Mikhuíí.
5Xúꞌkhue̱n máꞌ Lót mangaa, rí ngrigo̱o̱ ga̱jmáa̱ Abrám, ni̱gi̱ꞌdii̱n mogo̱, xede̱, jamí ni̱gi̱ꞌdoo̱ guꞌwá xtíin. 6Ikhaa jngó ná mbaa rí júwe̱e̱ꞌ tséꞌngo̱o̱ rí ma̱ju̱wée̱ꞌ ná-a̱jmi̱i̱, numuu rí phú kuaꞌdáa̱ mi̱ndaꞌkhúún. Rúꞌkhue̱n jngó níyoo rí ma̱ju̱wée̱ꞌ mbóó, 7numuu rí kuaꞌdáá xkujndu tsí nu̱ña̱wu̱ún xu̱kuíi Abrám gajmíí tsí nu̱ña̱wu̱ún xu̱kuíi Lót. Mbáá máꞌ rí mbiꞌi rúꞌkhue̱n mbo̱ kananéo̱ gajmíí mbo̱ fereséo̱ júwá máꞌ ná mbaa rúꞌkhue̱n. 8A̱ꞌkhue̱n rí Abrám niꞌthúun Lót: «Ra̱gíꞌmaa rí mu̱tsa̱ña̱ꞌlóꞌ ikháa̱nꞌlóꞌ, ni máꞌ xa̱bo̱ tsí nu̱ña̱wu̱ún xu̱kiálóꞌ, numuu rí mijngi juꞌya-mi̱jna̱lóꞌ. 9Á ra̱ꞌkhá a̱ꞌkhue̱n kri̱ga̱ mbá xúgíí mbaa rí ma̱goo ma̱tra̱ꞌwíí rá. Athañu̱ꞌ mbá rí máján, athane̱ janíí-mina̱ꞌ. Xí rí ikháán nadxo̱ꞌ ná ñawún xti̱ya̱ꞌlóꞌ, ikhúúnꞌ ma̱ꞌgá ná ñawún májánlóꞌ, o xí ikháán nadxo̱ꞌ ná ñawún májánlóꞌ mbo̱ꞌ, ma̱ꞌgá ikhúúnꞌ ná ñawún xti̱ya̱ꞌlóꞌ xúꞌkhue̱n rá».
10A̱ꞌkhue̱n rí niyaxe̱ Lót, jamí ndiꞌyoo̱ mbá xúgíí xko̱o̱ mañuu Jordán asndo ná rí giaxu̱u̱ xuajen Soár, rí mbá xúgíí ne̱ ñajuun mbaa xtagíya̱ꞌ. Xómá mbaa ixe̱ mitsaan drígo̱o̱ Ana̱ꞌlóꞌ Mikhuíí jaꞌnii ne̱, o xómá mbayuu Ejípto̱. Xkuaꞌnii jaꞌnii ne̱ nákhí rí xóó táꞌne gámba̱a̱ Ana̱ꞌlóꞌ Mikhuíí Sodóma̱ ga̱jma̱á Gomórra̱. 11A̱ꞌkhue̱n rí Lót niraꞌwíí mbá xúgíí xko̱o̱ mañuu Jordán, jamí nigájnuu̱ ni̱ke̱e̱ ná na̱ꞌkha̱ a̱kha̱ꞌ. Xkuaꞌnii neꞌne rí nene̱ wájí-mi̱jne̱e̱. 12Kajngó Abrám niwanúu nixtáa ná mbayuu Kanaán. Xómáꞌ Lót, ni̱ka̱-raxtáa ná xuajen rí triga̱ ná xkua̱, jamí ni̱ka̱-raskuíji̱i̱ guꞌwá xtíin drígo̱o̱ asndo ná Sodóma̱. 13I̱ndo̱ó numuu rí xa̱bo̱ tsí júwa̱ꞌ ná Sodóma̱ rí phú nda̱a̱ gamakúún, jamí maphú mba̱a̱ mi̱ndaꞌkho aꞌkhán i̱xu̱da̱ꞌ-mi̱jne̱e̱ ná inuu Ana̱ꞌlóꞌ Mikhuíí.
14Nda̱wa̱á rí niríya̱ꞌ-mina̱ꞌ máꞌ Lót, a̱ꞌkhue̱n Ana̱ꞌlóꞌ Mikhuíí niꞌthúun Abrám: «Atiaxe̱ asndo ná rí xtaa máꞌ a̱ꞌkhue̱n, atiaxi̱í naꞌwáán jamí jawáá, xúꞌkhue̱n máꞌ ná na̱ꞌkha̱ a̱kha̱ꞌ jamí ná najngúun a̱kha̱ꞌ. 15Numuu rí mbá xúgíí mbaa rí natiaxi̱í, ma̱xna̱a̱ꞌlo̱ꞌ ikháán gajmiáaꞌ xa̱bia̱a̱ꞌ, mbá jámuu gáꞌne dríga̱ꞌlaꞌ. 16Jamí ma̱ne̱ rí ma̱mi̱diúún mi̱ndaꞌkho xa̱bia̱a̱ꞌ asndo xóo yujndo̱o̱ꞌ ju̱ba̱ꞌ. Xí mbáa na̱ꞌngo̱o̱ na̱gu̱xnuu iꞌñúu yujnda̱ꞌ, xkuaꞌnii máꞌ ma̱goo ma̱gi̱xnuu xa̱bia̱a̱ꞌ mangiin. 17Araxo̱n, ayu mbá xúgíí rí ꞌmba̱ꞌ mbaa ríge̱ꞌ, jamí xúgíí rí ma̱jia̱nꞌ ne̱, numuu rí ikháán na̱xna̱a̱ꞌ ne̱».
18A̱ꞌkhue̱n rí Abrám ndiyá-tuxi̱i̱ la guꞌwá xtíin jamí ni̱ka̱ gáxtáa̱ ná Ebrón ná kuájun ixe̱ xi̱xoo drígo̱o̱ Mámre̱. Ikhín máꞌ ni̱rngu̱xi̱i̱ itsí ná ma̱ꞌne-mba̱a̱ Ana̱ꞌlóꞌ Mikhuíí.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 13: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.