Rí nene̱ 5:3-5

A̱ꞌkhue̱n Pédro̱ niꞌthúu̱n: «Ananía̱s, náá numuu kajngó nitatsíñá-mina̱ꞌ rí Satanás maꞌthán-ñájuun a̱kia̱anꞌ rí ma̱tha̱ne̱-nduwaa Xu̱u̱ꞌ Ana̱ꞌlóꞌ, jamí nitrígú tháan inuu mbúkho̱o̱ mbayaaꞌ róꞌ. Nákhí rí xóó tsíta̱ngu̱jwa̱ ne̱, ñawáanꞌ máꞌ ikháánꞌ ríga̱ ne̱. Jamí ído̱ ni̱ta̱ngu̱jwa̱ ne̱, mbúkha̱a̱ꞌ máꞌ ikháánꞌ ñajuun ne̱. Náá numuu kajngó nithaꞌgí-mina̱ꞌ rí ma̱tha̱ne̱ rúꞌkhue̱n róꞌ. Ra̱ꞌkhá xa̱bo̱ numbaa nithane̱-nduwiin, rí Ana̱ꞌlóꞌ nithane̱-nduwaa». Ído̱ nidxawuun Ananía̱s ajngáa rúꞌkhue̱n, a̱ꞌkhue̱n ningáxi̱i̱ jamí nijáñuu̱. Jamí mbá xúgíin tsí ni̱dxawíín rí niríga̱, maphú nimíñúu̱.