Rí nene̱ 23
23
1A̱ꞌkhue̱n rí Páblo̱ niyaxu̱ún mbá xúgíin xa̱bo̱ buanuu ede̱, a̱ꞌkhue̱n niꞌthúu̱n: «Xa̱bo̱ buanuu a̱ngui̱nꞌ, asndo mbiꞌi máꞌ ríge̱ꞌ ikhúúnꞌ nda̱yo̱o̱ mújúnꞌ rí na̱nguá e̱ne̱ rí xkawe̱ꞌ xtáá ná inuu Ana̱ꞌlóꞌ».
2A̱ꞌkhue̱n Ananía̱s, tsí jayá idxu̱ún dxakuun, nixná-ñájúu̱n tsí wájun mijngi ná inuu Páblo̱ rí muxnáa̱ rawuun. 3A̱ꞌkhue̱n Páblo̱ niꞌthúu̱n: «¡Ana̱ꞌlóꞌ maxnáaꞌ ikháánꞌ, tsáánꞌ a̱jma̱ inaaꞌ! Ikháánꞌ xtaꞌún a̱ꞌkhue̱n kajngó ma̱ta̱xu̱ꞌdáa awan ga̱jma̱á numuꞌ xómá naꞌthán xtángoo. Jamí ikháánꞌ tsíthane̱-mbáníí xtángoo, rí naraxná-ñájun rí mi̱ꞌxnúꞌ».
4A̱ꞌkhue̱n xa̱bo̱ tsí wájun mijngi nitháa̱n Páblo̱:
―Náá numuu kajngó narathán-xkawi̱íꞌ tsí jayá idxu̱ún dxakuun, tsí niꞌgíi Ana̱ꞌlóꞌ róꞌ.
5A̱ꞌkhue̱n Páblo̱ niꞌthán:
―A̱ngui̱nꞌ, na̱nguá i̱yo̱o̱ xí ikhaa̱ ñajuu̱n tsí jayá idxu̱ún dxakuun. Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: “Ma̱xára̱tha̱n-xkawi̱íꞌ xa̱bo̱ nikhi̱i̱ tsí jayá idxu̱ún xa̱bo̱ xuajñaaꞌ”.
6Ído̱ ndiꞌyoo Páblo̱ rí mbá tikhuun xa̱bo̱ tsúꞌkhue̱n ñajúún xa̱bo̱ saduséo̱, jamí i̱ꞌwíin ñajúún xa̱bo̱ fariséo̱, a̱ꞌkhue̱n nixúxi̱i̱ a̱ꞌwóo̱ ná inúú mbá xúgíin xa̱bo̱ buanuu ede̱ tsí gatiin ikhín: «Xa̱bo̱ buanuu a̱ngui̱nꞌ, ikhúúnꞌ ñajunꞌ xa̱bo̱ fariséo̱, jamí a̱dée mbáa xa̱bo̱ fariséo̱. Xúge̱ꞌ na̱to̱ꞌo̱o̱ awan ga̱jma̱á numuꞌ, numuu rí gúꞌthu̱u̱n ga̱jma̱á mbá jañii a̱kui̱nꞌ rí mbuya̱a mbiꞌñúú tsí nijáñúú».
7Ído̱ niꞌthán Páblo̱ ajngáa rúꞌkhue̱n, a̱ꞌkhue̱n xa̱bo̱ fariséo̱ ni̱tsa̱ñu̱ú gajmíí xa̱bo̱ saduséo̱, jamí ni̱xpi̱ꞌtha̱-mijnée̱. 8Numuu rí xa̱bo̱ saduséo̱ nuthan rí xa̱bo̱ tsí nijáñúú na̱nguá iyaa̱ mbiꞌñúu̱, ni máꞌ ndawi̱in ánje̱l, ni máꞌ ndawi̱in tsí ñajúún xe̱ꞌ. Xómáꞌ tsí xa̱bo̱ fariséo̱ nanimbu̱únꞌ mbá xúgíí rúꞌkhue̱n. 9Jamí phú gakhe̱ ni̱xu̱xí a̱ꞌwá xa̱bo̱. A̱ꞌkhue̱n ni̱tu̱xu̱ún mbá tikhuun xa̱bo̱ tsí nusngáá xtángoo tsí júwa̱ꞌ gajmíí xa̱bo̱ fariséo̱, jamí nithee̱n: «Tsíxkamaaxo̱ꞌ nimbá rí ra̱máján rí neꞌne xa̱bo̱ tsíge̱ꞌ. Á gáꞌne xí mbáa xe̱ꞌ waꞌtháa̱n neꞌne, o mbáa ánje̱l mbo̱ꞌ. Ma̱xáwajúnꞌthi̱ínlóꞌ Ana̱ꞌlóꞌ».#23.9 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ma̱xáwajúnꞌthi̱ínlóꞌ Ana̱ꞌlóꞌ».
10Jamí i̱tha̱án na̱ka̱-ratsimuu rí na̱tsa̱ñu̱ú xa̱bo̱, a̱ꞌkhue̱n xa̱bo̱ ede̱ drígu̱ún tsí ku̱ra̱tuun ajwa̱nꞌ, nimíñuu̱ rí mi̱chíkú-makaa Páblo̱ gúne̱ xa̱bo̱. Ikhaa jngó nixná-ñájwii̱n rí ma̱wátaan xa̱bo̱ tsí ku̱ra̱tuun ajwa̱nꞌ kajngó mu̱ri̱yaa̱ꞌ ga̱jma̱á tsiakhe̱ ná majñu̱ú xa̱bo̱ tsúꞌkhue̱n, jamí magúu̱n juya̱a̱ ná guꞌwá rí gatiin xa̱bo̱ tsí ku̱ra̱tuun ajwa̱nꞌ.
11Rí i̱mba̱ mbroꞌon nisngájma-mina̱ꞌ Táta̱ ná inuu Páblo̱, jamí niꞌthúu̱n: «Araxná-mina̱ꞌ tsiakhe̱, Páblo̱. Numuu rí ndaꞌyóo mi̱dxo̱ꞌ gára̱tha̱n ga̱jma̱á numuꞌ ná Róma̱, xómá rí nirathán ga̱jma̱á numuꞌ ná Jerusalén ge̱jyoꞌ».
Naguáꞌdáá awan xa̱bo̱ rí mu̱xíya̱a̱ Páblo̱
12Ído̱ watse rí i̱mba̱ mbiꞌi, a̱ꞌkhue̱n mbá tikhuun xa̱bo̱ judío̱ niguáꞌdáá awan rí mu̱xíya̱a̱ Páblo̱. Ni̱xu̱da̱ꞌ-mijnée̱ mbá awan rí mu̱míníi̱, nithee̱n rí mu̱xúpiꞌtsii̱ ni máꞌ mu̱xúwa̱a̱n iya asndo gúxíya̱a̱ Páblo̱. 13Nanújngoo rí a̱jma̱ skíñúu (40) xa̱bo̱ tsí niguáꞌdáá awan rí mune̱ rúꞌkhue̱n. 14Ikhiin tsúꞌkhue̱n nigóó ná inúú dxakuun tsí gíꞌdoo numúú gajmíí xa̱bo̱ buanuu, jamí nithúu̱n: «Ikháanꞌxo̱ꞌ ni̱xu̱ꞌdá-mijnáxo̱ꞌ rí mu̱míni̱íxo̱ꞌ, rí mu̱xúpeꞌtsoxo̱ꞌ asndo gúxíya̱a̱xo̱ꞌ Páblo̱. 15Ikhaa jngó rí xúge̱ꞌ rá, ikháanꞌlaꞌ gajmiálaꞌ xa̱bo̱ buanuu ede̱, gu̱tha̱ánlaꞌ xa̱bo̱ ede̱ drígu̱ún tsí ku̱ra̱tuun ajwa̱nꞌ rí ma̱ꞌkha̱ jayáa̱ Páblo̱ gátsíí ná inalaꞌ. Gu̱ne̱laꞌ asndo xó rí nandalaꞌ mbu̱ya̱á i̱tha̱án xóó ga̱jma̱á numuu̱. Jamí ikháanꞌxo̱ꞌ ma̱juwa na̱ma̱ñaxo̱ꞌ rí mu̱xíya̱a̱xo̱ꞌ nákhí rí xóó tsíga̱níi̱ ge̱jyoꞌ».
16I̱ndo̱ó máꞌ numuu rí a̱dée dxáguíi Páblo̱ nidxawuun xáne niguáꞌdáá awan xa̱bo̱ tsúꞌkhue̱n ga̱jma̱á numuu a̱muu̱. A̱ꞌkhue̱n ni̱ke̱e̱ gáꞌthúu̱n ná guꞌwá rí gatiin xa̱bo̱ tsí ku̱ra̱tuun ajwa̱nꞌ. 17A̱ꞌkhue̱n Páblo̱ nindxaꞌwóo mbáa xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, jamí niꞌthúu̱n: «Ayu-ꞌcháa dxáma tsíge̱ꞌ ná inuu xa̱bo̱ ede̱ drígu̱ún tsí ku̱ra̱tuun ajwa̱nꞌ, numuu rí gíꞌdoo̱ mbá ajngáa rí maꞌthúu̱n».
18A̱ꞌkhue̱n rí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ ni̱ka̱ jayáa dxáma ná inuu xa̱bo̱ ede̱ drígúu̱n, jamí niꞌthúu̱n: «Páblo̱ tsí gída̱ꞌ ná géjwa̱nꞌ nindxaꞌwéꞌ jamí niꞌthínꞌ rí ma̱ꞌkha ja̱ya̱a̱ dxáma tsíge̱ꞌ inaaꞌ, numuu rí gíꞌdoo̱ mbá rí maꞌtháa̱nꞌ».
19Xa̱bo̱ ede̱ drígu̱ún tsí ku̱ra̱tuun ajwa̱nꞌ niwatuun ñawúun dxáma jamí ni̱ka̱ jayáa̱ janíí, a̱ꞌkhue̱n niraxu̱u̱:
―Dí ñajuun rí xtaꞌdáá ma̱ra̱thu̱nꞌ rá.
20A̱ꞌkhue̱n niꞌthán dxáma:
―Xa̱bo̱ judío̱ niguáꞌdáá awan rí mu̱nda̱ꞌa̱a̱ꞌ rí mi̱dxo̱ꞌ-ꞌcháa Páblo̱ gátsíí ná inúú xa̱bo̱ buanuu ede̱. Muni̱i̱ asndo xó rí nandúu̱n mbuyáa̱ i̱tha̱án xóó ga̱jma̱á numuu̱. 21I̱ndo̱ó máꞌ numuu rí ikháánꞌ ma̱xánimba̱a̱ꞌ xtañúu̱. Numuu rí nanújngoo rí a̱jma̱ skíñúu (40) xa̱bo̱ guáꞌthi̱ín ngu̱ꞌwa̱ rí mu̱xíya̱a̱, jamí asndo niguáꞌdáa̱ mbá awan rí mu̱míníi̱, rí mu̱xúpiꞌtsii̱ ni máꞌ mu̱xúwa̱a̱n iya asndo gúxíya̱a̱ Páblo̱. Jamí xúge̱ꞌ rá, júwe̱e̱ꞌ máꞌ xawi guáꞌthíi̱n rí ikháánꞌ ma̱tha̱ne̱-mbáníí rí mu̱nda̱ꞌa̱a̱ꞌ.
22A̱ꞌkhue̱n xa̱bo̱ ede̱ drígu̱ún tsí ku̱ra̱tuun ajwa̱nꞌ niꞌthán-ngawoo̱ dxáma rí ma̱ꞌgaa̱, jamí nixnángawoo̱ rí ma̱xáꞌthúu̱n asndo nimbáa xa̱bo̱ rí niꞌthúu̱n ajngáa rúꞌkhue̱n.
Páblo̱ na̱ka̱ jiꞌyáa ná inuu xa̱bo̱ ñajun Féli̱ks
23A̱ꞌkhue̱n nindxaꞌwúu̱n a̱jmi̱i xa̱bo̱ tsí nuthan-ñajúún tsí ku̱ra̱tuun ajwa̱nꞌ, jamí nixná-ñájúu̱n rí ga̱ju̱wá na̱ma̱ñúú mbá gu̱wa̱ꞌ skíñúu (200) xa̱bo̱ tsí ku̱ra̱tuun ajwa̱nꞌ, atsú skíñú gu̱wi̱inꞌ (70) tsí trámúú guáyo̱, jamí gu̱wa̱ꞌ skíñúu xa̱bo̱ tsí juda ajwa̱nꞌ rí júdú inuu. Kajngó ma̱ga̱jnúu̱ magóo̱ ná Sesaréa̱ ído̱ gáꞌne mijnagu̱wa̱ꞌ i̱ka̱ ajwa̱nꞌ rí mbroꞌon. 24Xúꞌkhue̱n máꞌ nixná-ñájúu̱n rí ga̱ju̱wá na̱ma̱ñúú guáyo̱ tsí ma̱riguu Páblo̱ kajngó nda̱a̱ rí gágíꞌnuu̱, jamí gagóo̱ juya̱a̱ ná inuu xa̱bo̱ ñajun Féli̱ks. 25Jamí niꞌnii̱ mbá i̱yi̱i̱ꞌ rí naꞌthán xáꞌnii:
26«Ikhúúnꞌ ñajunꞌ Kláudio̱ Lísia̱s, na̱ra̱xi̱ínlo̱ꞌ táta̱ nikhi̱i̱, xa̱bo̱ ñajun Féli̱ks. 27Xa̱bo̱ tsíge̱ꞌ nikhuáa nene̱ xa̱bo̱ judío̱, jamí inu máꞌ júwe̱e̱ꞌ rí mu̱xíya̱a̱ ído̱ rí ikhúúnꞌ ne̱ne̱-jríya̱a̱ꞌlo̱ꞌ gajmíꞌ xa̱bo̱ tsí ku̱ra̱tuun ajwa̱nꞌ, numuu ni̱dxawuun rí xa̱bo̱ Róma̱ ñajuu̱n. 28Ikhúúnꞌ ndiyoꞌ mba̱yo̱o̱ náá numuu kajngó nuni̱i̱ aꞌkhúun, ikhaa jngó nika ja̱ya̱a̱lo̱ꞌ ná inúú xa̱bo̱ buanuu ede̱ drígúu̱n. 29A̱ꞌkhue̱n ndi̱yo̱o̱ rí nuni̱i̱ aꞌkhúun ga̱jma̱á numuu xtángawúu̱n ikhii̱n, i̱ndo̱ó máꞌ numuu rí táꞌnii̱ nimbá aꞌkhán rí asndo jaꞌyoo ma̱ja̱ñúu̱ ni máꞌ rí ma̱ꞌgee̱ géjwa̱nꞌ. 30I̱ndo̱ó máꞌ numuu rí ído̱ ni̱dxawuun rí xa̱bo̱ judío̱ niguáꞌdáá awan rí mu̱xíya̱a̱ xa̱bo̱ tsíge̱ꞌ, a̱ꞌkhue̱n mbá nacha̱ máꞌ ni̱xu̱ꞌmáa̱ ná inaaꞌ ikháánꞌ. Jamí ni̱thu̱ún tsí nune̱ aꞌkhúu̱n rí ná inaaꞌ ikháánꞌ gúthee̱n rí guáꞌdáa̱ muthee̱n ga̱jma̱á numuu̱. Mba̱xíꞌlóꞌ rá».#23.30 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Mba̱xíꞌlóꞌ rá».
31A̱ꞌkhue̱n xa̱bo̱ tsí ku̱ra̱tuun ajwa̱nꞌ nene̱-mbáníí rí waꞌxná-ñájúún, nigóo̱ juya̱a̱ Páblo̱ mbroꞌon máꞌ rúꞌkhue̱n asndo ná xuajen Antípa̱tri̱s. 32Jamí i̱mba̱ mbiꞌi, tsí nagóó nakhúún nithangi̱in ná guꞌwá rí gatiin xa̱bo̱ tsí ku̱ra̱tuun ajwa̱nꞌ, jamí tsí trámúú guáyo̱ nigóó ga̱jma̱á nindxu̱u̱ Páblo̱. 33Ído̱ niguáꞌníi̱ ná Sesaréa̱, a̱ꞌkhue̱n ni̱xna̱xíi̱ i̱yi̱i̱ꞌ inuu xa̱bo̱ ñajun, jamí ni̱xna̱xíi̱ Páblo̱ mangaa. 34Ído̱ wámbo̱o̱ xa̱bo̱ ñajun ni̱gu̱xnuu i̱yi̱i̱ꞌ, a̱ꞌkhue̱n niraxu̱u̱ Páblo̱ náá xuajñuu̱. Jamí ído̱ nidxawuu̱n rí xa̱bo̱ Silísia̱ ñajuu̱n, 35a̱ꞌkhue̱n niꞌthúu̱n: «Ma̱dxawaanꞌ ído̱ gáguáꞌnú tsí nune̱ aꞌkháanꞌ». A̱ꞌkhue̱n nixná-ñájwii̱n rí mi̱tia̱wáa̱n ná guꞌwá mba̱a̱ rí neꞌne Eróde̱s.
ទើបបានជ្រើសរើសហើយ៖
Rí nene̱ 23: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
