Rí nene̱ 17
17
Páblo̱ ga̱jma̱á Síla̱s naguáꞌnú ná Tesalóni̱ka̱
1Páblo̱ ga̱jma̱á Síla̱s ninújngúu̱n ná xuajen Anfípo̱li̱s jamí Apolónia̱, a̱ꞌkhue̱n niguáꞌníi̱ ná xuajen Tesalóni̱ka̱, ná ꞌgí mbá guꞌwá rí na̱gi̱mbíin xa̱bo̱ judío̱. 2Páblo̱ ni̱ka̱ ná guꞌwá rí na̱gi̱mbíin xa̱bo̱ judío̱, xómá rí naꞌne jayuu̱. Atsú mbiꞌi rí nduya̱a xu̱únꞌ xa̱bo̱ ni̱ke̱e̱ ikhín, jamí naꞌthán-mine̱e̱ꞌ gajmíi̱. 3Naꞌthán-makúu̱n ga̱jma̱á majñu̱u̱ i̱yi̱i̱ꞌ ajngóo Ana̱ꞌlóꞌ, rí jaꞌyoo rí ma̱ja̱ñúu Krísto̱, jamí jaꞌyoo rí mbayáa̱ mbiꞌyuu̱. Jamí xáꞌnii iꞌthúu̱n: «Jesús tsí na̱tha̱nꞌlaꞌ ga̱jma̱á numuu, ikhaa̱ ñajuun Krísto̱». 4Mbá tikhuun xa̱bo̱ judío̱ ninimbu̱únꞌ jamí nimbáxúu̱n gajmíi̱ Páblo̱ ga̱jma̱á Síla̱s. Mangaa máꞌ phú mbaꞌiin xa̱bo̱ griégo̱ tsí nune̱-mba̱a̱ máꞌ Ana̱ꞌlóꞌ ninimbu̱únꞌ, xúꞌkhue̱n máꞌ phú mbaꞌiin go̱ꞌo̱ tsí gíꞌdoo numúú ninimbu̱únꞌ.
5I̱ndo̱ó máꞌ numuu rí xa̱bo̱ judío̱ tsí tsínimbu̱únꞌ, nixígúu̱n jamí ni̱gímbúu̱n mbá tikhuun xa̱bo̱ ra̱májíin tsí ngrigu̱ún na̱nguá i̱ñajun. A̱ꞌkhue̱n nini̱i̱ rí xa̱bo̱ xuajen mu̱xu̱xí a̱ꞌwá, xúꞌkhue̱n máꞌ ni̱dráꞌii̱n ga̱jma̱á tsiakhe̱ ná guꞌwóo Jasón numuu rí nduꞌyáa̱ Páblo̱ ga̱jma̱á Síla̱s, kajngó mu̱rawíi̱n jamí magóo̱ judii̱n ná inúú xa̱bo̱ xuajen. 6I̱ndo̱ó máꞌ numuu rí na̱nguá ni̱xkamii̱, ikhaa jngó ni̱ríya̱a̱ꞌ ga̱jma̱á tsiakhe̱ Jasón jamí i̱ꞌwíin a̱ngia̱nꞌlóꞌ, nigóo̱ judii̱n ná inúú tsí ñajúún xa̱bo̱ ñajun ná xuajen. Jamí xáꞌnii nu̱ndxa̱ꞌwe̱e̱: «Ikhiin xa̱bo̱ tsíge̱ꞌ, tsí nune̱-ngra̱ꞌiin xa̱bo̱ ná mbá xúgíí numbaa, niguáꞌnú ge̱jyoꞌ mangaa. 7Jamí Jasón ni̱grui̱gúu̱n ná guꞌwóo̱. Mbá xúgíin xa̱bo̱ tsúꞌkhue̱n tsíne̱-mbáníi̱ rí naxná-ñájun thúngaa Sésa̱r, jamí nuthee̱n rí xtáa i̱mba̱a̱ꞌ thúngaa mbiꞌyuu Jesús».
8Ído̱ rí xa̱bo̱ xuajen gajmíí xa̱bo̱ ñajun ni̱dxawíín ajngáa rúꞌkhue̱n, a̱ꞌkhue̱n ni̱xu̱xíi̱ a̱ꞌwá. 9I̱ndo̱ó máꞌ numuu rí xa̱bo̱ ñajun, ni̱ni̱ꞌñáa̱ Jasón gajmíí i̱ꞌwíin a̱ngia̱nꞌlóꞌ, ído̱ wámbúu̱n nixnee̱ mbúkha̱a̱ rí ni̱ndu̱ꞌúu̱n kajngó mu̱ni̱ꞌñúu̱.
Páblo̱ ga̱jma̱á Síla̱s naguáꞌnú ná Beréa̱
10A̱ꞌkhue̱n a̱ngia̱nꞌlóꞌ mbá nacha̱ máꞌ ni̱xu̱ꞌmaa̱ Páblo̱ ga̱jma̱á Síla̱s ído̱ neꞌne mbroꞌon, rí magóo̱ ná xuajen Beréa̱. Ído̱ niguáꞌníi̱ ikhín, a̱ꞌkhue̱n ni̱tu̱ꞌúu̱n ná guꞌwá rí na̱gi̱mbíin xa̱bo̱ judío̱. 11Jamí xa̱bo̱ judío̱ tsúꞌkhue̱n i̱tha̱án máꞌ májáan a̱kuíi̱n ikhii̱n xó rí tsí júwa̱ꞌ ná Tesalóni̱ka̱, numuu rí mbá jañii a̱kuíi̱n ni̱dri̱guíi̱ ajngáa máján. Xúꞌkhue̱n máꞌ mbámbá mbiꞌi nune̱-gajma̱a̱ i̱yi̱i̱ꞌ ajngóo Ana̱ꞌlóꞌ, kajngó mbuyáa̱ xí gakon rí nithúu̱n. 12Ikhaa jngó phú mbaꞌiin tsí ikhii̱n ninimbúu̱n juyáa̱ Jesús, jamí phú mbaꞌiin xa̱bo̱ griégo̱ ninimbu̱únꞌ mangiin, go̱ꞌo̱ tsí gíꞌdoo numúú jamí xa̱bekha. 13Ído̱ ni̱dxawíín xa̱bo̱ judío̱ tsí júwa̱ꞌ ná Tesalóni̱ka̱ rí Páblo̱ naꞌthán-ráꞌa ajngóo Ana̱ꞌlóꞌ ná Beréa̱ mangaa, a̱ꞌkhue̱n nigóo̱ ikhín, nini̱i̱ rí xa̱bo̱ tsí mbaꞌiin mu̱xu̱xí a̱ꞌwá. 14I̱ndo̱ó máꞌ numuu rí a̱ngia̱nꞌlóꞌ mbá nacha̱ máꞌ ni̱xu̱ꞌmaa̱ Páblo̱ ma̱ꞌga ná rawuun iya a̱pha̱. Xómáꞌ Síla̱s ga̱jma̱á Timotéo̱ ninguanúu̱ ná Beréa̱. 15Xómáꞌ xa̱bo̱ tsí nagóó ga̱jma̱á nindxu̱u̱ Páblo̱, nigóo̱ juya̱a̱ asndo ná xuajen Aténa̱s. Ído̱ nithangii̱n, juye̱e̱ ajngóo Páblo̱ niguwáa̱n, rí mutháa̱n Síla̱s ga̱jma̱á Timotéo̱ rí wapha máꞌ gúni̱i̱ rí magóo̱ gúxkamaa̱ ná Aténa̱s.
Páblo̱ naꞌsngáá ná Aténa̱s
16Awúun máꞌ rí Páblo̱ gíꞌthu̱u̱n ná Aténa̱s rí ma̱ga̱nú Síla̱s ga̱jma̱á Timotéo̱, phú nadaa a̱kuii̱n ído̱ ndiꞌyoo̱ rí mbá xúgíí awúun xuajen na̱gu̱ma-mbi̱in tsí ra̱ꞌkháa Ana̱ꞌlóꞌ ñajúún. 17Ikhaa jngó naꞌthán-mine̱e̱ꞌ gajmíi̱ xa̱bo̱ judío̱ ná guꞌwá rí na̱gi̱mbíi̱n, jamí naꞌthán-mine̱e̱ꞌ gajmíi̱ i̱ꞌwíin xa̱bo̱ tsí nune̱-mba̱a̱ Ana̱ꞌlóꞌ. Xúꞌkhue̱n máꞌ mbámbá mbiꞌi naꞌthúu̱n xa̱bo̱ tsí na̱gi̱mbíin ná xuáá. 18Ikhín máꞌ naꞌthán-mine̱e̱ꞌ gajmíi̱ mbá tikhuun xa̱bo̱ tsí nune̱-gajma̱a̱ gisngáá drígu̱ún epikúre̱o̱, jamí tsí nune̱-gajma̱a̱ gisngáá drígu̱ún estóiko̱. A̱ꞌkhue̱n mbá tikhuun tsúꞌkhue̱n nuthan: «Dí iyoo gáꞌthán xa̱bo̱ tsíge̱ꞌ, rí naꞌthán guéño rá». Jamí i̱ꞌwíin nuthan: «Asndo xó mbáa xa̱bo̱ tsí naꞌthán-ráꞌa ga̱jma̱á numúú i̱ꞌwíin tsí nithúún “ana̱ꞌlóꞌ” jaꞌnii̱». Numuu rí Páblo̱ naꞌthán-rúꞌúu̱n ajngáa máján ga̱jma̱á numuu Jesús, jamí ga̱jma̱á numuu rí mbuya̱a mbiꞌñúú xa̱bo̱. 19A̱ꞌkhue̱n nigóo̱ juya̱a̱ ná nawi̱in xa̱bo̱ ñajun xuajen ná nutháa̱n Areópa̱go̱, jamí ni̱ra̱xíi̱: «Á ma̱goo mbu̱ya̱á mangáanꞌxo̱ꞌ dí gisngáá nuxe̱ꞌ ñajuun ríge̱ꞌ rí narathán ga̱jma̱á numuu rá. 20Numuu rí ni miꞌtsú túdxawíínxo̱ꞌ rí narathánxo̱ꞌ, jamí nandaxo̱ꞌ mbu̱ya̱á dí iyoo gáꞌthán ajngáa rúꞌkhue̱n». 21(Numuu rí mbá xúgíin tsí xa̱bo̱ Aténa̱s jamí xa̱bo̱ tsí naguwá i̱ꞌwá xuajen tsí júwa̱ꞌ máꞌ ikhín, nda̱a̱ máꞌ i̱mba̱ rí phú nuni̱i̱, rí i̱ndo̱ó máꞌ rí nuthee̱n numuu mbá rí nuxe̱ꞌ o nu̱dxawíi̱n mbá rí nuxe̱ꞌ niríga̱ mbo̱ꞌ.)
22A̱ꞌkhue̱n Páblo̱ ni̱we̱je̱ ná ti̱kua̱pho̱o̱ Areópa̱go̱, jamí niꞌthúu̱n: «Xa̱bo̱ buanuu Aténa̱s, mbá xúgíí rí nda̱yo̱o̱lo̱ꞌ nasngájma rí ikháanꞌlaꞌ phú máján nu̱ne̱-mbáníílaꞌ rí nandúún tsí nu̱ne̱-mbi̱inlaꞌ. 23Numuu rí ído̱ naka-ranújngoꞌ nda̱yo̱o̱ ná nu̱ne̱-mbi̱inlaꞌ tsí nanimba̱ꞌlaꞌ ju̱ñu̱ú, a̱ꞌkhue̱n ni̱xkamaa mangaa mbá ná ka̱ma naꞌthán ajngáa ríge̱ꞌ: “Ná nuꞌthán-jáñíílóꞌ Ana̱ꞌlóꞌ tsí tsíꞌne̱-nuwiinlóꞌ”. Ikhaa jngó, ikhúúnꞌ na̱tha̱nꞌlaꞌ ga̱jma̱á numuu Ana̱ꞌlóꞌ, tsí ikháanꞌlaꞌ nu̱ne̱-mba̱a̱laꞌ, maske máꞌ tsíne̱-nuwiinlaꞌ.
24»Ikhaa Ana̱ꞌlóꞌ tsí neꞌne-ku̱maa numbaa jamí mbá xúgíí rí ríga̱ ná inuu ne̱, ikhaa̱ ñajuu̱n tsí naꞌthán-ñájuun mikhu ga̱jma̱á ju̱ba̱ꞌ. Na̱nguá xtáa̱ ná awúun guꞌwá dxákuun rí nune̱ xa̱bo̱ numbaa, 25ni máꞌ tsíꞌyóo̱ rí mi̱tambáyíi̱ nitháan gúne̱ xa̱bo̱ numbaa ga̱jma̱á ñawúún. Numuu rí ikhaa̱ naꞌnii̱ rí mbá xúgiáanꞌlóꞌ nduꞌyalóꞌ, xúꞌkhue̱n máꞌ naxnálóꞌ gíñá, jamí naxnálóꞌ mbá xúgíí rí ndaꞌyálóꞌ. 26Jamí ga̱jma̱á majñu̱u̱ mbáwíi xa̱bo̱ niꞌnii̱ mbá xúgíí inii xa̱bo̱, kajngó ma̱ju̱wée̱ꞌ mbá xúgíí inuu numbaa. Wapha máꞌ niꞌgí-mine̱e̱ꞌ nguáná ma̱ju̱wée̱ꞌ, jamí asndo náá jayáa mbaa rí ma̱ju̱wée̱ꞌ gáꞌne. 27Ana̱ꞌlóꞌ neꞌne mbá xúgíí rúꞌkhue̱n kajngó mbu̱ꞌyáa̱ ikhaa̱, á gáꞌne xí awúun rí nu̱xkajngaa̱, ma̱goo mu̱xkamaa̱. Gakon máꞌ rí Ana̱ꞌlóꞌ na̱nguá xtáa tsíngua̱ꞌ inuu mbámbáa tsí ikháánꞌlóꞌ. 28Numuu rí ga̱jma̱á numuu̱ ikhaa̱ nduꞌyalóꞌ, na̱ba̱ñáaꞌlóꞌ jamí juwalóꞌ. Xómá nithan mbá tikhuun xa̱bo̱ dxágua̱ dríga̱ꞌlaꞌ: “Xa̱bo̱ ri̱jyu̱u̱ꞌ Ana̱ꞌlóꞌ ñajwanlóꞌ”. 29Ikhaa jngó, numuu rí xa̱bo̱ ri̱jyu̱u̱ꞌ Ana̱ꞌlóꞌ ñajwanlóꞌ, na̱nguá gíꞌmaa mu̱ndxaꞌwá-mijnálóꞌ rí Ana̱ꞌlóꞌ jaꞌnii xómá ajwa̱nꞌ mo̱jmo̱ꞌ, o ajwa̱nꞌ miꞌxá, o itsí mbo̱ꞌ, rí nutháá xa̱bo̱ ma̱ꞌne xómá rí na̱ju̱múu̱ ikhii̱n. 30Rí nákhí wajyúú Ana̱ꞌlóꞌ neꞌne mba̱a̱ a̱kui̱in jaꞌyoo ríge̱ꞌ, numuu rí júgoo inúú xa̱bo̱. I̱ndo̱ó máꞌ numuu rí xúge̱ꞌ rá, naxná-ñájúu̱n mbá xúgíin xa̱bo̱ tsí júwa̱ꞌ mbá xúgíí inuu numbaa rí ma̱thangii̱n ná inuu̱ ikhaa̱. 31Numuu rí Ana̱ꞌlóꞌ naꞌgí mbá mbiꞌi rí maxudaa mújúun awan ga̱jma̱á numúú mbá xúgíin xa̱bo̱, ga̱jma̱á majñu̱u̱ xa̱biya̱ tsí ikhaa̱ niraꞌwíi̱. Ikhaa máꞌ Ana̱ꞌlóꞌ nasngájmúú mbá xúgíin xa̱bo̱ rí gakon rí niraꞌwíi̱ tsúꞌkhue̱n, ído̱ niꞌnii̱ rí mbayáa̱ mbiꞌyuu̱».
32I̱ndo̱ó máꞌ numuu rí ído̱ ni̱dxawíi̱n ga̱jma̱á numuu rí mbuya̱a mbiꞌñúú wa̱jen, a̱ꞌkhue̱n mbá tikhuun nu̱tsi̱jmaa Páblo̱, jamí i̱ꞌwíin nuthan: «Nda̱wa̱á gúdxawaanꞌxo̱ꞌ ga̱jma̱á numuu rúꞌkhue̱n». 33A̱ꞌkhue̱n Páblo̱ nigájna̱a ná majñu̱ú xa̱bo̱ tsúꞌkhue̱n. 34I̱ndo̱ó máꞌ numuu rí mbá tikhuun xa̱bo̱ ninimbu̱únꞌ, a̱ꞌkhue̱n nimbáxúu̱n ga̱jma̱á nindxu̱u̱ Páblo̱. Mbáa tsúꞌkhue̱n mbiꞌyuu Dionísio̱, tsí jimaa gajmíí xa̱bo̱ ñajun ná Areópa̱go̱, xúꞌkhue̱n máꞌ ninimbo̱o̱ꞌ mbáa a̱ꞌgo̱ tsí mbiꞌyuu Dáma̱ri̱s, jamí i̱ꞌwíin xa̱bo̱ ga̱jma̱á nindxúu̱n.
ទើបបានជ្រើសរើសហើយ៖
Rí nene̱ 17: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
