लु 14
14
जिसु मित्टेन रुगि होड़े बोगेयेदे
1आदो मित् जिरा़उक् माँहाँरे फा़रिसिकोरेन मुखिया़को मोदरेन मित् होड़ाक् ओड़ाक्रे जोम ला़गित्ए बोलोयेनरे ओनको दोको ता़नखिआकादे ताहेंकाना। 2आर ञेलपे, मित्टेन उदरि होड़ जिसु सामाङरेये ताहेंकाना। 3खानगे जिसु दो आ़न गुरुको आर फा़रिसिकोय मेतात्कोवा, “जिरा़उक् माँहाँरे दो होड़ बोगे गानोक्आ से बाङा?” 4मेनखान ओनको दो हापेगेको ताहेंयेना, खान चापोकातेये बोगेकेदेया आरे बिदा़कादेया।
5आदो ओनकोय मेतात्कोवा, “आपे मोदरे जाहाँयरेन गिदरा़ से डाङगरा कुञरेये ञुरलेन खान, जिरा़उक् माँहाँ हिलोक् हों बाड़े हारेफारे बाय ओर राकाप्गोदेया?” 6आर नोवाको काथा रेयाक् बाको रोड़ रुवा़ड़ दाड़ेयादेया।
निंधा़न ताहेंन आर पेक्ड़ाको रेयाङ
7आदो जिसु ओनको नेवता आकानकोय ता़फिनकेत्कोवा चेत्लेका मानोतानाक् ठा़ँइकोको बाछावजोङकान, खान मित्टेच् फेने ला़इयात्कोवा, 8“जाहाँय होड़ बापला भोजरेये नेवतालेम खान, मानोतानाक् ठा़ँइरे दो आलोम दुड़ुप्आ, पासेच् आम खोन हों बा़ड़ति मानोतान होड़े नेवता आकादे। 9आम आर उनि बाना होड़े नेवता आकात्बेनिच् दो हेच्कातेये मेताम, ठा़ँइ दो उनि होड़ आड़ाक्आयमे, आदो हाड़ेयागाड़ेया तायोम उता़राक् ठा़ँइरेम दुड़ुप्एनगे। 10मेनखानेम नेवतालेनरे सेनकाते तायोम उता़र ठा़ँइरे दुड़ुप्मे, जेमोन नेवता आकात्मेयिच् दो हेच्लेनरेये मेताम ए गाते देला नोते लाहाक् तालाङमे, उनरे मान होयोक्तामा आम तुलुच् सानाम दुड़ुप् पानतेयाकानको सामाङरे। 11एनते आच्ते माराङोक् मित्के मित् होड़ दोए चोपोत ओचोक्आ आर आच्ते हुडिञोक्इच् दोए उसुल ओचोक्आ।”
12आदो नेवता आकादेयिच् होंए मेतादेया, “आमेम माञजान सेम केदोक् भोजलेरे आमरेन गातेको, से आमरेन बोयहाको, से आमरेन पेड़ाको, से आमरेन किसा़ँड़ आडेपासेरेनको दो आलोम नेवताकोवा, पासेच् आको होंको नेवता हालामे आर हाला हा़लि होयोक्ताम। 13मेनखान आमेम भोजलेरे रेङगेच् ओरेच्को, ठुनटा़को लेडहाको आर काँड़ाँको बाड़े नेवताकोम। 14आदो भोरानिच्एम होयोक्आ, एनते ओनको दो हाला रुवा़ड़ाम ला़गित् चेत् हों बा़नुक्ताकोवा, एनते भागे होड़कोवाक् जिवेत् बेरेदोक्रेगे हालावामा।”
माराङ भोज रेयाक् फेन
(माथ 22:1-14)
15खानगे उनि तुलुच् जोजोम दुड़ुप् आकानको मोदरेन मित् होड़ ओनाको आँजोमकातेये मेतादेया, “भोरानगेयाय उनि दो, ओकोय इसोराक् राजरे पिठा़इ जोम ञाम।”
16मेनखान जिसु दोए मेतादेया, “मित् होड़ माराङ ओकोच्ए केदोक् भोजकेदा आर आ़डि होड़े नेवताकेत्कोवा। 17आदो केदोक् ओकते आच्रेन गुतिये कोलकेदेया नेवता आकानको मेताको ला़गित्, एनकाथाय, ‘देला हिजुक्पे, एनते नितोक् दो भोज तेयारेना।’ 18खानगे ओनको दो जोतोगे मिमित् मिमित्ते इका़ ओचोक्को एहोप् एना पा़हिलिच् दोए मेतादेया, ‘मित्टेच् गोडा इञ किरिञ आकादा आर ओना ञेला मेनते चालाक्तेगे होयोक्तिञा नेहोंराम कानाञ इका़का़ञमे।’ 19एटाक्इच् दोए मेनकेदा, ‘मोंड़ें आराँड़ डाङगराञ किरिञ आकात्कोवा आर ओनको बिक्डा़उ इञ चालाक्काना, नेहोंराम काना़ञ इका़ ओचोका़ञमे।’”
20“एटाक्इच् दोए मेनकेदा, ‘बा़हु आकावानाञ, ओनाते बा़ञ सेन दाड़ेयाक् काना।’ 21आदो उनि गुति दो हेच्काते किसा़ँड़तेत् ओनाकोय ला़इयादेया खानगे उनि ओड़ाक् किसा़ँड़ दो राङगावेनते आच्रेन गोलामे मेतादेया ‘मा हाकोपाको नागराहा रेयाक् कुलहिको आर चिरित् होरकोते सेन होदोक्मे आर रेङगेच् ओरेच्को आर ठुन्ठा़को आर काँड़ाँको आर लेडहाको नोंडे आ़गु आदेरकोम।’ 22आदो उनि गुतिये मेनकेदा, ‘ए प्रोभु, आमेम हुकुमलेत् लेकागे होयेना, एनहों ठा़ँइ मेनाक्गेया।’ 23खान उनि किसा़ँड़ दो गुतिये मेतादेया, ‘दो सोड़ोककोते आर सुड़ुँच् होरकोते चालाक्मे आर होड़को आ़गुते हों आ़गुकोम जेमोन ओड़ाक् दो पेरेजोक्तिञ। 24एनतेञ मेतापेकाना,ओनको नेवतालेत्को होड़ मोदरे ओकोय हों इञाक् केदोक् भोज दो बाय चाखा ञामा।’”
जिसुरेन चेला होयोक्रे हारोन कोसटो
(माथ 10:37-38)
25आर आ़डि गादेल होड़ जिसु साँवतेको चालाक्कान ताहेंकाना, आदो आ़चुरेनतेये मेतात्कोवा, 26जाहाँय होड़ इञ ठेने हिजुक्, आर आच्रेन आपात आर एङगात आर ओड़ाक् होड़ आर गिदरा़को आर बोयहाको आर मिसराको इञ खोन बा़ड़तिये दुला़ड़को खान, हें आयाक् जिवि सुदहा़ हों, उनि दो इञरेन चेला ओहोय होय दाड़ेलेना।#माथाय १०:३७ 27ओकोय आयाक् कुरुस बाय गोग आर इञ तायोमते बाय हिजुक् उनि दो इञरेन चेला ओहोय होय दाड़ेलेना।#माथाय १०:३८; १६:१४; मा़रकुस ८:३४; लुक ९:२३
28“एनते आपे मोदरे जाहाँय मित्टेच् बुरुंज बेनावे मेनजोङ खान पा़हिल दो दुड़ुप्काते खोरोचतेत् चेत् बाय हिसा़ब माड़ाङा एनकाथाय ओना पुरा़उ ला़गित् मेनाक्तिञा से बाङा? 29बाङखान पासेच् नेव बा़इसा़उकाते बाय पुरा़उ दाड़ेयाक् खान, जोतो ञेञेलकोको लानदावाय आरको मेन। 30‘नुय होड़ दो बेक्नाव माय एहोप्लेत्गे मेनखान पुरा़उ मा बाय पुरा़उ दाड़ेयात्।’ 31से ओकोय राज हालाय एटाक् राजा तुलुच् लाड़हा़इरे ञापामोक् ला़गित्ए चालाक् खान पा़हिल दो दुड़ुप्काते बाय सोलहा जोङ एनकाथाय, गेल हाजार होड़ानते दो उनि मित्इसि हाजार होड़ानते इञ उपा़रते हिजुक्का़निच् दोञ दाराम दाड़ेवाया से बाङा? 32आर बाङखान, उनि सा़ङगिञरेये ताहेनरेगे आच्रेन दुतको कोलकाते सामगेक् ला़गित्ए कुलिजोङा।”
33ओनाते मुचा़त्रे जिसुइ मेतात्कोवा, “आपे मोदरे जाहाँयगे मेनाक् तायाक्को बाय देयागिडि खान उनि दो इञरेन चेला ओहोय होय दाड़ेलेना।”
बेकाम रेयाक् बुलुङ
(माथ 5:13; मा़र 9:50)
34“बुलुङ मा बोगेगे, मेनखान बुलुङ हों साबाक्लेन खान, ओना दो चेत्ते राहामोक्आ? 35ओना दो ओत ला़गित् हों काज रेयाक् दो बाङ आर गुरिच्मान्दे ला़गित् हों बाङ, मेनखान बाहरेतेको ओडोक गिडिकाक्आ, आँजोम ला़गित् लुतुर मेनाक्ताय होड़ दोए आँजोममा।”
ទើបបានជ្រើសរើសហើយ៖
लु 14: NTSPt25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Santhali Language © The Word for the World International and Santhali Translation Project, Nepal, 2025
