जोहा 9
9
जोनोम काँड़ाँ होड़े बोगेयेदे
1आर जिसुइ चालाव पारोमोक्कान ताहेंकानरे मित्टेन जोनोम काँड़ाँ होड़े ञेलकेदेया। 2आदो उनिरेन चेलाको कुलिकेदेया, “हेंदा रा़ब्बि, ओकोये का़इलेदा, उनि से उनिरेन एङगात आपात ओनाते काँड़ाँगेये जानाम एना?”
3जिसुइ रोड़ रुवा़ड़केदा, “नुय हों बाय का़इलेदा आर उनिरेन एङगात आपात हों बाङ, मेनखान जेमोन इसोराक् दाड़ेयानाक् का़मिको उनिरे सोदोरोक्। 4इञ दो कोलआकादेञिच् रेयाक् का़मि होयोक् तिञा। सिञ मेनाक् हा़बिच्, ञिंदा़ दाराकाना ओने उनरे ओकोय हों बाको का़मि दाड़ेयाक्। 5धा़रतिरे तिन हा़बिच् मिना़ञा, धा़रति रेयाक् मारसाल कानाञ।”#माथाय ५:१४; जोहान ८:१२
6नोवाकोय मेनकेत् खान ओतरेये थोकेदा आर थोते लोसोत्ए बेनावकेदा, आर ओना लोसोत् दो उनियाक् मेंत्किनरेये इला़त्आदेया आरे मेतादेया, 7“दो सेनकाते सिलोआम पुखरिरे आबोक्मे, तोरजोमाते दो कोल आकान।” आदो उनि सेनकाते मेंत्हाँय आप्एना, आर ञेञेलकाने रुवा़ड़ हेच्एना।
8आदो आडेपासेरेनको आर उनि कोकोयकान ताहेंकान पा़हिलको ञेलेकान ताहेंकान होड़को मेनकेदा, “नुयगे बाङ उनि दुड़ुप्काते कोकोयकान ताहेंकानिच् दो?”
9आदोम दोको मेनकेदा, “उनि कानगेयाय।” आदोम दोको मेनकेदा, “बाङा मेनखान उनि लेकानिच् कानाय।”
आच् होंए मेनकेदा, “उनि कानगेया़ञ।”
10आदोको कुलिकेदेया, “चेकाते एनडेखान मेत् दो बेङगेत्एनतामा?”
11उनिये रोड़ रुवा़ड़केदा, “उनि जिसुको मेताय होड़ दो लोसोत् बेनावकाते मेंत्किनरेये इला़त्आदिञा, आरे मेतादिञा, सिलोआमते सेनकाते आबोक्मे, आदो सेनकातेञ आप् एना आर इञ बेङगेत् गोत्केदा।”
12मेतादेयाको, “उनि दो ओकारे मेनाया?” मेनकेदाय “बा़ञ बाडाया।”
फा़रिसिको दो बोगेयेन रेयाङको कुपुलिकान
13उनि काँड़ाँय ताहेंकान होड़ दो फा़रिसिको ठेनको इदिकेदेया। 14एनहिलोक् दो जिरा़उक् माँहाँ ताहेंकाना ओने उनरे जिसु दो लोसोत् बेनावकाते मेंत् ए बेङगेत् ओचोकेत्ताय। 15आदो फा़रिसिको होंको कुलि आरोकेदेया चेत् लेकातेये बेङगेत्केदा मेनते, उनि दोए मेतात्कोवा, “इञाक् मेंत्किनरे लोसोत् ए इला़त्आदिञा, आदोञ आप् एना, आर इञ ञेञेल काना।”
16फा़रिसिको मोदरेन आदोम होड़को मेनकेदा, “नुय होड़ दो इसोर ठेन खोन दोए बाङ काना, एनते जिरा़उक् माँहाँ बाय मानावेत् दो।” एटाक्को दोको मेनकेदा, “चेकाते मित्टेन का़इ होड़ दो नोनकान चिनहा़कोय का़मि दाड़ेकेया?” आर ओनको तालारे भिना़भिनि होयेना।
17खान उनि काँड़ाँ होड़ आरहोंको मेतादेया, “आमाक् मेत्ए बेङगेत् मारसाल ओचोकेत्तामते उनि रेयाङ दो आम चेत्एम मेनेदा?” उनि दोए मेनकेदा, “मित्टेन ना़बि कानाय।”
18ओनाते जिहुदिकोरेन एकतिया़रियानको दो उनि रेयाङ बाको पा़तिया़उलेना, काँड़ाँगेये ताहेंकाना आर नितोक्ए ञेञेल काना मेनते, उनि मेंत्ए ञावान होड़रेन एङगात आपात आ़उरिको होहो आ़गुकिन हा़बिच्। 19आदोको कुलिकेत्किना, “नुयगे आबेनरेन होपोन कानाय ओने उनि रेयाङबेन मेनेत् काँड़ाँगेये जानामलेना मेनते, आर नितोक् दो चेकातेये ञेञेलकाना?”
20उनिरेन एङगात आपातकिन रोड़ रुवा़ड़केदा, “बाडाय गेयालिञ उनि दो आ़लिञरेन होपोन कानाय, आर काँड़ाँगेये जानामलेना मेनते, 21मेनखान चेकाते नितोक् दोए ञेञेल काना, ओना दो बा़लिञ बाडाया, से ओकोय उनियाक् मेंत्ए बेङगेत् ओचोकेत्ताया, ओना हों बा़लिञ बाडाया, आच्गे बाडे़ कुलियेपे सेंड़ाँगेयाय, उनिगे आच् रेयाङे ला़इया।” 22उनिरेन एङगात आपातकिन दो नोनकाकिन मेनकेदा, एनते जिहुदिकोरेन एकतिया़रियानकोकिन बोतोराकोकान ताहेंकाना, एनते जिहुदिको दो पा़हिलरेगेको गोटा आकावान ताहेंकाना बाङमा जाहाँयगे जिसु दो मा़सि कानाय मेनतेये आङगोचले खान उनि दो सुना़गोग खोने ओडोक ओचोक्आ। 23नोवा इया़ते उनिरेन एङगात आपात दोकिन मेनकेदा, बाङमा “सेंड़ाँगेयाय, आच् बाड़े कुलियेपे।”
24आदो उनि काँड़ाँय ताहेंकान होड़ दोसार छोटको होहोवादेया आरको मेतादेया, “इसोर ठोनोकायमे। आलेले बाडाया उनि दो का़इ होड़ कानाय मेनते।”
25खानगे उनिये रोड़ रुवा़ड़ात्कोवा, “का़इ होड़ कानचोय बाङ चोङ, ओना दो बा़ञ बाडाया, मित्गोटेनगेञ बाडाया, काँड़ाँञ ताहेंकाना, नितोक् दोञ ञेञेल काना।”
26आदोको मेतादेया, “चेत्ए चेकावात्मेया? मेंत् दो चेकातेये बेङगेत् ओचोकेत्तामा?”
27रोड़ रुवा़ड़ात्कोवाय, “नितगे चोञ ला़इयात्पे आर बापे आँजोमलेदा, चेदाक् आँजोम दोहड़ा सानायेत्पेया? आपे हों उनिरेन चेला होयोक् सानायेत्पेया से चेत्?”
28आदो चोकाक् बाकलाक्आदेतेको मेनकेदा, “आम कानाम उनिरेन चेला दो, आले दो मोसेरेन चेला कानाले। 29आलेले बाडाया इसोर दो मोसेये गालमाराव आकावादेया मेनते, मेनखान उनि दोए ओकारेनकानचो बाले बाडाया।”
30उनि होड़े रोड़ रुवा़ड़ात्कोवा, “नोवारेगे हाहाड़ा दो, आपे दो बापे बाडाया ओकारेन कानाय मेनते, आर एनरेहों इञाक् मेंत्किने बेङगेत् मारसाल ओचोकेत्तिञा। 31बाडाय गेयाबोन इसोर दो का़इ होड़कोवाक् बाय आँजोमा, मेनखान जाहाँयगेये इसोर सेवायिच्कान आर उनियाक् मोने लेकाय का़मिकान उनियाक्गेये आँजोमा। 32धा़रति एतोहोप् खोन तिस हों बाङ आँजोम आकाना जाहाँय होड़ मित्टेन जोनोम काँड़ाँयिच् रेयाक् मेंत्ए बेङगेत् मारसाल ओचोवाकात्ताया मेनते। 33नुय होड़ इसोर ठेन खोन आलोय ताहेंलेन खान होनाङ, चेत् हों ओहोय चेका दाड़ेलेया।”
34आदोको रोड़ रुवा़ड़ादेया, “आममा एकालते का़इरेम जानामाकान, आर आलेम चेत्आले काना?” खान बाहरेतेको ओडोक गोत्कादेया।
जिउतेन काँड़ाँको
35जिसुइ आँजोमकेदा बाहरेतेको ओडोक आकादेया मेनते, “आदो ञामकेदेतेये मेतादेया, मानवा होपोनरेम पा़तिया़उक् काना?”
36उनिये रोड़ रुवा़ड़केदा, “ओकोय कानाय, ए प्रोभु, उनिरेञ पा़तिया़उक्?”
37जिसुइ मेतादेया, “ञेल होंम ञेलआकादेया, आर आम तुलुच् गालमाराविच् दोए उनि कानगेया।”
38खानगेये मेनकेदा, “पा़तिया़उक् कानगेया़ञ ए प्रोभु, आरे सेवावादेया।”
39जिसुइ मेनकेदा, “इञ दो बिचा़र ला़गित् नोवा धा़रतितेञ हेच् आकाना, जेमोन बाङ ञेञेलकोको ञेञेल, आर ञेञेलको दोको काँड़ाँक्।”
40उनि तुलुच्को ताहेंकान आदोम फा़रिसिको दो नोवाको आँजोमकातेको मेतादेया, “आले होंले काँड़ाँगेया?”
41जिसुइ मेतात्कोवा, “काँड़ाँपे ताहेन खान होतेच् का़इ दो ओहो ताहेंलेनतापेया, मेनखान नितपे मेनेदा, ञेञेलकानगेयाले, आपेयाक् का़इ दो ताहेनकानगे तापेया।”
ទើបបានជ្រើសរើសហើយ៖
जोहा 9: NTSPt25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Santhali Language © The Word for the World International and Santhali Translation Project, Nepal, 2025
