जोहा 5
5
जिसु पुखरिरे होड़कोय बोगेयेत्को
1नोवा तायोम जिहुदिकोवाक् मित्टेन पोरोब ताहेंकाना, आर जिसु दो जेरुसालेमतेये राकाप् चालावेना। 2जेरुसालेमरे दो भिडि फाटोक ठेन मित्टेन पुखरि मेनाक्आ, ओकाटाक् इबरि पा़रसिते बेथेस्दाको मेताक्, ओना रेयाक् दो मोंड़ेंगोटेच् पिंडा़को मेनाक्आ। 3ओनाकोरे दो आ़डि उता़र का़हिलको, काँड़ाँको, लेडहाको आर रोहोड़ नाञ्जोमकोको गितिच्आकान ताहेंकाना; दाक् रेयाक् लाड़ावक् ञेल होहोरकान, 4एनते प्रोभुरेन मित्टेन दुत दो ओकते ओकते ओना पुखरिरेये फेडोक्आ आर दाक्ए लाड़ावा, आर दाक् लाड़ावलेन तायोम ओंडे दाक्रे फेड माड़ाङोक्इच् दो जाहान रोगतेगेये जा़बुनकोक्रे होंए, बोगेक्आ।
5आर ओंडे दो मित् होड़े ताहेंकाना, ओने उनि दो पे गेल इरा़ल सेरमा खोन रुवा़ जाड़ाव आकाने ताहेंकान। 6जिसु दो उनि गितिच् आकाने ञेलकेदे आर ढेर दिन खोने जाड़ाव आकाने बाडायकेत्तेये मेतादेया, “बोगेक् सानायेत्मेया?”
7उनि रुवा़क्इच् दोए रोड़ रुवा़ड़केदा, “ए बाबा, ओकोय हों बा़नुक्कोतिञा, दाक् लाड़ावलेनरे पुखरिते फेडेञ ला़गित् आर इञ चालाक्तेगे एटाक्इच् इञ लाहातेये फेडेनगे।”
8जिसुइ मेतादेया, “मा बेरेत्मे आमाक् आटेत्आक् कुटुङताम आर ताड़ाममे।” 9खानगे साटमेनते उनि होड़ दोए बोगेयेना आर आयाक् आटेत्आक् कुटुङकातेये दाँड़ाँ बाड़ाकेदा आर एनहिलोक् दो जिरा़उक् माँहाँ ताहेंकाना।
10ओनाते जिहुदिको दो उनि बोगे ओचोयेनिच्को मेतादेया जिरा़उक् माँहाँ काना आर आटेत्आक् कुटुङ बाड़ाय दो हुकुम बिरुदगेतामा।
11मेनखाने रोड़ रुवा़ड़ात्कोवा, “उनि बोगेकेदिञिच्गेये मेतादिञा, आटेत्आक् कुटुङताम आर ताड़ाममे।”
12कुलिकेदेयाको “ओकोय कानाय उनि होड़ दो, ओने ओकोये मेतात्मे कुटुङकाते ताड़ाममे?” 13मेनखान उनि बोगे ओचोयेनिच् दो बाय बाडायलाक्आ, उनि दोए ओकोय काना मेनते, एनते जिसु दोए गुसा़वेना, गादेल होड़ ओना ठा़ँइरेको ताहेंकानते।
14नोवाको तायोमते जिसु दो कोयजोङ ओड़ाक्रे उनिये ञामकेदेया आरे मेतादेया, “ञेलमे बोगे आकानाम आर दो आलोम का़या, जेमोन जाहानाक् बा़ड़ति बा़ड़िच् आलो होयोक्ताम।” 15उनि होड़ दोए चालावेना आर जिहुदिकोय ला़इयात्कोवा, बाङमा जिसु कानाय आच् बोगेयिच् दो।
16ओना इया़ते जिहुदिको दो जिसुको खेदेकान ताहेंकाना, जिरा़उक् माँहाँरे नोवाकोय का़मियेत् ताहेंकानते। 17जिसुइ रोड़ रुवा़ड़ात्कोवा आ़पुञ दो नित हा़बिच्ए का़मिकाना आर इञ होंञ का़मिकाना। 18नोवा इया़ते जिहुदिको दो आरतेत्गे उनि गोजे रेयाक् दावको ञामबाड़ायेत् ताहेंकाना, एनते जिरा़उक् माँहाँय टालावकेत् छाडा। उनि दो इसोर हों आच् निज आपात ए मेतादेया, ओने ओनकाते आच्तेत् इसोर बाराबारिये बेनावेन।
होपोन रेयाक् एकतिया़रि
19जिसु दो ओनकोय रोड़ रुवा़ड़ात्कोवा, सा़रि सा़रिगेञ मेतापेकाना, होपोन दो आपाते का़मियेत्काने ञेलेत् छाडा आच्ते दो चेत् हों बाय का़मि दाड़ेयाक्आ, एनते जाहानाक्कोगे आपाते का़मियेत्, ओनाको दो होपोन होंए का़मियेदा। 20एनते आपात दो होपोने दुला़ड़ेदेया, आर आच्ए का़मियेत् जोतोवाक्ए उदुक्आय काना आर नोवाको खोन हों माराङ का़मिकोय उदुक्आया जेमोनपे हाहाड़ाक्। 21एनते चेत्लेका बाबा दो गोच्कोय बेरेत्एत्को आरे जिवेत्एत्कोवा, ओनकागे होपोन हों जाहाँयकोय मोनेयाकोय जिवेत्कोवा। 22बाबा दो ओकोय हों बाय बिचा़रेत्कोवा, मेनखान सानाम बिचा़र दो होपोने एम आकावादेया, 23जेमोन बाबाको मानोत एदेकान लेका, होपोन हों जोतो होड़को मानोते, होपोन बाय मानोत एदे कानिच् दो बाबा बाय मानोत एदेकाना ओने ओकोय उनिये कोल आकादे।
24सा़रि सा़रिगेञ मेतापेकाना, इञाक् काथा आँजोमिच् आर कोल आकादिञिच्रे पा़तिया़उक्इच् दो जायजुग जियोन मेनाक्ताया आर बिचा़ररे बाय पाड़ावक्आ, बिचकोम मोरोन खोन जियोनतेये पारोम आकाना। 25सा़रि सा़रिगेञ मेतापेकाना, ओकते हिजुक् काना आर नित हों कानगेया, ओने उनरे गोच्को दो इसोररेन होपोन रेयाक् आड़ाङको आँजोमा, आर आँजोमको दोको जिवेदोक्आ। 26एनते चेत्लेका आपात दो आच्रे जियोन मेनाक्ताया, ओनकागे होपोन हों आच्रे जियोन ताहेनताय ला़गित् ए एम आकावादेया। 27आर बिचा़र ला़गित् एकतिया़रिये एम आकावादेया, एनतेये मानवा होपोन काना।
28नोवाते आलोपे हाहाड़ाक्आ, एनते ओकते हिजुक् काना ओने उनरे कोबोररे मेनाक्को जोतोगे उनियाक् आड़ाङको आँजोमा, 29आरको ओडोक हिजुक्आ, भागेयाक्को का़मि आकात् होड़ दो जियोन रेयाक् जिवेत् बेरेत् रुवा़ड़ोक् ला़गित् आर बा़ड़िच्आक्को का़मि आकात् होड़ दो बिचा़रोक् रेयाक् बेरेत् रुवा़ड़ोक् ला़गित्।
जिसु रेयाङ गोहा
30इञ दो इञते चेत् हों बा़ञ चेका दाड़ेयाक्आ, इञिञ आँजोमेत् लेकागेञ बिचा़रेदा, आर इञाक् बिचा़र दो ठिक गेया, एनते इञाक् मोनेजोङाक् दो बा़ञ ञाम काना, मेनखान कोलआकादिञ रेयाक् मेनजोङगे।
31इञ आपनार रेयाङ गोहाञ एम लेखान, इञाक् गोहा सा़रियाक् दो बाङ काना। 32मित्टेन एटागिच्गे इञ रेयाक् गोहा एमोक्कानिच् दो आर इञ बाडाया ओना गोहा दो सा़रिगेया ओकाटाक् इञ रेयाङे गोहा कान।
33आपे दो जोहान ठेन काथापे कोललेदा, आर उनि दो सा़रियाक् रेयाङ गोहाय एम आकादा। 34नोवा दो बाङ काना जे इञ दो होड़कोवाक् गोहा रेयाक् दोरकार मेनाक् तिञा, मेनखान नोवाकोञ रोड़ेदा जेमोनपे बाञचावक्। 35जोहान दो जोलोक्कान आर डिगडिगा़उक्कान दिउहेये ताहेंकाना आर उनियाक् मारसालरे मित् घा़ड़ि ला़गित् हुला़सोक्पे कुसिलेना।
36मेनखान इञ दो जोहान रेयाक् खोन हों माराङ गोहा मेनाक्तिञा, एनते ओकाको का़मि आ़पुञे एम आकावादिञा, ओना का़मि पुरा़वा मेनते, इना़को का़मिगे ओकाकोञ का़मियेत्कान, इञ रेयाङ गोहाय एमेदा जे आ़पुञगेये कोलआकादिञा। 37आरे कोल आकादिञ आ़पुञ, उनिगे इञ रेयाङ गोहाय एम आकादा, आपे बाङ दो उनियाक् आड़ाङ जाहाँतिसपे आँजोमाकात्ताया, आर बाङ दो उनियाक् मुठा़नपे ञेल आकात् 38आर बाङदो उनियाक् काथा आपेरे ताहें आकान ताहेनकान, एनते ओकोय उनिये कोल आकादे, उनिरे आपे दो बापे पा़तिया़उक् काना। 39सोसतोरकोपे डुन्ढा़वेदा, एनतेपे हुदिसेदा ओनारे जायजुग जियोन मेनाक्तापेया मेनते, आर ओनाकोगे इञ रेयाङ गोहा एमोक्आक्को दो, ओनागे इञाक् सोसतोर दो। 40आर जियोनपे ञाम ला़गित् इञ ठेन हिजुक् दो बाङ सानायेत्पेया।
41होड़को ठेन खोन सारहावक् बा़ञ खोज काना, 42मेनखान आपेको दोञ बाडाय आकात्पेया, आपेरे इसोर ला़गित दुला़ड़ दो बा़नुक् आनाङ। 43इञ दो इञरेन आ़पुञ ञुतुमतेञ हेच् आकाना आर बापे आङगोच एदिञा, मित्टेन एटागिच् आपनार ञुतुमतेये हेच्लेन खान, उनि दोपे आङगोचकेया। 44चेकातेपे पा़तिया़उ दाड़ेयाक्आ, आपे आपेरे मानोत ञामपे आसोक्काना, आर एसकार इसोर ठेन खोनाक् मान दो बापे खोज काना?
45आलोपे हुदिसोक्आ आ़पुञ ठेनिञ दुसिपेया मेनते, दुसियेत्पे कानिच् मेनाया, मोसेगे। ओने उनिरे आपेपे आस आकान। 46मोसेपे पा़तिया़वाय खान होनाङ, इञ होंपे पा़तिया़वा़ञकेञा, एनते इञ रेयाङे ओल आकादा। 47मेनखान उनियाक् ओलाक्को बापे पा़तिया़वाक् खान, चेकाते इञाक् काथाको दोपे पा़तिया़उक्आ?
ទើបបានជ្រើសរើសហើយ៖
जोहा 5: NTSPt25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Santhali Language © The Word for the World International and Santhali Translation Project, Nepal, 2025
