Luke 19
19
Zachaeus nah herahakelabe
1Jisu Jericho namdi ga lütlwe kahgwang zeu. 2Cidau, cika mige pezi Zacchaeus#19:2 Zacchaeus: hezi au Hebrewme zi nah cide pekie “mci.” lie kecuge bam, pa heraha kehame reu kedibe nah pa mahei. 3Nah pa Jisu caubi pie zielie piecu, dede hemaabe ziemne nah pa pera keduine, ngau luma. 4Cine pa pak ntwa gwang nah pecu pie zielie caimünbang reuga nrahang lu, kedanemene Jisu cilam de kahgwang lai kezeune. 5Nah Jisu heni cika gwanglu ge, ngangcuh pecu pie eh pe dage rang, “Zacchaeus, kelwa nghung lu, kedanemene Ih henai n ki ga bammai sialu.” 6Cine pa kelwa nghung lwe pe suisüt eh pecu pe kiga ngngwa lütlu. 7Nah mina pelane aide ngaulu ge, penui ncamdi, rang eh, “Pa kemaume ge gia tei zielie gwang dida.” 8Dede Zacchaeus saplu nah Rampaube dage rang, “Ainie, Rampaubo, Ih a ma pempie ge pwa kegahme de peu dizie, nah ma gade Ih makeheibe lede keheibe de cwa dicai, Ih ci mdai kieege peu dai dizie.”#Tet. 22:1 9Cidau Jisu pe dage rangdi, “Henai ki aika kelikelu gwang luda, kedanemene pa de Abraham leuhme ge kecu ziemne. 10Kedanemene Mina Nabe gah kedime de peei nah kelilu zielie gwang.”
Minas kerei samgwa
11Penui sam aidungde kingnei kebam dau, pa samgwa kedage ranglia si, kedanemene pa Jerusalem ga gwang mnadi zeu, nah penui Tinggwang hegwang gwang zette zie lie mningla kedine. 12Ciziemne pa rangdi, “Kedime ge mie deudi kemdei gage de kengkieng ngaulwe ne cailigwang dai zielie tetdi. 13Cine pa pe kilame hangkerei de qulwe penuide minas kerei#19:13 Minas kerei: kecak rangkanggeu kerei peugai, nah penuide rangbeu, ‘Heli teilu Ih gwang kemaktane.’ 14Dede pe leuhmedung pecu ngaurau eh hegwame gede pecai de langgai, rang eh, ‘Anui peu aipaude de anui reu hegwang tei neu ma.’ 15Pa hegwang kengkieng ngaulwe nli gwang kelu dau, pa kilame rangkang peu kegai medungde pe dage qu teugwang lo langgai, ciude penui heli tei eh daikiee ge mmilu dibi pa ci lu kerane. 16Iciu eh keraibe peda gwanglu, rang eh, ‘Kedibo, n rangkang zi kerei kieege pet ludi.’ 17Nah pa pe dage rang, ‘Teidau da, kila keyibo. Kedanemene nang makeceu nage gade de masang kelu ziemne, peu ncu namdi kerei reu kengkieng teizie.’ 18Cidau pekenabe de gwang, rang eh, ‘Kedibo, n rangkang zi mengei kieege pet ludi.’ 19Cine pa aipaude de de rangbeu, ‘Nangbe namdi mengei reu zie.’ 20Pecai kedage gwang, rang eh, ‘Kedibo, ainie n rangkang, Ih cide paineu gage kezui lwe kebai pwabam, 21Ih ncu hing di, kedanemene nang mina ketak kauge. Nang kai kemak gade de keu lala, nah linggai kemak gade de rumla kelane.’ 22Pa pe dage rang, ‘Ih n samrang gade ncu mmau zie, kila kenlienbo! Ih a lung ketak kauge, kai kemak gade de keu kela, nah linggai kemak gade de rum kela nang cini? 23Nah nang daitei a rangkang rangkangki gage kai meno, nah Ih nli kegwang dau, Ih pekai de si eh pwalu kera ge?’ 24Nah pa cika sap kebammedung dage ranggai, ‘Rangkang de pe dade keuteu dilo, nah minas kerei kebambe de peudi.’ 25Dede penui pe dage rang eh, ‘Kedibo, pe da minas kerei bam.’ 26‘Ih nnui dage ranglia zie, keheibe de kebambe de peu si zie, dede kegabe dade, kebam nade de keuteu si dizie. 27Dede a ngaurau aidungde, peu acu penui reu hegwang tei rau kedimedung, penuide au aika ngngwa gwang lwe a dwagade penuide teitset dilu.’”
Hecili eh kelüt
28Nah pa aidungde rang cang dige, pa tet jüja eh, Jerusalem lege tet gaidi.
29Cu cinzwa eh pa Olivet deutu lie qu kela, Bethphage penai Bethany renam taiga gwang mna keludau, pa pe caisuime hangna de langgai eh, 30ranggai, “n dwaga kebam renam ga tet lütcu. Cika nnai lüt de, gada ge mina ne madaude pereu ga cwa kemak nage keupwa bam eh ngau luzie. Cide hiak lwe aika teu gwanglu. 31Nah mige de nnaide keteucai, ‘Daitei eh nnai cide hiak auno?’ nnai ainzwa rangbeu lu, ‘Rampaube teu maisia aulie.’” 32Cine langkegaime mie nah penaide rangkebeu de nzwa bam eh ngaulu. 33Penai gada nade hiak bamge, pegumedung penai dage rang, “Daitei nnai gada nade hiak zeu no?” 34Ge penai rang, “Rampaube aide teu mai sia aulie.” 35Nah penai cide Jisu da teu gwang beu, delwe penui pai gada na reu gage kamlwe peu Jisu de pereu ga bamlu. 36Cu pa gwang kezeu dau, hemaabe penui pai puidi gage kamlu.#2 Heg. 9:13 37Olive deutu gade tet kenghung lampui de pa mna gwang kezeu dau pe caisuime maadi penui suiyi eh nah miswakegah bata penui kengaudung de ziemne sahbak eh Tinggwang de twa eh cu,#Zec. 9:9 38rang, “Rampaube zi teu kegwang hegwangbe de peu samlam pungkelube tei lulo! Tinggim ga keyibe teilu nah ting hutu gade ndulu!”#19:38 Lei. 72:18-19, 118:26 39Dede mina hemaabe gade Phariseemedung ge pe dage rang, “Keledeubo, n caisuimedung de kesiu dilo.” 40Dede pa rangdi, “Ih nnui dage ranglia zie, aidungde mlei tadi de, tangtsudung de sah pet dizie.”
41Cu Pa Jerusalem ga gwang mna eh namdi de ngaulu ge, Pa cide ziemne hapdi, 42rang eh, “Magade nang henai de ci lucai, lungciep teugwang kelabe! Dede cu cidungde n miak gade kebai dida. 43Kedanemene peting ge gwang zie nnui da nah n ngauraume ne ncu tsukwa kwa twagwa luzie, nah ncu kehei lam de twagwa luzie, nah ncu nyia ketangzie. 44Delwe penui ncu nah n namedung de si eh kideu gage hekap gai dizie. Nah penui peu tangtsukang gede keda ge reu keswa pung bamlak, kedanemene ncu peei kegwang ting de nang cilu mede lu.”
Jisu kerecaki ga
45Pecai Jisu kerecaki kigu ga lüt eh cika ma zwa kebamme de pa gwa mpet eh, 46penui dage ranggai, “Kesanglaisiu ga aiciu rau nzeu, ‘A ki le pwa kekie ki tei zie,’ dede nnui cide pwa sütketyeime ki ge tei dida.”#19:46 Isa. 56:7, Jer. 7:11
47Cine pa kerecaki ga tingba ramsangne ledeu bamdi. Cingku kedime nah laisiukecime nah muiteume pecu teitset di zielie peei bamdi, 48dede penui tei kera peeilu tadi, kedanemene mina pelane pe sam kingnei eh la kedine.
ទើបបានជ្រើសរើសហើយ៖
Luke 19: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
