Kendeu 27
27
Jacob ne Isaac samlam ngaukelu
1Pecai Isaac hecing dige pe miak siadi nah pa mangau tadi, pa pe na hecingbe Esau de qu teugwanglu, nah peda ge rangdi, “A na.” Esau pe dage rang eh, “Ih aika bam,” 2nah Isaac rangdi, “Pielo aika, Ih au hecing dida. Ih tsai kelwadi de ci meda. 3Ciziemne n reunetdung, n lakpitsi nah lakpitsibung pwa lwe, renaamkang mie a ziemne heteih kaplo. 4A ziemne Ih tyei keneube, nah kenggum taktyei ntei beulo nah cide ada pwa gwang beulo ciu eh Ih cide teilu kerane nah Ih tsaidi kemak dwa ncu samlam beulu kerane.”
5Cu Rebekah siulu Isaac pe napei Esau de resiu kebam dau. Esau luh ga hetei gwa kera nah cide punggwang beu kera tet petdi. 6Rebekah pe napei Jacob de mpau eh rangdi, “Aika pielo, n pei n swacingbe Esau de marang cu Ih siulu. Pa rangdi, 7‘Acu makaune tei teugwang nah acu taktyei keyibe lang beulo, Ih cide tyei lwe Ih tsai kedi dwa RAMPAUBE dwade samlam pwa ncu peu zie lie.’ 8Ciziemne cu, a na, kiengnei lu Ih ncu ajah kai kebeu de. 9Hemeu hau ga mie, nah acu hemeu pelui keyi be kena teugwang beu; iciu de Ih cidung de gade n pei pa tyei neu tube taktyei keyibe lang beu zie. 10Nang cide n pei da pwa gwang zie, ciu eh pa cide tyei lu kerane, iciude pa tsai kedi dwa pa pe samlam pwa ncu peu zie.” 11Jacob pe pui Rebekah de rang gai, “Ainie, Esau au pemai kekie kau ge, nah Ih nduipai kecu kau ge. 12Magade a pei acu tung cai, nah Ih au pe ziemne mide kecwame ge nzwa dizie. Ih samlam mene reset a dage kai gai zie.” 13Pe pui pedage rangdi, “A na, peu reset pelane a peu ga gwanglu. Ih kerang nzwa teilu, nah mie delwe, ada cidungde pwa gwang beulo.” 14Cine Jacob mie lwe hemeuna pe pui da cidungde teugwang beu, nah pe pui pe pei tyei keneube taktyei keyibe lang beulu. 15Rebekah pe na cingtube Esau painia peda kilungga kebam de yitubedung keulu, delwe pe henabe Jacob de peu teulu. 16Pa hemeuna geu pwa peba kena nah pe ngwang pemai kegadung gage kailu. 17Pa pe na Jacob de taktyei keyibe nah tangku pe ba le ru kelude de si eh pwa beu.
18Jacob pe pei taiga gwang eh rangdi, “A pei.” Pe pei rang eh, “Ih aika bam; nang cau no, a na?” 19Jacob pe pei dage rangdi, “Ih au n neraibe Esau. Nang rang kebeu de nzwa Ih tei luda. Cu cuh ntumlu delwe Ih n ziemne pwa gwang kela hetei tyei lulo, iciu eh nang acu samlam beulu kerane.” 20Isaac pe napei dage rangdi, “Nang dainzwa cide ngau zette ludi ah, a na?” Pa rangdi, “Kedanemene RAMPAUBE n Tinggwang adage cide pwa gwang kebeune.” 21Isaac Jacob dage rangdi, “Ada gwang nnalu, iciu eh Ih ncu tunglu kerane, a napei, nah nang a na Esau kesang mi mebi kecu cilu kerane.” 22Jacob pe pei Isaac da gwang, nah Isaac pecu tunggai nah rangdi, “N kwa Jacob kwa nzwa, dede n ba kena au Esau ba nzwa.” 23Isaac pecu cilu tadi, kedanemene pe ba au pe sinabe Esau ba nzwa pemai kebamne, cine Isaac pecu samlam beudi. 24Pa rang dai eh, “Nang a na Esau kesang de ni?” Pa keli eh, “Ih da.” 25Isaac rangdi, “Acu taktyei ra teugwang beulo, nah Ih n gu hetei cide tyei zie, Iciu eh Ih ncu samlam beulu kerane.” Jacob taktyei peda teugwang beu. Isaac tyeilu, nah Jacob zau de si eh pecu teugwang beu nah pa saklu. 26Pecai pe pei Isaac pe dage rangdi, “Cu gwang mnalu nah acu kemam gai, a na.” 27Jacob gwang nnalu nah pecu kemamgai, nah pa pe paini riem nghui gai nah pecu samlam beu. Pa rangdi,
“Ainie, a na riem de RAMPAUBE samlam kebeu luh riem de nzwa da.
28Tinggwang de peu tinggim gade hezin kaibeu eh n luh peu yi kelube tei lulo,
peu ncu tak nah zau keheci peu kiee süt kelube tei lulo.
29Kideu ga heleuhdung de peu n kila teilu nah peu minadung de n dwa keumie kelube tei lulo.
Nang n kibaume pelane reu di kelube tei lulo,
nah n pui leuhme de peu ndwa keumie kelube tei lulo.
Ncu reset kelame de peu reset punglu;
Ncu samlam kebeume de peu samlam pung kelube teilu.”
30Isaac pe samlam Jacob de peu cangdi, nah Jacob tet di herizi pe pei Isaac dwade, pe swacingbe Esau hetei gwala eh gwanglu. 31Pa de pe pei ziemne taktyei keyibe lang lwe cide pwa gwang beu. Pa pe pei dage rangdi, “Apei, cuh lu nah Ih ncu teugwang kebeu hetei tyei lulo, ciude nang acu samlam beulu kerane.” 32Pe pei Isaac pedage rangdi, “Nang cau no?” Pa keli eh, “Ih au n na, n neraibe, Esau.” 33Isaac pepum pelane mbeu süt di nah rangdi, “Cau ah sui, mige hetei gi pung gwang acu kepeu be de? Nang kegwang dwa Ih cide pelane tyei luda, nah Ih pecu a samlam kekam be peu dida. Kesang, pa samlam beuzie.” 34Esau pe pei sam siulu ge, pa hap mtei süt eh, nah pe pei dage rangdi, “A pei, acu de n samlam peulo.” 35Isaac rangdi, “N caihereibe aika gwang acu cwa dida nah pa n samlamdung luu teu dida,” dedi. 36Esau rangdi, “Pezi Jacob kecu petau lu me ni? Kedanemene pa acu cwa kedi pia pekena be dida. Pa a kecing kwa luu teudi, nah, ainie, pa cu a samlam luu teudi.” Pecai pa rang dai eh, “Nang a ziemne samlam ge de banglu me de ni?” 37Isaac au Esau de keli gai eh rangdi, “Ainie, Ih pecutei pwa n mpaube teibeu dida, nah Ih pe kibaume peciakne de pe kilame teibeu dida, nah Ih pecu tak zauci peu dida. Ih ma gede n ziemne teilu kebui gede ga da, a na?” 38Esau pe pei dage rangdi, “A pei, nang a ziemne samlam kette bamme deni? Acu samlam beulo, acu de, a pei.” Esau hap cudi. 39Pe pei Isaac pecu keligai nah rangdi,
“Pielo, nang kelung ni de kideu be maheidung gade mdei dizie,
nreule ting ga hezin gade mdei dizie.
40Nang n kiengtie teu eh lung zie, nah nang n caihereibe gwa teizie.
Dede nang n zaisia kedi dau, nang pe kengking de gileu dizie.”#Heb. 11:20
Jacob au Laban dage pakgai kedi
41Esau Jacob de ngkaudi kedanemene pe pei Jacob de samlam peu kedine. Esau kecet rangdi, “A pei ziemne hei eh hap kera ting nna dida; cipau cai Ih a sinabe Jacob de teitset dizie.” 42Rebecca pe cingtu napei Esau sam de ranglia beu. Cine pa Jacob pe napei henabe pei de qu eh langgai nah peda rangdi, “Ainie, n swacingbe Esau au ncu teitset kera riam eh pekatei pe lung taumla bam dida. 43Cu ciziemne, a na, Ih kerang de teilu nah Haran ga a heibe, Laban da kelwa mie cu. 44Cika kakge pecu ngngwa bamlu, n swacingbe rata ngkungdi kemaktane, 45n swacingbe ncu pe rata kebamde ngkungdi kemaktane nang mdei dilu, nah nang pe dage tei kegai nsungtadi kemaktane. Iciude Ih cika de mi de ncu ngngwa dailu kera lang gai beu zie. Daitei Ih a na hang nana de tingnai ge gage deu nggah di lulai?”
46Rebekah Isaac dage rangdi, “Ih au lungh leu dida lie Heth napuidung ziemne. Aipau pui de nzwa, cipau deu ga mipui kesa, Jacob de Heth me pui gede luu dailu cai, Ih a teilung dai keyi ge bam lai?”
ទើបបានជ្រើសរើសហើយ៖
Kendeu 27: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.