Kendeu 25
25
Abraham tsit
1Abraham mipui keda de luulu; pezi cai Keturah. 2Pa pecu Zimran, Jokshan, Medan, Midian, Ishbak, nah Shuah penui de mnabeu. 3Jokshan au Sheba penai Dedan pei di. Dedan leuhme cai Assyriame, Letushme, nah Leumme. 4Midian name cai Ephah, Epher, Hanok, Abida, nah Eldaah mina aidung de Keturah leuhme. 5Abraham pe mabam pelane pwa Isaac de peudi. 6Ciuliede, pa ring kebam dau, pe nauseupui napeidung de pa mapeu ciau delwe penuide Canaan deudi naimiak kepetle ge lang gaidi, pe na Isaac dade lang gidi. 7Aidung de Abraham teilung tingba ziedung, cide cai pa mmi 175 ge lungh. 8Abraham lungh mnungkui lwe cing süt eh tsaidi, kecing me ge pe teilung lungh mnungkui eh, nah pa pe leuhmedung da gwangdi. 9Pe na kena Isaac penai Ishmael, pecu pwa Hittitme pei Ephron, Zohar napei luh Mamre taiga Machpelah tsupop de gage kungdi.#25:9 Ken. 23:17-20 10Luh cide Abraham Heth name dade luilu. Abraham de de pe nau Sarah de kekung gage ngngwa kungdi. 11Abraham tsit cai, Tinggwang pena Isaac de samlam beu, nah Isaac Beer Lahai Roi taiga lungh di.
Ishmael napeidung
12Cu aidungde cai Ishmael leuhme, Abraham napei, Sarah kilapui Egyptme pui Hagar ne Abraham de mna kebeudung da. 13Aidung de Ishmael napeimedung zi, kecingbe zi gade rai eh rau kelu: Nebaioth, Ishmael neraibe, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, nah Kedemah. 16Aidungde Ishmael napeidung, nah penui zidung msiak pwa, penui renamdung ne, nah penui kelung nidung zi gage kaibeu; penui hegwangna kereiekena heleuh rehi gade. 17Aidung de Ishmael mmi peteilung ziedung haige camreiehena. Pa perabe kaibeu eh tsaidi, nah pe leuhme de teuhekwa dailu. 18Penui Havilah gade Ashhur kecang ga lung, Egypt tai kemna, Assyria lambie kemie ga. Penui hangge ge de kengaurau eh lungh.
Jacob penai Esau
19Aidung de cai Abraham napei Isaac de kemna ha. Abraham Isaac pei teidi. 20Isaac Rebekah, Bethuel napui Paddan Aram ga Arameanme ge, nah Arameanme Laban tipui de pe nau luu kelu dau mmi riakdai di. 21Isaac pe nau pe na kega ziemne RAMPAUBE dage kiegai, nah RAMPAUBE pe kekie tei beu, iciu eh penau Rebekah tetlaklu. 22Penai mna kemak dwa de pe za gade ngngwa keherei bamdi, nah pa rang, “Daitei ai kenzwabe ada gwang lai no?” De eh pa RAMPAUBE dade aide ziemne keteu kera miedi. 23RAMPAUBE pe dage rangdi,
“Heleuh kena nlung ga la, nah nlung gade nang heleuh kena keu ntsam dizie.
Hangge kedabe swa ngkiengki zie, nah kecingbe henabe nküt teizie.”
24Pa mna kera ting canglu ge, ainie, peza ga nedui la. 25Kecingbe de pegeu gie ciak eh mamai pai ge nzwa mnalu. Penui pezi Esau lie qulu. 26Cipau cai, henabe be pe ba Esau pideu herakting lwe mnalu. Pecu Jacob de eh qulu. Penau mna kelu dau Isaac mmi riakherok di.
27Penai ngkieng culu, nah Esau teihgwa keyi mege teilu, pa hegwale kela pesui yila; dede Jacob be mlei ham lama, pa peting kilung ga bamla. 28Ciu eh Isaac au Esau de pesuiki kedanemene pane gwa kelu makaune teih pa tyei, dede Rebekah Jacob de pe suiki. 29Jacob reteipi gi ge lang bam. Esau mnei di nah pa nzeu eh luh gade gwangla. 30Esau Jacob dage rangdi, “Acu taktyei kegie lude a pok teibeu lo. Kehereide, Ih au leu zu dida!” Aide ziemne pezi Edom lie qu di. 31Jacob rang eh, “N nerai kwa cide acu zwa railu.” 32Esau rang eh, “Ainie, Ih nzeu eh tsai lau da. A nerai kwa cide pe keyi dai no?” 33Jacob rangdi, “Keraibe nang ada letpet lulo,” Cine Esau letpet lu nah cinzwa eh pa pe nerai kwa Jacob dage zwa beudi. 34Jacob Esau de tangku nah gi pwapeu. Pa tyei nah saklu, nah cuh lwe pe lampui ga tetdi. Ainzwa eh Esau pe nerai kwa de mapei tadi.
ទើបបានជ្រើសរើសហើយ៖
Kendeu 25: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.