Kendeu 20
20
Abraham penai Abimelech
1Pecai Abraham cika de Negev deu nkangle bie ge tet gaidi, nah pa Kadesh namceu penai Shur kakga lungh di. Pa au Gerar namceu ga sangme ge tei eh lungh bam la. 2Abraham pe nau Sarah de liagai eh rangdi, “Pa au a tipui lie.” Cine Gerarme Gwangpei Abimelech Sarah de ngngwa kera langgai nah pecu ngngwalu. 3Dede Tinggwang tingmui dau Abimelech mang lede gwang eh pedade rangdi, “Ainie, nang au ketsai mege dida nang ngngwang gwang pwa kebam pui de ziemne, kedanemene pa au mipei ge nau lu.” 4Cidau Abimelech pe taiga mna gwang ma nah pa rangdi, “RAMPAUBO, nang makesangme leuh ge dede teitset dizie ni? 5Pa pekatei ne adade, ‘Pa au a tipui’ de eh rang meni? Nah pa pekatei de rangdi, ‘Pa au a heibe.’ Ih aide a lung mzuizang eh tei nah a ba kena kemau teima.” 6Pecai Tinggwang pemang lede pedade rangdi, “Yeo, nang nlung mzui delwe aide tei kecu Ih de ci lie, nah Ih ncu peu a dage kemau teigaidi melie. Ciziemne Ih ncu peu pecu tung me lie. 7Ciziemne, mipeibe nau de pwa peu di lu, kedanemene pa au caihakecime ge lu. Pa n ziemne kekie tei beu zie, nah nang ring luzie. Dede magade nang pecu pwa peu dilu mecai nang nah ngu minadung pelane tsai bi zie.”
8Abimelech tingcang nuge pecai benai cuhlu delwe pe kilamedung de petaiga ge qu ngwang lu. Pa penuide ma aidung de pelane ranglia gai, ge minadung ngngi süt di. 9Pecai Abimelech Abraham de qu lwe pedade rangdi, “Nang anui dage daige teigai zeu no? Dainzwa Ih n dage kemau teigaidi di no, ciu eh nang adage nah a hegwangram gage kemau kedi ge keugwang kecu? Nang ada ge teibui kemak teigai au delie.” 10Abimelech Abraham dage rang dai, “Ncu dai ne ai kenzwa teigai kera kecung gai beu no?” 11Abraham keligai, “Kedanemene Ih cet kecu, ‘Aipau ni ga Tinggwang mie kehing mige de bam lak, nah penui a nau ziemne acu teitset dizie.’ 12Pecaide, pa au a tipui kesang, a pei napui, dede a pui napui ma; nah pa a nau dida. 13Tinggwang acu peu a pei ki püt di delwe heni ketsamtsam ga mbeu gwang la dau, Ih pedage ranggai, ‘Nang a nau kecu nzwa aipau samsang keulia bi maisia: Heni keheiga anai kemie dau, acu lepwa, “Pa au a heibe, de eh rang lulo beulie.”’” 14Pecai Abimelech meurün nah hetumseu, nah hebaangme mipui nah mipei keulu delwe penuide Abraham de peu gai. Pecai pa Sarah, Abraham nau de pecu peu caili beu di. 15Abimelech rangdi, “Pielo, a deu ndwa ga bam. Nang lungh keneu keheibe ga lungh lulo.” 16Pa Sarah dage rangdi, “Pielo, Ih n heibe de rangkang geu chang ge peu dida. Cide au ncu nzang kelame pelane miakngau gade ncu kemmau keheibe gade gumlu kerane, nah pelane dwade, ncu au tei petau cangsiak dide lie kecu ge.” 17Pecai Abraham Tinggwang dade kekie teigai, nah Tinggwang Abimelech de teihemi beu, pe nau, nah pe kilame puidung de iciu eh penui hena lungh lu kera teibeu. 18Kedanemene RAMPAUBE peu Abimelech kilung ga mipuime pelane de hena lungh kelak teidi, Abraham nau Sarah ziemne.
ទើបបានជ្រើសរើសហើយ៖
Kendeu 20: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.