Bata 24
24
Felix dwade tutiak
1Lang mengei cia, cingkupei kedibe Ananias, hangkiamedung, nah marangkeci muiteume ge pe zi Tertullus de ngngwalwe cika mie. Mina aidungde deuceudibe dwade Paul de kemmau sam ranggai. 2Paul deuceudibe dwaga sap luge, Tertullus Paul de mmau cuh eh deuceudibe dage rangdi, “N ziemne anuida kezuyi kedi bam luda, nah n mariem keyine anui leuhme de ma keyi kekiee ge teugwang beuda;
3keheidaude nah keheiga liede anui aide ci eh ncu twa bamla, Yikemtingbe Felix. 4Ciuliede, ncu kesa tie sütdi neu ma, cine ngaungia eh anui kwa kingnei gailo Ih n dade kiela. 5Kedanemene mina aipaude ma kebwak kela kauge nah kideu ga Jewme pelane reuga kehebwak teugwang gai kecu anui ngaulu. Nah pa au Nazarenme maa ga muiteume ge. 6Pa kerecaki tei heradi kera de tei, cine anui pecu tuilu.#Kesa kehegwa laisiudung ga pedum 6 kekamde, pedum 7, nah pedum 8 keraibe de sila. [Anui pecu anui zai rehi gade pe tu tiak neula. 7Dede kedibe Lysias gwang eh pecu anui ba gade anui kemei tei eh ngngwa teudi. 8Nah Lysias pecu mmau kelame de n da gwang lulo aja kaigai.] Anui pecu mmau kela hadung de cilu kerane nang nkatei pecu ma aidungde pelane ha keteu lubui.” 9Iciu eh Jewme kedame pecu nzang kelame de kemmau aide kesang delie kesuizwalu.
10Pecai deuceudibe Paul de marang culo peungum gai, ge Paul keligai, “Nang mmi kekiee ge aipau leuhme reu tutiakpe tei kegwang Ih ci, cine Ih a sui yisüt eh a nzeu rangla.”
11Ih Jerusalem ga reca zielie eh nghang kelu ziangreikena gwale si mereu lie kecu nang ci luzie. 12Penui acu kerecaki gade migede de ngngwa kesamlim eh, mede synagoguedung gade nah namdi gade Ih hemaabe de teu kebwak bam eh ngauma. 13Penui cu acu kemmaudung de penui n dage rangmci gailak. 14Dede Ih aide n dage rang gaila, cide Ih penui maulie kera Lampui de mzui eh anui paume Tinggwang gwa teila. Ih au hezaibe gade teikela pelane ga nah caihakecime rauteu keladung ga masang bam. 15Mina aidungde keregui kebam kesiakge Ih de Tinggwang da keregui bam, cide mina makesangme de nah kesia keteime de ketsai gade ringcuh daizie lie kecude.#Dan. 12:2 16Cine aide ziemne, Ih Tinggwang nah mina pekiene dwade ma pelane ga a lungcet mci bamlu kerane a laikai teibam muila. 17Cu mmi kekieege caine Ih a minadung de rangkang mapeu keugwang beu kera and Tinggwang de reca teibeu kerane Jerusalem ga cailigwang. 18Ih aide tei kebam dau acu mmau kelame Ih kerecaki ga tei kemci zai teicang kelu ngaulu, cika hemaa gede mede magede kehebwak bam ma. 19Dede cika Asia gade kegwang Jewmedung kangge bam, penui n dwaga gwang eh acu mmau kera bamcai penui katei mmau kerabe. 20Mecai, mina aidungde de peu Ih Jewme baudi dwaga kesapdau penui daipai kemau a dade ngaulu dibi peu ranglo, 21Ih penui kakga kesapdau ma aide sah kegai gwale ma, ‘Ketsaime ringcuh daikera hade ziemne, henai nnui dwade a tutiak bam.’”
22Pecai Felix, Lampuibe ha cimci kebamne, tutiak de tei nridi. Pa rangdi, “Lysias reugwamuibe Jerusalem gade nghung keludaune Ih nnui ha tiak beuzie.” 23Pecai pa haireu kedibe de Paul de kainzeu lulo, dede pecu kezeu süt helo nah pe zangme pe gwatei kebamme de kaamdi helo aja kaigai.
24Tingbazie dungge cai, Felix pe nau Drusilla,#24:24 Drusilla: Pa Herod Agrippa napui. Jewmepui gede ngngwalwe caili gwangdai, nah mide peu Paul de qu teugwanglwe pa Khrista Jisu de kenlum ha pa pe dade siulu. 25Dede Paul pecu ngngwa makesang, mikatei mide kezeu kecu, nah gwangkela hetuketiak ha pecu ranglia gai ge, Felix ngngidi eh rangdi, “Nang cu tet dilu. Dede Ih peting keyi ngaulude, Ih ncu qugai daizie.” 26Cipau tingdau pa Paul dade rangkang de ngaulu kera regui bam, cine pa pecu qu nah pecu mpau bam bamla. 27Dede mmi kena cang dige, Felix cia Porcius Festus ne deuceudibe teidi, dede Felix Jewme suiyi teineudi, cine pa Paul de hebaangki ga peu bam jüja di.
ទើបបានជ្រើសរើសហើយ៖
Bata 24: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
