Bata 14
14
Iconium ga
1Pecai Paul penai Barnabas Iconium namdi ga Jewme synagogue ga nzang lütlwe marang hemisüt gai ge Jewme nah Greekme maadi nlumlu. 2Dede samzai tei kemakme Jewme, Gentileme lung tei kebwak gai nah penui lung teimsia gai eh penui siname de mmau cuhdi. 3Cine penai cika peting ketie ge bamdi, Rampaube ziemne kuusüt eh marang eh, nah pa Paul penai Barnabas de peu miswakegah nah mimakecang bata tei eh pe ngaugia sam kerang de kesang lie liagai. 4Dede namdibe ga minadung de mzidi; kedanemene mi kangge Jewme lam pwadi, dede kangge langkegaime lam pwa kedine. 5Dede Gentileme nah Jewme Paul penai Barnabas de teikeherei nah tangtsu le sam kera penui muiteume lung tei kera tei ge, 6penai cide cilu delwe Lycaonia namdi, Lystra nah Derbe nah twakengwa cuikui gage pak gaidi. 7Cika de penai samliakeyi pau jüja bamdi.
Lystra nah Derbe ga
8Lystra ga mige pe pi sia eh bam, pecu mna kelu gade pe pi swa eh pa madaude tet luma. 9Mina aipaude Paul zierang tei kebam siulu. Paul pecu pie linggai nah pecu teingkeilu kebui kenlum kebam ngaulu. 10Cine pa sahbak eh pe dage ranggai, “N pi cuh sap mzuilu.” Ge minabe nsau cuhlu eh tet tegwa ladi. 11Maadibe Paul tei kegaide ngau luge, penui Lycaoniame let gade sahbak eh ranggai, “Rabedung mina nzwa anui da nghungbam dida.” 12Penui Barnabas de “Zeus,#14:12 ZeusZeus Greekme Tinggwang kakde ditube nah Hermes Greekme tinggwangdung gu sampauswa kelabe lie nlum la. ” nah Paul de “Hermes,” lie qudi, kedanemene pa makerang kenlangbe kecune. 13Zeus cingkupei, pe recaki namdi taiga kebambe, ketumseu nah maparingoidung teu kiriebe ga gwang; kedanemene pa nah maadibe ratak teigai beu neu kedine. 14Dede langkegaibe kena, Barnabas penai Paul cide siu luge, penai pai hietdi eh zette maadibe taiga mpetlwe sahbak eh, 15ranggai, “Minadung, nnui daitei aikenzwa tadung tei zeu no? Anaide nnui nzwa mina lungcet kebamme lie. Anai nnui dage samliakeyi paula, iciu eh peu nnuide kemta aidungde gade nreu pwa ringkela Tinggwang, tinggimdung, nah kideu, nah duidi nah cika kebam leune tei kegaibe da nreugwanglu kerane. 16Gwang kedi mmidung ga, Tinggwang heleuhdung pelane de peu penui suibe tei eh lunghgwang. 17Dede pa lalie kecu keulia mene ta dima, pa heta keyi tei eh peting pehidau tinggim gade tingrui nah meitsi builu kebui ting peula, ciu eh nnuide ketyeipok nah nnui nlung suiyi peula.” 18Aipau samdungde ranggai liede Paul penai Barnabas maadibe de peu penai dage ratak teibeu kera kaamlu pa sütdi. 19Dede Jewme kangge Antioch nah Iconium gade gwang mina maadibe lung teigai. Cine penui Paul de tangtsule pwa sam nah pa tsaidi deha cet eh namdi gwale ge teukerei mpetdi. 20Dede kenlumme pecu sap twagwa kebamdau, pa cuhlwe namdi ga lütdi. Pecai benai pa Barnabas de ngngwalwe Derbe nam gage tet gaidi.
Syria deu Antioch ga cailikegwang
21Pecai penai samliakeyi namdi cika zierang teigai eh mina kekiee de kenlumme tei luge, penai Lystra, Iconium, nah Antioch ga cailigwangdi. 22Penai nlum kelume de tei ngkieng nah penui kenlum ga ntip bam lulo kecung eh ranggai, “Anui Tinggwang hegwangram ga keherei kekieege dau eh nlüt maisia.” 23Penai kekie tei nah mmwang eh penui ziemne ngqwa ramsang ga hangkiame kedet luge, penai penuide Rampaube penui nlum kelabe de nlum beudi. 24Pecai penai Pisidia deuzi tetkah gwang Pamphylia deuzi ga gwangdi. 25Penai Perga namdi ga sambe zierang tei kelucai, penai Attalia namdi ga nghungdi. 26Cikade penai liem gade Antioch ga gwangdi, cika penaide Tinggwang ngaugia gage kaipwa heta teilo nlum kebeu de cu teicanglu. 27Penai Antioch ga gwanglu nah ngqwamedung de ngngwa ngkwa luge, Tinggwang penai da heta tei kegaidung, nah dainzwa pa Gentileme ziemne kenlum kikam letbeu bi kecu pelane paubeu. 28Penai cika peting ketie ge kenlummedung de ngngwa bamdi.
ទើបបានជ្រើសរើសហើយ៖
Bata 14: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
