Proverbs 7
7
1Mwana wangu, kotoo kwivasuva findikuwombela, ukamuli malawu vangu. 2Kamuli malawu vangu dawikali, udimi findikuwulili kucha ngelingeli sha lisu lyaku. 3Chipindi chosi wuvi na findikuwulili, chipindi chosi wuvi na ngumbungumbu mundima yaku. 4Dimi luhunja kucha wuumdima muhaja waku, ludimi luhala kucha wuumdima mlongu waku wa pabehi. 5Afi dafikuviki kutali na mdadala muwoni, na dafikugoli ulyepi na filongu finowuli fya mdadala yangajila kuva mwaminifu yaywanga filongu finovili.
Mwehi muwoni
6Lijuva limu ngashungulileyi panji kupitila palilanga ya nyumba yangu, 7na ndivawonili fijana vatangalili vapufi, gati yawu yumu avelili mpufi munu. 8Ayu avelili akuyendayenda mdeha yila yivelili pabehi nyumba yayikala mdala yumoyu. Topi kalola deha yiyenda kaya kwa mdala yula, 9yavelili chipindi cha palumihi, lijuva likudiba, lwisa lukwingila. 10Tepu mdala yula atanganikili na chijana, kafwala kucha muwoni na mundima yaki kwavelili na jangi yifisikili. 11Avelili mdala muna chowu na ngajila chindipa, ayikalagha ha pakaya, 12majuva vosi kava mudeha na kusoku, mumaleka ili kuvakema vandu akawonji nawu. 13Kamuyangala chijana yula na kumunonela, na kamlola kuwushu kamuwombela filongu finovili, 14“Tuyendi tukalyi filivi fitawuliwili kwanongwa ya mitambiku ya kujova, nalelu gola jangi yangu. 15Topi nyisa kukuyanga, ndikusaka ponopa ndikupata! 16Nyala litefu lyangu nyanyi, kwa yingwa sha kwigubika ngeli sifumili Misili. 17Ndichivika mafuta va kunungilila na manimani na udi na amudalasini. 18Wisi tuwonji pamu mbaka pamalavila, wisi twinomi dobu. 19Bambu wangu kawuka kaya kwaveli ha, kayenda mwanja wa kutali. 20Katola mbiya sitangalili, mwesi pawupela ndi dawuyi.” 21Kamujanga kwa filongu finofu fitangalili, na mweni fyambakili. 22Tepu hela kamukovekela yula mdala kucha likambaku lya senga yiliyenda kusinjiwa, kucha mbawala yawomilili mumtambu, 23mbaka pawonili kucha kasomiwa na musali mundima, kava kucha mbongu yayendela chijaka, amanyili ha kucha ngalilu yaki yiva mumsayisayi. 24Topi vana vangu, mumbikanishi. Mteghli matu venu kwa filongu findivawombela.
25Mukotoo kujumila ndima yaku yimkovikeli mdala kucha ayu, na mukotoo kwilongosha na mweni. 26Nongwa mweni kavayaghamisha vatangalili, na kugola vandu vatangalili vasovi. 27Nyumba yaki ndi deha yiilola kusembi, na ndi deha ya kusunukila njifwa.
ទើបបានជ្រើសរើសហើយ៖
Proverbs 7: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.