Luka 13
13
Mkilema kuleka uhakata mtehova
1Lipindi lila pawelili na wandu wamonga wakamlongela Yesu milando vila wandu wa mbwani Galilaya kwa Pilato kuwakoma wandu na mwahi gha wandu hagha ikahanganika na litambiku lya mkihanja pawawelili wakihinja mikokolu gha litambiku. 2Na mweni Yesu akawakonya, “Mnguliwachila yiwa hagha Wagalilaya wawelili na sambi kupiti Wagalilaya ghangi, hata kugholwa nagha? 3Ninguwalongela chakaka, ng'ogha, mwenga hilahila pamkotoho kulekiselwa sambi, mteyalamika handa weni. 4Au mnguliwachila wala wandu ikumi na inane ku Silohamu wahovili pawaguiliwa na lilingo, mnguliwachila wala wawelili wahakata kupiti ghangi wogha walikalili Yelusalemu? 5Ninguwalongela ng'ogha nagha. Na mwenga pamkotoho kulekiselwa uhakata na kumuhyukila Sapanga, mteyalamika handa weni.”
Mlandano wa libiki lilela ng'ogha matungula
6Hinu, Yesu akawalongela mlandano hau, “mundu mmonga awelili na libiki walikema mtini mulitawa ghaki gha mizabibu. Mundu hayu akayenda akipala kuyapa matungula ghaki, ila alolili ng'ogha litungula hata limonga. 7Hinu, akamlongela mghola lihengu ghaki, ‘Uloli. Kwa lipindi lya machuva itatu nivile nikihika kuyapa matungula gha libiki hali lya tini na mbata ng'ogha kindu chochose. Hinaa uudumuli. Kwa kyani uyendeleli kuyalamisa lutupi lya maha hela?’ 8Yula mkulila akamyanga, ‘Bambu, uuleki kangi kwa lichuva limonga kuulongolo, na nenga niteutukutulila mmbali ghaki na kuuvikila mboleya. 9Ikiva utalela matungula lichuva lya ulongolo, ni maha, hinu pautewesa ng'ogha kulela uudumuli.’ ”
Yesu angumlamisa nyongo mmonga lichuwa lya Kupumulila
10Lichuwa lya kupumulila limonga, Yesu awelili akivula kulighuta lya kukonganika Wayahudi. 11Na pala pawelili na mdala awelili na lihoka livile limghola avile mvina wa kughondama mghongu kwa machuva ikumi na inane hata awesili ng'ogha kugholoka dali. 12Yesu paamlola, akamkema akamlongela, “Mdala, ulama kala uvina ghako.” 13Hinu akamvikila mawoko, na lipindi lilalila higha ghaki ukavile dali kangi, akatumbula kumyinula Sapanga.
14Ila mkulu wa lighuta lya kukonganika Wayahudi ahyomili kwaikiva Yesu awelili kamlamisa yula nyongo lichuwa lya Kupumulila. Hinu yula mkulu akawalongela wala wandu walikungulili pala, “Mvile na machuwa isita gha kughola lihengu, kumachuwa hagha, mhiki mlamiswi ila mkotoho kuhika lichuwa lya Kupumulila.”
15Pala Bambu akamyanga, “Mwenga wambindingu yiwa wandu wa maha. Ila ng'ogha. Ni ghani paghati mwa mwenga kaleka kumuwoposola ng'ombi ghaki au punda ghaki kuhuma mlihungulu akamyegha kumpegha masi lichuwa lya Kupumulila? 16Hinaa, baha tuvile na mhelekwa wa Ibulahimu hayu Lihyukana limgholili kibyongo kwa lipindi lya machuva ikumi na inane. Ghuli, ni maha ng'ogha kuwoposolewa biti hayu kuhuma kukiwopa haki lichuwa lya Kupumulila?” 17Yesu paalongili ghala, wahakata ghaki wakalihola honi, ila wandu wahekelelili kwaikiva gha mighalu gha kukangasa agholili.
Mlandano wa mbeyu isokombi waikema haladali
Matayu 13:31-32; Maliku 4:30-32
18Yesu akakonya, “Unkosi wa Sapanga ungulandana na kyani? Niteulandanisa na kyani? 19Ulandana na mbunji isokombi nesu waikema haladali, ivile mundu aitolili na kuitulila kulitawa lyaki. Nayeni ikamela na kukula, ikavile libiki na mbongo wa kundumba wakachenga vijaka kumiputila ghaki.”
Mlandano wa simika
Matayu 13:33
20Yesu akakonya kangi, “Niteulandanisa Unkosi wa Sapanga na kyani? 21Ni handa simika aitolili nyongo mmonga na kuihanganisa pamonga na madebi maitatu gha ukowa na ukowa wogha ukatutumuka.”
Mlyango ukombala
Matayu 7:13-14, 21-23
22Yesu akaphita kumbwani na vimbwani akivula paawelili kumwanja ghaki kuyenda Yelusalemu. 23Mundu mmonga akamkonya, “Bambu ghuli, ni wandu wa mayaghani hela watelamiswa?” 24Yesu akawalongela, “Myangalayi kuyingila kwa kupitila mlyango ukombala, kwaikiva, ninguwalongela, wandu watangala wateyesa kuyingila ila watewesa ng'ogha. 25Lipindi litehika mwenikaya ateyinuka na kuwopa mlyango. Mwenga mtegholoka panji na kutumbula kutova mlyango mkilonga, ‘Bambu, utuwoposeleli mlyango,’ ila mweni atewayanga, ‘Nimanya ng'ogha mhuma kugha.’ 26Na mwenga mtetumbula kumlongela, ‘Twenga ndiwa wala tulyeghili na kunywegha pamonga na wenga, kangi wenga utuvulili twenga kuvimbwani vya twenga.’ 27Ila mweni atewayanga, ‘Niwamanya ng'ogha mwenga hilahila mhuma kugha. Muhuki kwa nenga mwenga waghola mahakata.’ 28Baha ndiwa mtelila na kuhyagha malino, lipindi mtewalola Ibulahimu na Isaka na Yakobu na walota wa Sapanga wogha walikala ku Unkosi wa Sapanga, ila mwenga baha mdangiliwi panji. 29Wandu watehika kuhuma mbandi zyogha inne zya mlima wogha, mashaliki na maghalibi na kusini na kasikazini na weni watelikala kumahala weni wayandalililwi mhambu ku Unkosi wa Sapanga. 30Hina, ulole wala wa mwihu watevile wa mtumbulo, na wala wa mtumbula watevile wa mwihu.”
Yesu anguwalilila wandu wa mbwani Yelusalemu
Matayu 23:37-39
31Lipindi lilalila wamonga gha Mafalisayo wakamuyendela Yesu na kumlongela, “Uhuki baha uyendi mahala ghangi kwaikiva Helode angupala kukukoma.”
32Yesu akawayanga, “Myendi mkamlongeli yula mbweha, ninguwawinga mahoka na kulamisa wavina lelo na kilau, na nenga lichuwa lya itatu niteyomola lihengu lyangu.” 33Hata nagha, kwa lelo na kilau na kilau ghangi, ningupalwa niyendeleli na mwanja, kwa ikiva maha ng'ogha mlota wa Sapanga ahovi panji gha Yelusalemu ila mghati mwa Yelusalemu. 34“Mwenga wandu wa Yelusalemu, Yelusalemu. Mnguwakoma walota wa Sapanga na kuwatova maganga wala walaghililwi kwa mwenga na Sapanga. Nihikili kwa mwenga lihanja kwa lihanja nikipala kuwakungula wana ghako pamonga handa nguku angukungula wana nguku pahi gha mbapatilo ghaki ili awagholokeli, ila wenga ukalema. 35Ulole lighuta lya Sapanga wa mwenga, hinaa ninguyenda, ninguwalongela mtenilola ng'ogha kangi mbaka lipindi lila mtelonga, ‘Kahighiliwa yula ayeghilwi na kupeghwa ulongosi na Bambu.’ ”
ទើបបានជ្រើសរើសហើយ៖
Luka 13: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
