Yohana 12
12
Maliamu angumyitila Yesu mahuta
Matayu 26:6-13; Maliku 14:3-9
1Machuwa isita pambila gha muhambu wa pasaka, Yesu ahikili Besania kula awelili angulikala Lazalu yula mweni kuhindulwa. 2Haku wamyandalilili mulyo wa lumihi, na Malita akawela angumyandalila Yesu. Na mweni Lazalu awelili mmonga paghati gha wala weni kukemwa kulyegha pamonga na Yesu. 3Hinu, Malia akatola mandina gha supa yenikuvikwa mahuta gha kunungila yenikugholwa kwa libiki lya nalido, akampakala Yesu mumaghulu na kupyata kwa hwila ghaki. Lighuta lyogha likanungila manungilo. 4Hinu, Yudasi Isikaliyoti mmonga wa wala ikumi na ivili yula atemhyuka Yesu kuulongolo, akalonga, 5“Tungaliwusa mahuta hagha na kupokela mapesa na kuwapegha wakapuku, kwaikiva tungaliwesa kupokela mapesa gha kumuhipa mundu mahipo gha lichuva limonga?” 6Yudasi alongili vila ng'ogha kwaikiva awawonelili luhungu wala wandu kapuku, ila kwaikiva mweni awelilili mwihi. Hayu ndiwa mweni kukola mhaku wa mapesa, mihanja wekaweka mweni anguwela angutola kuhuma mula.
7Hinu Yesu akamuyanga Yudasi, “Mkotoho kumghasa hayu nyongo, hayu kaniyitila hagha mahuta gha kunungila kwaikiva gha lichuwa lya kusikwa nenga.” 8Kwaikiva wandu kapuku muwela nau machuwa hyogha, ila mtewela ng'ogha na nenga machuwa hyogha bila mwihu."
Wakulu wa watambika wanguhakula njila gha kumkoma Lazalu
9Wayahudi watangala wakahyoghanila yiwa Yesu kawela ku Besania. Hinu, wakayenda haku lukani lwau luwelili ng'ogha kumlola Yesu weka, ila hilahila kumlola Lazalu yula awelili kahindulwa na Yesu kuhuma kukihu. 10Hinu watambika wakulu wakahakula njila gha kumkoma Lazalu hilahila, 11kwaikiva Yesu amuhindulile Lazalo, watangala wa Wayahudi wawahyukile wakamuyendela Yesu na kumkwinila.
Yesu anguyingila Yelusalemu kunu wandu wakikuwa vilulu
Matayu 21:1-11; Maliku 11:1-11; Luka 19:28-40
12Kilau ghaki lipinga likulunga lya wandu wenikuhika kweni mhambu wakayoghanila yiwa Yesu kamnjila anguhika ku Yelusalemu. 13Hinu, wakatola miputila gha mibiki gha mipangalala, wakahuma wakayenda kumpokela, kunu wakitova lilowi wakilonga, “Ayinuliwi Sapanga! Ahighilwi hayu mweni kuhika kwa lihina lya Bambu. Ahighilwe nkosi wa Izilaeli.”
14Yesu apatile mwanapunda mmonga, akakwela kunani ghaki handa yalongili mayandiko,
15“Mkotoho kutila, mwenga wandu wa Sayuni,
uloli nkosi wa mwenga anguhika,
kakwela mwanapunda.”
16Wavulwa ghaki haku mtumbulo wamanyili ng'ogha mighalu hila, ila Yesu pakahindulwa kala, ndiwa wakakumbwiki yiwa awelili kayandikilwa hagha, na hinu wandu wawela wamgholela hagha.
17Lipinga lya wandu wala wawelili pamonga na Yesu lipindi pamkemili Lazalu kuhuma kulimambi, na kumuhindula, wayendelelili kulongelelela ghala yahumile. 18lipinga lya wandu likayenda kumpokela Yesu kwaikiva wawelili wayoghanila yiwa awelili kaghola mkangasu hau wa kumuhindula Lazalu. 19Hinu Mafalisayo wakalongilana weni kwa weni, “Mngulola hinaa tuwesa ng'ogha kughola chochosi kangi. Uloli wandu wogha wangumkovekela mweni!”
Wamonga wa Wagiliki wangupala kumlola Yesu
20Kumhambu hau wa Pasaka haku Yelusalemu hilahila Wagiliki wayendili kumyupa Sapanga, 21hagha wamuyendelili Filipo, mwenikaya wa ku Betisaida kumlima wa Galilaya, wakamlongela, “Mkulu, tungupala kumlola Yesu.”
22Filipo akayenda, akamlongela Andelea, hinu wogha waivili wakayenda wakamlongela Yesu. 23Yesu akayanga, “Lipindi lya kuyinuliwa kwa Mwana wa Mundu lihika kala!” 24Ninguwalongela chakaka, mbunji gha nganu paikulilwa ng'ogha mulutupi inguhighala mbunji hela. Ila paikullilwa mulutupi hai itemela na kumwihu itelela mbunji zitangala. 25Mundu yeyosi mweni kupala ngalilu ghaki ateiyalamisa, na yula mweni kuhyomela ngalilu ghaki gha mlima wogha hau, ateulokola hata ukomu wa machuwa hyogha bila mwihu. 26Mundu yoyosi mweni kupala kunitumikila angupalwa anikovikeli, ili aweli na nenga kokosi ninguyenda. Mundu yoyosi mweni kunitumikila Tati ghangu atempegha utundamilu.
Yesu angukilongelela kihu kyaki
27“Hinaa mpumulo ghangu ungunyengemala nesu. Na nimanya ng'ogha nilongi niki. Ghuli, nilongi, ‘Tati ninguluwa unilokoli kuhuma kulipindi lya mahakilo hagha?’ Ng'ogha, niwesa ng'ogha kuluwa nagha kwaikiva nihika kumlimawogha ili nipitili lisaa hali lya mahakilo. 28Tati, uliyinuli lihina lyaku.”
Ndiwa likahuma lilowi kuhuma kundumba, “Niliyinula kala na kangi niteliyinula.”
29Hinu lipinga lya wandu lyeni kuwela pala palihyoghanila lila lilowi, amonga gha weni waliwachilili mlindimu wa ladi, na amonga waliwachilili yiwa Mtumikila wa kundumba wa Sapanga kalonga na Yesu.
30Ila Yesu akawalongela, “Lilowi hali kuhuma kwa Sapanga lihika ng'ogha kwaikiva gha nenga, ila ni kwaikiva gha mwenga. uma kwa Sapanga na lihika kwaikiva gha mwenga ng'ogha nenga. 31Hinaa ndiwa lipindi lya mlima wogha hau kulamulwa, hinaa mkulu wa mlima wogha hau atedangwa panji. 32Ila nenga paniyinulwa kunani gha mlima, nitewakwegha wandu wogha wahiki kwa nenga.” 33Yesu ailongile hagha akilangiha yiwa atehova kwa kihu kya ndambu liki.
34Hinu, lipinga lila likayanga, “Twenga tungulongelwa kulaghililo lya twenga yiwa Kilisito atelikala machuwa hyogha bila mwihu. Hinu kwa kyani unguwesa kulongela yiwa Mwana wa Mundu angupalwa kuyinulwa kunani? Na hayu Mwana wa Mundu kaghani?”
35Yesu akawalongela, “Mhana ukali kuwela pamonga na mwenga kwa lipindi mayaghani. Hinu mtyangi kumhana hau kwaikiva mmbila kuwela nau, mkotoho kukolwa na lwisa, kwaikiva yula mweni kutyanga mlwisa kamanya ng'ogha kula anguyenda. 36Hinu pamuwela na hau mhana muukwinili ili mpati kuwela wandu wa mhana hau.”
Wandu walema kumkwinila Yesu
Badili gha kulongela hagha, Yesu akahuka na kujihigha kutali na weni. 37Hata badili gha Yesu kughola makangasu ghala hyogha kuulongolu ghao, weni walemili kumkwinila, 38ili lipati kutimila lila lilando lya Mlota wa Sapanga Isaya paalongili,
“Bambu ni ghani mweni kukwinila ujumbi wa twenga?
Na ni kwa ghani Bambu kawonesa makakala ghaki?”
39Kwa nagha wawesa ng'ogha kumkwinila, kwaikiva Isaya ailongile kangi.
40“Sapanga kadosola mihu ghao,
na kawaghola waweli watatala,
ili mihu ghao ikotoho kuwesa kulola,
na malangu ghao yakotoho kuwesa kumanya,
wakotoho kunihyukila, ili mbati kuwalamisa,
angulonga Bambu.”
41Mlota Isaya alongile hagha kwaikiva ailolile kwa utali ukulu wa Yesu, hinu akalongela habali zyaki.
42Pamonga na hagha wandu watangala paghati gha wakulu wa Wayahudi wamkwinilili Yesu. Ila kwaikiva gha kuwatila Mafalisayo wakalema kumjumila lipalalipala kwa kutila kuwingwa kuyenda kuyupa kulighuta lya kukonganikila Wayahudi. 43Vilongosi hagha wa Wayahudi wapalili nesu kutundamilwa na wandu kupiti kutundamilwa na Sapanga.
Yesu kahika kulokola wandu wa mlima wogha
44Yesu akalonga kwa lilowi likulunga, “Mundu yula mweni kunikwinila, kangwinila ng'ogha nenga hela, ila angumkwinila hilahila Tati mweni kuniyegha. 45Yoyosi mweni kunilola nenga, kamlola yula mweni kunilaghila. 46Nenga nihika handa mhana kumlimawogha hau, ili wandu wogha weni kunikwinila wakotoho highala mlwisa. 47Yula mweni kuhyoghanila milando ghangu na akaleka kukovekela kila nilongili, nitemtosa ng'ogha, kwaikiva nenga nihika ng'ogha kuutosa mlima wogha hau ila nihika kuulokola. 48Ila wogha weni kunilema na kuulema ujumbi wa nenga watetoswa kulichuwa lya mwihu kwa milando gha chakaka niilongile. 49Nenga nilongile ng'ogha kwa kupala mwenibaha. Ila niilongela ghala angupala Tati yula mweni kunilaghila kanilongela nilongi. 50Nenga ningumanya lilaghilo lyaki yiwa linguyegha ukomu wa machuwa hyogha bila mwihu. Ndiwa kwaikiva nilonga ghala Tati kanilaghila nilongeli.”
ទើបបានជ្រើសរើសហើយ៖
Yohana 12: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
