यहुन्ना 18
18
येशु आकोलोसिन्या
मत्ती २६:४७-५६; मर्कुस १४:४३-५०; लूका २२:४७-५३
1येशुले प्रार्थना आढाऔ छिन्ट आसिइयाङसं किद्रोन खोल्सा हुदिफन हिनौ, नङ तोलोअ बारी लेऊ ओटन आसिइयाङसं ओलं हिन्वाङ। 2ओलजन कोलोअन्या यहूदाले बै नका पो शईस्यु लेऊ, दानाङभन्या येशु सनर आ सिइयाङ तबर पाला ओलं हिनस्युलेवाङ। 3तब कजम्तिइ, भाङ सनर हतियारयाङ होनन्या सिपाइयाङल त बगाल सनर मुख्या पुजाउरो सनर फरिसीयाङै रापरिङन्या पाल्याङजन हिनस्यु यहूदा बारील रांऔ। 4तब आयर्त परिरान्या सोगल छेन सनस्यु येशु हाङन रांऔ, ओटन नकाङजन ऐआढोवाङ, “जे काङ्काजन जेरोअज्याचिऊ?”
5नकाङै ओजन ऐराढोव, “नासरतला येशुजन।” येशुले नकाङजन ऐआढोवाङ, “ङा ओइ ज्या।” आब ओलजन कोलोअन्या यहूदा बै नकाङसै च्याङज्याऊ। 6जब येशुले नकाङजन ऐआढोवाङ, “ङा ओइ ज्या” ऐलेऊ, तब नकाङ छिन्देए हाएसिवाङ, ओटन नामल पाइवाङ। 7फरि नकाङजन आगिन्वाङ, “जे काङ्काजन जेरोअज्याचिऊ?” नकाङै ऐलेवाङ “नासरतला येशुजन।” 8येशुले जबाक आयोवाङ, “ङा जेजन ऐढादुच्या, कि ङा ओइ ज्या। नैताइस्यु यदि जे ङाजन रोअज्याङच्योकन ईका रुयाङजन हिनौ योंचिरते।” 9“नङ ङाजन नयांन्याङ्ङन तोलोअजन बै ङा मागवाइदुङरा” ओले ऐआलन्या बचन पुरा ग्याताइत्या ऐलेस्यु ईका ताहौ।
10सिमोन, पत्रुसले ओलसं लिज्यान्या तरवाल हाएस्यु मुख्या पुजाउरोल सेवाऱ्याजन आराइस्याऔक नकाल दाइन्या ना च्वाट्टै आपलस्यौ। नका सेवाऱ्याल मिन हो माल्खस। 11येशुले पत्रुसजन ऐआढोव, “तरवाल सिपल झोअते। नैति बौले ङाजन आयांन्या कटौरा ङा माओङा?”#मत्ती २६:३९; मर्कुस १४:३६; लूका २२:४२
येशु हन्नासल लेऊक
12“नालछिन्ट रोमी पाल्याङल बगाल, नकाङल कप्तान, सनर यहूदी अढिकारीयाङल पाल्याङै येशुजन राकोलोकौ, ओटन ओलजन रांपोकौ। 13हादेए नकाङै ओलजन हन्नासल्योङ रालाङौ, जो नका साल्ला प्रधान पुजाउरो कैयाफाल मामा लेऊ। 14ईकाइ कैयाफा ज्या, जोले ‘जनताल नाल्ट तोलोअ रु आसिन्याई चान्या लेया’ ऐलेस्यु यहूदी अढिकारीयाङजन सल्ला यांस्यु आनाएवाङ।”#यहुन्ना ११:४९-५०
पत्रुसले येशुजन इन्कार आढान्या
मत्ती २६:६९-७०; मर्कुस १४:६६-६८; लूका २२:५५-५७
15सिमोन पत्रुस सनर येशुल छुट्टै तोलोअ सिइ येशुल छिन्ट लागिऊ। ना छुट्टै सिइ प्रधान पुजाउरोल नशईन्या लेऊ, ओटन येशु सकाएजै प्रधान पुजाउरोल ठरबाङल हिनौ। 16तर पत्रुस पाखाङ झलापत च्याङज्याऊका। जो प्रधान पुजाउरोले नशईन्या छुट्टैवाला सिइ, पाखाल पलिईस्यु झलापल चुङन्या किटीजन खुलौपरिङस्यु पत्रुसजन भितर आहोनौ। 17तब झलापत चुङन्या नका किटीले पत्रुसजन ऐआढोव, “नैति नङ बै ईका रुल सिइयाङ्ङन तोलोअ माङडी का?” पत्रुसले ऐआढोव, “ङा माङडी” 18नङ नोक्करयाङ सनर पाल्याङ भलाङज्यान्या मी मुनसिस्यु च्याङज्यावाङ, दानाङभन्या झिमज्याऔ। ओटन पत्रुस बै नकाङसं च्याङस्यु मी मुनसिऊ तअसिऊ।
येशुजन प्रधान पुजाउरोयाङ्ङन ग्यानगिन
मत्ती २६:५९-६६; मर्कुस १४:५५-६४; लूका २२:६६-७१
19आब प्रधान पुजाउरोल येशुजन आ सिइयाङ सनर आसिछ्यालं बारेल आगिनौ। 20येशुले नकाजन जबाक आयोव, “ङा सङ्सारलं सोगलैजन प्रस्टै पानस्युलेङा। ङा सदाईज आराधना झिमजिऊल सनर मन्दिर जिऊल सिक्छ्या यांज्याङा, जोल सोगल यहूदीयाङ दुउसिरा। ङा गोप्यल नैज पानस्यु मालेङदी। 21ङाजन दानाङ गिनज्याङ? ङा नकाङजन कैङाढोङवाङ ना थएन्याङझन्जै गिनौरते। ङा ङापानन्या छेनयाङ इकाङजन थाहै लेया।”
22येशुले ईका छेन आपानौक नेराक च्याङज्यान्याङ पाल्याङ्ङन तोलोअले ऐलेस्यु येशुजन आलपत्याहौ, “नैति प्रधान पुजाउरोजन ऐलेस्यु जबाक योंना?”#लूका ५:१; लूका २२:६३ 23येशुले नकाजन ऐआढोव, “ङा गलत बयन ङायान्या ताहकन नकाल प्रमान यांङते, तर यदि ङा ठिकै ङापानन्या ताहकन ङाजन दानाङ टुपङ?” 24तब हन्नासले ओलजन पोअसिज्यान्याईज प्रधान पुजाउरो कैयाफा ल्योङ आपरिङौ।
पत्रुसलं नेंपाला सनर तिस्रा चोए इन्कार
मत्ती २६:७१-७५; मर्कुस १४:६९-७२; लूका २२:५८-6२
25सिमोन पत्रुस च्याङस्यु मी मुनसिज्याऔ। नकाङै नकाजन ऐराढोव, “नैति नकाल सिइयाङ्ङन तोलोअ नङ बै माङडी?” नकाले माभनस्यु ऐआढोवाङ, “ङा माङडी।” 26प्रधान पुजाउरोल सेवाऱ्याङ मध्य तोलोअ, जोल नालनाठाल नां पत्रुसले आपलस्यौ, नकाले आगिनौ, “नैति नङजन ङा नकासं बारील ङामारङनु का?” 27तब फरि पत्रुसले इन्कार आढोव। ओटन ओचोएटै भाल्या कोव।
पिलातसल सामन्दी येशु
मत्ती २७:१-२; मर्कुस १५:१-५; लूका २३:१-५
28तब नकाङै येशुजन कैयाफाल झिमलन महल लेऊदेए आलाङौ। नवाए बेला छकाल्यादेए हो। जुठुउ परीस्यु निस्तार-पर्बल ज्यान्या ज्याऔ माढोतैदी ऐलेन्या, छ्याइले नकाङ महल भितरलं मापसिवाङ। 29ऐताइस्यु नकाङल्योङ पाखा पलिईस्यु पिलातसले ऐआढोवाङ, “ईका रुल बिरोदत नैकाम दोस लाइच्यो?” 30यहूदी अढिकारीयाङै ऐलेवाङ, “यदि ईका रु अपरादि माताहकन गे इकाजन नल्योङ मासुम्पिइदी।”
31पिलातसले यहूदी अढिकारीयाङजन ऐआढोवाङ, “जे इकाजन लाङचिते, ओटन जे जेमिई ब्यबस्था अनुसार इकाल निया ढोचिते।” यहूदी अढिकारीयाङै ओलजन ऐराढोव, काङ्काई रुजन म्रित्युदन्ड यांन्या अढिकार गेसं माल्दी। 32येशुल काल कैताइन्या रीतिले ताइन्या नकाल सङ्केट यांस्यु ओले आपानन्या बचन पुरा ग्याताइत्या ऐलेस्यु ऐताहौ।#यहुन्ना ३:१४; १२:३२ 33पिलातस फरि महल भितरलं पसिऊ, ओटन नकाले येशुजन खुल्स्यु ऐआढोव, “नैति नङ यहूदीयाङल रय रों?” 34येशुले जबाक आयोव, “नङजै ऐलिज्याना, सन् ङाबारेङन नङजन अपुर काङ्काङै रापानस्यानु?”
35पिलातसले जबाक आयोव, “नैति ङाक्या यहूदी का? नरुयाङ सनर मुख्या पुजाउरोयाङै नङजन ङाकुईत रा:सुम्पिनु। नङ नै नढोनु?” 36येशुले जबाक आयोव, “ङा राज्य ईका सङ्सारला माङडी ङा राज्य ईका सङ्सारलं आलन्या ताहकन्ता ङा सेबकयाङ ङा नाल्ट खप्सिदुरा होला, ओटन ङा यहूदीयाङ कुईत परिन्या मालेङदी। तर ङा राज्य ईका सङ्सारलं माङडी।” 37पिलातसले ओलजन आगिनौ, “नै नङ रय ज वन?” येशुले जबाक आयोव, “ङाजन नङजै रय ऐढाङज्याना। इकालै नाल्ट ङा ङाजर्मिङु हो, ओटन इकालै नाल्ट सत्यल बयन यांन्या ङा ईका सङ्सारलं ङारांङु हो। सोगल जो सत्यल पक्छेल ले, नकाले ङा ग़ा थएवा।”#१यहुन्ना ४:६ 38पिलातसले ओलजन आगिनौ, “सत्य नैति?” छेन छ्योङस्यु ओलं यहूदी अढिकारीयाङ ल्योङ पाखा पलिईस्यु हिनौ, ओटन नकाङजन ऐआढोवाङ, ङा इकाल नैज दोस माडोटङदी।
येशुजन म्रित्युदन्डल आग्या
मत्ती १५:२७; मर्कुस ६:२०; लूका २३:१३-२५
39“निस्तार-पर्बक बेलाक जे नाल्ट तोलोअजन राइस्यान्या जेचलन लेया। कि यहूदीयाङल रयजन राहङ सन् कैजेल्चिऊ?” 40तर नकाङ फरि ऐलेस्यु कलिऊवाङ, “इकाजन माङडी, बारब्बाजन।” बारब्बा डाङ्का लेऊ।
ទើបបានជ្រើសរើសហើយ៖
यहुन्ना 18: NTSKm25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025
