यहुन्ना 14
14
येशु बौल ल्योङ हिनन्या यम
1येशुले आसिइयाङजन ऐआढोवाङ, “जे यिङ छटपटी ताटाइत्या। जे परमेस्वरतं बिस्वास ढोच्योकन, ङाजन बै बिस्वास ढाङचिते। 2नङ ङा बौल झिमल चुङन्या पो खाटखाट लेया, नैताइस्यु ङा जे नाल्ट पो तयार जाएन्या ङाहिनज्याङु। ईका छेन मछ्यु माताहकन, ङा जेजन ऐमाढाचिदी। 3ओटन ङा हिनस्यु जे नाल्ट पो तयार जाएस्यु रांङा, ओटन जेजन ङासकाए लाङच्या, ओटन ङा जोङ लिज्याङ, जे बै नङै लिज्याच्या। 4जोङ ङा हिनज्याङा, जे नका यम ऐसनच्या।”
5थोमाले येशुजन ऐआढोव, “औ प्रभु, नङ कान्देए नहिनज्यानु, गे मासनइदी, ओटन यम गे कैलेस्यु सनै?” 6येशुले नकाजन ऐआढोव, “यम, सत्य सनर जिबन ङाई ज्या। ङाङन बाहेक काङ्काई बै बौल्योङ रांऔ माढुदुऊदी। 7जे ङाजन जेशईन्या ताहकन, ङा बौजन बै शईच्या होला। आबकन ओजन शईच्या, सनर ओजन रङदुच्या।” 8फिलिपले ओलजन आढोव, “औ प्रभु, गेजन बौ थनस्यासिन्ते। आवाए लेकन्ता गेजन ऐयोका।” 9येशुले नाजन ऐआढोव, “फिलिप, आवाए समन ङा जेसकाए लिज्याङा, ओटन बै नङ ङाजन नमासहङनु? जोले ङाजन रङस्युले, नकाले बौजन रङस्यु लेया। नङ कैलेस्यु ऐनल्नु, ‘गेजन बौ थनस्यासिन्ते?’ 10ङा बौसै लिज्याङा, ओटन बौ ङासै लिज्याया ऐलेस्यु नैति नङ बिस्वास नमाढोनु? जो छेन ङा जेजन पानस्याच्यो, नका ङा ङामिइ अढिकारतन ङाछ्योङ्ङु माङडी, तर ङात बाए ढान्या बौले आकाम ढोवा। 11ङाजन बिस्वास ढाङचिते, कि ङा बौसै लिज्याङा, ओटन बौ ङासै लिज्याया। मानकन ईका कामयाङलै कारन बिस्वास ढाङचिते।” 12“ङा जेजन मछ्यु ऐढाच्या, जोले ङाजन बिस्वास ढाङु, नकाले ङा ङाढान्या काम बै ढोवा, ओटन नकातन घिन्या काम बै ढान्यालेया, दानाङभन्या ङा बौ लेऊदेए ङाहिनज्याङु। 13जे ङा मिनतन जो नीच्योकन बै ज़ाङन बौल महिमा ग्याताइत्या ऐलेस्युई ङा ना ढोङा। 14जे ङा मिनतन जो जन्तु नीच्योकन ङा ढास्याच्या।
पबित्र आत्माल बाचा
15“जे ङाजन मया ढाङच्योकन ङा आग्या बै पालन ऐढोच्या। 16ओटन ङा बौजन बिन्ति ढोङा, ओटन ओले जेजन तोलोअ छुट्टै सल्लाकार यांचिवा, ओटन ओ जेसकाए सदाईज लिजिया।” 17ओ सत्य आत्मा हो, जोजन सङ्सारले ग्रहन ढाऔ माढुदुऊदी, दानाङभन्या सङ्सारले ओजन न त रङौ न सहौ। जे याएजै ओजन शईन्यालेच्या, दानाङभन्या ओ जेसकाए बाए ढोवा, ओटन ओ जेसकाए जै लिज्याया।
18“ङा जेजन टोक्या माबनाएचिदी। ङा फरि जेल्योङ रांन्यालेङा। 19आब तचिइ छिन्ङन सङ्सारले ङाजन खकै रङन्या माल्दी, तर जे ङाजन रङन्या लेच्या। ङा जिङदा ङाताहौकाले, जे बै जिङदा लिज्याच्या। 20नका छिम्क जे सनन्यालेच्या, कि ङा बौसै लिज्याङा, ओटन जे ङा सकाए, ओटन ङा जेस लेङा।”
21“ङाजन मया ढान्या नकाई ज्या जोसकाए ङा आग्या ले, ओटन नकाले ना पालन ढोव। ओटन ङाजन मया ढान्याजन ङा बौले नाजन मया ढोवा। ओटन ङा बै नाजन मया ढान्यालेङा, ओटन ङा नका ल्योङ रंनन्या लेङा।”
22यहूदा (इस्करियोत माङडी) तर छुट्टै यहूदाले येशुजन ऐआढोव, “प्रभु, नङ नै नपान्नु, नङ नङझन्जै गेत सथन्ना, ओटन सङ्सारजन माङडी?”
23येशुले नाजन जबाक यांस्यु ऐआढोव, “जोले ङाजन प्रेम ढाङु, नकाले ङा बचन पालन ढोवा, ओटन ङा बौले नाजन प्रेम ढान्यालेया, ओटन घोन नका ल्योङ रांच्या, ओटन नका ल्योङ बाए ढोच्या। 24ङाजन प्रेम माढान्याले ङा बचन पालन माढोवदी। जो बचन जे थएच्यो, ना बचन ङामि माङडी, तर ङाजन परिङन्या बौल हो।”
25ईका छेन जेसकाए ङालिज्याऔकै ङा जेजन पानस्याज्याच्या। 26तर सल्लाकार, अथाबा पबित्र आत्मा, जोजन बौले ङा मिनतन परिङन्या लेया, ओले जेजन सोगलै छेन ह्युउचिवा, ओटन ङा जेजन ङापानस्यान्या सोगलै छेनयाङ जेजन यिङौ परिङचिवा।
27ङा जेसकाए शान्ति बनाएङा। ङा ङामि शान्ति जेजन यांच्या। सङ्सारले आयांन्या मनताइन्या ङा जेजन मायांचिदी। जे यिङ छटपटी ताटाइत्या सनर हिपहिप ताटाइत्या। 28“ङा जेजन ङाहिनज्याङु, सनर फरि जेल्योङ रांङा, ऐङालन्या जे थएदुच्या। जे ङाजन प्रेम जेढान्या ताहकन ङा बौलेऊदेए ङाहिनज्याङु ऐङालन्या थएस्यु जे हेसाङदुच्याहोला, दानाङभन्या बौ ङातन माहान लेया। 29आब ईका आताहौ हादेएजै ङा जेजन पानस्यादुच्या, ओटन जब ईका ताइरा जे बिस्वास ढाऔ ढुदुचिते। 30ङा जेसकाए आब तबर माछ्योङ्ङडी, दानाङभन्या ईका सङ्सारला शासक रांज्याया। नकाल ङायर्त नैज सक्ति माल्दी। 31तर ङा बौजन प्रेम ढोङा, ओटन जोमनताइन्या बौले ङाजन आग्या यांस्यु आनाएङु, नाइ अनुसार ढोङा ऐलेस्यु सङ्सारले ग्यासनौत्या। सोचिते गे ईका पालन बाया।”
ទើបបានជ្រើសរើសហើយ៖
यहुन्ना 14: NTSKm25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025
