प्रेरित 15
15
यरुशलेमल बिस्वासीयाङलं बैठअ
1आब काङ्का रुयाङै यहूदियाङन एन्टिओखियाल रा:स्यु बिस्वासी भाईयाङजन ऐटाइन्या सिक्छ्या यांऔ तअसिवाङ, “जे मोशाल चलन अनुसार खटना माढोच्योकन ता जे उद्दार ताहौ माढुदुऊदी।”#लेवी १२:३ 2तब पावल सनर बारनाबासलं नकाङ सकाए तबर ताकानतोकन ताहापाइना, नला बिस्वासी भाईयाङै पावल सनर बारनाबास सनर अपुर ख्वाएजन ईका पान टुङ्गाहौ नाल्ट प्रेरितयाङ सनर बिस्वासी सेरयाङ#15:2 सेर=सेर ल्योङ, यरुशलेम हिनौ नाल्ट पक्का आजाटौ।
3मन्डलीला सदस्याङै नकाङजन नङंन बिदा रांयोव। नकाङ फोनिके सनर सामरीयाङन ताइस्यु रांहिनौक, गैरयहूदीयाङै प्रभुजन ग्रहन राढान्या छेन नकाङजन तचिचीइङन नेसठटौ। आका थाईले नङा बिस्वासी भाईयाङ तबर जै हेसाङवाङ। 4जब नकाने यरुशलेमल ताप्राऔने, तब नेंजन मन्डलीला प्रेरितयाङ सनर बिस्वासी सेरयाङै स्वागत रांढोव, परमेस्वरले नेंङन आढान्या स्वाट्टै छेनल गतिबिधि नकाङजन नेसठएवाङ। 5तब फरिसी बगालला ख्वाएयाए बिस्वास ढान्याङै च्याङस्यु ऐलेवाङ, “गैरयहूदीयाङल खटना ढास्यान्या सनर नकाङजन मोशाल ब्यबस्था मानिन्या आग्या यांन्या आबस्यक लेया।”
6ईका बारेल बिचार ढाऔ नाल्ट प्रेरितयाङ सनर बिस्वासी सेरयाङ दुउसिस्यु लेवाङ। 7जमा भ्याई बहस चलियापाइना पत्रुसले च्याङस्यु नकाङजन ऐआढोवाङ, “ऐ बिस्वासी भाईबैनाङ, जेजन थाहै लेया कि हाका दिनयाङल कैलेस्यु परमेस्वरले ङा याह्लन गैरयहूदीयाङै चान्याथाईल बचन ग्याथएरत्या सनर बिस्वास ग्याढोरत्या लेस्यु, जेखार्लन ङाजन आछेल्ङु। 8यिङला छेन सनन्या परमेस्वरले नकाङजन बै गे मन्जै पबित्र आत्मा योंवरा पाइना नकाङै ग्रहन राढान्या छेनयाङ आठनस्योवाङ। 9ओले नकाङ सनर गे खार्ल नैज भेदभाब मानाएदा, तर नकाङल यिङ बिस्वासङन चोखा आजाएस्योव। 10नैताइस्यु सिइयाङल पुङत ईका कुम नाएस्यास्यु दानाङ परमेस्वरजन अल्चिज्याच्यो? ईका कुम न त गेमि बौ-बाज्याङै न गे वुरौ गेढुदुयिउ। 11तर गे बिस्वास ऐढोया, कि प्रभु येशुल अनुग्रहङन गे उद्दार डोएस्यु लेया, जोमनलेस्यु ओयाङै बै डोएस्यु लेरा।” 12तब बैठअलाङ सोगलै छपक्कै दिङवाङ, ओटन गैरयहूदीयाङल खार्ल परमेस्वरले नकाङतन कैताइन्या अचम्मला कामयाङ सनर अचम्मला कामयाङ आढोव नकाल चर्चा बारनाबास सनर पावलले नेंढोव। नकाङै ईका छेन राथटौ। 13नकाने छ्योङस्यु खेमन्यापाइनाई याकूबले ऐआढोवाङ, “ऐ, बिस्वासी भाईबैनाङ, ङा छेन थएचिते। 14परमेस्वरले आमिई मिनल नाल्ट गैरयहूदीयाङ्ङन तोलोअ जाति छेलन्या क्रिपा आढोव ऐलेन्या छेन रुयाङजन सिमोनले आपानस्योवाङ। 15ईकाइ अगमबक्ताङल छेन बै मिलिया, जोमनताइन्या सरसिन्यालेया, 16‘ईका छेनल छिन्ट ङा वलन्यालेङा, ओटन दाऊदल तांन्या बाईपो फरि जाएन्यालेङा, नकाल तांस्युलेन्या बाईपो ङा फरि जाएस्योङा, ओटन नाजन सच्यानन्यालेङा,#यर्मिया १२:१५ 17ओटन बाङ्की रुयाङै परमप्रभुजन रोंकौ ग्याढुदुरत्या, ओटन सोगल गैरयहूदीयाङै बै जोयाङ ङा मिनतन खुल्सिवाङ।’ 18ईका छेन परमप्रभुले आपानौ, जोले ऐका बेलाकन्ज ईका छेनयाङ जनाइस्यु लेऊ, जो स्रिस्टील सुरुकन सन्सिन्या लेऊ।”#आमोस ९:९-१२; यशैया ४५:२१
19“नैताइस्यु ङामि निर्नय आकाई ज्या, कि परमेस्वर लेऊदेए वलन्या गैरयहूदीयाङजन गे दुख यांन्यामाङदी। 20तर नकाङजन आका छेन गेसरस्योइवाङ, कि नकाङ मुर्ति पुजाल अशुद्दताङन अलक ग्यालरत्या, ब्यबिचारङन अलक ग्यालरत्या, भोङकराअ पचिरस्यु सएसिन्या पशुल चिप सनर जीतन अलक ग्यालरत्या।#उत्पत्ति ९:४; लेवी ३:१७; लेवी १७:१४ 21दानाङभन्या हाङा पुस्ताङन्जै सहरभरि मोशाल ब्यबस्थालं प्रचार ताइरा:स्यु लेया, आका सदाई यहूदी आराधना झिमल स्वाट्टै शबाथल परीज्यासिया।”
अपुर बिस्वासीयाङजन चिठी
22तब प्रेरितयाङ, सेर बिस्वासीयाङ सनर सोगलै मन्डलीले मिलिस्यु, रां खार्लन ख्वाएयाए रुयाङजन छेल्स्यु पावल सनर बारनाबास सकाए एन्टिओखियाल परिङन्या सहि रामानिऊ, ओटन बिस्वासी भाईयाङ मध्य मुख्या रुनें, यहूदा ऐढासिन्या बारनाबास सनर सिलासजन रांछेलौ।
23“ओटन नकानेसं ओयाङै ईका चिठी रांपरिङौ एन्टिओखिया, सिरिया सनर किलिकियाल लिज्यान्या मन्डलीला गैरयहूदी भाईबैनाङजन प्रेरितयाङ सनर सेर बिस्वासीयाङजन अभिबादन। 24गे थएस्यु गेलेयिउ कि, गे खार्ला काङ्का-काङ्काङै गे आदेस बिनाईज जे यिङ दोधारल जाएस्यास्यु जेजन भ्याई छेनले दुख यांस्यु रानाएचिऊ। 25नैताइस्यु गे सोगलैल सहमतित ढासिन्या निर्नय अनुसार ख्वाएयाए रुयाङजन छेल्स्यु नकाङजन गेमि ङानिज्युन्या बारनाबास सनर पावल सकाए परिङन्या गेजन ठिक लागिऊ। 26ईका रुयाङ ऐटाइन्या ग्याताइत्या, जोले गेमि प्रभु येशु ख्रीस्टल नाल्ट रां परान जोखिमल पराइस्यु लेर। 27नैताइस्यु गे यहूदा सनर सिलासजन परिङस्यु गेलेयिउ। नकानेले बै ना छेनयाङ याह्लेई पानन्यालेन्या। 28दानाङभन्या पबित्र आत्मा सनर गेजन ईका ठिकलागिऊ, कि ईका आबस्यक छेनयाङ बाहेक अपुर तबर वुर जेजन बोकाइन्या माचाहिइडी। 29जे शुरुपयाङजन बलि जेचराइन्या जन्तु, जी, भोङकराअ पचिरस्यु सएसिन्या पशुल चिप सनर ब्यबिचारतन अलक लेचिते। ईका छेनयाङतन अलक लेच्योकन चान्या ताइन्यालेया।”#उत्पत्ति ९:४; लेवी ३:१७
30बिदाबारी ताहा पाइनाई बारनाबास, यहूदा, सिलास सनर पावलयाङ एन्टिओखियाल रांवाङ, ओटन बिस्वासी बगालजन तचोएकै दुउस्यु ना चिठी रांयोव। 31चिठील लेन्या अर्थला छेन डोएसिऊ नकाङ हेसाङस्यु उत्साहित ताइवाङ। 32यहूदा सनर सिलास नें बै अगमबक्ता नेंताहौकाले बिस्वासी भाईयाङजन तबर बचनङन अर्थ यांस्यु नकाङजन साहसी सनर बलल्या नेंजाटौवाङ। 33नकाने तचिइ समाय नङ बिताइन्या पाइना नङा बिस्वासी भाईबैनाङै नकाङजन परिङन्याङ ल्योङ चान्यासकाए बिदा यांस्यु रांपरिङौ। 34तर सिलासजन नङै चुङन्या चान्या लागिऊ।
35पावल सनर बारनाबास सिक्छ्या यांऔयन प्रभुल बचन प्रचार ढाऔयन अपुर तबर जनाङसं एन्टिओखियाल छिन्ङ समन ओलै लिज्याऔने।
पावल सनर बारनाबासने नेभाअसिन्या
36तचिइ दिनछिन्ट पावलले बारनाबासजन आढोव, “रांन्ते, जो-जो सहरल प्रभुल बचन घोन प्रचार घेनढोचिऊ नका सहरयाङल वलस्यु हिनस्यु भाईबैनाङजन डोएन्याङ ओटन नकाङ नै कैताइज्यावाङ खिमन्याङ।” 37बारनाबासले मर्कुसं ऐढासिन्या यहुन्नाजन नेसकाए लाङन्या बिचार आढोव। 38तर पावलले मर्कुसजन नें सकाए लाङन्या ठिकमामानिदा, दानाङभन्या नका पामफिलियाङन नकाङसं छुतिस्यु लेऊ, ओटन नकाङ सकाए कामल हिनस्यु मालेव। 39नकाङल खार्ल आवाए घिन्या यिसिई ताहौ, कि नकाने नेंने भाअसिऊने, ओटन बारनाबास मर्कुसजन ओलसं लाङस्यु साइप्रसदेए हिनौ। 40तर पावलले सिलासजन आछेलौ, ओटन भाईयाङ्ङन परमेस्वरलं अनुग्रहल अर्पन ताइस्यु बिदा ताहौ। 41मन्डलीयाङजन बलल्या जाटौवन नकाले सिरिया सनर किलिकिया ताइस्यु भ्रमन रांढोव।
ទើបបានជ្រើសរើសហើយ៖
प्रेरित 15: NTSKm25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025
