Joni 15
15
Yesu E shina Ma Ntasi
1<<E ni la ni ma ntasi ni gaskye, Adaa na e ma nsu noma, 2Yaa sala guru nani ntasi de beyi yaya a siki na ba, du nani de yaa beyi yaya yaa gyale yi nkyawu de e beyi yaya nyowa. 3Ku rigye ma sere wo sobon kelima de ni gye ku. 4Ku zunwa a siki na E ni mma zunwa a siki ku. Ba nani ntasi de yaa beyi yaya nkiya yi; sede e mala a nki ni ntasi. Yomuna kwa mani sori yi mbodaa ba se ku zunwa a siki na.
5Yesu nkye, <<E ni na ni ma ntasi inebi; oku na kuma nani ntasi. Nde nsude ma a siki na E ni mma a siki e yi, yaa beyi yaya nyowa; mba nja ni ba kwa yi yaa yi mbodaa ba. 6Guru nsude ma a siki na ba, yaa ma kankye nani ntasi de su sala kutiri de e kyekeri; yiri nani ntasi mu sua tala yi de su kutiri a siki wuta anya de sua suwuta. 7Nde ku ma a siki na nja kelima na ma a siki aku, kua minya guru mbode kwa bila, kwa samu. 8Yomuna girima ni Adaa na, yaa nana te anya beyi yaya aku nyowa, yomuna a nana nkye ku ma yayagizi na aka.
9<<Yiride Adaa yaa so ni, yomuna e ni ma na so ku. Kuzukam ku zunwa a siki so na. 10Nde kwa biya doka na, kwa zunwa a siki so na, yiri de ni biya doka ni Adaa na nja ni zunwa a siki so e yi. 11<<Ni gye ku yomu sobon de ku yi peri siki nja Ni nja de perisiki aku e sika. 12Doka na e shina ma; Ku so kiya ku yiri de ni so ku. 13Totolo so daa de e pi nsum e ma ba, de nsebeki e beyi leyi e yi sobon oboki e yi. 14Oku na ku ma oboki na nde ku biya mbode doka na pala. 15Na sakye sukwa ku bunwa gagaba, sobon bunwa shina mbode nsugizi yi yaa yi ba a kiya yomuna mma sukwa ku oboki na, sobon guru mbode ni zi anya ni Adaa na Ni sa ku shina yi. 16Ba oku na ku zabi ni ba, sede E ni na ni zabi ku nja Ni ba ku ANKI de ku te yi yaya nyowa kankye yaya ntasi de yaa ma gbogbo. Anya ni Adaa yaa ba ku du mbode ku minya a siki seni na. 17Osu na e ma doka na: Ku so kiya ku.
Durinya Ki Yayagizi Yesu
18<<Nde durinya ki ku, ku shina su ki ni du tun a pari. 19Nde ku ma ni durinya mu na, durinya yaa so ku a kiya de ku ma na yi. Yiri de e ma, ba ku ma ni durinya mu na ba, sede Ni zabi ku butu a siki durinya mu la. E shiya sa durinya ki ku. 20Ku turunwa ni mbode ni gye ku nkye: <Ba bunwa de yaa pi nsugizi yi girima.> Nde su ba ni Genbeki, sua ba ku Genbeki du. Nde su biya mbode Ni kokoyi su, sua biya na ku du. 21Sede sua yi ku mbo worosu mu guru sobon seni na, su shina nsude saka ni ba. 22Da ni zo gye su beta Mirikisi ba, da sua mani lepi ba. Kuzukam, sede, ba su mani mbodaa de sua beyi sobon lepi asu ba. 23Du nsude ki Ni e ki Adaa na du. 24Nde Ni yi mbodaa a siki asu ba, mbode nseda taba yi ba, nda sua mani lepi ba. Sede kuzukam de su geni mbo mamanki de ni yi, nzun yomu su ki ni nja Adaa na. 25Sede nsum e ma de e sika mbode ma a rubutu a siki doka asu nkye: <Su ki ni ba delili daa ba.>
26<<Kwanki de nsu sua nto zo, nsude e ni ma saka yi butu anya ni Adaa, woto Aworo nsu pelesa gaskye de yaa butu anya ni Adaa, yaa beyi sheeda a kiya na. 27Oku na, kwa beyi sheeda a kiya na, sobon ku ma nja Ni tun a pari.
ទើបបានជ្រើសរើសហើយ៖
Joni 15: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
