TAKADA 21
21
Bulusu Ta Wurishelima
1A beyi de mu yi selema nja su, mu butu bilasu anya ni te tiriri a baki totolo riki yuru a kwanto te ni Kos. Nana ni bi mu te a geri Rodes mu dege anya ni ta Patara.
2Mu san kwanto de yaa nyeteri ta Pinikiya, se mu yuru a siki yi te. 3De mu para geni Sayipuru se mu bise ta kudu mu sigeba ni tepiya ta kesa Suriya. Mu keyi Taya, anya de kwanto amu yaa sonka keikei yi. 4De mu san nsubiya Yesu anya ni, Mu zunwa nja su nana bokwe. A siki Aworo su ologba Bulusu nkye kede ta ni Wurishelima ba. 5Sede de kwanki amu yi, mu bila su mu sigeba ni tepiya amu. Guru nsubiya Yesu nja mata asu nja yaya asu su sa yi mu butu a woze ni geri, se mu dure a baki riki mu yi lepa. 6A beyi de mu seleme nki amu guru, mu yuru a kwanto, se su kuma gizi.
7Mu sigeba ni tepiya dege Taya mu sonka a Tolemayi, anya ni mu geshe yayuwa mu zunwa nja su nana daa. 8Mu bila su geri shekeri, mu keyi Keseriya mu yuru a gizi Pilibu, daa a siki bokwe de yaa beyi manki beta Mirikisi. 9Pilibu man yaya mata wuru de yi amere ba de sua yi aneshi.
10A beyi de mu ma anya ni ni worosu su nana, Se anebi de seni e yi ma Agabus zo butu dege Yawudiya. 11De Agabus zo anya ni, e la mbo shompa ni Bulusu, domuna nani yi nja seni yi nkye, <<Aworo Nsuseki nkye, <Yomu na Yawudawa ni Wurishelima sua domuna nsu mbo shompa mu de su la yi ba worede su ma Yawudawa ba.> >>
12De mu zi yomu, omu nja ntani de su ma anya ni ologba Bulusu kede ta Wurishelima ba. 13Se Bulusu keleba, <<Mina sa kwa yi kuka ari kwa bebeta ni dishiya? Ni man shiri, ba ni domuna na kin ba, sede nzun ni muntu a Wurishelima sobon seni Obagizi Yesu.>> 14Tunde mwa yi yaa shenja dishiya Bulusu ba, mu bila yi, mu nkye, <<Obagizi yi mbode yaa bila.>> 15Se a beyi yomu, mu yi shiri de mu ta Wurishelima. 16Worosu nsubiya Yesu dege Keseriya su sa mu su ka yi mu zo a gizi Manason, anya de mwa ta sonka. E ma nseminji dege Sayipuru na nja daa a siki nsubiya Yesu ni pari.
Bulusu Keyi Wurishelima
17De mu keyi Wurishelima, yayuwa keleba mu ni pari siki. 18De anya kwa yi Bulusu nja ririgye amu te de mu geni Yakubu, nja guru toree de ma. 19Bulusu geshe su se e gye su guru mbo de Mirikisi yi nja worede su shina Mirikisi ba a kiya ANKI de e yi. 20De guru su zi yomu, su yobo Mirikisi. Se su gye Bulusu nkye: Ku geni, Yayuwa, Yawudawa dubu kona su beigaskye, Guru asu su ma memeri ni biya doka Musa na. 21Su pala nkye ka kokoyi guru Yawudawa de sua zunwa a kesa worede su ma Yawudawa ba de su bila biya doka Musa, ki gye su nkye kede su yi yaya su yanka ko su biya alada Yawudawa ba. 22Su minya Bulusu nkye, mina omu mwa yi? Dole sua zi nkye ki zo, 23Se ki yi mbode mu gye ke. Mu ma ni ntani wuru nja mu de su melese. 24Se ki te nja su ku biya kayida ni kokoyi ni buki wonkye nki ki kuma biya gyolo wonkye nki de su kwa yi su kiya. Yomuna konwawa yaa shina nkye gaskye ma a siki guru mbode su pala a kiya ke ba, sede eke nkiya ke ki ma biya doka Musa. 25A kiya worede su shina Mirikisi ba de sua biya Yesu, mu rubuta te su nshi ni yeda nkye kede si mbo de su ba boka, dege zini, ni nama de su muruda yi wuya ko su sayi Genbeki nja kede ku kwana nja mase de ma na ke ba.>> 26A nana ni bi Bulusu la ntani mu nja e yi wonkye rebi nja su. Se Bulusu te a laki lepa de ba su nana de wonkye rebi yi nja de e beyi sedeka a kiya kowon nseda su.
Su Kaa Bulusu
27De kwana bokwe yaa bila yaa, worosu su Yawudawa dege kesa Asiya su geni Bulusu a laki lepa. Su rikishe nyowa ntani de su ka Bulusu, 28su yi kuruwa,<<Sua nkye ntani Izireyila, sua mu nto! Nse minzi mu yaa kokoyi guru ntani anya guru de su yi geba nja ntani mu nja doka kesa mu. Mbom yomu, e zon Helenawa a siki anya laki lepa nja e sa anya mu de ma nsuseki ba.>> 29Su pala yomuna sobon su ma geni Bulusu nja Turopimus nseminji Apisa a siki geri, su ma geni kankye Bulusu la yi te nshi a siki laki Mirikisi.
30Se guru geri rikishe, se ntani yi gudu yiri guru keteri. Su kaa Bulusu, su butu yi a laki lepa, dandani kopa ripe. 31De sua yi kokori kisa yi, se nabari keyi anya ni tolense shoja Roma nkye guru geri Wurishelima su ma a siki rikishe soseyi. 32Dandani tolense shoja Roma la toree nja shoja su yi gudu ta anya ntani de yi yowa. De yaya rikishi geni tolense shoja nja toree shoja su bila dukwa Bulusu.
33Se tolense shoja zo ka Bulusu e sa su domuna yi nja serika bi. Se e minya ko waana ma e shi ko minana e yi. 34Worosu su a siki yowa ntani sua yi kuruwa su nkye daa mu worosu su su nkye daa ni, de tolense shoja geni gaskye ba sobon ni rikishe, e gye su nkye su te Bulusu a siki gizi shoja. 35De Bulusu keyi matakala, rikishi yi yowa se shoja leyi a bisi. 36Se yowa ntani de sua biya yi su sigeba kuruwa nkye kisa yi, <<Se su ka yi Bulusu te nshi!>>
Bulusu Yi Beta Nja Ntani
37De shoja sua bila de su la Bulusu te nshi a siki gizi shoja, Bulusu minya tolense nkye, <<Ni gye ke mbo daa?>>
<<Tolense shoja pala gye Bulusu nkye, ka zi arishiya Helenawa?>> 38<<Ki ma nseminji Masa na bo de para tawaye nja biya nsu kisa ntani dubu wuru ta denka a kwanki de su bise?>> 39Bulusu keleba,<<Ni ma Yawudawa na, dege Tasu a kesa Kilikiya, ni ma yaa kesa ni anihi geri. kadishiya de ni yi beta nja ntani.>>
40De Bulusu bila dama anya ni tolense shoja, e bayi dama Bulusu dege a kiya matakala yaa yi ntani nani. Se guru asu su yi shuru, e yi su beta ni arishiya Aramaya.
ទើបបានជ្រើសរើសហើយ៖
TAKADA 21: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
