Mak 9
9
1Jiso kə́ gɛ̀ nə shʉbə ghɔ̀ŋ tʉ bɔŋ mbɔ, “M̈ɔ shyíi bii nə shʉəŋ mbɔ bəbɛʼbʉə mu bii ndə bɔ̂ŋ tə́nə fɛ̄ŋ, kʉʉ yúotə kwú fɛ, tə bɔ̂ŋ yaʼ yi nyíɛ ndə Sɔ́ʼ-Nyii bu gwè nə ghʉəʼkə.”
Jiso fyú mu məŋwɔʼmə-ì
(Matia 17:1-13; Luk 9:28-36)
2Chîbə kʉ̂ʉ tíŋ ntʉʼʉ Jiso lʉ̀ Bita, Jɛŋ leʼnə Jɔŋ ghɔŋ bɔŋ kóʼ gɛ̀ ndəŋ kwɔŋ ndə i də̀ʼ ghɔʼ, gɛ̀ bɛ chɔ tətɛʼ bɔŋ. Ɔ bə̀ŋ bəshʉ bɔŋ fyú mu məŋwɔʼmə-i. 3Ndyihə-i fyûʼ tə kə́ lèʼnə təmə wo kəwʉʉnəmbi fɛ̄ŋ mə nə chìi ndyi, i fyûʼ nɔ fɛ. 4Ndʉʉmɛ, Ɛlaja fyú ghɔŋ Mushi, kə́ kwə́ʼ ghɔŋbə Jiso. 5Bita ghɔ̀ŋ tʉ Jiso mbɔ, “Chicha, i nɔ bʉ̀ʉ ndə bâʼa bɛ fɛ̄ŋ nɔ. B̈âʼa fʉ̀ə lɛʼbə itia, imɔʼ tʉ a, imɔʼ tʉ Mushi leʼnə imɔʼ tʉ Ɛlaja.” 6Ɔ kə kínə nukə ndə ɔ gìe fɛ, bʉʼka i nɔ nə fɛ̀ŋhə bɔŋ daa.
7Ndʉʉmɛ, mbɔʼkə kwóhə bɔŋ, gyʉʉ gìe mu mbʉ kəmbɔʼ mbɔ, “Nɔ bɛ mbʉətə vaa-ɔŋ nɔ ndə mɔ kʉ̀ʉ, b̈ii yʉ́ chu-i.” 8Bɔŋ kə kwɔnə lɛ́nə təmə leʼ nyíɛ wo fɛ, yaʼkɛŋ Jiso tətɛʼ ɔ. 9Ndə bɔ̂ŋ kə́ shíʼ ndəŋ mbʉ kwɔŋ, ɔ kàhə bɔŋ mbɔ bɔ̂ŋ mə yi shyíi wo nə nukə ndə bɔ̂ŋ nɔʼ nyíɛ fɛ, tə Vaa-Woməsʉʉ yi bʉ̀nə kóʼ hə ndəŋ kwu. 10Bɔ̂ŋ káa nə nu-ghɔ̄-kə bətɔ-bɔŋ, kə́ bíʼtə tʉ ŋwɔŋtə-ʉə nukə te ndə məbʉnə-kóʼ-ɔ̄ hə ndəŋ kwú bɛ yɔŋ.
11Bɔ̂ŋ chʉ́ʉhə kə́ bíʼtə tʉ ɔŋ mbɔ, “Chìi ka bʉə dàhə nuʼ-Mushi kə́ ghɔ̀ŋ mbɔ Ɛlaja kie ndə mə-fəŋ-gwè ŋkəŋ?”
12Ɔ bə̀ŋhə tʉ bɔŋ mbɔ, “Ndə shʉəŋ, Ɛlaja nɔ kie ndə mə-fəŋ-gwè shʉ̀tə nubə nchəŋnchəŋ-ɛŋ, i bɛ ndyʉndyʉ ndə ntɛhə ndə i kə bɛ hə bəshʉ. Bə bɔŋ nyɔ̀ʼ mu ŋwɔʼnə-Nyii bʉʼka ka ndʉʉmɛ mbɔ Vaa-Woməsʉʉ bu yaʼ nyíɛ ŋgʉəʼ ndə nubə buŋmbi, bə tɛ́ŋ ɔŋ? 13Nɔʼ m̈ɔ bɔŋ shyíi bii mbɔ Ɛlaja nɔ kə gwè, bɔ̂ŋ fɔ̀ʼ nə nɔŋ ndə bɔ̂ŋ kʉ̀ʉ, haʼ ndə bə kə nyɔ̀ʼ mu ŋwɔʼnə-Nyii te ɔ.”
Jiso chʉ́ʼ vaabələŋ ndə ɔ kie lyʉʉhəbʉəbʉəkə mu mbʉə-ɔ
(Matia 17:14-19; Luk 9:37-43a)
14Ndʉʉ ndə bɔ̂ŋ kə gwè bìatə bəbɛʼbə vâafɔʼɔ-bʉə, bɔ̂ŋ nyíɛ nuɔ-bʉə-buŋmbi yə̀ŋhə bɔŋ fúu, bʉə dàhə nuʼ-Mushi kə́ túŋ bəŋʉʉ ghɔŋ bɔŋ. 15Ndʉʉ ndə mbʉ nuɔ-bʉə bənchəŋ kə nyíɛ Jiso, i chàa bɔŋ daa, bɔ̂ŋ nyʉ́ʉ gɛ̀ mbʉə ɔ, gɛ̀ gìe tʉ ɔŋ. 16Ɔ bíʼtə tʉ bɔŋ mbɔ, “Bii tʉʼ túŋ bəŋʉʉ ka bii bɔŋ?”
17Wobɛʼ mu mbʉ nuɔ-bʉə bə̀ŋhə mbɔ, “Chicha, mɔ nɔ gwè nə vaa-ɔŋ tʉ a, bʉʼka ɔ nɔ kie lyʉʉhəbʉəbʉəkə ndə i nɔʼ chìi təmə ɔ kə́ leʼ kwə́ʼ fɛ. 18Ndʉʉtəmiyɔŋ ndə i yá ɔ nɔ, i mɔ̀ʼ ɔ sê, lukə fyùʼ chu-ɔ, ɔ kwó gyʉəʼə-ɛ, mbʉə-e tɛ̀nə. Mɔ nɔʼ fʉ̀ʉtə vâafɔʼɔ-ba mbɔ b̈ɔ̂ŋ jə̀ŋ ɔŋ, bɔŋ bɔ̂ŋ mùutə kəŋkaa.” 19Ɔ bə̀ŋhə tʉ bɔŋ mbɔ, “Oo ŋgwie-bʉə ndə bɔ̂ŋ gòʼ təmə mɔ̀ʼfyiihə-ʉə ndəŋ mɔ fɛ, mɔ kie ndə məbɛ bʉʼʉ ntyʉʉ təka? Mɔ kie ndə məyá fyii-ɔ te nə bii ntyʉʉ təka? B̈ii gwè nə ɔŋ tʉ mɔ.” 20Bɔ̂ŋ gwè nə mbʉ vaa tʉ ɔŋ. Ndʉʉ ndə mbʉ kəlyʉʉhəbʉəbʉə nyíɛ ɔŋ, ɔ mɔ̀ʼ mbʉ vaa sê ndəŋ ŋgɛŋ haʼ ndʉʉmɛ, ɔ gwù sê kə́ kíatə, lukə kə́ fyùʼ chu-ɔ. 21Jiso bíʼtə tʉ tie-e mbɔ, “I nɔʼ chìi nə nɔŋ mənɔ ntyʉʉ təka?” Ɔ bə̀ŋhə mbɔ, “Lʉ̀ hə vaambuɔ. 22Ĩ bɔŋ-nɔ-leʼ chʉʼ mɔ̀ʼ ɔ mu viʼi leʼnə mu muu ndə məyí ɔ. Bɔŋ kaʼ bɛ mbɔ bəkɔ a chìi nukə, ẗʉkə-a vyíi ndəŋ baʼa, ä kwáa baʼa.”
23Jiso bə̀ŋhə mbɔ, “Məghɔ̀ŋ mbɔ, ‘Kaʼ bɛ mbɔ bəkɔ a chìi nukə’? Bəkɔ nubə inchəŋ tòʼ kaʼ wo bɛ́ŋ Nyii.”
24Haʼ ndʉʉmɛ, mbʉ tie-vaa tíi nə ghʉəʼkə#9:24 Bəbɛʼbəŋwɔʼnə kəŋgie-Gili nɔ bìʼ tə shʉmə fyú shʉ-ɔ. ghɔ̀ŋ mbɔ, “Mɔ nɔ bɛ́ŋ, kwáa mɔ təmə mɔ kə́ jínə fɛ!”
25Bɔŋ ndʉʉ ndə Jiso nyíɛ mbɔ nuɔ-bʉə kə́ nyʉ́ʉ ndʉʉ ntyuu, ɔ sɔ́ʼ mbʉ kəlyʉʉhənyaatə kə́ ghɔ̀ŋ mbɔ, “Mbəŋ-aŋ, lyʉʉhəkə ndə ɔ chìi wo ɔ bə̀ŋ chie bɔŋleʼ fʉ̀əŋtə tyunəbə-i, mɔ nɔ tʉʼ kàhə a, fyú hə mbʉə-ɔ, kə a mə leʼnə bìʼ sʉ́ʉ fɛ.” 26Ndʉʉmɛ, ndə mbʉ kəlyʉʉhə tíi, mɔ̀ʼ ɔ sê ndə ŋgɛŋ shʉ́əshʉ́ə, fyú hə mbʉə-ɔ, mbʉ vaa-ghɔ̄ bɛ nə ŋkwu-wo-kə, i chìi bʉə buŋmbi ghɔ̀ŋ mbɔ ɔ la nɔʼ kwú. 27Bɔŋ Jiso yá kwii-i chɔ̀ʼhə ɔŋ ghɔʼ, ɔ lɔ̀ hə sê.
28Ndʉʉ ndə ɔ ŋíi mu njaa, vâafɔʼɔ-bi gwè bíʼtə tʉ ɔŋ bɔ̌ŋbɔ̌ŋ mbɔ, “Chìi ka baʼa jə̀ŋ ɔŋ kəŋkaa?” 29Ɔ bə̀ŋhə tʉ bɔŋ mbɔ, “Bəkɔ fɔkə mə fyúhə ntɛ yɔ̄ŋ-yə fɛ, yaʼkɛŋ nə məgháaNyii.” #9:29 Bəbɛʼbəŋwɔʼnə kəŋgie-Gili nɔ bìʼ məjì muu.
Jiso bìʼ kwə́ʼ te kwu-i
(Matia 17:22-23; Luk 9:43-45)
30Bɔ̂ŋ lɔ̀ hə chɔ tíŋ hə mu Galili, təmə ɔ kʉ̀ʉ mbɔ wo kínə fɛ, 31bʉʼka ɔ nɔ kə́ dàhə vâafɔʼɔ-bi, ghɔ̀ŋ tʉ bɔŋ mbɔ, “Bə bu chɔ̀ʼhə Vaa-Woməsʉʉ kɔ́ mu kəghɔ-bʉə-məsʉʉ, bɔ̂ŋ yi ɔ. Ndʉʉ ndə bə bu yi ɔ, chîbə kʉ̂ʉ tíŋ itia nɔ ɔ bʉ̀nə kóʼ.” 32Bɔŋ təmə bɔ̂ŋ kínə nukə ndə ɔ kə́ gìe fɛ, bɔ̂ŋ fàa ndə məbíʼtə.
Bu bɛ nda bɛ wokwɛʼtəŋ?
(Matia 18:1-5; Luk 9:46-48)
33Ndʉʉ ndə bɔ̂ŋ dàa Kabanu, kʉ̂ʉ bɛ ndʉʉ ndə ɔ bɛ mu njaa, ɔ bíʼtə tʉ bɔŋ mbɔ, “Bii kə kə́ túŋ bəŋʉʉ ndə ka sêfia?” 34Təmə bɔ̂ŋ bə̀ŋhə fɛ, bʉʼka bɔ̂ŋ nɔ kə kə́ túŋ bəŋʉʉ mu bɔŋ te nə wo ndə ɔ bɛ fɔŋ wokwɛʼtəŋ. 35Ɔ dùʼ sê tíi mbʉ vâafɔʼɔ njuɔ bûu nə wuŋ, ghɔ̀ŋ tʉ bɔŋ mbɔ, “Kaʼ wotəmiyɔŋ kə́ kʉ́ʉ bɛ fəŋ, ɔ nɔ kie ndə məbɛ ndyiʼtəkə mu bʉə bənchəŋ, bɔŋleʼ bɛ vaafɔ̀ʼ tʉ bʉə bənchəŋ.” 36Ɔ lʉ̀ vaambuɔ tîetîe tʉ́ʼ ɔ ntəŋntəŋ bɔŋ, kʉ̂ʉ chɔ̀ʼhə mbʉ vaa ghɔʼ ndəŋ kwiitə-i, ghɔ̀ŋ tʉ bɔŋ mbɔ, 37“Wotəmiyɔŋ ndə ɔ lʉ̀ vaambuɔ nə yɔ̄ŋ-yə yie-mɔ, nɔ lʉ̀ mɔ, bɔŋ wotəmiyɔŋ ndə ɔ leʼ lʉ̀ mɔ, lʉ̀ bə mɔ fɛ, ɔ nɔ lʉ̀ wo ndə ɔ tə́ŋ mɔ.”
Wo ndə ɔ gòʼ təmə tɛ́ŋ bʉʼʉ fɛ nɔ bɛ kəvia-bʉʼʉ
(Luk 9:49-50)
38Jɔŋ ghɔ̀ŋ tʉ Jiso mbɔ, “Chicha, baʼa nɔ nyíɛ wobɛʼ, ɔ kə́ jə̀ŋ lyʉʉhəbʉəbʉəbə nə yie-a, baʼa kə́ kɔ̀ɔtə ndə məkɔ́tuu tʉ ɔŋ, bʉʼka ɔ kaa wo nuɔ-yʉʼʉ fɛ.” 39Bɔŋ Jiso bə̀ŋhə mbɔ, “Kə bii mə kɔ́tuu tʉ ɔŋ fɛ, bʉʼka wo kaa ghɔ ndə ɔ tʉʼ fɔ̀ʼ nu-shʉ́əshʉ́ə-bə yie-mɔ ndə bəkɔ ɔ chʉʼ tíi yie-ɔ bʉəbʉə fɛ. 40Bʉʼka mbɔ wo ndə ɔ gòʼ təmə tɛ́ŋ bʉʼʉ fɛ, nɔ bɛ kəvia-bʉʼʉ. 41Bʉʼka ndə ŋgie-shʉəŋ-kə, m̈ɔ shyíi bii mbɔ wotəmiyɔŋ ndə ɔ kɔ́ ndʉ̂ʉ muu tʉ bii ndə mənú bʉʼka Wo ndə Nyii Kùŋ Tə́ŋ, mə bɛ́ kɛŋbə-i fɛ.
Məmùutə wo mbɔ ɔ gwù mu bʉ̂ʼʉ
(Matia 18:6-9; Luk 17:1-2)
42 “Wotəmiyɔŋ ndə ɔ chìi mbyu vaambuɔ tîetîe hə mu vâa-bɔ̄ŋ ndə bɔ̂ŋ bɛ́ŋ mɔ, gwù mu nubə ndə ĩ chìi wo chìi bʉ̂ʼʉ, nɔ bʉ̀ʉ mbɔ b̈ə chyúu lɔkɔʼ tê mii-ɔ, mɛ̀ʼ ɔŋ mu muukwɛʼtəŋmə. 43Bɔŋ kaʼ ghɔkə-a chìi a chìi bʉ̂ʼʉ, ä chʉ̀ə fyúhə mɛ̀ʼ. Bʉʼka i nɔ bʉ̀ʉ tʉ a ndə məbɛ lɛŋ, kie məchímbi təmə liʼ-i ghɔ fɛ, tə chàa ndə məgɛ̀ mu viʼi nə ghɔbə-a ibûu, mu viʼi təmə i mə nə lʉ́əŋnə fɛ, 44[‘kəyəŋ ndə ntyʉəbə-ʉə mə nə kwú fɛ, təmə viʼi-yʉə mə nə lʉ́əŋnə fɛ.’] 45Bɔŋ kaʼ kʉ̀ʼ mbɔ kwii kəwu-a chìi a chìi bʉ̂ʼʉ, ä chʉ̀ə mɛ̀ʼ. Bʉʼka i nɔ bʉ̀ʉ tʉ a ndə məbɛ lɛŋ, kie məchímbi təmə liʼ-i ghɔ fɛ, tə chàa mbɔ a kie wubə-a ibûu gɛ̀ mu viʼi, 46[‘kəyəŋ ndə ntyʉəbə-ʉə mə nə kwú fɛ, təmə viʼi-yʉə mə nə lʉ́əŋnə fɛ.’] 47Bɔŋ kaʼ kʉ̀ʼ mbɔ vaashʉ-a chìi a chìi bʉ̂ʼʉ, ä chʉʼ fyúhə mɛ̀ʼ. I nɔ bʉ̀ʉ tʉ a ndə məŋíi ntoʼ-Nyii nə vaashʉ-a imɔʼ, tə chàa ndə məkie vâabəshʉ ibûu, bə mɛ̀ʼ aŋ mu viʼi, 48‘kəyəŋ ndə ntyʉəbə-i mə nə kwú fɛ, təmə viʼi-i mə nə lʉ́əŋnə fɛ.’ 49Bʉʼka bə bu sùu bʉə bənchəŋ nə viʼi ndə bə kùŋ mbɔʼ nə chʉəʼ le. #9:49 Bəbɛʼbəŋwɔʼnə kəŋgie-Gili nɔ bìʼ Bə bu kùŋ fɔ-fɛ̀ʼndɛŋ-bə inchəŋ nə chʉəʼ. 50Chʉəʼ nɔ bʉ̀ʉ, bɔŋ kaʼ məsʉ́ʼnə-i fyú chɔ, a bu chìi ka chɔ i buŋ leʼ sʉ́ʼnə? Bii nɔ kie ndə məbɛ nə chʉəʼ tʉ ŋwɔŋtə-ii, bɔŋleʼ kie fyiighʉ́ənə mu bii.”
ទើបបានជ្រើសរើសហើយ៖
Mak 9: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.