Matia 22
22
Chəŋkə te nchəŋtə lɔŋ
(Luk 14:15-24)
1Jiso bìʼ kwə́ʼ tʉ bɔŋ ndə chəŋkə kə́ ghɔ̀ŋ mbɔ, 2“Bəkɔ bə fʉ̀ʼ Sɔ́ʼ Fɔŋ Yuo ndə fɔŋ ndə ɔ tʉʼ chìi lɔŋ vaa-ɛ, 3tə́ŋ vâafɔʼɔ-bi ndə məgɛ̀ tíi bʉə ndə bə kə kɔ̀ʼnə bɔŋ ndə mbʉ lɔŋ, təmə bɔ̂ŋ bɛ́ŋ ndə məgwè fɛ. 4Ɔ bìʼ tə́ŋ bəbɛʼbə vâafɔʼɔ, ghɔ̀ŋ tʉ bɔŋ mbɔ, ‘B̈ii gɛ̀ gìe tʉ bʉə ndə bə kə kɔ̀ʼnə bɔŋ mbɔ b̈ii nyíɛ, mɔ nɔʼ shʉ̀tə fɔ-nchəŋtə-bə-ɔŋ liʼ, nɔʼ gwìa yʉʼ bələŋ-naʼa leʼnə yʉʼ vâabələŋ-naʼa yɔ́ʼhə, nɔʼ shʉ̀tə fɔbə inchəŋ tʉ́ʼtə. B̈ii gwè ndə mbʉ nchəŋtə lɔŋ.’ 5Bɔŋ təmə bɔ̂ŋ yʉ́ nukə ndə bɔ̂ŋ tʉʼ gìe fɛ gɛ̀ nə wʉə ndə fɔʼtə-ʉə, ibɛʼ-yə gɛ̀ nə wi mutɔ-ɔ, ibɛʼ-yə gɛ̀ kəyəŋ vyii-ɔ. 6Bəʼkə yá mbʉ vâafɔʼɔ mɔ̀ʼ tʉvyiikə-ʉə, yítə bɔŋ.
7 “Tʉʉ mbʉ fɔŋ byʉ́ʼ, ɔ tə́ŋ bəsɔge-bi, b̈ɔ̂ŋ gɛ̀ yítə mbʉ bʉə ndə bɔ̂ŋ yítə vâafɔʼɔ-bi bɔŋleʼ tɔ̀ŋ mu kəyəŋkwɛʼtəŋ-yʉə. 8Ndʉʉmɛ, ɔ ghɔ̀ŋ tʉ mbʉ vâafɔʼɔ-bi mbɔ, ‘Mbʉ nchəŋtə lɔŋ nɔʼ kʉ̀ʼnə, bɔŋ bʉə ndə bə kɔ̀ʼnə bɔŋ kaa ŋkɛŋ-bʉə-hə fɛ. 9Nɔ, b̈ii gɛ̀ mu tɔʼnə-fia-tə, gɛ̀ kɔ̀ʼnə bʉə bɔ̂ŋ yɔ́ŋ tə bɛ ntyʉʉ ndə bəkɔ b̈ii nyíɛ bɔŋ, b̈ɔ̂ŋ gwè ndə mbʉ lɔŋ.’
10 “Nɔ, mbʉ vâafɔʼɔ fyú gɛ̀ ndə tɔʼnə-fia-tə, gɛ̀ chə̀ŋtə bʉə bənchəŋ ndə bɔ̂ŋ nyíɛ, bɔ̂ŋ gwè ndə mbʉ lɔŋ, bʉə-bʉ̂ʼʉ ghɔŋbə bʉə jyujyu. Mbʉ mu njaakwɛʼtəŋ ndə bə kə́ chìi lɔŋ chɔ lə́ŋ nə bʉə-ŋkɔʼnə. 11Bɔŋ ndʉʉ ndə mbʉ fɔŋ sʉ̀ʉnə mu njaa ndə mənyíɛ mbʉ bʉə-ŋkɔʼnə, ɔ nyíɛ wobɛʼ chɔ ndə ɔ gòʼ təmə mɔ̀ʼ ndyi lɔŋ mbʉə-ɔ fɛ. 12Ɔ bíʼtə tʉ ɔŋ mbɔ, ‘Tieŋkɔŋ-ɔŋ, a sʉ́ʉ mu njaa-fɛ̄ŋ təka təmə kie ndyi lɔŋ fɛ?’ Ɔ byúu ŋgie-gìe-kə. 13Ndʉʉmɛ, mbʉ fɔŋ gìe tʉ vâafɔʼɔ-bi mbɔ, ‘B̈ii kɔ́ʼ kwiitə-i ghɔŋbə fʉəŋtə-i yíɛʼhə ɔŋ mɛ̀ʼ mbi mu kənjəŋ. Kəyəŋ-ghɔ̄, bə bu kə́ gwía chɔ bɔŋleʼ kie mbʉə liŋnə shʉ́əshʉ́ə.’ 14Bʉʼka bə nɔ tíi bʉə buŋmbi bɔŋ bu séʼ mbyuhə məniʼ.”
Məlɔ̀ʼ tashi tʉ Fɔŋ-Luŋ
(Mak 12:13-17; Luk 20:20-26)
15Ndʉʉmɛ, bʉə-Falasi gɛ̀ kə́ fʉ̀ə fiatə ndə məyá Jiso ndəŋ kwəʼ-ɛ. 16Bɔ̂ŋ tə́ŋ vâafɔʼɔ-bʉə tʉ ɔŋ ghɔŋbə bəbɛʼbʉə-nuɔ-Hɛlo, ghɔ̀ŋ mbɔ, “Chicha, baʼa nɔ kínə mbɔ a nɔ bɛ wo-kəŋgie-shʉəŋ, kə́ dàhə fia-Nyii nə shʉəŋ, təmə kə́ fàa shʉ-wo fɛ, bʉʼka a kyinə kə́ lɛ́nə ntɛ-wo-hə fɛ. 17Shyíi baʼa nə nukə ndə a kwɔ̀ʼtə mbɔ i kʉ̀ʼnə. Nuʼ bɛ́ŋ mbɔ b̈ə lɔ̀ʼ tashi tʉ Fɔŋ-Luŋ mɛ, kə mbee?” 18Bɔŋ Jiso kínə ŋkwɔʼtə bʉəbʉə ndə bɔ̂ŋ kie, ɔ ghɔ̀ŋ tʉ bɔŋ mbɔ, “Bii tʉʼ mùutə mɔ mbuka, bʉə làhə shʉ? 19B̈ii dʉ̀ʼ mbyu kyʉə tʉ mɔ ndə b̃ə mɔ̀ʼ tashi bʉə-Luŋ nə yɔŋ.” Bɔ̂ŋ gwè nə mbyu kyʉə ndə bə kə́ lɔ̀ʼ fɔʼɔ kəchîmbi nə yɔŋ. 20Jiso bíʼtə tʉ bɔŋ mbɔ, “Bɛ ŋkwutə-kətʉ-nda-kə leʼnə yie nda ndəŋ ghɔ?”
21Bɔ̂ŋ bə̀ŋhə mbɔ, “Yi-Fɔŋ-Luŋ-yə.” Ɔ ghɔ̀ŋ tʉ bɔŋ mbɔ, “B̈ii kɔ́ fɔ-Fɔŋ-Luŋ-bə tʉ Fɔŋ-Luŋ, kɔ́ yi-Nyii-yə tʉ Nyii.” 22Ndʉʉ ndə bɔ̂ŋ yʉ́ yɔ̄ŋ-yə, i chíe chu-yʉə, bɔ̂ŋ lɔ̀ mɛ̀ʼtə ɔŋ gɛ̀ nə wʉə.
Kwəʼ te məbʉ̀nə kóʼ
(Mak 12:18-27; Luk 20:27-40)
23Kʉ̂ʉ bɛ haʼ yɔ̂ŋ-ghɔ̄, bʉə-Sadusi-bɛʼbə ndə bɔ̂ŋ tɛ́ŋ mbɔ məbʉ̀nə kóʼ bɛ ghɔ fɛ, gwè tʉ Jiso nə mbyu mbiʼtə 24kə́ ghɔ̀ŋ mbɔ, “Chicha, Mushi nɔ nə ghɔ̀ŋ mbɔ kaʼ wo kwú təmə kie vâa fɛ, liŋ-iŋ nɔ kie mə-yaʼ-lʉ̀ mbʉ woke bí vâa chɔ yie-mbʉ-ŋkwu-liŋ-iŋ. 25Nduɔ, vâabələŋbɛʼbə nɔ nə bɛ chu ŋkwê-bɔŋ təkwiitia mu bʉʼʉ. Fəŋ lɔŋ woke kwú təmə kie vâa fɛ, mɛ̀ʼtə vi-i tʉ liŋ-iŋ. 26Ï bɛ haʼ nɔ tʉ ntyunə-bɔ̌ŋ-kə-i, leʼnə ntyunə-kəntyunə-kə-i tə bɔ̂ŋ mì təkwiitia. 27Kəliʼ, mbʉ woke kwú ghɔ. 28Bu yi bɛ chîkə ndə bʉə ndə bɔ̂ŋ nɔʼ kwútə bu bʉ̀nə kóʼ nɔ, ɔ bɛ vi nda mu bɔŋ? Bʉʼka bɔ̂ŋ bənchəŋ nɔʼ kə lʉ̀ ɔ.”
29Jiso bə̀ŋhə tʉ bɔŋ mbɔ, “Bii nɔʼ fyùu, bʉʼka bii kínə nukə ndə ŋwɔʼnə-Nyii ghɔ̀ŋ fɛ, təmə bɔŋleʼ kínə ghʉəʼ-Nyii-kə fɛ. 30Bʉʼka kʉ̂ʉ yi bɛ ndʉʉ ndə bʉə bu yi bʉ̀nə kóʼ nɔ, bɔ̂ŋ kʉʉ yi kə́ gɛ̀ lɔŋ fɛ, təmə bɔ̂ŋ bɔŋ kʉʉ yi leʼ kə́ kɔ́ vâa lɔŋ fɛ, bɔ̂ŋ bɔŋ bu yi leʼ bɛ nə bʉəntəŋNyii ndə bɔ̂ŋ bɛ yuo. 31Bɔŋ ndə məkwə́ʼ te məbʉ̀nə kóʼ bʉə ndə bɔ̂ŋ nɔʼ kwútə, bii chʉʼ kə tíi nukə ndə Nyii kə ghɔ̀ŋ tʉ bii mu ŋwɔʼnə-i mbɔ, 32‘Mɔ nɔ bɛ Nyii-Ablahaŋ, kə́ bɛ Nyii-Aisi, bɔŋ-kə́-leʼ bɛ Nyii-Jakɔ’ fe? Ɔ kaa Nyii-bəŋkwusê fɛ, ɔ nɔ bɛ Nyii-bʉə ndə bɔ̂ŋ bíe ŋɛnə.” 33Ndʉʉ ndə mbʉ nuɔ-bʉə yʉ́ yɔ̄ŋ-yə, i chàa bɔŋ ndə ntɛ ndə ɔ kə́ dàhə.
Ŋkahəkwɛʼtəŋ
(Mak 12:28-34; Luk 10:25-28)
34Ndʉʉ ndə bʉə-Falasi kə yʉ́ mbɔ Jiso nɔʼ chíe chu bʉə-Sadusi, bɔ̂ŋ chə̀ŋtə kəyəŋ kəmɔʼ. 35Mbyu wobɛʼ mu bɔŋ, ndə ɔ bɛ wo dàhə nuʼ-Mushi, bíʼtə mbyu kənu tʉ ɔŋ ndə məyúotə ɔŋ mbɔ, 36“Chicha, bɛ yɔ̄ŋ-yə ŋkahə bɛ yikwɛʼtəŋ-yə mu nuʼ-Mushi?”
37Jiso bə̀ŋhə tʉ ɔŋ mbɔ, “A nɔ kie ndə məkʉ̀ʉ Nyii Tiekətʉ-a nə fyii-a inchəŋ, nə lyʉʉhəkə-a inchəŋ leʼnə ndaahə-a inchəŋ. 38Yɔ̄ŋ-yə nɔ bɛ ŋkahəkwɛʼtəŋ bɔŋleʼ kə́ bɛ fəŋ. 39Biitəkə kə́ bɛ haʼ nə yɔŋ ndə i ghɔ̀ŋ mbɔ a nɔ kie ndə məkʉ̀ʉ wo-kətoʼ-a ndə a kʉ̀ʉ ŋwɔŋ-aŋ. 40Nukə ndə nuʼ-Mushi kə dàhə ghɔŋbə bʉəyʉkəŋgieNyii bənchəŋ nɔ yʉ́əʼnə ndəŋ bəŋkahə-bɔ̄ŋ ibûu nɔ.”
Mbʉ Wo ndə Nyii Kùŋ Tə́ŋ bɛ vaa nda?
(Mak 12:35-37; Luk 20:41-44)
41Ndʉʉ ndə mbʉ bʉə-Falasi kə chə̀ŋtə kəyəŋ kəmɔʼ, Jiso bíʼtə tʉ bɔŋ mbɔ, 42“Bii kwɔ̀ʼtə mbuka te mbʉ Wo ndə Nyii Kùŋ Tə́ŋ? Ɔ bɛ vaa nda?” Bɔ̂ŋ ghɔ̀ŋ tʉ ɔŋ mbɔ, “Vaa-Dɛbi.”
43Ɔ ghɔ̀ŋ tʉ bɔŋ mbɔ, “Bɔŋ nɔ nə chìi ka LyʉʉhəNyiikə chóʼ Dɛbi ndə mətíi ɔ nə Tiekətʉ, ghɔ̀ŋ mbɔ,
44 ‘Mbʉ Tiekətʉ nɔ nə ghɔ̀ŋ tʉ Tiekətʉ-ɔ mbɔ,
“Dùʼ kwiiləŋ-mɔ,
tə mɔ yi mɔ̀ʼ bʉə-bàa-ba sê bəshʉ a” ’? # 22:44 Ŋwɔʼnə-təLyuu 110:1.
45 Kaʼ Dɛbi tíi ɔ nə Tiekətʉ, bəkɔ ɔ bʉ̀nə bɛ vaa-ɛ təka?”
46Təmə wo bɛ ghɔ ndə məbyʉ̀hə ŋgiekə tʉ ɔŋ fɛ byuunɔ lʉ̀ hə yɔ̂ŋ-ghɔ̄, wo leʼnə mùutə bíʼtə nukə tʉ ɔŋ fɛ.
ទើបបានជ្រើសរើសហើយ៖
Matia 22: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
