Matia 17

17
Jiso bə̀ŋ ndə mədʉ̀ʼ məŋwɔʼmə-i
(Mak 9:2-13; Luk 9:28-36)
1Chîbə kʉ̂ʉ tíŋ ntʉʼʉ Jiso lʉ̀ Bita, Jɛŋ leʼnə Jɔŋ liŋ-iŋ ghɔŋ bɔŋ kóʼ gɛ̀ ndəŋ kwɔŋ ndə i də̀ʼ ghɔʼ, gɛ̀ bɛ chɔ tətɛʼ bɔŋ. 2Ɔ bə̀ŋ bəshʉ bɔŋ, mbe-shʉ-i kə́ báa nə chichi, ndyihə-i báa kə́ fyùʼ nə chisuu. 3Kə kwɔnə nyíɛ, Mushi ghɔŋ Ɛlaja fyú kə́ kwə́ʼ ghɔŋbə Jiso.
4Bita ghɔ̀ŋ tʉ Jiso mbɔ, “Tiekətʉ, i nɔ bʉ̀ʉ ndə bâʼa bɛ fɛ̄ŋ nɔ. Kaʼ a kʉ̀ʉ, mɔ fʉ̀ə lɛʼbə fɛ̄ŋ itia, imɔʼ tʉ a, imɔʼ tʉ Mushi leʼnə imɔʼ tʉ Ɛlaja.”
5Ndə ɔ kə́ bíe kwə́ʼ, kə́ nyíɛ, mbɔʼ-leʼnə-kə kwóhə bɔŋ, gyʉʉ gìe mu mbʉ kəmbɔʼ mbɔ, “Nɔ bɛ mbʉətə vaa-ɔŋ nɔ ndə mɔ kʉ̀ʉ, fyii-ɔ nɔ bʉ̀ʉ ndəŋ ɔŋ, b̈ii yʉ́ chu-i.” 6Ndʉʉ ndə mbʉ vâafɔʼɔ kə yʉ́ yɔ̄ŋ-yə, bɔ̂ŋ gwùtə nə shʉtə-ʉə sê, faa-kwu-kə yá bɔŋ shʉ́əshʉ́ə.
7Bɔŋ Jiso gwè kə̀ŋ bɔŋ, ghɔ̀ŋ mbɔ, “B̈ii lɔ̀ hə sê, kə bii mə leʼ fàa fɛ.” 8Ndʉʉ ndə bɔ̂ŋ bə̀ŋhə shʉtə-ʉə sê, təmə bɔŋleʼ nyíɛ wo fɛ yaʼkɛŋ Jiso tətɛʼ ɔ.
9Ndə bɔ̂ŋ kə́ shíʼ ndəŋ mbʉ kwɔŋ, Jiso kàhə bɔŋ mbɔ, “Kə bii mə shyíi wo nə nukə ndə b̈ii nyíɛ fɛ, tə Vaa-Woməsʉʉ yi bʉ̀nə kóʼ ndəŋ kwú.”
10Ndʉʉmɛ, vâafɔʼɔ-bi bíʼtə tʉ ɔŋ mbɔ, “Ndʉʉmɛ, chìi ka bʉə dàhə nuʼ-Mushi kə́ ghɔ̀ŋ mbɔ Ɛlaja kie ndə mə-fəŋ-gwè ŋkəŋ?”
11Ɔ bə̀ŋhə mbɔ, “Ɛlaja nɔ kie ndə mə-fəŋ-gwè shʉ̀tə nubə nchəŋnchəŋ-ɛŋ i bɛ ndyʉndyʉ ndə ntɛhə ndə i kə bɛ hə bəshʉ. 12Nɔʼ m̈ɔ bɔŋ shyíi bii mbɔ Ɛlaja nɔʼ kə gwè, təmə bɔ̂ŋ chèʼnə ɔŋ fɛ, bɔ̂ŋ fɔ̀ʼ nə nɔŋ ndə bɔ̂ŋ kʉ̀ʉ. Nɔ bɛ haʼ nɔ ndə Vaa-Woməsʉʉ kie ndə mə-yaʼ-nyíɛ ŋgʉəʼ kəghɔ-bɔŋ.” 13Ndʉʉmɛ, mbʉ vâafɔʼɔ kínə yʉə-yə mbɔ ɔ nɔ kə́ kwə́ʼ tʉ bɔŋ te Jɔŋ ndə ɔ̃ kɔ́ muu.
Jiso chʉ́ʼ vaabələŋbɛʼ ndə lyʉʉhəbʉəbʉəkə kə́ chɔ́ŋhə ɔŋ
(Mak 9:14-29; Luk 9:37-43a)
14Ndʉʉ ndə bɔ̂ŋ kə gwè bìatə mbʉ nuɔ-bʉə, wobɛʼ kwɛ̀ʼtə gwè mbʉə ɔ, kʉ̂ʉ bè kweʼtəbə-i bəshʉ ɔ, 15ghɔ̀ŋ mbɔ, “Tiekətʉ, kə ẗʉkə-a vyíi ndəŋ vaa-ɔŋ vaabələŋ, bʉʼka mbɔ ŋgwukə nɔ kə bɛ mbʉə-ɔ, ɔ bɔŋ-kə́-leʼ nyíɛ ŋgʉəʼ daa. Ɔ̃ nɔ chʉʼ gwù mu viʼi bɔŋleʼ gwù mu muu təvɛʼtəvɛʼ. 16Mɔ bɔŋ gwè nə nɔŋ tʉ vâafɔʼɔ-ba, bɔ̂ŋ chʉ́ʼ ɔ kəŋkaa.” 17Jiso bə̀ŋhə mbɔ, “Oo ŋgwie-bʉə ndə bɔ̂ŋ gòʼ təmə mɔ̀ʼfyiihə-ʉə ndəŋ mɔ fɛ, bɔŋleʼ kie mənaa, mɔ kie ndə məbɛ bʉʼʉ ntyʉʉ təka? Mɔ kie ndə məyá fyii-ɔ te bii ntyʉʉ təka? B̈ii gwè nə nɔŋ tʉ mɔ fɛ̄ŋ.” 18Jiso sɔ́ʼ mbʉ kəlyʉʉhəbʉəbʉə, ɔ fyú hə mbʉə mbʉ vaa-ghɔ̄, ɔ kie nchʉʼ haʼ ndʉʉghɔfii.
19Ndʉʉmɛ, mbʉ vâafɔʼɔ gwè tʉ Jiso bɔ̌ŋbɔ̌ŋ, bíʼtə tʉ ɔŋ mbɔ, “Chìi ka baʼa jə̀ŋ ɔŋ kəŋkaa?”
20Ɔ ghɔ̀ŋ tʉ bɔŋ mbɔ, “Bʉʼka bii mɔ̀ʼfyiihə-ii ndəŋ mɔ məniʼ. M̈ɔ shyíi bii nə shʉəŋ mbɔ kaʼ məmɔʼfyiihə-ii ndəŋ mɔ kʉ̂ʉ buŋ tə́ʼ tə bɛ nə ŋgwie-kîa, bəkɔ bii ghɔ̀ŋ tʉ kwɔŋ-ɔ̄ŋ mbɔ, ‘Lɔ̀ hə fɛ̄ŋ gɛ̀ fīi,’ i bɔŋ lɔ̀, nubɛʼkə yi shʉ́ə chàa bii fɛ.” 21[Bɔŋ yɔ̄ŋ-yə ntɛ kəlyʉʉhəbʉəbʉə mə fyú fɛ yaʼkɛŋ nə məgháaNyii leʼnə məjì muu.]
Jiso bìʼ bú kwu-i
(Mak 9:30-32; Luk 9:43-45)
22Ndə bɔ̂ŋ kə́ chə̀ŋtə Galili, Jiso ghɔ̀ŋ tʉ bɔŋ mbɔ, “Bə nɔ tʉʼ gwè chɔ̀ʼhə Vaa-Woməsʉʉ kɔ́ mu kəghɔ-bʉə-məsʉʉ, 23bɔ̂ŋ yí ɔ, kʉ̂ʉ bɛ chîbə itia nɔ, ɔ bʉ̀nə kóʼ.” Bɔ̂ŋ vínə daa.
Məlɔ̀ʼ tashi njaafɛ̀ʼndɛŋ
24Ndʉʉ ndə bɔ̂ŋ gwè dàa Kabanu, bʉə ndə bɔ̂ŋ kə́ fí tashi#17:24 Tashi-ɔ nɔ bɛ kyʉə ndə wotəmiyɔŋ kə́ lɔ̀ʼ ndə tʉ-ŋgʉʼʉmbi-kə, vaabələŋ lʉ̀ hə ndə ŋgʉʼhə wuŋ bûu ndə mətɔ́ŋ fɔ̀ʼ mu njaafɛ̀ʼndɛŋNyii nə yɔŋ. mu njaafɛ̀ʼndɛŋNyii gwè tʉ Bita, bíʼtə tʉ ɔŋ mbɔ, “C̃hicha-a lɔ̀ʼ mbʉ tashi-ghɔ̄ fe?” 25Ɔ ghɔ̀ŋ mbɔ, “Ɔŋ.” Ndʉʉ ndə ɔ ŋíi mu njaa, Jiso fəŋ kwə́ʼ tʉ ɔŋ ghɔ̀ŋ mbɔ, “A kwɔ̀ʼtə mbuka Samu? B̃əfɔŋ kəwʉʉnəmbi-bɔ̄ŋ fí lɔʼɔ-fia-bə, byuunɔ tashi, hə kəghɔ bənda? Hə kəghɔ-vâabələŋ-bi mɛ, kə hə kəghɔ bəntoʼŋgwe?”
26Ndʉʉ ndə ɔ kə ghɔ̀ŋ mbɔ, “Kəghɔ-bəntoʼŋgwe.” Jiso bə̀ŋhə mbɔ, “I dʉ̀ʼ mbɔ mbʉ vâabələŋ-bi kie ndə mə lɔ̀ʼ fɛ. 27Bɔŋ ndə məchìi təmə tʉʉ bʉə-bɔ̄ŋ byʉ́ʼ fɛ, lʉ̀ sɔʼnduɔŋ gɛ̀ mɔ̀ʼ mu taanə-kəghəŋ-kə. Fəŋ mbɔʼ ndə a yá, ndʉʉ ndə a bu ŋɔ́ʼhə chu-i nɔ, a bu nyíɛ kyʉə mu chu-ɔ ndə bəkɔ i lɔ̀ʼ tashi-a ghɔŋ yɔŋ-yə. Fyúhə gɛ̀ kɔ́ tʉ bɔŋ yie-baʼa.”

ទើបបានជ្រើសរើសហើយ៖

Matia 17: bvm

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល