Jɔŋ 7
7
Jiso ghɔŋbə bəliŋ-bi bələŋ
1Nubə-ɔ̄ŋ kʉ̂ʉ tíŋ, Jiso kə́ tòʼ mu Galili lɔ̀ hə ndə mu lɔʼɔ imɔʼ gɛ̀ ndə ibɛʼ-yə. Ɔ kə kʉ̀ʉ ndə mətòʼ mu Judia fɛ bʉʼka bəntəŋbəshʉ-bʉə-Juu nɔ kə́ kʉ́ʉ yí ɔ. 2Bɔŋ ndʉʉ ndə bʉə-Juu yú Nchəŋtə-Bəlɛʼ chɔ nɔ kə́ kə́ŋhə gwè, 3ndʉʉmɛ, bəliŋ-bi bələŋ ghɔ̀ŋ tʉ ɔŋ mbɔ, “Lɔ̀ hə fɛ̄ŋ gɛ̀ Judia, vâafɔʼɔ-ba chʉʼ nyíɛ nubə ndə a tʉʼ fɔ̀ʼ ghɔ. 4Bʉʼka wo kyinə chìi nubə ndə bə kie ndə məkínə bənchəŋ, kə́ lə̀ŋlə̀ŋ fɛ. Kaʼ a kə́ chìi nubə-ɔ̄ŋ, chìi wʉʉnəmbikə kínə aŋ bənchəŋ.” 5Bʉʼka buŋ bəliŋ-bi bələŋ kə bɛ́ŋ ɔŋ fɛ.
6Jiso ghɔ̀ŋ tʉ bɔŋ mbɔ, “Ndʉʉ-ɔ chʉʼ kʉ̀ʼnə fɛ, bɔŋ ndʉʉtəmiyɔŋ nɔ kʉ̀ʼnə tʉ bii. 7Wʉʉnəmbikə mə bàa bii fɛ bɔŋ i nɔ bàa mɔ, bʉʼka mɔ nɔ tʉʼ kwə́ʼ te wʉʉnəmbikə, kə́ chìi bə kə́ kínə mbɔ fɔʼtə-i nɔ bɛ bʉəbʉə. 8B̈ii kóʼ gɛ̀ ndəŋ mbʉ nchəŋtə, mɔ kʉʉ nɔʼ gɛ̀ ndəŋ nchəŋtə-ɔ̄ŋ fɛ, bʉʼka ndʉʉ-ɔ chʉʼ shʉ̀tə kʉ̀ʼnə fɛ.” 9Ndʉʉ ndə ɔ gìe yɔ̄ŋ-yə liʼ, ɔ káa mu Galili.
Jiso dàhə mu njaafɛ̀ʼndɛŋNyii təmə kə́ líilíi fɛ
10Bɔŋ ndʉʉ ndə bəliŋ-bi bələŋ nɔʼ kə kóʼ gɛ̀ ndə mbʉ nchəŋtə, ɔ kóʼ gɛ̀ mu bəliinə təmə gɛ̀ ŋgwʉʉnə fɛ. 11Mbʉ bəntəŋbəshʉ-bʉə-Juu kə́ kʉ́ʉ ɔ ndəŋ mbʉ nchəŋtə kə́ bíʼtə mbɔ, “Ɔ ba?” 12Bʉə buŋmbi nɔ nə kə́ luŋtə te ɔ. Ndə bəbɛʼbʉə kə́ ghɔ̀ŋ mbɔ, “Ɔ nɔ bɛ wo jyujyu,” bəbɛʼbə kə́ ghɔ̀ŋ mbɔ, “Mbee, ɔ nɔ tʉʼ fə́ʼhə bʉə fə́ʼhə.” 13Bɔŋ bʉʼka bə kə́ fàa bəntəŋbəshʉ-bʉə-Juu təmə wo kə́ tíi yie-e ntaa fɛ.
14Mbʉ nchəŋtə kʉ̂ʉ gɛ̀ tə kə́ dàa ntəŋntəŋ ghɔ, Jiso kóʼ gɛ̀ mu chunjaafɛ̀ʼndɛŋNyii chʉ́ʉhə kə́ dàhə. 15I chàa bəntəŋbəshʉ-bʉə-Juu, bɔ̂ŋ kə́ bíʼtə mbɔ, “Wo-ɔ̄ kínə ŋwɔʼnə təka mənɔ, təmə nɔʼ nə yétə fɛ?”
16Jiso bə̀ŋhə tʉ bɔŋ mbɔ, “Nubə ndə mɔ tʉʼ dàhə kaa yɔŋ-yə fɛ, nɔ bɛ yi-wo-yə ndə ɔ tə́ŋ mɔ. 17Wotəmiyɔŋ ndə ɔ séʼ ndə məfɔ̀ʼ ŋkʉʉnə-tʉʉ-Nyii bu kínə mbɔ mbʉ kənu ndə mɔ tʉʼ dàhə lɔ̀ hə kəghɔ-Nyii mɛ, kə mɔ tʉʼ dàhə nə yɔŋ-yə ghʉəʼkə. 18W̃o ndə ɔ tʉʼ kwə́ʼ nə yi-yə ghʉəʼkə, nɔ kʉ́ʉ bə yi-yə məgʉ́ə, bɔŋ wo ndə ɔ tʉʼ kʉ́ʉ məgʉə-w̃o ndə ɔ tə́ŋ ɔŋ, nɔ gìe shʉəŋ, təmə nu-mbii-bə bɛ mu ɔŋ fɛ. 19Mushi chʉʼ kə kɔ́ nuʼ tʉ bii fe? Bɔŋ təmə mbyu wo mu bii bɔŋ kə́ tʉ́ʼ mbʉ nuʼ fɛ. Bii tʉʼ kʉ́ʉ yí mɔ mbuka?”
20Mbʉ nuɔ-bʉə bə̀ŋhə mbɔ, “A nɔ kie lyʉʉhəbʉəbʉəkə! Tʉʼ kʉ̀ʉ nda ndə məyí a?”
21Jiso bə̀ŋhə tʉ bɔŋ mbɔ, “Mɔ nɔʼ fɔ̀ʼ mbyu kənu imɔʼ i chíe chutə-ii bənchəŋ. 22Mushi nɔ nə kàhə bii ndə mə-kə́-fɔ̀ʼ vâa-bii, (kaa mbɔ i kə chʉ́ʉhə kəghɔ-ɔ fɛ, i nɔ nə chʉ́ʉhə kəghɔ-bətietie-bii), nɔ bii kə́ fɔ̀ʼ wo ndəŋ Chîlɔʼkə. 23Kaʼ bə fɔ̀ʼ wo ndəŋ Chîlɔʼkə ndə mətʉ́ʼ nuʼ-Mushi, chìi ka bii kə́ bàa tʉʉtə-ii tʉ mɔ bʉʼka mɔ chʉ́ʼ ŋkwê-mbʉə-wo inchəŋ ndəŋ Chîlɔʼkə? 24Kə bii mə kə́ chʉ̀ə ŋkwɛ bə ndə nukə ndə b̈ii nyíɛ ndə wo chìi fɛ, b̈ii kə́ chʉ̀ə ŋkwɛ ndə ntɛ ndə i kʉ̀ʼnə ndə məchʉ̀ə ŋkwɛ.”
Jiso bɛ mbʉ Wo ndə Nyii Kùŋ Tə́ŋ mɛ?
25Ndʉʉmɛ bəbɛʼbʉə Jɛlosalɛŋ kə́ ghɔ̀ŋ mbɔ, “Kaa wo nɔ ndə bə tʉʼ kʉ́ʉ ɔ ndə məyí le fe? 26Ɔ kə́ tə́nə fɛ̄ŋ kwə́ʼ ŋgwʉʉnə, təmə wo kə́ bíʼtə nukə tʉ ɔŋ fɛ! Bəkɔ bəntəŋbəshʉ kɛŋ kínə mbɔ bɛ mbʉ Wo ndə Nyii Kùŋ Tə́ŋ nɔ mɛ? 27Bɔŋ baʼa bɔŋ kínə yəŋkə ndə wo-ɔ̄ lɔ̀ hə chɔ, bɔŋ ndʉʉ ndə mbʉ Wo ndə Nyii Kùŋ Tə́ŋ bu yi gwè nɔ, wo kínə yəŋkə ndə ɔ gwè hə chɔ fɛ.”
28Ndʉʉmɛ, ndə Jiso kə́ dàhə mu chunjaafɛ̀ʼndɛŋNyii, ɔ kə́ lɔ̀ʼ tʉ bɔŋ mbɔ, “Bii nɔ kínə mɔ, kínə yəŋkə ndə mɔ lɔ̀ hə chɔ. Mɔ bɔŋ gwè nə yɔŋ-yə ghʉəʼkə fɛ, wo ndə ɔ tə́ŋ mɔ nɔ bɛ wo-kəŋgie-shʉəŋ, təmə bii bɔŋ kínə ɔŋ fɛ. 29Mɔ bɔŋ kínə ɔŋ bʉʼka mɔ nɔ gwè hə kəghɔ-ɔ, tə́ŋ ɔŋ tə́ŋ mɔ.” 30Ndʉʉmɛ, bɔ̂ŋ kə́ kʉ̂ʉ ndə məyá ɔ, bɔŋ təmə wo mɔ̀ʼ ghɔkə ndəŋ ɔŋ fɛ bʉʼka ndʉʉ-i chʉʼ kə kʉ̀ʼnə fɛ.
31Bɔŋ bʉə buŋmbi mu mbʉ nuɔ-bʉə bɛ́ŋ ɔŋ, kə́ ghɔ̀ŋ mbɔ, “Ndʉʉ ndə Wo ndə Nyii Kùŋ Tə́ŋ bu yi gwè nɔ, ɔ chìi nubəcheʼbə tə i chàa yi-yə ndə wo-ɔ̄ nɔʼ chìi mɛ?”
32Bʉə-Falasi yʉ́ ndə mbʉ nuɔ-bʉə tʉʼ luŋtə nubə-ɔ̄ŋ mu bɔŋ te ɔ, bətiefɛ̀ʼndɛŋNyii leʼnə bʉə-Falasi tə́ŋ bənchyii mu njaafɛ̀ʼndɛŋNyii ndə məgɛ̀ yá ɔ. 33Jiso ghɔ̀ŋ tʉ bɔŋ mbɔ, “Mɔ bu bɛ bʉʼʉ mɔʼɔ məniʼ ndʉʉmɛ mɔ gɛ̀ nyíɛ wo ndə ɔ tə́ŋ mɔ. 34Bii bu kʉ́ʉ mɔ, təmə bɔŋ nyíɛ mɔ fɛ. Yəŋkə ndə mɔ bu bɛ chɔ, bii mə gwè chɔ fɛ.”
35Mbʉ bəntəŋbəshʉ-bʉə-Juu kə́ gìe tʉ ŋwɔŋtə-ʉə mbɔ, “Wo-ɔ̄ tʉʼ kwɔ̀ʼtə mbɔ ɔ bu gɛ̀ fa təmə bʉʼʉ mə nyíɛ ɔŋ fɛ? Ɔ tʉʼ kʉ́ʉ ndə məgɛ̀ bìatə bʉə-bʉʼʉ ndə bɔ̂ŋ nɔʼ wɔ̀ʼnə, bɛ mu bʉə ndə bɔ̂ŋ gòʼ təmə bɛ bʉə-Juu fɛ, ndə mə-kə́-dàhə bʉə ndə bɔ̂ŋ gòʼ təmə bɛ bʉə-Juu fɛ mɛ? 36Yɔ̄ŋ-yə bɛ mbuka ndə ɔ tʉʼ ghɔ̀ŋ mbɔ, ‘Bii bu kʉ́ʉ mɔ təmə nyíɛ fɛ,’ bɔŋleʼ kə́ ghɔ̀ŋ mbɔ, ‘Yəŋkə ndə mɔ bu bɛ chɔ, bii mə gwè chɔ fɛ’?”
Jiso kɔ̀ʼnə ndə məkɔ́ muu ndə ĩ kɔ́ məchímbi
37Kʉ̂ʉ bɛ ndyiʼtə-kəchî-nchəŋtə-kə, mbʉ kəchîkwɛʼtəŋ, Jiso lɔ̀ hə sê tíi nə gyʉʉ dədə ghɔ̀ŋ mbɔ, “Kaʼ jyʉʉ muu yɔ́ʼ wotəmiyɔŋ, ɔ̈ gwè tʉ mɔ, nú. 38Wotəmiyɔŋ ndə ɔ bɛ́ŋ mɔ, ndə ŋwɔʼnə-Nyii nɔʼ ghɔŋ, ‘Ŋgwɛŋ ndə m̃uu-mi kɔ́ məchímbi bu fyú hə mu fyii-ɔ kə́ kè.’ ” 39Ɔ nɔ kə́ gìe yɔ̄ŋ-yə te LyʉʉhəNyiikə, ndə bʉə ndə bɔ̂ŋ bɛ́ŋ ɔŋ kie ndə məkie, bʉʼka bə chʉʼ kə kɔ́ mbʉ kəLyʉʉhəNyii fɛ, bʉʼka Jiso chʉʼ kə ŋíi mu məŋwɔʼmə-i fɛ.
Mbʉ bʉə wɔ̀ʼnə bʉʼka Jiso
40Ndʉʉ ndə bɔ̂ŋ kə yʉ́ ŋgiebə-ɔ̄ŋ, bəbɛʼbʉə ghɔ̀ŋ mbɔ, “Nɔ bɛ ŋkɛŋ mbʉ YʉkəŋgieNyii nɔ.” 41Bəbɛʼbə kə́ ghɔ̀ŋ mbɔ, “Nɔ bɛ mbʉ Wo nɔ ndə Nyii Kùŋ Tə́ŋ.” Bɔŋ bəbɛʼbə kə́ ghɔ̀ŋ mbɔ, “Mbʉ Wo ndə Nyii Kùŋ Tə́ŋ kə kie ndə məgwè hə Galili mɛ? 42Ŋwɔʼnə Nyii kə ghɔ̀ŋ mbɔ mbʉ Wo ndə Nyii Kùŋ Tə́ŋ bu bɛ ŋgwie Dɛbi fe, bə bí ɔ Bɛtələhɛŋ mu lɔʼɔ ndə Dɛbi kə́ chí chɔ fe?” 43Ndʉʉmɛ, mbʉ bʉə wɔ̀ʼnə bʉʼka ɔ. 44Bəbɛʼbʉə kə́ kʉ́ʉ ndə məyá ɔ, bɔŋ təmə wo kia mɔ̀ʼ ghɔkə ndəŋ ɔŋ fɛ.
45Ndʉʉ ndə mbʉ bənchyii mu njaafɛ̀ʼndɛŋNyii bʉ̀nə gwè, mbʉ bətiefɛ̀ʼndɛŋNyii leʼnə mbʉ bʉə-Falasi bíʼtə tʉ bɔŋ mbɔ, “Chìi ka təmə bii gwè nə nɔŋ fɛ?”
46Mbʉ bənchyii bə̀ŋhə mbɔ, “Wo kaa ghɔ ndə ɔ nɔʼ nə kwə́ʼ ndə wo-ɔ̄ fɛ!” 47Mbʉ bʉə-Falasi bə̀ŋhə tʉ bɔŋ mbɔ, “Ɔ nɔ̂ʼ fə́ʼhə bii ghɔ mɛ? 48Bii kínə mbyu wokwɛʼtəŋ imɔʼ byuunɔ mbyu wo-Falasi imɔʼ ndə ɔ nɔʼ nə bɛ́ŋ ɔŋ mɛ? 49Nuɔ bʉə-bɔ̄ŋ ndə bɔ̂ŋ gòʼ təmə kínə nuʼ-Mushi fɛ nɔ, ndɔŋ nɔ ndəŋ bɔŋ.”
50Nikodemu ndə ɔ nɔʼ kə fəŋ gɛ̀ tʉ ɔŋ bɔŋ-kə́-leʼ bɛ mbyu wo mu bɔŋ, ghɔ̀ŋ tʉ bɔŋ mbɔ, 51“Nuʼ-yʉʼʉ bɛ́ŋ mbɔ b̈ə kwɛ̀ fɛʼɛ wo təmə nɔʼ fəŋ yʉ́ kəghɔ-ɔ, tyúutə nukə ndə ɔ nɔʼ chìi fɛ mɛ?” 52Bɔ̂ŋ bə̀ŋhə mbɔ, “A lɔ̀ haʼ hə Galili ghɔ mɛ? Kʉ́ʉ mu ŋwɔʼnə-Nyii, a bu nyíɛ mbɔ yʉkəŋgieNyii kaa ghɔ ndə ɔ fyú hə mu Galili fɛ.” [Bəbɛʼbəŋwɔʼnə kie Jɔŋ 7:53–8:11 fɛ.] 53[Wotəmiyɔŋ bʉ̀nə gɛ̀ chunjaa-ɔ.
ទើបបានជ្រើសរើសហើយ៖
Jɔŋ 7: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
