Jɔŋ 20
20
Məbʉ̀nə kóʼ Jiso
(Matia 28:1-8; Mak 16:1-8; Luk 24:1-12)
1Kʉ̂ʉ bɛ ndəŋ fəŋ kəchî mu vyii mbi,#20:1 Fəŋ kəchî mu vyii mbi nɔ bɛ Sɔŋnde. Mɛli Matalina gwè chu mbʉ sě ndʉʉfiimbi njəŋkə kə́ bíe mbi, nyíɛ tʉ bə nɔʼ kə tʉ́ʉhə mbʉ ŋgoʼ hə chu mbʉ sě. 2Ɔ bʉ̀nə nyʉ́ʉ gɛ̀ tʉ Samu Bita ghɔŋbə ibɛʼ-yə vaafɔ̀ʼ, wo ndə Jiso kə kʉ̀ʉ, ghɔ̀ŋ tʉ bɔŋ mbɔ, “Bə nɔʼ fyúhə ŋkwu-Tiekətʉ-kə mu sě, təmə baʼa bɔŋ kínə yəŋkə ndə bə mɔ̀ʼ chɔ fɛ.”
3Ndʉʉmɛ, Bita fyú gɛ̀ ghɔŋ ibɛʼ-yə mbyu vaafɔ̀ʼ-ghɔ̄ kə́ gɛ̀ mbʉə mbʉ sě. 4Bɔ̂ŋ bəbûu nɔ kə́ nyʉ́ʉ gɛ̀, bɔŋ ibɛʼ-yə mbʉ mbyu vaafɔ̀ʼ nyʉ́ʉ chàa Bita fəŋ gɛ̀ dàa. 5Ɔ kʉ̂ʉ bʉ́ʉnə ndə məlɛ́nə mu-i, nyíɛ mbʉ ndyi-kəfyuʼ-hə ndə i nʉ̀ʉ muŋgɔ, təmə ɔ bɔŋ shíʼ chɔ fɛ. 6Ndʉʉmɛ, Samu Bita gwè hə bɔ̌ŋ gwè shíʼ mu mbʉ sě, mbʉ ndyihə kə́ nʉ̀ʉ muŋgɔ, 7leʼnə ndyi shʉ-i, ndə i kə bɛ kətʉ-ɔ, təmə kə́ nʉ̀ʉ ghɔŋ mbʉ ndyihə mɔʼɔ fɛ, bə nɔʼ bɔ́nə mɔ̀ʼ tətɛʼ ɛ. 8Ndʉʉmɛ, ibɛʼ-yə mbyu vaafɔ̀ʼ ndə ɔ nɔʼ kə fəŋ dàa chu-sě le, leʼ shíʼ ghɔ mu mbʉ sě, nyíɛ, bɔŋleʼ bɛ́ŋ, 9bʉʼka bɔ̂ŋ chʉʼ kə kínə nukə ndə i kə ghɔ̀ŋ mu ŋwɔʼnə-Nyii mbɔ Jiso la bu yaʼ bʉ̀nə kóʼ ndʉʉ ndə ɔ kə kwú fɛ. 10Ndʉʉmɛ, mbʉ vâafɔʼɔ bʉ̀nə gɛ̀tə chunjaa-bɔŋ.
Jiso kɛ̀ʼ ŋwɔŋ-ɛŋ tʉ Mɛli Matalina
(Matia 28:9-10; Mak 16:9-11)
11Mɛli kə́ tə́nə mbi mbʉ ŋgwuu-sě gwía, ndə ɔ kə gwía, ɔ bʉ́ʉnə lɛ́nə mu-i, 12nyíɛ bʉəntəŋNyii bəbûu bɔ̂ŋ mɔ̀ʼ ndyi-kəfyuʼ-hə mbʉə bɔŋ, kə́ dùʼ kəyəŋ ndə bə kə mɔ̀ʼ ŋkwu-Jiso-kə chɔ, imɔʼ kə́ dùʼ kəyəŋ ndə bə kə mɔ̀ʼ tʉkə-i chɔ, imɔʼ kə́ dùʼ kəyəŋ ndə fʉəŋtə-i kə bɛ chɔ. 13Bɔ̂ŋ ghɔ̀ŋ tʉ ɔŋ mbɔ, “Naa, a tʉʼ gwía ka?” Ɔ ghɔ̀ŋ tʉ bɔŋ mbɔ, “Bə nɔʼ lʉ̀ Tiekətʉ-ɔ gɛ̀ nə nɔŋ təmə mɔ kínə yəŋkə ndə bə mɔ̀ʼ ɔ chɔ fɛ.” 14Ndə ɔ kə́ gìe yɔ̄ŋ-yə, ɔ kíahə ŋwɔŋ-ɛŋ nyíɛ Jiso ɔ kə́ tə́nə, bɔŋ təmə ɔ kínə mbɔ bɛ Jiso fɛ. 15Jiso ghɔ̀ŋ tʉ ɔŋ mbɔ, “Naa, a tʉʼ gwía ka? A tʉʼ kʉ́ʉ nda?” Ɔ kə́ kwɔ̀ʼtə mbɔ la bɛ wo-fɔ̀ʼ mutɔ, ghɔ̀ŋ tʉ ɔŋ mbɔ, “Tie-ɔ, kaʼ a nɔʼ lʉ̀ ɔ gɛ̀ nə nɔŋ, shyíi mɔ nə yəŋkə ndə a mɔ̀ʼ ɔŋ chɔ, mɔ bu lʉ̀ ɔ gɛ̀ nə nɔŋ.” 16Jiso tíi ɔ mbɔ, “Mɛli.” Ɔ kíahə ŋwɔŋ-ɛŋ ghɔ̀ŋ tʉ ɔŋ kəŋgie-Hibulu mbɔ, “Laboni!” ndə i bɛ mbɔ chicha. 17Jiso ghɔ̀ŋ tʉ ɔŋ mbɔ, “Kə a mə yá mɔ fɛ, bʉʼka mɔ chʉʼ kóʼ gɛ̀ tʉ mbʉ Tie fɛ, bɔŋ gɛ̀ tʉ bəliŋ-bɔŋ bələŋ, gɛ̀ ghɔ̀ŋ tʉ bɔŋ mbɔ mɔ nɔ tʉʼ kóʼ gɛ̀ tʉ mbʉ Tie ndə bɛ Tie-yii ghɔ, tʉ Nyii-ɔŋ, ndə bɛ Nyii-yii ghɔ.” 18Mɛli Matalina gɛ̀ lɔ̀ʼ tʉ vâafɔʼɔ-bi mbɔ, “Mɔ nɔʼ nyíɛ Tiekətʉ.” Leʼ ghɔ̀ŋ mbɔ ɔ la nɔʼ nə gìe nubə-ɔ̄ŋ tʉ ɔŋ.
Jiso kɛ̀ʼ ŋwɔŋ-ɛŋ tʉ vâafɔʼɔ-bi
(Matia 28:16-20; Mak 16:14-18; Luk 24:36-49)
19Kʉ̂ʉ bɛ ndʉʉbuumbi, ndəŋ fəŋ kəchî mu vyii mbi, chusiitə kə́ bɛ ifʉ̀əŋnə kəyəŋ ndə mbʉ vâafɔʼɔ kə bɛ chɔ, bɔ̂ŋ kə́ fàa bəntəŋbəshʉ-bʉə-Juu, Jiso gwè tə́nə mu bɔŋ ghɔ̀ŋ tʉ bɔŋ mbɔ, “B̈ii kie fyiighʉ́ənə.” 20Ndʉʉ ndə ɔ kə gìe yɔ̄ŋ-yə, ɔ dʉ̀ʼ ghɔbə-i tʉ bɔŋ leʼnə buuŋ ŋkyii-i. Tʉʉ vâafɔʼɔ-bi bʉ̀ʉ ndʉʉ ndə bɔ̂ŋ kə nyíɛ Tiekətʉ. 21Jiso bìʼ ghɔ̀ŋ tʉ bɔŋ mbɔ, “Bii kie fyiighʉ́ənə. Haʼ ndə mbʉ Tie nɔʼ tə́ŋ mɔ, mɔ nɔ tʉʼ tə́ŋ bii haʼ nɔ ghɔ.” 22Ndʉʉ ndə ɔ nɔʼ kə gìe yɔ̄ŋ-yə, ɔ yìhə ndəŋ bɔŋ, ghɔ̀ŋ mbɔ, “B̈ii fí LyʉʉhəNyiikə. 23Kaʼ bii sʉ̀fyiihə-ii hə ndəŋ bʉ̂ʼ-bʉə-tə, təmə bə nɔʼ sʉ̀fyii ndə bʉ̂ʼtə-ʉə, kaʼ bii tɛ́ŋ ndə məsʉ̀fyii hə ndəŋ bʉ̂ʼ-bʉə-tə təmə bə nɔʼ tɛ́ŋ ndə məsʉ̀fyii hə ndəŋ bʉ̂ʼtə-ʉə.”
Jiso kɛ̀ʼ ŋwɔŋ-ɛŋ tʉ Tɔmɔ
24Bɔŋ Tɔmɔ, mbyu wo mu mbʉ Vâafɔʼɔ-bi njuɔ bûu nə wuŋ ndə bə kə́ bɛ́ʼnə ɔŋ, tíi ɔ nə vaanyii, kə́ bɛ ghɔŋ bɔŋ mɔʼɔ ndʉʉ ndə Jiso kə gwè fɛ. 25Bəbɛʼvâafɔʼɔ shyíi ɔ mbɔ, “Baʼa nɔ nyíɛ Tiekətʉ.” Ɔ bɔŋ ghɔ̀ŋ mbɔ, “Kaʼ mɔ gòʼ təmə yaʼ nyíɛ ghɔkə-i, nyíɛ cheʼ-məntəŋ-bə chɔ, sʉ́ʉhə vaakəghɔ-ɔ chɔ, bɔŋleʼ sʉ́ʼ ghɔkə-ɔŋ ndəŋ buuŋ ŋkyii-i fɛ, mɔ mə nə bɛ́ŋ fɛ.”
26Chîbə fɔ̂ŋ kʉ̂ʉ tíŋ, vâafɔʼɔ-bi bìʼ kə́ bɛ mu njaa, Tɔmɔ kə́ bɛ ghɔŋ bɔŋ. Chusiitə kə́ bɛ ifʉ̀əŋnə, Jiso bɔŋ sʉ́ʉ gwè tə́nə mu bɔŋ ghɔ̀ŋ mbɔ, “B̈ii kie fyiighʉ́ənə.” 27Ndʉʉmɛ, ɔ ghɔ̀ŋ tʉ Tɔmɔ mbɔ, “Sʉ́ʉhə vaakəghɔ-a fɛ̄ŋ, nyíɛ ghɔbə-ɔŋ, leʼ dùhə ghɔkə-a sʉ́ʉhə ŋkyii-mɔ, chʉʼ káa məjínə, bɛ́ŋ mɔ.” 28Tɔmɔ bə̀ŋhə mbɔ, “A nɔ bɛ Nyii, Tiekətʉ-ɔ!”
29Jiso ghɔ̀ŋ tʉ ɔŋ mbɔ, “A bɛ́ŋ nduɔ bʉʼka mbɔ a nyíɛ mɔ mɛ? Tʉʉjyu nɔ bɛ tʉ bʉə ndə bɔ̂ŋ bɛ́ŋ təmə nɔʼ nyíɛ fɛ.”
Luu-ŋwɔʼnə-ɔ̄ŋ
30Vâafɔʼɔ Jiso nɔ nə nyíɛ cheʼbɛʼbə buŋmbi ndə Jiso kə chìi bəshʉ-bɔŋ, ndə bə nyɔ̀ʼ mu ŋwɔʼnə-fɛ̄ŋ fɛ, 31bɔŋ bə nɔ nyɔ̀ʼ bɔ̄ŋbə mbɔ bii chʉʼ bɛ́ŋ mbɔ Jiso nɔ bɛ mbʉ Wo ndə Nyii Kùŋ Tə́ŋ bɔŋleʼ kə́ bɛ VaaNyii, mbɔ bii kʉ̂ʉ leʼ bɛ́ŋ nɔ, kie məchímbi nə yie-e.
ទើបបានជ្រើសរើសហើយ៖
Jɔŋ 20: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
